Itre Ini Qa Ngöne La 40 Lao Drai Tixenuë i Iesu e Celë Fen

1-2. Nemene la ka traqa kowe la lue atre drei Iesu la nyidroti a tro Emao?

AME lo 16 Nisan macatre 33 M.K., tru la akötre me xou ne la itretre drei Iesu. Hnene la lue atre drei Iesu hna tro qa Ierusalema me xom la gojeny a tro Emao, traqa koi 11 lao kilomet la enanyine qa Emao a tro Ierusalema. Tru catr la akötre i angatr, ke meci hë Iesu, lo atr hnei angatr hna xötrethengen. Angatr ekö a mekun ka hape, pine laka, nyidrëti la Mesia, tro nyidrëti a amelen la nöje Iudra. Ngazo pe, tha eje ju kö. Ngo kolo ha saze la mekuna i angatr.

² Ketre trenyiwa a easeny me ce tro me nyidro. Nyidroti a qaja la ewekë ka traqa koi Iesu memine la akötre i nyidro. Matre nyidrëti a nyiqane porotrik me nyidro, nge tha tro jë kö nyidroti a thëthëhmine la porotrike cili. Hnei nyidrëti hna nyiqane qejepengöne koi nyidro “qaane Mose uti hë itre perofeta,” la kepin, matre loi e tro la Mesia a pane akötr me mec. Ame hë la angatr a traqa e Emao, hnei nyidrëti hna qaja koi nyidro ka hape, nyidrëti hi lo Iesu hna amelene hmaca! Drei jë kö la madrine la itretre dreng, la angatr a atre ka hape, mele hmaca ha la Mesia!​—Luka 24:13-35.

3-4. Nemene la thangane la hnei Iesu hna mama kowe la itretre dreng, nge nemene la hne së hna troa ce wang ngöne la tane mekun celë? (Itre Huliwa 1:3)

³ Ame ngöne la 40 lao drai tixenuë i Iesu e celë fen, anyimua mama nyidrë kowe la itretre dreng. (E jë la Itre Huliwa 1:3.) Ame ngöne la ijine cili, hna nyihnane la akötr me xou i angatr hnei madrin, me mejiun, me catr. Ame hë e cili, hnei angatr hna nyiqane catre cainöjëne la maca ka loi ne la Baselaia me inine la itre atr.a

⁴ Tru catre la itre ini nyine tro sa xom qa ngöne la ijine cili. Ame ngöne la tane mekun celë, tro sa ce wang la hnei Iesu hna kuca ngöne la ijine cili, matre (1) ithuecatr kowe la itretre dreng, (2) xatua angatr troa trotrohnine la Itre Hna Cinyihan, nge (3) hnëkë angatr troa xome la itre hnëqa ka tru. Ame ngöne la köni götrane celë, tro sa ce wang la aqane tro sa nyitipu Iesu.

ITHUECATRE JË

5. Pine nemene matre itretre drei Iesu a aja ithuecatr?

⁵ Itretre drei Iesu a aja ithuecatr. Pine nemen? Pine laka ame la itre xan, hnei angatr hna trotrij la itre uma i angatr, me itre fami, me itre huliwa matre xötrethenge nyidrë. (Mat. 19:27) Ame pena la itre xan, ke hna xele ma wang me methinën pine angatre nyiqane xötrethenge Iesu. (Ioa. 9:22) Hnei angatr asë hna nue mel, ke xecie koi angatr laka, nyidrëti hi la Mesia. (Mat. 16:16) Ngo ame hë la kola humuthi Iesu, ke hleuhleu catr angatr me kucakuca, ke thatre hë angatr la nyine troa kuca.

6. Nemene la hnei Iesu hna kuca thupen la nyidrëti a mele hmaca?

⁶ Trotrohnine hi Iesu laka, itretre dreng a akötr, ke meci hë nyidrë, ngo tha hnene kö laka, angatr a lapaun acon. Celë hi matre, ame la kola amele nyidrëti hmaca, hnei nyidrëti hna pane ithuecatr kowe la itre sinee i nyidrë. Hnei nyidrë hna pane mama koi Maria Magadalena, lo eahlo a treij ngöne la hua i nyidrë. (Ioa. 20:11, 16) Hnei nyidrëti fe hna mama kowe lo lue atre dreng hne së hna qaja lo xötrei. Nge hnei nyidrëti mina fe hna mama koi Peteru aposetolo. (Luka 24:34) Nemene la ini koi së? Tro sa pane ce wang la ewekë ka traqa, lo nyidrëti a mama koi Maria Magadalena.

