Kola Hnëkë Së Hnene La Ini Ne Cainöj Qaathei Akötresie Göne La Macatre 2015

¹ Öni Davita: “Iehova fe, gitinge me ate amele ni, nge nyine kapa xajawa i cilie la hna qaja hnene la ukeineqeng, memine la mekuna ne la hning.” (Sal. 19:14) Easë fe a ajane troa hane amadrinë Iehova hnene la itre mekune hne së hna qaja, ke ka tru koi së la troa inine la iatrene la ekalesia, memine la itre atr hne së hna cainöje kow. Iehova a ini së jëne la Ini Ne Cainöj Qaathei Akötresie. Ini lai hna sin e nöjei wiike hnene la 111 000 nge hetre munëne lao ekalesia e cailo fen. Itre Keresiano trahmanyi me föe asë a inine la aqane troa catre tro fë la maca ka loi, me aqane troa hamëne hnyawane la ini.—Ite hu. 19:8; Kol. 4:6.

² Ame ngöne la macatre 2015, easa troa huliwane la itre itus Itre Drei La Ka Kuca La Aja i Iehova Enehila (jl), me “Thupë Nyipunieti Ju Kö Ngöne La Ihnimi Akötesie” (lv), memine lo Trenge Edromë Qa Hnin La Tusi Hmitrötr (my), me Aliene La Wesi Ula i Akötresie (igw). Hna saze la traeme hna athipe kowe la itre trejine ka troa kuca la Hnëqa N. 1, memine la itre ka troa hamëne la itre Mekune Ka Sisitria Qa Ngöne La Itre Mekene La Tusi Hmitrötr Nyine e. Kola qeje pengöne koi së ngöne la itre paragaraf e cahu la itre hna amekötine memine la itre ewekë ka saze ngöne la Ini.

³ Mekune Ka Sisitria Qa Ngöne La Itre Mekene La Tusi Hmitrötr Nyine e: Lue menetre hi hna athip kowe la Keresiano trahmany ka kuca la hnëqa celë, nge casi hi la mekune ka sisitria hnei angeic hna troa qeje pengön. Loi e troa hnëkë hnyawa matre atreine troa hamëne la mekune ka sisitria me metrötrëne la hawa hna athip. Thupene lai, sikisi lae menetr hna nue kowe la iatrene la ekalesia: isa 30 lae secondes ne tro angatr a isa qaja la ini hnei angatr hna kapa qa ngöne la itre mekene Tusi hna amekötine troa e ngöne la wiik. Nyipici laka, ketre huliwa la troa hnëkëne la mekun nyine qaja ngöne la 30 lae secondes, ngo aqane tro hi së lai a ini. Ketre, aqane tro hi së lai a nue itre xan troa hane qaja la itre mekune hnei angatr hna ketre hnëkën.

⁴ Hnëqa N. 1: Hna ahopatrëne la qâ ne la ka e Tusi Hmitrötr, köni menetre pe hi hna athip koi angeic. Ame la aqane troa hnëkë hnyawa, tre ene la troa a nyimu a e catrën, me kuca matre troa saathe me uke hnyawa la aqane e, matre ijije tro la iatrene la icasikeu a trotrohnine la itre mekune hna e. Loi e tro la itre hlue i Iehova asë a inine troa atreine e hnyawa, ke celë hi lai ketre götrane gaa tru ne la hmi së. Easa madrine la easa dreng la kola e tusi hnyawa hnene la itre nekönatr! Nge easa olene kowe la itre keme me thine la hnei angatr hna ini nyudren ngöne la götrane cili.

⁵ Hnëqa N. 2: Troa tro fë la hnëqa celë hnei itre föe, koi faifi lae menetr. Tro la föe a ithanatane la tane porotrik hna athipe koi angeic. Maine angeic a ithanatane la itus Aliene La Wesi Ula i Akötresie, tre loi e troa mama ngöne la aqane tro fë la hnëqa ka hape, ka ihmeku memine la hne së hna ithanatane memine la itre atr ngöne la hna cainöj. Maine qâ i angeic la troa qeje pengöne lo itus Trenge Edromë Qa Hnin La Tusi Hmitrötr, loi e tro angeic a pane inine la aliene la itus cili, me iëne hnyawane la itre xötr nyine troa qeje pengön, me qaja la ini hnei angeic hna kapa jëne la pengöne la itre atr ka mama ngöne la götrane itus hna ahnith koi angeic troa hnëkën. Ijije hi troa xom la itre xötr ka ihmeku memine la tane porotrik. Qanyine la atre thupë ini iëne la sine porotrike ne lai ka trene hnëqa.

