Thele Jë La Inamacane i Iehova

1. Pine nemene matre ka nyipiewekë la inamacane i Akötresie? (Ite Edomë 4:7)

AME la easa axecië mekun, easë a pane sipo Iehova la inamacan. (Iako. 1:5) Öni Solomona joxu: “Kasisitria la inamacan.” (E jë la Ite Edomë 4:7.) Ame e celë, tha Solomona kö a qaja la inamacane i atr, ngo inamacane qaathei Akötresie. (Ite edomë 2:6) Ngo hapeu, ijije kö troa xatua së hnene la inamacane i Akötresie ngöne la itre jole ka traqa koi së enehila? Öö, ijije hi. Celë hi hne së hna troa ce wang ngöne la tane mekune celë.

2. Nemene la nyine tro sa kuca matre tro sa inamacan?

² Tro sa inamacan, e hne së hna inine me trongëne la itre ini hna hamëne hnene la lue atr ka inamacan, nge hna metrötrën. Ame la hnapan ke, Solomona joxu. Öni Tusi Hmitrötr ka hape, “hnei Akötesie hna hamë Solomona la inamacane me wangate hmekune nyipi atraqat.” (1 Ite jo. 4:29) Nge ame la hnaaluene ke, Iesu. Pëkö ka atreine wej la inamacane i nyidrë. (Mat. 12:42) Hnei Isaia hna perofetane göi Iesu, ka hape: “Nge troa të hui nyidë la [u]ati Iehova, u ne inamacane me trotrohnin.”—Is. 11:2.

3. Nemene la hne së hna troa ce wang ngöne la tane mekune celë?

³ Jëne la inamacane qaathei Akötresie, hnei Solomona me Iesu hna hamëne la itre eamo ka sisitria koi së. Ame ngöne la tane mekune celë, tro sa ce wang la aqane tro sa tulu ewekë (1) göi mani, (2) göi huliwa i maseta, me (3) göi easë kö.

TROA TULU EWEKË GÖI MANI

4. Nemene la ka aisapengönë Solomona me Iesu?

⁴ Ka trene mani Solomona, nge tru catre hnei mo i angeic. (1 Ite jo. 10:7, 14, 15) Ngo, ame pena Iesu, pë fe kö mo me hnalapa i nyidrë. (Mat. 8:20) Ngo ame asë hi nyidro ke, lue ka atreine tulu ewekë göi mani me mo. Hna jëne nemen? Hnene la inamacane qaathei Akötresie.

5. Nemene la ka amamane ka hape, ka atreine tulu ewekë göi mani Solomona?

⁵ Öni Solomona, ijije hi tro la mani a “thupë së.” (Ate cai. 7:12, MN) Nyipici laka, jëne la mani, ijije hi tro sa itöne la itre ka nyipiewekë kowe la mele së, me itre xaa ewekë ju kö hne së hna ajan. Ngacama ka trene manie ju hë Solomona, ngo atre hi angeic ka hape, hetre ka nyipiewekë catre kö hune la mani. Celë hi matre öni angeic: “Ka loi kö la troa hlemu la ëje së, hune la tro sa trenamo.” (Ite edomë 22:1, MN) Hnei Solomona fe hna öhne la itre atr ka hnimi mani, ngo tha ka madrine kö. (Ate cai. 5:10, 12) Celë hi matre, angeic a hmekë së laka, tha tro kö sa mejiune koi mani, ke, tro hi a canga patr.—Ite edomë 23:4, 5.

6. Nemene la ka amamane ka hape, atreine hi Iesu tulu ewekë göi mani me mo? (Mataio 6:31-33)

⁶ Atreine fe Iesu tulu ewekë göi mani me mo. Ajane catre nyidrë troa xeni me ij. (Luka 19:2, 6, 7) Ame lo ketre ijin, hnei nyidrë hna saze la tim koi nyipi waina. (Ioane 2:10, 11) Ame ngöne lo nyidrëti a mec, hna heetrë nyidrë hnei itre iheetr ka tru thupen. (Ioane 19:23, 24) Ame pe, tha hnei Iesu kö hna nue la itre mo ne fen, troa tro pa ngöne la mele i nyidrë. Celë hi matre öni nyidrë kowe la itretre dreng: “Pëkö hlu ka atreine troa nyihluene la lue maseta . . . Thatreine kö nyipunie troa ce nyihlue i Akötresie me Mani.” (Mat. 6:24) Hnei Iesu hna ini së troa amë panëne la Baselaia ngöne la mele së, nge tro pë hë Iehova a hamë së la ka ijije göne la mel.—E jë la Mataio 6:31-33.

