Huliwane Jë Së La Itre Tarak Ngöne La Easa Tro Fë La Maca Ka Loi
1. Hnene la itre hlue i Akötresieti hna huliwane tune kaa la itre tarak?
1 Hnene pala hi la itre hlue i Iehova hna huliwane la itre tarak ngöne la angatr a tro fë la maca ka loi. Ame lo macatre 1880, hnei Russell me itre sine huliwa i nyidrëti hna nyiqaane kuca lo itre hna hëne ngöne qene papale ka hape, Bible Students’ Tracts (Itre Tarak Ne La Itretre Ini Tusi Hmitrötr), me iupi fë kowe la itre ka majemine kapa lo La Tour de Garde matre tro angatr a hane hamë tarak kowe la itre xa atr. Kola mama la aqane wange atrune catrëne angatre la itre tarak, ngöne lo macatre 1884, ijine Russell a cile thei musi göi troa qaja ka hape, ase hë acile la organizasio ka troa huliwa, tha göi mani, ngo göi Baselaia pe. Nge hna ati ëjen ka hape, Zion’s Watch Tower Tract Society, lo hna atë pë hë enehila ka hape, Watch Tower Bible and Tract Society of Pennsylvania. Mama asë ngöne la lue ëje celë la hnaewekë “tarak.” Ame hë la kola easenyine lo macatre 1918, ase hë sasaithe la 300 milio lao tarak hna hamëne hnene la Itretre Ini Tusi Hmitrötr kowe la itre atr. Nge tha saze kö enehila, ke ketre jia ne huliwa ka loi pala hi la itre tarak ngöne la hnedrai së.
2. Pine nemene matre ketre jia ne huliwa ka loi la itre tarak?
2 Kepine Matre Ketre Jia Ne Huliwa Ka Loi: Canga pi tro hi la itre atr a goeëne la itre tarak, ke hna nyi han. Ketre, hetre ini ka ketri së hne së hna kapa qa ngöne la itre hnepe mekune hna qatrenge hnene la itre tarak. Maine jë, tro hi lo itre ka xele ma e tusi maine zonale pena a hetre aja troa e. Tha jole kö troa hamë tarak koi itre atr; ijije hi tro la itre nekönatre me itre ka xötrei cainöj a tro fë itre ej. Ketre, ka hmaloi hi troa xome trongëne la itre tarak.
3. Qaja jë la hnei nyipunieti hna isa melën, maine hnei nyipunieti pena hna e ngöne la ketre itus, nge ka amamane la enyipiewekëne la itre tarak.
3 Ala nyimu la itre atr ka xötrei atre la nyipici ekö jëne la itre tarak. Ame la ketre föe e Haïti, hnei eahlo hna öhne me hleme la ketre tarak e kuhu gojeny. Ame ju hi la eahlo a ase e lo lai tarak, öni eahlo ju hi “Nyipici hi la!” Eahlo pë hë a tro jë kowe la Uma Ne Baselaia, me nyiqaane ini Tusi Hmitrötr, nge e thupen, kolo ha bapataiso eahlo. Celë hi emenene la Wesi Ula i Akötresieti lai, hna qatrenge hnene la nekö i tarak.
4. Nemene la qa së ngöne la easa troa tro fë la itre tarak ngöne la treu?
4 Cainöje Ngöne Ketre Uma Me Ketre Uma: Pine laka ketre jia ne huliwa ka loi la itre tarak, haawe, qaane e Nofeba, ijije fe hë troa tro fë itre eje ngöne la treu. Ame la kola troa tro fë tarak, tha ene hmekuje kö laka troa line kowe lai atr la tarak, ngo tro fe sa thele troa ithanata me angeic. E ajane hi lai atr troa porotrik ngöne la easa xötrei iöhnyi me angeic, maine ngöne la easa traqa troa wai angeice hmaca, tro sa amamane koi angeice la aqane inine së la Tusi Hmitrötr me itre atr jëne lo itus Ini Tusi Hmitrötr maine ketre itusi pena thatraqane la ini Tus. Nemene la itre tarak nyine tro sa tro fë, ngöne la easa cainöje ngöne ketre hnalapa, matre ketre hnalapa pena? Hetrenyi së la nöjei pengöne tarak; qa ngöne lai, loi tro sa thele troa atrepengöne itre ej.