7. Thenge la Ioane 20:11-16, nemene la hnei Iesu hna öhne lo hmahmakanyi ne 16 Nisan, nge nemene la hnei nyidrëti hna kuca? (Wange ju la iatr.)

⁷ E jë la Ioane 20:11-16. Ame lo hmahmakanyi ne 16 Nisan, alanyimu la itre föe ka mele nyipici, ka tro kowe la götran hna amë la ngönetrei i Iesu. (Luka 24:1, 10) Tro sa ce wang la hna melën hnei Maria Magadalena. Ame la eahlo a traqa kowe la hua, ke pëkö alien. Hnei eahlo hna canga nyap troa qaja koi Peteru me Ioane, me xötrethenge nyidro la nyidroti a nyap kowe la hua. Ame la nyidroti a öhne laka, ka pë aliene la hua, hnei nyidroti hmaca hna isa tro koi hnalapan. Lapa ju pe hi Maria e cili a treij. Nge thatre kö eahlo ka hape, Iesu a goeë eahlo. Hna ketri nyidrë la eahlo a treij. Matre hnei nyidrëti hna mama koi eahlo, me kuca la ketre ewekë matre ithuecatr koi eahlo. Hnei nyidrëti hna hamën la ketre hnëqa ka tru koi eahlo, ene la troa thuemacane la itre trejin me nyidrë laka, mele hmaca ha nyidrë.​—Ioa. 20:17, 18.

8. Tro sa nyitipu Iesu tune kaa?

⁸ Tro sa nyitipu Iesu tune kaa? Nyimutre la itre nyine tro sa kuca, matre ithuecatr kowe la itre trejin troa catre nyihlue i Iehova. Maine aja së troa ithuecatr kowe la itre trejin, tui Iesu, loi e tro sa pane atre la itre jol hnei angatr hna melën, me ithanata amenyiken koi angatr. Celë hi hna melën hnei Jocelyn, ketre trejine föe. Hna mec la trejin me angeic ngöne la ketre aksida. Öni angeic: “Itre treu hnenge hna pane akötr.” Ngo hnene la lue trefën hna hë angeic kowe la hnalapa i nyidro, me drei angeice hnyawa, me qaja lapan koi angeic laka, ka tru angeic koi Iehova. Öni Jocelyn: “Kösë hnei Iehova hna upi nyidro troa huli ni qa ngöne la hnagejë ka holehol. Hnei nyidroti hmaca hna thue aja koi ni troa nyihlue i Iehova.” Tro fe sa ithuecatre kowe la itre trejin troa catre nyihlue i Iehova, ngöne la easa drei angatre hnyawa me ithanata amenyiken.​—Roma 12:15.

XOMI INI JË QA NGÖNE LA TUSI HMITRÖTR

9. Nemene la hna tha trotrohnin hnene la itretre drei Iesu, nge hnei nyidrëti hna xatua angatr tune kaa?

⁹ Itretre drei Iesu a mejiune kowe la trengewekë i Akötresie, nge angatr a isin troa trongën la itre eamo qa ngöne ej. (Ioa. 17:6) Ngo tha trotrohnine kö angatre la kepin, matre hna humuthi Iesu hune la sinöe ne iaxösisi, tune la atrekënö. Atre hi Iesu laka, angatr a luelu, ke hetre ewekë hnei angatr hna tha trotrohnin, ngo tha hnene kö laka, ka ngazo la hni i angatr. (Luka 9:44, 45; Ioa. 20:9) Matre hnei nyidrëti hna xatua angatr troa trotrohnine la Itre Hna Cinyihan. Tro sa ce wang la aqane kuca i nyidrë, lo nyidrëti a mama kowe la lue atre dreng ngöne la gojeny a tro Emao.

10. Tune kaa la aqane amamane Iesu kowe la itretre dreng laka, nyidrëti hi la Mesia? (Luka 24:18-27)

¹⁰ E jë la Luka 24:18-27. Tha hnei Iesu kö hna canga amamane la pengöi nyidrë kowe la lue atre dreng. Hnei nyidrëti pe hna pane hnying koi nyidro. Pine nemen? Pine laka, aja i nyidrë tro nyidroti a qaja la mekun me aliene hni i nyidro. Nge celë hi la hnei nyidroti hna kuca. Hnei nyidroti hna qaja ka hape, aja i nyidro tro Iesu a thepe Isaraela qa ngöne la musi Roma. Thupene la nyidroti a fe la hni i nyidro, hnei Iesu hna xatua nyidro troa trotrohnine la ewekë ka traqa,b jëne la Itre Hna Cinyihan. Nge ame e hej, hnei nyidrëti hna amexeje hmaca la itre ini cili kowe la itre xaa atre dreng. (Luka 24:33-48) Nemene la ini koi së?

