The Cile Hnö Kö, Ngacama Tru La Itre Huliwa Nyine Tro Sa Kuca
1. Pine nemene matre tha canga hnyinge kö hnei itre xa Keresiano kowe la itre atr, ka hape, aja i nyudreni kö troa hane ini Tus?
1 Ame la itre xa Keresiano, tre tha hnyingëne kö angatre kowe la itre atr ka hape, aja i nyudreni kö troa hane ini Tusi Hmitrötr. Maine jë hnene laka, tru la huliwa ne la itre Keresiano cili. Nyipici laka, maine easa ajane troa inine la itre atr, tre loi e troa hetre ijin. Nyipi ewekë troa pane xomi ijine troa hnëkë, matre ini Tusi jë pë hë, me xatuane fe la atre hna inin troa elë hune la itre jole hnei angeice hna ixelë memin. Hnei Paulo hna qaja ka hape, hnei angeice hna nue mele göi troa xatuane la angetre Thesalonika, matre atre Iehova jë fe hnei angatr. (1 Thes. 2:7, 8) Nemene la nyine tro sa kuca, matre ngacama tru la huliwa së, ngo ame pe ijije hi tro sa xomiujine la ini Tusi ne la ketre atr?
2. Maine hnimi Iehova hi hne së, nemene la aqane tro sa huliwane la traeme së?
2 Ketre Huliwa Ka Tru La Troa Huliwa Koi Iehova: Nyipici laka, tha huliwa ka co kö la troa huliwa koi Iehova, ke hna upi së troa sine lapane la itre icasikeu, me cainöje trootro, me e Tusi Hmitrötr, me thith. Ngo pane goeëne ju së la ketre atr ka faipoipo hë; ngacama tru la jole i angeic, ngo angeic a thele jëne troa ami ijine thatraqai angeice me fö i angeic. Haawe, loi e tro fe sa amamane la ihnim i së koi Iehova ngöne la easë “anyipi ewekëne la nöjei ijin” thatraqane la huliwa i Nyidrë. (Efe. 5:15-17; 1 Ioane 5:3) Öni Iesu ka hape, ame la ketre huliwa ka sisitria catre nyine tro sa kuca, tre ene la troa inine la itre atr. (Mat. 28:19, 20) Maine trotrohnine hnyawa ha së la mekune celë, tha tro kö sa cile troa xomiujine la itre ini Tusi ne la itre atr.
3. Nemene la nyine tro sa kuca, e hetre ewekë ju ka ajolë së troa xomiujine la ini Tusi ne la ketre atr?
3 Ngo tune kaa e ajolë së ju hnene la huliwa i maseta, maine hnene laka, ngazo la aqane tithi së hnene la ketre mec, maine tru pena ha la hnëqa hna ahnithe koi së hnine la ekalesia? Ame itre xan, maine hetre ini Tus i angatr, nge hna upi angatre hnei maseta kowe la ketre götran, tre angatr a telefone jë matre troa ini Tusi memine la itre hna inin, maine jëne ëternet pena. Ame la itre hna tith hnene la itre meci ka tru, tre angatr a sipone ju kowe la itre hnei angatre hna ini Tusi memin, troa traqa kowe la hnalapa i angatr. Ame pena itre xan, tre hnei angatre hna sipone kowe la itre xa ka cainöje troa nyi hna i angatr, e thatreine ju angatre xomiujine la ini Tus.
4. Nemene la itre eloine la hne së hna xomiujine la ini Tusi ne la ketre atr?
4 Tru catre la madrine hnei Paulo hna kapa, qa ngöne la hnei angeice hna nue la traeme me trenge catre i angeic, göi troa xatuane la itre atr troa atre la nyipici. (Ite hu. 20:35) Ame hë la angeic a goeëne la thangane la hnei angeice hna catre huliwa e Thesalonika, angeic a olene jë koi Iehova. (1 Thes. 1:2) Maine tha hne së kö hna nue la itre jole troa othi së troa xomiujine la ini Tusi ne la ketre atr, haawe, tro ha elitrauje me pexeje la madrine së, pine la huliwa hne së hna kuca.