Kola Ini Së Hnei Iehova Troa Xome La Huliwa
1. Ame ngöne la Iehova a athipi hnëqa së, nemene fe la hnei Nyidrëti hna hamën?
1 Ame la Iehova a ahnithe la ketre hnëqa kowe la itre atr, tre, Nyidrëti fe a hamëne koi angatre la ixatua matre troa eatrëne ej. Drei la ketre ceitun, hnei Iehova hna upi Noa troa cane la aka; ngacama ketre huliwa lai ka hnyipixe koi angeic, ngo ame pe tha hna nue axöji angeice kö, ngo hnei Nyidrëti pe hna qaja koi angeice la aqane troa kuca. (Gen. 6:14-16) Mose la ketre atre ka hni ka ipië. Hnei Iehova hna upi angeice troa ithanata kowe la itre qatre ne Isaraela, me Farao; hnei Iehova hna ithuecatre koi angeic, me hape: “Tro ni a ce memine la qe i ’ö, me ini eö la hna troa qaja.” (Eso. 4:12) Ame ngöne la easa xome la hnëqa ne troa cainöj, tha hna nue axöji së kö hnei Iehova. Nyidrëti a ini së troa xome la hnëqa cili, jëne la Ini Ne Cainöj Qathei Akötresie memine la Icasikeu Ne La Huliwa. Nemene la itre manathithi hne së hna kapa qa ngöne la ini cili?
2. Tro sa kepe thangane tune ka qa ngöne la Ini Ne Cainöj Qathei Akötresie?
2 Ini Ne Cainöj Qathei Akötresie: Qëmekene troa sine la itre icasikeu, loi e troa pane e me inine la itre mekune hna hamëne hë. Thupene lai, ame hë la easa drenge la kola cile fë la xötreqa hnene la hnainin, tro ha lolo me maca la aqane tro sa hane hamë ini. (Ite edomë 27:17) Loi e tro sa xome kowe la hna icasikeu me huliwane la itusi hna hape, École du ministère. Matre, ame la kola ce ithanatane hnene la atre thupëne la ini memine la hnainin, la ini nyine tro angeic a huliwan, loi e troa siji hatrene la itre mekune ka tru hne së hna ajane troa trongën, me hane cinyihane ezine la itre xa mekun. Ngo tro hë sa kepe thangane ka loi qa ngöne la ini cili, e hne së hna hane qeje mekun. Hapeu, ka hane fe eö sine la ini cili? Ame la eö a kapa la ketre xötreqa, hnëkë hnyawa jë me trongëne la eamo hna hamëne koi eö. Hawe, ame hë la eö a cainöje trotro, huliwane jë hë la itre hnei eö hna inin.
3. Nemene la ka troa xatua së troa kepe thangane qa ngöne la Icasikeu Ne La Huliwa?
3 Icasikeu Ne La Huliwa: Maine easa ajane troa hnehene la itre mekune hna hamëne ngöne la icasikeu celë, loi e tro sa pane e la itre mekune cili, me canga hnëkë matre troa hane qeje mekun. Maine hne së hna ahopatrene la itre mekune së, hawe, tro ha hmaloi koi së troa hamëne itre ej. Loi e tro sa wangatrune hnyawa la itre iamacany, me trongëne la itre mekune ka troa xatua së troa maca ngöne la huliwa ne cainöj. Ketre, loi e tro sa amë hnyawa la itre hna cinyihane qa hnine la Huliwa Ne Baselaia ka troa xatua së ngöne la hna cainöj.
4. Pine nemene matre nyipi ewekë tro sa trongëne hnyawa la itre ini qathei Akötresie?
4 Ceitune hi lo itre hnëqa hna ahnithe koi Noa me Mose, memine la hnëqa së troa cainöjëne la maca ka loi ngöne la fene asë, laka tha ka hmaloi kö. (Mat. 24:14) Troa tro loi la huliwa së, e hne së hna mejiune koi Iehova lo Atre Ini së Ka Sisitria, me hane trongëne la itre ini hnei Nyidrëti hna hamën.—Is. 30:20.