7. Nemene la itre manathith hna kapa hnei Daniel qa ngöne la hna tulu ewekë göi mani?

⁷ Nyimutre la itre trejine ka öhnyi eloine la angatr a trongëne la itre eamo i Tusi Hmitrötr göi mani. Ame hi lai ketre ke, Daniel, ketre trejine ka tha faipoipo kö. Öni angeic: “Ame lo eni a nekötrahmany, hnenge hna iëne troa huliwa koi Iehova. Nge tro la huliwa cili a tro pa ngöne la meleng.” Jëne la hnei Daniel hna ahmaloeëne la mele i angeic, hnei angeic hna nue la traem me atreine i angeic troa huliwa i Iehova. Öni Daniel: “Pëkö ketre mele ka lolo hune la mele celë hnenge hna iën. Nyipici, maine hnenge ju hna huliwa mec koi maseta, tro ni a trene mani enehila. Ngo ame pe, thatreine kö la mani troa nyihnane la itre nyipi sineeng, memine la madrine troa amë panë Iehova ngöne la meleng. Goi thatreine fe la mani troa weje la etrune la itre manathith hnenge hna kapa qaathei Iehova.” Eje hi, tru catre kö la itre manathith hne së hna kapa la easa huliwa koi Iehova, hune la troa nyinyape thele mani.

TROA ATREINE TULU EWEKË GÖI HULIWA I MASETA

8. Nemene la ka amamane ka hape, atreine hi Solomona tulu ewekë göi huliwa? (Ate Cainöj 5:18, 19)

⁸ Ame koi Solomona, ame la troa catre huliwa ke, ketre “ahnahna i Akötresie.” (E jë la Ate Cainöj 5:18, 19.) Öni angeic: “Hete thangane ngöne la nöjei huliwa asë.” (Ite edomë 14:23) Atre hi Solomona la eloine la troa catre huliwa. Ketre trahmanyi ka catre huliwa angeic! Hnei angeic hna xupe la itre uma, me traane la itre vin, me itre iengene ka mingöming, me itre jë i tim. Nge hnei angeic fe hna xupe la itre traon. (1 Ite jo. 9:19; Ate cai. 2:4-6) Ngacama tha ka hmaloi kö la itre huliwa cili, ngo madrine catre angeic troa kuca. Ame pe, hetre ketre huliwa ka sisitria catre kö hune lai, nge ka hamë madrine koi Solomona. Kola qaja la huliwa i Iehova. Eje hi, hnei Solomona hna elemekene la huliwa ne xupe la uma ne hmi i Iehova ngöne 7 lao macatre! (1 Ite jo. 6:38; 9:1) Thupene la hnei Solomona hna huliwa koi angeic me koi Iehova, angeic ha öhne ka hape, ka loi ju kö la troa huliwa koi Iehova, hune la troa huliwa koi angeice kö. Celë hi matre öni angeic: “Tro sha ate la pune la nöjei ewekë asë; Qouju e Akötesie, me trongëne la nöjei wathebo i nyidë ; ke celë hi qâne la nöjei ate asë.”—Ate cai. 12:13.