⁶ Hnëqa N. 3: Hna nue la faifi lae menetre kowe la föe maine trahmanyi ka kuca la hnëqa celë. Maine föe la ka kuca, troa tro fë tune lo aqane kuca lo Hnëqa N. 2. Maine trahmanyi la ka qeje pengöne la itre mekune ne la itus Trenge Edromë Qa Hnin La Tusi Hmitrötr ke tro angeic a tro fë cainöj, nge troa hnëkëne ceitu me ketre cainöj hmekune la ka nyipi ewekë kowe la ekalesia. Troa ithanatane la tane hna athipe koi angeic, me iëne hnyawan la itre xötr nyine troa qeje pengön, me qaja la hna ini angeic hnene la pengöne la itre atr hna qaja hnei Tusi Hmitrötr.

⁷ Saze Hë La Hnëqa N. 3 Koi Itre Trahmany: Maine kola troa ithanatane la itre mekun ne lo sine itus Aliene La Wesi Ula i Akötresie, tre loi e troa kuca ceitu me iamacany (göi hmi ne la hnepe lapa maine cainöje trootro pena). Qâ ne la atre thupëne la ini troa iën la sine porotrik me cadre ne lai ka ini. Ame la sine porotrike i angeic, tre ketre atrene la hnepe lapa i angeic, maine ketre trejine trahmanyi pena hi. Ijije troa xom la itre xa xötre kö ka ihmeku memine la mekune hna ithanatan. Ame itre xa ijin, tro la ketre qatre thup a kuca la hnëqa celë. Qanyi angeice pë hë ketre iëne la cadre me sine porotrike i angeic. Aqane tro hi la qatre thupe lai me sine tronge i angeic a thuecatrene la ekalesia troa maca ngöne la aqane troa hamë ini.

⁸ Eamo: Lue menetr ne tro la atre thupëne la ini a olene me hamë eamo kowe la itre ka ini, thupene la hnei angatre hna isa cile fë hnëqan. Itre eamo lai hna xom qa hnine lo itus Tirons profit de l’École du ministère théocratique. Ame la kola troa qaja hnene la atre thupëne la ini la ëje me hnëqa i ketre, tha tro kö nyidrëti a canga qaja la ini nyine tro angeic a huliwan. Ngo e ase mina ketre la hnëqa i angeic, nyidrëti hë a olene me qaja la ini hna athipe koi angeic, me qaja la kepin matre lolo hi, maine nyipi ewekë hmaca troa huliwane lai ini cili.

⁹ Tro la ka ini a öhne lo hna hape Fiche de conseils personnelle ngöne la sipu itus i angeice kö (École du ministère), ngöne la götrane 79 koi 81. E ase hë lai ka ini kuca la hnëqa i angeic, tro la atre thupëne la ini a sija la itre ithuemacany hnine la itus i angeic, me hnyingëne casine koi angeic maine hnei angeic hna kuca lo itre qâ hna qaja e hnine la itus. Troa hamëne la itre xa ithuecatre me ixatua thupene la icasikeu, maine e ketre ijine pena. Itre eamo lai hna hamëne kowe la itre ka ini nyine xatua angatr troa macaje ngöne la götrane la u.—1 Tim. 4:15.

¹⁰ Maine ase hë sasaithe la traeme hnene la ketre ka ini, loi e tro la atre thupëne la ini a nango nyi hatre koi angeic ka hape, traeme hë. E öhne hë la ka ini la kola nyi hatr koi angeic, tre loi e tro angeic a nyipun, me tro hë qa ngöne la hnë cile fë cainöj.—E ju lo itus École du ministère, g. 282, par. 4.

¹¹ Kola thuecatrene la itre ka ijije hë troa hane sine la Ini Ne Cainöj Qaathei Akötresie. (E ju lo itus École du ministère, g. 282, par. 6.) Kola atreine tro fë la maca ne la Baselaia hnene la itre hlue i Akötresie cememine la ihnim me iwangatruny, ke hna ini angatr jëne la Ini celë. Ka madrine Iehova la kola atrunyi Nyidrë hnene la itre atr hna xatuane hnei Nyidrë!—Sal. 148:12, 13; Is. 50:4.