11-12. (a) Tro sa nyitipu Iesu tune kaa la easa hamën la itre ini qa hnine la Tusi Hmitrötr? (Wange ju la iatr.) (b) Nemene la aqane xatua Nortey hnene la trejin ka ini Tus koi angeic?

¹¹ Tro sa nyitipu Iesu tune kaa? Ame la eö a ini Tusi me ketre, pane hnyinge jë koi angeic matre troa atre la mekuna i angeic memine la ka ej e kuhu hni i angeic. (It. Ed. 20:5) E thupen, amamane jë koi angeic la aqane troa öhne la itre xötr ka ihmeku memine la hnei angeic hna melën. Nge the qaja kö koi angeic la nyine troa kuca. Xatua angeice jë pe troa xomi mekun qa hnine la Tusi Hmitrötr, me öhne la aqane tro angeic a trongëne la itre trepene meköt ngöne la mele i angeic. Eje hi lai hna kuca hnene la trejin ka ini Tus koi Nortey ekö, ketre trejin qa Ghana.

¹² Hnei Nortey hna nyiqane ini Tus lo angeic a 16 lao macatre. Ngo hnene la fami i angeic hna icilekeu me angeic. Nemene la ka xatua angeic troa cile catr? Hnene la trejin ka ini Tusi me angeic hna xom la tusi Mataio mekene 10, matre troa amamane ka hape, troa axösisine la itre nyipi keresiano. Öni Nortey: “Ame la kola nyiqane axösisi ni, ke kolo hi lai a anyipicine koi ni ka hape, eni ngöne la nyipici.” Hnene fe la ka ini Tusi me angeic hna xom la tusi Mataio 10:16, matre amamane la enyipiewekëne troa atreine waiewekë, me metrötr la angeic a qeje hmi kowe la fami i angeic. Thupene la bapataiso, Nortey a pi pionie, ngo ajane kö la keme i angeic tro angeic a ini aqeany. Tha hnene kö la trejin hna qaja koi angeic la nyine troa kuca. Hnei nyidrëti pe hna hnying koi angeic me amamane la itre trepene meköt qa hnine la Tusi Hmitrötr. Nemene la thangane lai? Hnei Nortey hna axeciën troa huliwa i Iehova drai ka pexej. Matre hnene la keme i angeic hna helë angeic qa kuhu hnalapa. Tune kaa Nortey enehila? Öni Nortey: “Ka xecie koi ni ka hape, eje hi lai nyine tro ni a kuca.” Ketre tune mina fe, ame la easa xatuane la itre trejin jëne la Tusi Hmitrötr, ke tro hë angatre lai a macaj.​—Efe. 3:16-19.

ITRE QATRE THUP, XATUANE JË LA ITRE TREJIN TRAHMANY TROA “ITRE AHNAHNA”

13. Nemene la hnei Iesu hna kuca matre tro palahi a cainöjëne la maca ka loi thupen la nyidrëti a elë hnengödrai? (Efeso 4:8)

¹³ Hnei Iesu hna eatrëne hnyawa la hnëqa hnei Iehova hna ahnithe koi nyidrë, lo nyidrëti e celë fen. (Ioa. 17:4) Ngo tha ase kö Iesu mekun ka hape, nyidrë hmekuje hi la ka atreine eatrëne la aja ne la Keme i nyidrë. Ame ngöne lo köni macatre me sin ne cainöje nyidrëti e celë fen, hnei nyidrëti hna inine la itretre dreng. Qëmeken tro Iesu a elë hnengödrai, hnei nyidrëti hna upi angatr troa thupën la itre neköi mamoe i Iehova, me elemeken la huliwa ne cainöj me hamë ini. Ame la itre xaa trejin cili ka xomi hnëqa, ke tha 30 petre kö lao macatre i angatr. (E jë la Efeso 4:8.) Ame ngöne la 40 lao drai tixenuë i nyidrëti e celë fen, hnei nyidrëti hna xatuan tune kaa la itre trahmanyi cili ka catre huliwa me mele nyipici, troa “itre ahnahna”?

14. Nemene la aqane xatuane Iesu la itretre dreng, ngöne la 40 lao drai tixenuë i nyidrëti e celë fen? (Wange ju la iatr.)

