Kola Hë Catr Hnene La Nyipi Inamacan

1. Tune kaa la aqane ujë ne la itre atr la kola hë hnene la inamacan enehila? (Ite Edomë 1:20, 21)

AME ngöne la itre nöj, hne së hna majemine öhne la itre trejin ka cainöjëne la Baselaia me hamë zonal kowe la itre atr. Ase fe hë epuni a hane tupath la aqane cainöje cili? Maine eje hi, ke tro epuni lai a mekun la ceitune hna qaja ngöne Ite Edomë göne la inamacan. Ej a hëne la itre atr ngöne la itre gojenyi troa dreng la itre eamo ne ej. (E jë la Ite Edomë 1:20, 21.) Hna qatreng e hnine la Tusi Hmitrötr me ngöne la itre itusi së la “nyipi inamacan,” ene la inamacan qaathei Iehova. Celë hi ka troa xatuane la itre atr troa xötrëne la gojenyi ne mel. Easa madrine la kola kapa hnene la ketre atr la itre zonale së. Ngo tha itre atr asë kö la ka kapa. Ame la itre xan, xele kö angatr ma dreng la hna qaja hnei Tusi Hmitrötr. Nge ame pena la itre xan, angatr a hnyimasai së. Ame koi angatr ka hekö palaha la Tusi Hmitrötr. Nge itre xan a thipetrij la itre ini ne la Tusi Hmitrötr göne la itre huliwa ka sis. Öni angatr, ame la itre ka trongëne la itre ini cili, ke ka xeti he nge ka pi iameköti. Ngo tru la ihnimi Iehova matre Nyidrëti a catre amamane la nyipi inamacan kowe la nöjei atr. Tune kaa?

2. Kola mama ekaa la nyipi inamacan enehila? Nge nemene la aqane ujë ne la itre atr?

² Ame hi la ketre aqane amamane Iehova la nyipi inamacan ke, jëne la Trengewekë i Nyidrë, ene la Tusi Hmitrötr. Itre ka trene Tusi Hmitrötr asë hi së enehila. Nge tune kaa göne la itre itusi së hna nyitrepene hnei Tusi Hmitrötr? Jëne la mene i Iehova, hna ujën itre ej ngöne la 1 000 lao qene lapa. Ame la itre ka dreng la nyipi inamacan, ene la itre ka e me trongën, ke tro angatr a kepe manathith. Ngo ame pe, nyimutre catr la itre atr ka thipetrije ej. Pi tro kö angatr a kuca la sipu mekuna i angatr maine drenge la itre xan, la angatr a axecië mekun. Goi jele xeti he së fe hnei angatr ke, easa xötrethenge la hna qaja hnei Tusi Hmitrötr. Tro sa ce wange ngöne la tane mekune celë, la kepin matre kola ujë tun hnene la itre atr. Ngo tro sa pane wang, la aqane tro sa hetrenyi la inamacane i Iehova.

ATRE IEHOVA JË MATRE INAMACAN

3. Nemene la aliene la nyipi inamacan?

³ Ame la atr ka inamacan, ke angeic a axecië mekun thenge la itre hnei angeic hna inin. Ngo tha eje kö lai nyipi aliene la inamacan. Önine la Tusi Hmitrötr: “Ame la qoue Iehova, te, qane la inamacan, nge troa ate la Kahmitöt, celë hi [inamacan].” (Ite edomë 9:10) Celë hi matre ame la easa axecië mekun, loi e tro sa thele la mekuna i Iehova ngöne la Tusi Hmitrötr me ngöne la itre itusi së. Aqane tro hi së lai a hetrenyi la nyipi inamacan.—Ite edomë 2:5-7.

