Ijije Kö Tro Epuni a Hane Ketr La Föi Epun Ka Thaa Hmi Kö?
1. Pine nemene matre ame lo itre Keresiano ka trene föe hmunë ka thaa hmi kö, tre, thaa angatre hmekuje kö la itre ka ajane tro la itre föi angatre a hane kapa la nyipici?
1 Hapeu, hetrenyi kö e hnine la ekalesia i epun la itre xaa ka cainöj ka trene föe hmunë ka thaa hmi kö? Maine eje hi, haawe, ka xecie hnyawa e kuhu hni së, laka, eje thei angatre la ajane tro la itre föi angatr a caasi me angatre ngöne la nyipi hmi. Ngo thaa angatre hmekuje kö la ka ajane lai. Tui Akötresie, kolo mina fe a ajane hnene la ekalesia asë tro “la nöjei ate asëjëihë [a] mele me wangate hmekune la nyipici.” (1 Tim. 2:4) Tro sa ketr tune kaa la itre föe ne la itre trejine me easë ka thaa hmi kö?
2. Tro sa xatuane tune kaa la ketre föe ne la ketre trejine ka thaa hmi kö jëne la atreine së troa atrepengöne la itre ewekë?
2 Ame la ewekë hnapan, loi e tro sa thele troa goeëne la itre ewekë tune la aqane goeëne la atre cili ka thaa hmi kö. Nyimutre la itre atr cili ka hnime la hnepe lapa i angatr me thele troa itre trahmanyi maine föe, maine keme maine thine ka lolo thiina. Maine jë isapengöne kö la itre ini hne së me angeice hna mejiune kow. Ketre, maine jë ame hi la hnei angatre hna atre göne la Itretre Anyipicine i Iehova, tre, kolo itre trenge ithanata ka thaa meköti kö, nge ka iakötrë hna qaja koi angatre hnene la itre sinee i angatr. Hetrenyi pena la itre xan ka wesitr pine laka kola xome hnene la itre föi angatr la ijine hna amë ekö thatraqane la hnepe lapa, matre troa hmi koi Akötresie. Maine eje the së la atreine troa atrepengöne la itre ewekë, haawe, tro hë sa ujë kowe la ketre atr ka thaa ce hmi kö me easë cememine la thiina ka menyik me metrötr, nge thaa tro kö sa hnehengazo menu pala ha ngöne la easa ixelë me angeic.—Ite edomë 16:20-23.
3. Nemene la jëne ka lolo matre tro sa xatuane la föe ne la ketre trejine me easë ka thaa hmi kö troa hmala hni kowe la nyipici?
3 Loi e Tro Sa Sipu Wanga Atrunyi Angatr: Ame la jëne ka lolo matre tro la föe ne la ketre trejine me easë ka thaa hmi kö a hmala hni kowe la nyipici, tre, hnene la aqane ujë së; ngo thaa hnene kö la hna ce porotrikë Tusi Hmitrötr me angeic. (1 Pet. 3:1, 2) Haawe, nyipi ewekë catre tro sa amamane laka, easa sipu wanga atrunyi angeic. Loi e tro la itre trejine föe ne la ekalesia a thele troa wanga atrune lo itre ifënekö ne la itre trejine trahmany, nge itre trejine trahmanyi a wanga atrune lo itre trahmanyi ne lo itre trejine föe. Troa mama tune kaa lai?
4. Tro sa sipu wanga atrune tune kaa la itre föe ne la itre trejine me easë ka thaa hmi kö?
4 Maine thaa hne së pala kö hna öhne la föe ne la trejine me easë, loi e tro sa pane ce ithanatane memine lai trejine Keresiano. E pëkö thangane la hne së hna kuca kowe lai atr ka thaa hmi kö, the tro kö sa dreng akötrën. Ngo tro la aqane ujë së ka lolo memine la aqane wanga atrunyi angeic hne së, a upi angeice troa goeëne aloine la Itretre Anyipicine i Iehova. (Rom. 12:20) Ame la itre xaa Keresiano ka macaj, tre angatr a könën la atr ka thaa hmi kö memine la hnepe lapa i angeic matre troa ce xen; kola thele troa iatre hnyawa me köle trije qaathei angeic la itre mekun ka iwangatrehmekunyi atr. Thaa hnei angatre kö hna ithanatane pala hi la itre ewekë ngöne la götrane la ua, ngo hnei angatre pe hna ithanatane la itre ewekë hnei angeice hna wangatrun. Thupene lai, ame la angeice a imajemikeu hnyawa memine la itre trejin, haawe, ijije hë troa ce porotrikë Tusi Hmitrötr me angeic. Maine pena tro angeic a kapa la kola könë angeice troa hane sine la ketre icasikeu së matre troa wange la hna inine hnene la föi angeic, ke, atre hë angeice la itre xaa trejin e hnine la ekalesia. Ngacama thaa ijiji angeice pala kö troa waipengöne la nyipici, ngo ijije troa qaja aloinyi angeic pine la aqane xatuane angeic la föi angeic ka hmi.
5. Tro la itre qatre thup a ketr tune kaa la ketre atr ka thaa hmi kö?
5 Hnëqa ne la itre qatre thup troa ketre la itre föe ne la itre trejine ka thaa hmi kö, me thele troa cainöje koi angatr. Ngacama troa xele hnene la ketre atr ka thaa hmi kö troa ce porotrikë Tusi Hmitrötr me easë, ngo maine jë tro angeic a drenge hnyawa la kola hamë ithuecatre koi angeic jëne la Tusi Hmitrötr, ngöne la angeic a meköl e pital maine pena ngöne la kola tithi angeic hnene la ketre meci ka ngazo. Maine kola cile kowe la ketre jol hnene la ketre hnepe lapa laka ka isa hmi kö la itre atren, tune la meci ne la ketre sinee i angatr, haawe, loi e tro la itre qatre thup a hëne la atr ka thaa hmi kö troa hane sine la angatr a ithuecatre kowe hnepe lapa.
6. Nemene la itre kepin ka upi së troa catre ketr la itre atr ka thaa hmi kö?
6 Pane mekune ju së la aqane troa elitrauje la madrine ne la ketre Keresiano, ngöne la angeic a öhne la föi angeic a kapa la nyipici! Ketre, tro la ewekë ka lolo cili a hamë madrine ka tru koi Iehova, me itre angela memine la itre atrene la ekalesia. (Luka 15:7, 10) Ngo the kucakuca kö së hnene laka ame ngöne la xötrei, tre, thaa kapa kö la nyipici hnene la atr ka thaa hmi kö; madrine jë pe së laka ame la trenge catre hne së hna kuca, tre, itre ej a amadrinë Iehova, lo Atre “tha ajane tro kete at a hnëjin, loi pe tro angat’ asëjëihë a ietra.”—2 Pet. 3:9.
[Hna eköhagen götran 6]
Ame la jëne ka lolo matre tro la föe ne la ketre trejine me easë ka thaa hmi kö a hmala hnin kowe la nyipici, tre, hnene la aqane ujë së; ngo thaa hnene kö la hna ce porotrikë Tusi Hmitrötr me angeic