Aqane Troa Huliwane La Présentoir

Ame la présentoir, tre, ketre jia ne huliwa ka loi ngöne la easa thele troa ketr la hni ne la itre atr. (Ioane 6:44) Celë hi kepine matre hna thuecatren la itre qatre thup troa wange la itre götrane gaa tru atr. Pine laka tha ka lapa huti kö la présentoir, ame itre xa ijin, tre tha nyipi ewekë kö troa sipone koi mus troa ami présentoir ngöne la ketre götran. Drei lai ka ijij troa hane huliwane la présentoir? Ene la itre trejin ka hetre wangatrehmekun, nge ka loi thiina, nge ka thele troa porotrike hnyawa memine la itre atr. Tro la itre mekune e cahu a xatuane la itre ka cainöj asë troa hetre thangane ka loi ngöne la huliwa i angatr.

Nyine Kuca:

Tro sa madrine me xatuane la itre atr hne së hna kapa. Ame itre xa trejin, angatr a dredrehnyima me ibozu hnyawa memine la itre atr. Maine kola cili thenge présentoir hnene la ketre atr, qaja jë koi angeic ka hape “Iëne jë la aja i epun.”
Troa nango cil ananyine la présentoir. Aqane kuca i itre xa trejine lai ngöne la itre xa nöj. Angatr a mekune ka hape, ka loi troa nango ananyine lai présentoir matre tha tro kö la itre atr a xou troa cile me goeëne la itre tus. E cile hë ketre, angatre hë a easenyine lai présentoir me hnyinge ka hape, “Nemene fe la mekuna i epun?”
Maine ijij, loi e tro sa lapaa fe Tusi Hmitrötr.
Maine xome hë ketre atr la ketre itusi tune lo itus “Ini Tusi Hmitrötr,” qeje pengöne jë koi angeic la aqane ini Tusi së. Amamane ju fe ngöne itablet lo video Hnauëne La Troa Inine La Tusi Hmitrötr?.
Hnyingëne ju la hune tus maine numero ne telefon pena kowe lai atr ka pi porotrikë Tusi Hmitrötr. Maine tha ka lapa kö angeic ngöne lai götrane hnei epun hna cainöje ngön, nyialiene ju lo pepa Veuillez suivre l’intérêt (S-43), nge mekune kö hamëne kowe la seketere ne la ekalesia.