4. Hnauëne laka, Iehova hmekuje hi la ka ijije troa hamë së la nyipi inamacan?

⁴ Iehova hmekuje hi la ka atreine hamëne la nyipi inamacan. (Rom. 16:27) Pine nemen matre Nyidrëti la Qaane la inamacan? Ame la pane kepin, ke Nyidrëti la Atre Xup, nge thatrehmekune la trotrohnine memine la atrehmekune i Nyidrë. (Sal. 104:24) Ame la hnaaluen, kola mama la inamacane i Nyidrë ngöne la nöjei huliwa i Nyidrë. (Rom. 11:33) Ame la hnaakönin, ke itre atr a kepe thangane ka loi la angatr a xötrethenge la itre eamo i Nyidrë. (Ite edomë 2:10-12) Haawe, maine easa ajan troa hetrenyi la nyipi inamacan, nyipiewekë tro sa inine la itre nyipici qa hnine Tusi Hmitrötr me axecië mekun thenge la hne së hna inin.

5. Nemene la thangane la hna nuetriji la inamacane i Iehova hnene la itre atr?

⁵ Alanyimu la itre atr hne së hna cainöje kow ka wangatrehmekun ka hape, mingöminge la itre ewekë hna eköth hune la ihnadro. Ngo ame pe, tha kapa kö angatr ka hape, hetre ka xup itre ej. Öni angatr, ka xulu xane lai. Ame itre xan, atre hi angatr ka hape, hetre Akötresie, ngo pi tro kö angatr a kuca la itre sipu mekuna i angatr ke, ame koi angatr ka hekö catre palaha la Tusi Hmitrötr. Nemene hë la thangane lai? Kolo kö a tro loi la fen ke, hnei angatr hna isa kuci mekun? Hapeu, angatre kö a mele madrin? Nge hetre mejiune i angatr kö? Ame hi la hne së hna goeën enehila, ke kola amamane hnyawa ka hape: “Pëkö inamacan, nge pëkö ate hmekun, nge pëkö ithanata [e ka icilekeu] me Iehova.” (Ite edomë 21:30) Hapeu, tha kolo kö lai a upi së troa thele la nyipi inamacan, thei Iehova? Eje hi. Ngazo pe, tha celë kö la hna kuca hnene la itre atr. Pine nemen?

KEPIN MATRE ITRE ATR A THIPETRIJ LA NYIPI INAMACAN

6. Thenge la Ite Edomë 1:22-25, drei la itre ka drei simiine la kola hë catr hnene la nyipi inamacan?

⁶ Alanyimu la itre ka drei simiine la kola “hë cate ngöne la ite gojeny” hnene la inamacan. Tusi Hmitrötr a qaja la köni pengöne atr ka thipetrije la inamacan, ene la “itre ka thatre,” “itete ihnyima sai,” me “ite hmo.” (E jë la Ite Edomë 1:22-25.) Tro sa ce wange la itre thiina ka ukune la itre atre cili troa thipëne la inamacane i Akötresie, memine la nyine tro sa kuca matre tha tro kö sa xom la itre thiina cili.

7. Hnauëne la itre xan a sipu iën troa ujë tune la “itre ka thatre”?

⁷ Ame la “itre ka thatre” ke, kolo itre atr hna iaön, nge ka kapa la nöjei ewekë hna qaja koi angatr. (Ite edomë 14:15) Ame la easa cainöj, hnei easë fe hna ithanata memine la itre atre cili. Itre milio lao atr hna iaön hnene la itre hene ne hmi me itre hene ne politik! Ame la itre xan, kola elëhni la kola atre ka hape, hna iaö angatr hnene la itre hene i angatr. Ngo ame ngöne Ite Edomë 1:22 ke, kola qaja la itre ka atre, ngo hnei angatre hi hna sipu iën troa ujë tune lo itre ka thatre. (Iere. 5:31) Xele kö angatr ma inine la Tusi Hmitrötr wanga saze jë la aqane mele i angatr memine la itre hnei angatr hna majemine kuca. Ceitu i angatr memine la ketre föe ne Canada ka hmi catr. Öni eahlo kowe la ketre trejin, “Maine hna iaö hun hnei peenë, ke zöi nyidrëti lai, ngo tha zö huni kö!” Tha pi tro kö sa ujë tune la itre atre cili!—Ite edomë 1:32; 27:12.

