Itre Kovasio Së Ne Distrik—Itre Ijine Ka Sisitria Troa Anyipicine La Nyipici
1. Nemene la itre nyipici ka sisitria, hna sine thele me ce ithanatane hnei angetre Isaraela ngöne la itre pui ne xeni ka tru?
1 Hna majemine hnene la angetre Isaraela ekö troa akönia elë ngöne la macatre, matre troa atrune la itre pui ne xeni ka tru e Ierusalema. Ngacama hna amekötine hmekuje hi lai, kowe la itre trahmany ngo hna majemine hnei angatre troa ce elë memine la hnepe lapa i angatr, matre troa sine la itre kovasio ka lolo cili. (Deu. 16:15, 16) Kola aijijë angatre ngöne la itre ijine cili, troa sine thele me ce ithanatane la itre nyipici ka sisitria ngöne la ua. Nemene la itre xa nyipici cili? Ame la ketre, tre, ene laka Akötresie ka ihnim me ka hame Iehova. (Deu. 15:4, 5) Ame la ketre, ijije tro sa mejiune koi Nyidrë, me sipone koi Nyidrë troa xatua së me thupë së. (Deu. 32:9, 10) Kolo fe a aijijëne la angetre Isaraela troa mekune hnyawa ka hape, pine laka hna ië angatre hnei Iehova troa xome la ëje i Nyidrë, nyipi ewekë tro angatre a amamane la thiina ka meköti Nyidrë. (Deu. 7:6, 11) Eje hi, ijije tro fe së enehila a hane kepe thangane qa ngöne la itre kovasio ne distrik ngöne la nöjei macatre.
2. Kola wanga atrune tune ka la nyipici hnene la porogaram ne la kovasio ne distrik?
2 Kola Wange Atrune La Nyipici Hnene La Porogaram: Ame la easa sine la itre kovasio ne distrik, tre, tru la madrine së troa drenge ngöne la itre cainöj me itre elo me itre iamacany me itre hnyinge kowe la itre trejin, la kola wanga atrune la itre nyipici ka sisitria qa hnine la Tusi Hmitrötr. (Ioane 17:17) Ketre tru mina fe la itre huliwa hna kuca matre troa lolo la kovasio ka troa xulu. Hnene la organizasio i Iehova hna hnëkëne la ketre porogarame ka troa sajuëne hnyawa la itre aja ka eje ngöne la huliwa ne cainöj e cailo fen. (Mat. 24:45-47) Hapeu, aja i nyipunieti fe kö troa wange me drenge la itre hna hnëkëne cili?
3. Tro sa kepe thangane tune ka qa ngöne la porogaram?
3 Nyipici laka, tro hë sa kepe thangane la itre kovasio cili, e hne së hna thele troa sine me drenge hnyawa ngöne la köni drai asë. Maine tha hne së pala kö hna xomi ijine mano, loi e tro sa canga ithanatane lai memine la maseta së. Tro fe sa canga meköl, matre egöcatre së e hmakany troa drenge la porogaram. Nyimutre la itre ka öhnyi eloine la troa goeëne hnyawa pala hi la ka cile fë la cainöj, me xomi not. Tha tro pi kö sa nue la telefone së maine ketre ewekë pena, troa ajolë së maine itre xan pena. Ketre, tha tro kö sa ithanata menu, maine icinyanyikeu, maine xeni pena ngöne la kola cile fë la itre cainöj.
4. Tro la itre keme me thin a xatuane tune ka la itre nekö i angatre troa kepe thangane la kovasio?
4 Ame ngöne la nöjei hnaasevenen macatre, ngöne lo ijine Pui Ne Xeni Ne Uma Ne Hunuma, kola icasikeu hnene la angetre Isaraela troa drenge la kola e la Wathebo; angatre a ce traqa me itre “nekönat . . . mate deng, me inin.” (Deu. 31:12) Drei la ketre ithuecatre kowe la itre fami troa ce lapa memine la itre nekö i angatr ngöne la ijine kovasio, matre tro nyudreni a hane drenge hnyawa! Tune ka matre troa ce ithanatane e itre hej, la itre xa mekune ne la porogarame ne la drai? Pine laka “hna atuthe la qene hmo hnine la nekönat,” haawe, nyipi ewekë tro la itre keme me thine a thupëne hnyawa la itre nekö i angatr, tune mina fe lo itre ka nango tru hë. Tha tro kö angatre a “nue” nyudren ngöne la ijine mano e hnaipajö, me e thupene la kovasio.—Ite edomë 22:15; 29:15.