¹⁴ Hnei Iesu hna hamën kowe la itretre drei nyidrë la itre eamo ka catr cememine la ihnim. Hnei nyidrëti hna amekötin la itre xan e angatr ka mekun laka, tha ase kö amele nyidrëti hmaca. (Luka 24:25-27; Ioa. 20:27) Hnei nyidrëti fe hna qaja koi angatr ka hape, nyipiewekë troa amë panën la hnëqa ne qatre thup hune la huliwa i maseta. (Ioa. 21:15) Hnei nyidrëti mina fe hna hmekë angatr laka, tha ka loi kö troa aceitunën la hnëqa i angatr me itre xan ngöne la huliwa i Iehova. (Ioa. 21:20-22) Nge hnei nyidrëti hna amekötin la itre mekuna i angatr göne la Baselaia, me ithuecatr koi angatr troa amë panën la huliwa ne cainöj. (It. Hu. 1:6-8) Nemene la ini nyine tro la itre qatre thup a xom qa ngöne la tulu i Iesu?

15-16. (a) Tro la itre qatre thup a nyitipu Iesu tune kaa? (b) Nemene la itre thangan ka loi hnei Patrick hna kapa qa ngöne la hna dreng la itre eamo?

¹⁵ Tro la itre qatre thup a nyitipu Iesu tune kaa? Itre qatre thup fe, epuni a nyitipu Iesu la epuni a inine me xatuane la itre trejin trahmany, memine fe la itre jeune. Xatua angatre jë troa macaj matre hane xome la itre xaa hnëqa ka truc ngöne la ekalesia. Loi e tro epuni a atre laka, tru catr la nyine tro la itre trejin cili a inin. Eamo angatre jë matre tro angatr a atrein, me trotrohnine laka, nyipiewekë tro angatr a ipië, me mele nyipici, me hetre aja troa xatua itre xan.​—1 Tim. 3:1; 2 Tim. 2:2; 1 Pet. 5:5.

¹⁶ Tro sa ce wang la hna melën hnei Patrick. Ame lo angeic a jeune, ka majemin angeic icatrë me itre xan. Goi icatrë fe angeic memine la itre trejine föe, me ngazo thiina koi angatr. Hnene la ketre qatre thup hna öhne la itre thiina i angeice cili, me eamo angeic. Öni Patrick: “Eni a olene koi nyidrë. Eni ekö a dekurag la kola hamë hnëqa koi itre xan, ngo tha koi eni kö. Hnene la qatre thup hna xatua ni troa trotrohnin laka, ame la ka nyipiewekë, ke troa ipië me xatuane la itre trejin, ngo tha ene kö la troa cilën la itre hnëqa ngöne la ekalesia.” Hnei angeic hna kapa hnyawane la itre eamo, matre hna acili angeic troa qatre thup, nge angeic petre hi a sasaithe la 20 lao macatre.​—It. Ed. 27:9.

17. Tune kaa la aqane amamane Iesu laka, nyidrëti a mejiune kowe la itretre dreng?

¹⁷ Hnei Iesu hna upe la itretre drei nyidrë troa cainöj me inine la itre atr. Maine jë, ame koi angatr, tha ijiji angatre kö troa hane xom la hnëqa cili. Ngo tha luelue kö Iesu laka, ijiji angatre hi, matre öni nyidrë koi angatr: “Tune lo aqane upi ni hnei Kaka, eni fe a hane upi nyipunie.”​—Ioa. 20:21.

18. Tro la itre qatre thup a nyitipu Iesu tune kaa?

¹⁸ Tro la itre qatre thup a nyitipu Iesu tune kaa? Ene la troa nue la itre xaa hnëqa i angatr koi itre xan. (Fil. 2:19-22) Ijiji angatre troa upe la itre jeune troa nyidrawan me nyihnyawane la Uma Ne Baselaia. Thupene la angatr a thue hnëqa koi ketre, loi e tro angatr a amamane la aqane kuca, me nue pë hë la trejin troa ketre kuca. Hna ketri Matthew, ketre trejin hna hnyipi acil troa qatre thup, hnene la aqane xatua angeic hnene la itre xaa qatre thup. Hnei angatre hna ini angeic, me qaja koi angeic laka, ka lolo la hnei angeic hna kuca. Öni angeic: “Ame la eni a tria, angatr a ithuecatr koi ni me qaja ka hape, aqane tro eni lai a inin. Nge angatr a xatua ni troa kuca hnyawane la huliwa.”d

19. Nemene la nyine tro sa isine troa kuca?

¹⁹ Ame ngöne la 40 lao drai tixenuë i Iesu e celë fen, hnei nyidrëti hna ithuecatr koi itre xan, me hamë ini, me ini angatr. Isine jë së troa xötrethenge la tulu i nyidrë. (1 Pet. 2:21) Nge the luelue kö laka, tro kö nyidrëti a xatua së. Öni nyidrëti lo: “Tro pala hi ni a ce me nyipunie uti hë la troa nyipune la fene celë.”​—Mat. 28:20.