8. Tune kaa la aqane tro sa macaj?

⁸ Eje hi, Tusi Hmitrötr a thuecatre koi së laka, tha tro kö a ujë tune lo itre ka thatre, ngo tro pe sa “macaje” ngöne la inamacan. (1 Kor. 14:20) Nge ame la aqane tro sa macaj, ke ene la tro sa trongëne la itre trepene meköti ngöne la mele së. Tro lai a xatua së troa neëne la itre jol me axecië mekune hnyawa. Loi e tro palahi sa waipengö së ngöne la götrane cili. Isa hnyinge jë ka hape: Hnauëne laka, tha ase palakö ni xomi bapataiso, nge ka hekö hë ni ini Tusi Hmitrötr me sine la itre icasikeu? Nge maine ka bapataiso hë ni, ke hapeu, eni kö a isine troa maca ngöne la huliwa ne cainöj? Ame la eni a axecië mekun, eni kö a trongëne la itre trepene meköt? Ka loi kö la thiinang kowe la itre trejin? Maine hetre nyine tro palakö a saze the së, ke xötrethenge jë la itre eamo i Iehova, ‘atre ainamacanëne la atr ka thatre.’—Sal. 19:7.

9. Itre ka “ihnyima sai” a thipetrij tune kaa la inamacan?

⁹ Ame la hnaaluene pengöne atr hna qaja, ke ene la itre ka “ihnyima sai.” Ame itre xaa ijin, easa ithanata me angatr ngöne la hna cainöj. Pi tro catr la itre atre cili a thaipiëne la itre xan matre ahmahmanyi angatr. (Sal. 123:4) Ase hë Tusi Hmitrötr qaja ka hape, ame ngöne la itre drai ne la pun, troa tru hnei atr ka ihnyima sai. (2 Pet. 3:3, 4) Tune lo itre tresi Lota, alanyimu la itre atr enehila ka wangacone la itre hna qaja hnei Akötresie. (Gen. 19:14) Nge nyimutre fe la itre ka hnyima fë la itre atr ka mele thenge la itre trepene meköti Akötresie. Angatr a “tro thenge la itre sipu aja i angatr, matre kuca la ka tha meköti kö.” (Iudra 7, 17, 18) Ame la aqane qejepengöne Tusi Hmitrötr la itre ka ihnyima sai, ke casi hi memine la aqane ujë ne la itre ka iamenumenu memine la itre ka xele Iehova!

10. Thenge la Salamo 1:1, nemene la nyine troa kuca matre tha tro kö sa ujë tune la itre ka ihnyimasai?

¹⁰ Nemene la nyine troa kuca matre tha tro kö sa ujë tune la itre ka ihnyimasai? Tha tro pi kö sa ce tro memine la itre atre cili. (E jë la Salamo 1:1.) Kolo lai a hape, tha easë kö a hane dreng maine e pena la itre hna cinyanyine hnene la itre ka iamenumenu. E tha hmeke kö së, ke canga tro hi së lai a qajangazone la itre hna amekötine hnei Iehova memine la organizasio i Nyidrë. Celë hi matre nyipiewekë tro palahi sa hnying ka hape: ‘Eni kö a canga kapa me drengethenge la itre hna amekötin me itre ini ka hnyipixe? Nge eni kö a qajangazone la itre trejin ka elemeken?’ E tro sa canga wenë amekötine la aqane mekune së, ke tro së lai a amadrinë Iehova.—Ite edomë 3:34, 35.

11. Tune kaa la aqane goeën la itre trepene meköti Iehova hnene la “ite hmo”?

¹¹ Ame la hnaakönine pengöne atr ka thipetrije la inamacan, ke ene la “ite hmo.” Kola jele hmo angatr ke, xele kö angatr ma mel thenge la itre trepene meköti Akötresie. Pi tro kö angatr a kuca la sipu aja i angatr. (Ite edomë 12:15) Angatr a methinë Iehova, Qaane la inamacan. (Sal. 53:1) Ame la easa ithanata me angatr ngöne la hna cainöj, ke angatr a jele hmo së ke, easa metrötrën la itre trepene meköti Akötresie. Ngo hapeu, atreine fe kö angatr hane hamë së la mele ka loi? Öni Tusi Hmitrötr: “Nanyi cate la inamacane kowe la ate hmo ; tha tro kö nyën’ a hane ewekë ngöne la qanahag.” (Ite edomë 24:7) Thatreine kö angatr hamëne la itre ithanata ka troa xatua së. Celë hi matre Iehova a upi së troa ananyine “la ate hmo”!—Ite edomë 14:7.