5. Kola athaipine tune ka la nyipici hnene la elolone la thiina së ngöne la easa lapa hnine otel, maine thene la ketre fami së?
5 Kola Athaipine La Nyipici Hnene La Elolone La Thiina Së: Kola athaipine la nyipici hnene la elolone la thiina së ngöne la nöje hna hnen la kovasio. (Tito 2:10) Ame la itre ka huliwa hnine otel, tre, angatre a goeëne la aqane drengethenge së la itre wathebo ne la otel, me aqane xomihni ahoeanyi së me thiina ka lolo. (Kol. 4:6) Hnene la maseta ne la ketre otel hna qaja ka hape: “Aja huni troa kapa la itre sine hmi epun hnine la otel, ke, lolo catre la itre thiina i angatr. Angatre a thiina ka menyik, me metrötrëne hnyawa la itre ka huliwa, memine fe la itre ewekë hun.” Eje hi laka, loi e tro mina fe a lolo la aqane ujë së kowe la itre fami, maine itre trejine pena ka kepe së.
6. Kola athaipine tune ka la nyipici hnene la aqane heetre së ngöne la nöje hna hnen la kovasio?
6 Ame la easa ami badge ngöne la hna kovasio, tre, tha göi tro hmekuje kö a troa thuemacane la kovasio cili, me amamane la ëje së kowe la itre xa trejine me easë, ngo göi tro mina fe ej a anyipicine kowe la itre atr ka goeë së. Tro la itre atrene la nöj a öhne laka, ame la itre atr ka ami badge, tre, tha angatre kö a heetre menu tune la itre atre ne fen me thele troa pi mama; ngo angatre pe a iëne hnyawa la itre heetre ka porope me ka qahmihmi. (1 Tim. 2:9, 10) Qa ngöne lai, loi e tro sa wange hnyawa la aqane heetre së me aqane iseji së ngöne la easa tro ngöne la nöje hna hnen la kovasio. Maine easa mekune troa saze hna heetr thupene la hna kovasio me tro ngöne la itre hnë xen, tha tro pi kö sa thëthëhmine ka hape, itre ka traqa së troa sine la kovasio; hawe, loi e tro pala hi sa thupëne la aqane heetre së.
7. Nemene la ketre aqane tro sa kepe thangane la aqane casi së itre Keresiano ngöne la hna kovasio?
7 Ame ngöne lo itre pui ne xeni ka tru, atraqatre la madrine ne la angetre Isaraela troa casi memine la itre sine hmi angatre ka xulu qa ngöne la itre nöj e cailo fen; itre ijine lai ka acatrene la lapaune i angatr, nge ka sajuëne la cas. (Ite hu. 2:1, 5) Kola mama ngöne la itre kovasio ne distrik la aqane casi së asë itre Keresiano. Ketre götrane lai ne la hmi ka eje the së hna haine hnene la itre atr ka goeë së. (Sal. 133:1) Matre, nyipi ewekë tro sa xomi kemeji së thatraqane la hnaipajö, me ce lapa me ce porotrike memine la itre trejine me easë, hune la troa tro nue la hna kovasio, matre troa itö xen.
8. Nemene la itre kepine ka upi së troa saene troa ixatua, e ijiji së hi?
8 Kola haine hnene la itre atr la elolone la aqane eköthe me aqane trongene la itre kovasio së, ngo ame la hnei angatre hna haine catrën, tre, ene laka hna kuca la itre huliwa hnene la itre ka saene troa ixatua. Hapeu, ijije kö tro epuni a nue xanë epuni troa hane ixatua ngöne la hna kovasio? (Sal. 110:3) Ame la kola saene hnene la itre atrene la fami asë troa ixatua, tre, ketre aqane lai troa inine la itre nekönatre troa xatuane la itre xa atr. Maine epuni la ketre atr ka lapa thaup, tro la aqane catre epuni huliwa ngöne la kovasio a xatua epuni troa iatre memine la itre xa trejin. Hnene la ketre trejine föe hna qaja ka hape: “Ame hi la itre atr hnenge hna atre ngöne la hna kovasio, tre, ene hmekuje hi la itre atrene la faming, memine la itre xa sineeng. Ngo ame la eni a ixatua troa nyidrawane la uma ne kovasio, tre, ala nyimu pi hë la itre trejine trahmanyi me föe hnenge hna iatre memin. Madrine catre ni!” Tro ha atraqatre la madrine së, e hne së hna thele troa imelekeu memine la itre xa trejine ngöne la kola ixatua troa nyidrawane la hnë kovasio. (2 Kor. 6:12, 13) Maine tha hne së petre kö hna hane saen, loi e tro sa sipo ixatua thene la itre qatre thup.