9. Nemene la ka amamane ka hape, ka tru koi Iesu la huliwa i Iehova?

⁹ Iesu la ketre atr ka catre huliwa. Ame lo nyidrëti e celë fen, hnei nyidrë hna pane xome la huliwa ne tratrau sinöe. (Mar. 6:3) Madrine catre la keme me thine Iesu, ke, nyidrë a xatua nyidro troa huliwa kowe la fami. Nge pine laka, ka pexeje Iesu, tru hnei ka hain, me ka pi itöne la itre hnei nyidrë hna kuca! Eje hi, hnim catre Iesu la huliwa i nyidrë. Ngacama, ka tru ju hë koi Iesu la huliwa cili, ngo hnei nyidrëti palahi hna ami ijine kowe la huliwa i Iehova. (Ioane 7:15) Ame hë la nyidrëti a xome la huliwa ne cainöj, öni nyidrë kowe la itretre dreng: “The huliwa kö thatraqane la falawa ka canga patr, ngo thatraqane la xeni ka hamëne la mele ka pë pun.” (Ioane 6:27) Öni nyidrëti fe ngöne la cainöje hune la wetr, ka hape: “Xawane jë pe thatraqai nyipunieti la itre trengamo e hnengödrai.”—Mat. 6:20.

10. Nemene la ewekë ka traqa koi itre xan ngöne la hna huliwa?

¹⁰ Tro la inamacane i Akötresie a xatua së, matre tro sa atreine tulu ewekë göi huliwa i maseta. Pine laka, itre Keresiano së, hna ini së troa “catre huliwa, me huliwa hnyawa.” (Efe. 4:28) Eje hi, canga tro hi a mama kowe la itre maseta së la aqane huliwa nyipici së, me aqane eatrëne së la itre hawa hna sa. Jëne lai, itre maseta a madrin me olene koi së. Ngazo pe, pine laka easa ajane troa qaja aloinyi Iehova, easa nu asë koi maseta, utihë la easa triane la itre hnëqa së ngöne la fami, me ngöne la ekalesia. Haawe, loi e tro së e cili a canga saze, me atreine tulu ewekë.

11. Nemene la ka xatua William troa atreine tulu ewekë göi huliwa i maseta?

¹¹ Hnei William, ketre trejine nekötrahmany, hna öhne la eloine la troa amë la huliwa i maseta ngöne la göhnene ej. Hnene la ketre qatre thup hna xomi angeic troa ce huliwa me nyidrë. Öni angeic: “Ame [lai trejine cili] ke, ka atreine tulu ewekë göi huliwa. Madrine catre la itre clients koi nyidrë, ke ka huliwa hnyawa. Ketre, ame la kola ase la huliwa, nyidrëti a nue la huliwa, me eatrëne pena la itre hnëqa i nyidrë e hnine la fami, me ngöne la ekalesia. Atre hi epuni ka hapeu? Pëkö ketre trahmanyi hnenge hna hane öhne ka madrine palahi tui nyidrë!”b

TROA ATREINE TULU EWEKË GÖI EASË KÖ

12. Nemene la ka amamane ka hape, ka atreine tulu ewekë Solomona lo xötrei, nge nemene la ewekë ka traqa e thupen?

¹² Ame lo Solomona palakö a nyihlue i Iehova, atreine hi angeic tulu ewekë. Ame lo angeic a nekötrahmany, atre hi angeic la itre ifego i angeic, matre hnei angeic palahi hna sipo ixatua koi Iehova. (1 Ite jo. 3:7-9) Ketre, atre hnyawa hi angeic la thangane la pi tru. Öni angeic: “Qëmekene troa patr, kola pane pi tru.” (Ite edomë 16:18, MN) Ngazo pe, tha hnei Solomona kö hna trongëne la itre eamo i angeic. Tha qea ju kö thupen lo kola asë acili joxu angeic, hnei angeic hna nuetrij la itre hna amekötine hnei Iehova. Ame hi lai ketre ke, ene lo wathebo kowe la itre joxu. Kola hape, tha tro kö la joxu a nyimu föe, ke tro lai a ananyi angeic qaathei Iehova. (Deu. 17:17) Tha hnei Solomona kö hna trongëne la wathebo cili. Matre traqa koi 700 lao föe i angeic, me 300 lao hany. Nge alanyim thene la itre föe cili, ka nyihluene la itre xaa haze! (1 Ite jo. 11:1-3) Ma ame jë la mekuna i Solomona, tha tro kö angeic a hane kei. Nemene hë la ka traqa? Hnei Solomona hna xeni pun la itre huliwa i angeic. Nge hnei Iehova hna nuetriji angeic.—1 Ite jo. 11:9-13.