12. Nemene la ka xatua së troa thipetrije la aqane ujë ne la itre hmo?

¹² Tha ceitui easë kö memine la itre ka methinëne la eamo i Akötresie, ke easa wangatrune la itre mekuna i Nyidrë me itre trepene meköti Nyidrë. Ame la easa goeëne la pun kowe la itre ka idrei me ka tha idrei, ke kola uku së troa trongëne la itre trepene meköti Akötresie. Pane goeëne jë la aqane ngazone la mele ne la itre atr ka thipetrije la itre eamo i Iehova! Hapeu, tha madrine kö së laka, mingöminge me lolo la mele së, ke easa drengethenge Akötresie?—Sal. 32:8, 10.

13. Iehova kö a musinë së troa trongëne la itre trepene meköti Nyidrë?

¹³ Aja i Iehova tro asë hi së a hetrenyi la inamacan, ngo tha Nyidrëti kö a musinë së. Ame pe, Nyidrëti a amamane la itre thangane ka ngazo hna troa kapa hnene la itre ka xelene la inamacane i Nyidrë. Ame la itre ka iëne troa tha idrei, ke tro “angat’ a xeni [pune] la thina i angate kö.” (Ite edomë 1:29-32) Troa traqa koi angatr la itre akötr me hleuhleu utihë la Iehova a apatrenyi angatr. Ngo ame kö la itre ka drengethenge Iehova me trongëne la itre trepene meköti Nyidrë, ke ase hë thingehnaeane koi angatr ka hape: “Ame la ate dei ni, te, troa lapa xetietë; nge tro angeic’ a lapa hnyawa, nge tha qouene la ngazo.”—Ite edomë 1:33.

KOLA THUPË SË HNENE LA NYIPI INAMACAN

14-15. Nemene la hna ini së hnei Ite Edomë 4:23?

¹⁴ Ame la easa trongëne la itre eamo qaathei Iehova, ke tru la itre manathith hne së hna kapa. Tune la hne së hna ce wang, Iehova a ajan tro la itre atr asë a trongëne la itre eamo i Nyidrë. Ame ngöne la tusi Ite Edomë, hetrenyi la itre eamo ka troa xatua së ngöne la mele së. Tro sa ce wang la foa lao eamo.

¹⁵ Thupëne hnyawa ju la hni ö. Öni Tusi Hmitrötr: “Nyipi thupëne hnyawa ju la hni ’ö, ke xulu hë la mele qa ngön’ ej.” (Ite edomë 4:23) Pane mekune jë la nyine tro sa kuca matre troa thupëne la wenethëhmi së. Tro së lai a xeni hnyawa, me enij, me neëne fe la itre hna majemine ka ngazo. Ka ceitune hi lai memine la aqane tro sa thupëne la hni së. Tro së lai a e la Tusi Hmitrötr e nöjei drai. Tro fe sa hnëkën, me sine, me qeje mekun ngöne itre icasikeu. Nge tro fe sa catre cainöj. Nge easa thupëne la itre mekuna së qa ngöne la itre hna majemine ka ngazo, tune la troa goeëne la itre iatr ka sis, me ce tro memine la itre sinatro ka ngazo.