9. Tro sa könëne tune kaa la itre atr troa sine la kovasio?
9 Könëne Jë La Itre Atr Troa Drenge La Nyipici: Tune lo itre macatre ka ase hë, köni wiik qëmekene troa nyiqane la kovasio, kola troa xome la ketre huliwa ne ihë trootro. Loi e tro la itre ekalesia asë a thele troa haöthe la itre götrane hnei angatre hna cainöje ngön. (Wange ju la itre mekun hna eköhagen, hna hape, “Tune Ka La Aqane Troa Tro Fë La Pepa Ne Ihë?”) Maine hetre munëne la itre pepa, traqa fë pi kowe la hna kovasio. Tro pë hë la itre trejine a xome itre ej matre troa thawa fë ngöne la kola cainöje e cahu gojeny.
10. Qaja jë la itre xa hna melëne ka amamane laka, hetre thangane la huliwa ne ihë trotro së ngöne la nöjei macatre.
10 Hapeu, tro kö la itre atr a xemine la ihë së ngöne la macatre celë? Ame ngöne la ketre kovasio, hnene la ketre trejine hna xatuane la lue trefëne troa thele göhnë. Hnei nyidro hna qaja koi angeice ka hape, hnei nyidroti hna kapa la pepa ne ihë, nge “kösë ka lolo la itre ini qa ngön.” Hawe, nyidroti a nyiapëne pi la 320 lao kilomet, matre troa sine la kovasio. Hane mina fe la ketre ceitun, hnene la ketre trejine föe hna cainöje ngöne la itre hnalapa trotro, me hamë pepa ne ihë kowe la ketre trahmany ka pi atre pengöne la kovasio. Hnei eahlo hna xomi ijine troa ce ithanatane me nyidrë la aliene la pepa ne ihë. Ame hë la itre drai thupen, hnei eahlo hna öhne ngöne la hna kovasio la trahmanyi cili memine la ketre sinee i nyidrë, a kola isa xome trongëne la itre itus hna xötrei kapa.
11. Pine nemene matre ka sisitria catre tro sa sine ngöne la nöjei macatre la itre kovasio ne distrike së?
11 Ame lo itre pui ne xeni ekö, tre, itre hna amekötine lai hnei Iehova, matre troa xatuane la angetre Isaraela troa “nyi hlue i nyidë hnene la hni memine fe la nyipici.” (Ios. 24:14) Ketre tune mina fe, maine tro sa sine ngöne la nöjei macatre la itre kovasio ne distrike së, tro hë lai a xatua së troa “trongëne la nyipici,” nge ketre götrane lai ka sisitria ne la hmi së. (3 Ioane 3) Epi tro Iehova a amanathithine la trenge catre ne la nöjei atr ka hnine la nyipici, me ka thele troa sine la itre kovasio me kepe thangane qa ngön!
[Hna cinyhan ne la götran 4]
Kola athaipine la nyipici hnene la elolone la thiina së ngöne la nöje hna hnen la kovasio
[Hna cinyhan ne la götran 5]
Köni wiik qëmekene troa nyiqane la kovasio, kola troa xome la ketre huliwa ne ihë trotro
[Hna eköhagen götran 6]
Itre Nyine Amekunë Së Göi Kovasio Ne Distrik 2012
◼ Hawa Ne Icasikeu: Troa nyiqaane la porogaram e 8 h 20, ngöne la köni drai asë. Troa fe la itre qëhnelö e 7 h 00 e hmakany. Ame la kola nyiqane elone la miuzik ne la Baselaia, tre, loi e tro asë hi së a ilapany, celë hi aqane tro së lai a amamane la metrötre së ngöne la kola nyiqane la icasikeu. Troa nyipune la icasikeu e 15 h 55 e Drai Ka Tru, me Mecixen, nge 14 h 40 e Sabath.
◼ Hna Acili Loto: Ame ngöne la nöjei hnë kovasio, hetre göhnë hna acili loto, me thue göhnenen lo itre ka canga traqa. Troa acile ngöne la itre göhnë hna hnëkëne hë thatraqane la itre sine atr, ene hmekuje hi lo itre ka trene pepa nge hna aijijëne troa cile e cili. Pine laka tha tru kö e itre xa ijin la hnë acili loto, loi e troa nyi aliene hnyawa la itre loto.