13. Nemene la ka amamane ka hape, ka ipië Iesu?

¹³ Ka atreine tulu ewekë nge ka ipië Iesu. Qëmekene tro nyidrëti a traqa e celë fen, hnei nyidrëti palahi hna catre huliwa koi Iehova. Atre hi së ka hape, “jëne [Iesu], hna xup la nöjei ewekë asë e hnengödrai me e celë fen.” (Kol. 1:16) Ame lo kola bapataiso Iesu, hnei nyidrë hna mekune hmaca lo itre hnei nyidrë hna kuca ekö memine la Keme i nyidrë. (Mat. 3:16; Ioane 17:5) Tha hnei Iesu kö hna pi mama, me pi tru fë la inamacane i nyidrë. Öni Iesu kowe la itretre dreng göne la traqa i nyidrë e celë fen, ka hape: “Tha [eni] kö a traqa troa hetre hlu, ngo troa nyihlu, me hamëne la mele[ng] nyine nyi thupene mel kowe la ka ala nyim.” (Mat. 20:28) Ketre, hnei nyidrëti fe hna qaja amamane ka hape, thatreine kö nyidrë kuca xanëne la ketre ewekë. (Ioane 5:19) Drei la ketre tulu ne ipië! Haawe, catre pi së nyitipu Iesu.

14. Nemene la ini hnei Iesu hna hamën göne la aqane tro sa goeë easë kö?

¹⁴ Hnei Iesu hna inine la itretre drei nyidrë la aqane troa goeë angatre kö. Öni nyidrë koi angatr: “Ame nyipunie, goi hna e fe la itre pene he i nyipunie.” (Mat. 10:30) Troa ketri së hnene la trengewekë celë, e ka majemine së wangaconyi së. Kolo hi lai a amamane ka hape, Iehova a wangatrunyi së. Haawe, the mekune pi kö ka hape, tha ka nyipiewekë kö së koi Iehova, nge tha ijiji së kö troa hane kapa la mele ka pë pun.

15. (a) Thenge la hna qaja ngöne la ketre Ita Ne Thup, nemene la aqane tro sa atreine tulu ewekë? (b) Thenge la itre foto ngöne la götrane 24, nemene la thangane e tro sa pi mama?

¹⁵ Qane hë ekö, kola ithuecatre koi së hnene la zonal Ita Ne Thup, troa atreine tulu ewekë. Hane hi la hna qaja hnene la ketre Ita Ne Thup: “Tha aja së kö troa sasaithi tulu, me pi mama, me pi tru. Ketre, tha aja së kö troa hane mekune ka hape, ka sisitria catre kö së hui itre xan, nge atre ju kö së koilo hui angatr. Waea! Ame la aja së ke, tro sa atreine tulu ewekë. Celë hi matre, loi e tro sa atre la itre ifego së, me itre hnei easë hna atreine kuca. Önine la ketre trejine föe: ‘Tha eni kö a wangaconyi ni maine wangatrunyi ni palaha. Waea! Ceitunge hi me epun. Hetre hnenge hna atreine kuca, me thatreine kuca.’ ”c Nemene la itre eloine e tro sa atreine tulu ewekë?

16. Hnauëne la Iehova a hamë së la itre eamo?

¹⁶ Jëne la Tusi Hmitrötr, Iehova a eamo së. Nyidrëti a hnimi së, nge aja i Nyidrë tro sa madrin. (Is. 48:17, 18) Ame la aqane troa inamacane ke, ene la tro sa amë panë Iehova ngöne la mele së. E tro sa ujë tun, tha tro kö a traqa koi së la itre jol, hna melëne hnene la itre ka thatreine tulu ewekë göi mani, göi huliwa i maseta, me göi angatre kö. Haawe, catre pi së inamacane me amadrinë Iehova!—Ite edomë 23:15.