16. Pine nemene matre ka nyipiewekë catr enehila la hna qaja ngöne Ite Edomë 23:4, 5?

¹⁶ Mejihnine ju la hna hetreny. Öni Tusi Hmitrötr: “The huliwa troa tena mo. . . . Tro eö a goeë tiline la ka pa ’lien? ke tro ej’ a nyi lue iape ne ej, me sheshë hnengödrai ’ë tune la aeto.” (Ite edomë 23:4, 5) Eje hi, canga tro hi a paatr la mani së me itre mo ne fen. Ngo ame enehila, kola nyinyape thele mani hnene la nöjei atr, ngacama itre ka trenamo ju hë maine ka pë ewekë. Ame la thangane lai, ke angatr a ahmahmanyi angatre kö, me iwajahuj, nge kola tithi angatr hnei mec. (Ite edomë 28:20; 1 Tim. 6:9, 10) Ngo ame kö la inamacan qaathei Iehova, ke kola ini së troa tha hnimi mani. Celë hi ka sewe së troa pi hetrenyi, ngo tro pe sa mejihnin, me madrin.—Ate cai. 7:12.

17. Nemene la aqane tro sa hetrenyi la “sesepeneqe ne la ate ka inamacan,” hna qaja ngöne Ite Edomë 12:18?

¹⁷ Loi e troa pane mekune qëmeken troa ithanata. E tha hmeke kö së, ijije hi tro sa akötrëne la itre xan hnene la itre trengewekë së. Öni Tusi Hmitrötr: “Hetete ewekë kösë hna thine hnei taua; ngo nyine ameune la sesepeneqe ne la ate ka inamacan.” (Ite edomë 12:18) Ame la easa ixöjetrij, ke easë hi lai a thë la aqane imelekeu së me itre xan. (Ite edomë 20:19) Maine easa ajan tro la hne së hna qaja a tune la nyine ameun, ngo tha tune la taua ke, nyipiewekë troa lapane la hni së hnene la itre ini qa hnine la Tusi Hmitrötr. (Luka 6:45) Ame la easa lapa mekune la hne së hna e ngöne la Tusi Hmitrötr, ke canga tro hi sa qaja la itre trengewekë ka akeukawan itre xan.—Ite edomë 18:4.

18. Troa xatua së tune kaa ngöne la hna cainöj, hnene la hna qaja ngöne Ite Edomë 24:6?

¹⁸ Drengethenge ju la itre hna amekötin hnene la organizasio i Iehova. Öni Tusi Hmitrötr: “Tro eö a thë la ishi ’ö thenge la hna eamo hnyawa ; nge tro eö a kepe thangan qa ngöne la itre eamo ne la ka ala nyimu.” (Ite edomë 24:6) Ame la easa trongëne la eamo celë, ke easa öhne ka hape, easa maca ngöne la aqane cainöj me hamë ini. Tha easë kö a kuci mekun la easa cainöj, ngo easa xötrethenge hnyawa la itre tulu ne aqane nyiqane ithanata hna hamën hnene la hlu. Easa kapa la itre eamo ka xatua së ngöne la itre icasikeu jëne la itre trejin ka macaj ka cile fë cainöj. Ketre, nyimutre la itre itus, me itre video hna hamëne hnene la organizasio matre xatuane la itre atr troa trotrohnine la Tusi Hmitrötr. Hapeu, epuni kö a huliwan hnyawane la itre zuti cili?

19. Nemene la mekuna i epun göne la inamacan hna hamëne hnei Iehova? (Ite Edomë 3:13-18)

¹⁹ E jë la Ite Edomë 3:13-18. Easa olene koi Iehova la itre eamo hnei Nyidrëti hna hamë së jëne la Tusi Hmitrötr! Maine patre ju itre ej ke, tha tro kö a lolo la mele së. Ame ngöne la tane mekune celë, hne së hna ce wang la itre eamo ngöne la tusi Ite Edomë, ka xatua së troa inamacan. Ngo, maine tro sa e la Tusi Hmitrötr, tro sa öhne ka hape, tru catr la itre eamo e kuhu hnin. Haawe, catre jë së tro thenge la inamacane i Iehova. Tha nyipiewekëne kö së la aqane goeëne la fen la inamacane i Iehova. Ngo xecie koi së ka hape, “manathithi angete xölehuj” la inamacane i Akötresie.