5. Nemene la nyine tro sa kuca, ngöne la easa tro fë la itre tarak ngöne ketre uma me ketre uma?
5 Loi e tro sa tro fë la itre tarak ka qeje pengöne la itre mekune hnei itre atrene la götrane hne së hna cainöje ngön hna ajane troa ithanatane me easë. Ame la easa nyiqaane ithanata memine la atr, canga amamane jë koi angeice la ketre tarak. Maine jë tro angeic a ajane troa porotrike me easë, ke hetre ewekë ka ketri angeice ngöne la icetrön. Maine pena, tro sa amamane kowe lai atr la nyimu pengöne tarak, me upi angeice troa iëne la hnei angeice hna ajan. Maine easa cainöje ngöne la ketre götran nge easa öhne laka, nango xou la atr troa fe qëhnelö koi së, amamane jë koi angeice la icetröne lai tarak, maine pena, sipo angeice jë matre tro nyipunieti a line e kuhu fene qëhnelö i angeic lai tarak, nge hnyingë angeice jë la mekuna i angeic. Maine hnying la ka nyi tane mekune lai tarak, sipo angeice jë troa sa me qaja la mekuna i angeic. Maine pëkö, ketre hnyinge jë kö së göi troa aijijëne la atr troa ithanatane lai tarak me easë. E ijij, tro sa ce e me angeice la itre xa hnepe mekune qa hnine lai tarak, me cile e cili ngöne itre hnyinge matre nue angeice troa sa me qaja la mekuna i angeic. Ce xome jë fe me angeice la itre xötr ka sajuëne la itre mekune ka sisitria. Thupene jë hi la hna ce ithanatane la itre hnepe mekun, tro sa nyipune me sipone troa bëeke hmaca e ketre drai. Maine hna pune majemine hnene la ekalesia troa ami itus ngöne la itre hnalapa ka pë atren, nge traqa ju hi së kowe la ketre hnalapa ngo patre kö la itre atren, haawe, ijije hi troa hane amë acone la ketre tarak.
6. Tro sa tro fë tune kaa la itre tarak ngöne la easa cainöj e cahu gojeny?
6 Cainöj e Kuhu Gojeny: Hnei nyipunieti fe kö hna hane xome trongë tarak ngöne la nyipunieti a cainöj e cahu gojeny? Ame itre xa atr tre, angatr a tro nyimenyim, nge tha pi tro kö angatr a pane cile troa porotrike me easë. Ngo ame pe, tha nyipi atrepengöne kö së la aliene hni angatr. Celë hi matre, tha tro kö sa hamëne koi angatre la itre zonale hne së hna hnyipi kapa, ke thatre kö ka hape, tro jë kö angatr a e? Ngo line ju pe së la ketre tarak. Canga pi tro hi la itre atre lai a goeën, ke hnene la icetrön, nge ketre tha tru kö la nyine troa e. Qa ngöne lai, maine hetre hnepe menetre i angatr, maine jë tro hë angatr a e. Maine tha angatre kö a troa canga tro, haawe, ijije hi troa pane ce ithanatane me angatre la itre xa mekune hna fejane ngöne la i tarak.
7. Qaja jë la itre xa hna melën, nge ka amamane la enyipiewekëne la troa xom trongëne la itre tarak matre troa tro fë itre ej ngöne la easa cainöje ngöne la nöjei ijin.
7 Cainöj Ngöne La Nöjei Ijin: Ka hmaloi hi troa huliwane la itre tarak ngöne la kola cainöj ngöne la nöjei ijin. Ame la ketre trejin trahmany, e tro hë angeice qa koilo hnalapa, tre angeic a xome trongëne la itre xa tarak, me amë ngöne la pooce i angeic. Nge e ixelë hë angeice me itre ka salem maine itre xane pena, angeic a qaja ju ka hape, hetre hnei angeice hna ajane troa hamën nyine troa e, nge angeic a line ju kowe lai atr. Ame la lue xa trefën, tre hnei nyidroti hna pane ihamë e kohië e Newe Yok, nge mekune jë hi nyidroti laka, tro nyidroti a iöhnyi e cili memine la itre atrene la itre xa nöj. Celë hi kepin matre nyidroti a xome trongëne jë lo boroshüre Une bonne nouvelle pour les gens de toutes nations me itre xa tarak hna ujëne ngöne la itre xa qene hlapa. Ame ju hi la nyidroti a ixelë memine la itre atrene la ketre nöje ka salem e kuhu gojeny, maine ka lapa pena hi e celë ezi nyidro ngöne park maine ngöne hnë xeni pena, haawe, nyidroti a hamëne ju koi angatr la ketre tarak hna ujëne ngöne la sipu qene hlapa i angatre kö.
8. Pine nemene matre kola qaja ka hape, ceitune la itre tarak me itre feja?
8 “Traneju La Ite Feja i ’ö”: Ceitune hi la itre tarak me itre feja. Ame la atre eëny, tre angeic a jume menune la itre feja i angeic, ke thatre kö angeic ka hape, drei e itre ej la ka troa cia, nge drei la ka troa meci pe. Öni Ate cainöj 11:6 ka hape: “E hmakanyi traneju la ite feja i ’ö, nge e heji the shawa kö la iwanakoime i ’ö, ke tha ’te kö eö la ka troa cia, maine celë maine cili, nge maine troa ce loi lu’ ej.” Haawe, “kukuiëne [pi së] la ate hmekun,” jëne la itre jia ne huliwa celë ka lolo.—Ite edomë 15:7.
[Hna cinyihan ne la götran 3]
Pine laka itre jia ne huliwa ka loi la itre tarak haawe, qaane e treu Nofeba ijije fe hë troa tro fë itre eje ngöne la treu, tune lo itre itus.