Ka Hnëkë Kö Epun Kowe La Drai Ne Amekunën?

Ka ketrepengöne kö la Paseka tixenuë i Iesu. Easenyi hë tro nyidrëti a mec, matre hnei nyidrë hna ce xen la Paseka memine la itre aposetolo i nyidrë, me acile la ketre feet hna hape, Xeni Heji Ne La Joxu. Hnei nyidrëti hna upi Peteru me Ioane troa hnëkëne la hnahag hnë troa atrune la feete cili. (Lu 22:7-13; wange ju la pane iatr.) Kolo hi lai a amamane laka, nyipiewekë tro sa hnëkë kowe la Drai Ne Amekunën e 27 Maac. Ma ase jë hë la itre ekalesia hnëkë göne lai (trejin ka troa cile fë, waina me falawa, me itre xan ju kö). Nemene la nyine tro sa isa kuca matre troa hnëkë kowe la Drai Ne Amekunën?

Hnëkëne jë la hni eö. Troa e me lapa mekun la itre hna melën e hnine la Tusi Hmitrötr kowe la Drai Ne Amekunën. Troa e la itre xötr ne la Tusi Hmitrötr hna hnëkën ngöne la Topik Ne La Drai. Hetrenyi la itre xa ithuemacanyi ngöne la sine boroshür hna hape, Ixatua Göi Ini Tusi Hmitrötr mekene 16. (Wange ju fe la Mel Me Huliwa Ne Cainöj Pepa Nyine Huliwan ne Eiperem 2020.) Ketre, ame ngöne la Nyine Thele Mekun Ne La Itretre Anyipici Iehova, tro la itre fami a öhne la itre tane mekun ka amamane la enyipiewekëne la thupene mel, nge troa ce ithanatane ngöne la Hmi Ne La Fami.

Hëne jë la nöjei atr. Catre jë cainöj ngöne la ijine cili. Thele jë la itre atr hnei eö hna troa hën, tune la itre atr hnei eö hna wang, memine la itre hnei eö hna ini Tusi kow ekö, me itre sinee, me fami. Loi e tro la itre qatre thup a hëne la itre trejin ka nanazij. Maine tro eö a iöhnyi memine la ketre atr ka lapa gaa nany, tro eö a öhne la hawa me hnë icasikeu ngöne la site jw.org/dhv fene la hna hape, PENGÖ HUN, ngöne la götran “Drai Ne Amekunën.”

Nemene la itre xa nyine tro sa kuca matre troa hnëkë së?