Loi Me Ngazo: Mejiune Ju Kowe La Tusi Hmitrötr

NYIPIEWEKË TROA EATRONGË SË HNEI AKÖTRESIE

Ame ngöne la Tusi Hmitrötr, Iehovaa a qaja ka hape, tha qanyine kö la atr troa amekötine maine iujine la mele i angeic, ngo loi pe tro angeic a thele ixatua thei Nyidrë. (Ieremia 10:23) Celë hi matre, ame ngöne la Tusi Hmitrötr, Nyidrëti a amamane la ka loi me ka ngazo. Ka tru koi Nyidrë la itre atr, matre tha ajane kö Nyidrë tro sa mele thenge la itre mekun ka troa akötrë së. (Dreuteronomi 5:​29; 1 Ioane 4:8) Pine laka Nyidrëti la Atre Xupi së, haawe, hetrenyi thei Nyidrëti la inamacan me atrehmekun, matre hamë së la itre eamo ka lolo. (Salamo 100:3; 104:24) Ngo ame pe, tha hnei Nyidrëti kö hna musinë së troa drengethenge la itre eamo i Nyidrë.

Pëkö ewekë hnei Iehova hna cipane koi Adramu me Eva, lo lue pane atr. (Genese 1:28, 29; 2:8, 15) Ngo hnei Nyidrëti hna hamën asë la ka nyipiewekë, matre tro nyidroti a madrin. Ka hmaloi hi troa trotrohnine la itre hna amekötin hnei Iehova. Nge aja i Nyidrë tro nyidroti a idrengethenge. Nge hnei Nyidrëti hna nue nyidro troa sipu iën, ene la troa idrengethenge maine tha tro pena kö a idrengethenge. (Genese 2:​9, 16, 17) Ngazo pe, ka tru koi nyidroti la troa drengethenge la hni nyidro, nge co pë hë Akötresie. (Genese 3:6) Nemene hë la thangan? Hapeu, ka madrine kö la itre atr enehila, la angatr a sipu iëne la loi me ngazo? Waea. Kola mama enehila ka hape, pëkö tingeting me madrine la easa nuetrij la itre eamo qaathei Akötresie.​—Atre Cainöj 8:9.

Tusi Hmitrötr a hamëne la itre eamo ka troa xatua së troa axecië mekune hnyawa, ngacama isa qenenöje së kö, maine itre ka trene mani së maine ka pë pena kö. (2 Timoteo 3:​16, 17; wange ju la hna eköhagen “Ketre Itus Thatraqane La Nöjei Atr.”) Tro sa ce wang.

Tro sa ce wange la itre xa kepine matre, ame la Tusi Hmitrötr ke “Trengewekë i Akötresie.”​—1 Thesalonika 2:​13. Wange ju la video Ewekë i Drei La Tusi Hmitrötr? ngöne jw.org.

AQANE EATRONGË SË HNEI AKÖTRESIE

Kola mama e hnine la Tusi Hmitrötr la itre hna melëne ka qaja la aqane imelekeu Iehova memine la itre atr. Maine tro sa atre la aliene la Tusi Hmitrötr, tro hë së a atre la ka loi me ka ngazo koi Iehova, la ka troa hetre thangane ka loi me ka troa hetre thangane ka ngazo koi së. (Salamo 19:​7, 11) Tro fe sa öhne la itre eamo hna cinyianyine ekö, ngo thatraqai së palahi enehila, nge ka troa xatua së troa axecië mekune hnyawa e nöjei drai.

Hane hi la ketre ceitun. Itre Edromë 13:20 a qaja ka hape: “Ame la atre ce tro me itre ka inamacan, ke tro ha inamacan, ngo ame la atre epe kowe la itre hmo, ke tro hë angeic a jol.” Ka nyipici palahi enehila la trepene meköt celë. Tru catr la itre trepene meköt ka tune lai e hnine la Tusi Hmitrötr.​—Wange ju la hna eköhagen “Itre Eloine La Inamacan Qa Hnine La Tusi Hmitrötr Enehila.”

Ngo maine jë, tro epuni a hnyinge ka hape, ‘Tro sa atre tune kaa ka hape, ame la hna qaja hnei Tusi Hmitrötr, ke ka hetre thangane palahi enehila?’ Ame ngöne la tane mekun e thupen, tro sa ce wange la itre hna melën ka troa sa la hnyinge celë.