◼ Göi Göhnë Hnine Iuma Ne Drai: Tro hmekuje hi a ami göhnene la itre ka ce tro me easë hnine la loto ka cas, maine ka ce mele me easë, maine pena lo hne së hna ini tusi memin.—1 Kor. 13:5.
◼ Xeni Hnaipajö: Ka lolo catr troa traqa fë kemej kowe la hnë kovasio, hune la troa tro trije la hnë kovasio matre troa xomi xen ngöne la ijine xeni me mano e hnaipajö. Ijije troa amë la ketre neköi ka lepany fene la icea. Tha hna nue kö troa traqa fë ngöne la hnë asabele la itre glasier ka tru, me itre ver.
◼ Itre Ahnahna: Ijije hi tro sa amamane la hni ne ole së kowe la itre hna amekötine thatraqane la kovasio, hnene la hna hane hamë ahnahna thatraqane la huliwa e cailo fen, e hnine la hna kovasio. Maine kola hamë chèque, loi e troa sija la hna hape, “Association Chrétienne les Témoins de Jéhovah de Nouvelle-Calédonie (A.S.T.J.).”
◼ Itre Eatr Me Itre Sine Mec: Maine kola traqa la ketre ewekë ngöne la ijine kovasio, canga wange ju lai ketre trene hnëqa easenyi së matre tro angeic a hëne nyimenyimëne lo Pane Ixatua troa wai së. Maine ketre eatr ka tru, hawe, hëne jë la 15 ene la numero i pital. Ketre hna amekötine lai matre thaa tro kö a tru menu hnei ka hëne la itre ka cilën e la hnëqa, hna hape Pane Ixatua.
◼ Itre Drösinöe: Maine hetre drösinöe nyine tro epuni a xom, hawe, loi e tro epuni a traqa fë itre ej, ke, pëkö drösinöe hna troa hamëne koi epun ngöne la hna kovasio.
◼ Itre Nyine Uku Medreng: Hna wathebone troa traqa fë la itre nyine uku medrenge ngöne la itre hna kovasio. Ngo tha hna wathebone kö lo neköi cea i nekönatr matre tro la itre keme me thine a ati nyën ezi angatr.
◼ Itre Sine Pepa Hna Hape, “Veuillez suivre l’intérêt” (S-43): Loi e troa sija la sine pepa hna hape, “Veuillez suivre l’intérêt,” nyine hamë thuemacanyi göne la itre atr ka hetre hni ne ajan thupene la hna sine la kovasio ne distrik. Loi e tro la itre ka cainöj a mekune troa xome la cas maine lue sine pepa cili ngöne la hna kovasio. Thupene la hna sija apexejene lai sine pepa, ijije hi tro epuni a hamëne lai ngöne la hna Xomi Tus, maine pena kowe la seketere ne la ekalesia, ngöne la kola bëeke koi hnalapa.—Wange ju la Huliwa Ne Baselaia ne Nofeba 2009, götrane 4.
◼ Itre Hnë Xen: Atrune jë la ëje i Iehova ngöne la itre hnë xen. The cile kö troa nyithupen atrun.
◼ Itre Ka Ajane Troa Ixatua: Ame la ka ajane troa saene troa ixatua, tre, loi e tro angeic a thuemacane la itre trejin ka elemekene la huliwa cili ngöne la hna kovasio. Ame la itre nekönatr ka 16 lao macatre, tre, ijije fe hi tro nyudreni a hane ixatua ngo loi e troa ce tro me nyudren hnene la ketre keme maine thin, maine ketre atr ka ithupë pena hna kapa hnene la lue keme me thin.
[Hna eköhagen götran 6]
Tune Ka La Aqane Troa Tro Fë La Pepa Ne Ihë?
Maine easa ajane troa haöthe asë la teritoare së, tha tro pi kö sa aqeane menune la nyine tro sa qaja. Maine jë tro hi sa hape: “Bozu së. Eahuni asë hi a thele troa thawa la pepa ne ihë celë. Hanawange la pepa i epun. Eje ngöne la pepa ne ihë cili la nöjei ithuemacanyi asë.” Loi e tro epuni a madrin. Maine epuni a thawa la itre pepa ne ihë e mecixeni me sabath, thele jë fe troa tro fë la itre zonal.