Iehova a Nue La Ngazo Së ​—Kepine Matre Tro Sa Olen

1-2. Pine nemene matre ceitune hi la pengö së memine la nekötrahmanyi hna qaja ngöne la paragarafe 1?

PANE mekune jë la ketre nekötrahmanyi hna hetrune ngöne la ketre fami ka trenamo. Ame la ketre ijin, hna mec la kem me thine i angeic ngöne la ketre aksida. Hace catr angeic. E thupen, kola thuemacanyi angeic ka hape, ase hë keme me thine i angeic aluzine asë la manie i angatr. Matre pëhë mani, nge itre gufa pe hi la ka lapa. Nge baak a upi angeic troa canga të la itre gufa. Ngazo pe, tha ijiji angeice kö.

² Ceitune hi la pengö së memine la nekötrahmanyi cili. Ame lo pane keme me thine së, Adramu me Eva, ke lue atr ka pexeje nyidro, nge nyidro a mel ngöne la ketre paradraiso ka mingöming. (Gen. 1:27; 2:7-9) Maine ju, tro nyidro a madrin me mel epine palua. Ngazo pe, hna helë nyidro qa ngöne la paradraiso, nge luzi fe hë lo mel ka pë pun. Nemene pë hë la hnei nyidro hna hamën kowe la itre nekö i nyidro enehila? Öni Tusi Hmitrötr: “Hna haöthe la fen hnene la ngazo ne la ala cas [Adramu], nge meci a traqa pine la ngazo, ene pe, traqa pi la meci kowe la nöjei atr asë, ke itre ka ngazo asë hë së.” (Roma 5:12) Hnei Adramu hna hamë së la ngazo, nge hnene la ngazo hna axulune la mec. Ceitune hi lai memine la ketre gufa ka tru hne së hna thatreine të.​—Sal. 49:8.

3. Pine nemene matre ceitune hi la itre ngazo së me itre “gufa”?

³ Hnei Iesu hna aceitunëne la itre ngazo së me itre “gufa.” (Mat. 6:12; Luka 11:4) Ame la easa tria, ke kösë easa xomi gufa thei Iehova. Maine pëkö ixatua qaathei Nyidrë, ke thatreine kö së të la itre gufa cili, nge tro hi a apën e meci hë së.​—Roma 6:7, 23.

4. (a) E pëkö ka xatua së, nemene la pun kowe la atr ka ngazo? (Salamo 49:7-9) (b) Nemene la aliene la hnaewekë “ngazo” ngöne la Tusi Hmitrötr? (Wange ju la hna eköhagen, “La Hnaewekë Ngazo.”)

⁴ Maine pëkö ka xatua së, ijiji easë kö troa kapa hmaca lo hnei Adramu me Eva hna aluzin? Waea. (E jë la Salamo 49:7-9.) E pëkö ka xatua së, tha ijiji easë kö troa mejiun kowe la melehmaca me kowe la ketre mel ka lolo elany. Eje hi, tro sa meci palua tune la itre öni.​—A. Cai. 3:19; 2 Pet. 2:12.

5. Nemene la hnei Iehova hna kuca matre të la gufa së maine ngazo qaathei Adramu? (Wange ju icetrön.)

⁵ Tro hmaca së a ce wang la ceitun ne la nekötrahmanyi hna qaja e caha. Maine traqa ju la ketre atr ka trenamo me qaja ka hape, tro nyidrëti a të asë la itre gufa i angeic, nemene la hnei angeic hna troa kuca? Tro angeice lai a kapa, me hetre hni ne ole kowe la atre cili ka ham. Ketre tun, hnei Iehova Keme së, hna hamë së la ketre ahnahna ka të la gufa së, maine ngazo qaathei Adramu. Öni Iesu: “Atraqatre la ihnimi Akötresie kowe la fen, matre hnei nyidrëti hna upe la Nekö hnimina i nyidrë ka cas, matre tha tro kö a meci la atre amamane la lapaune i angeic kowe la Nekön, ngo tro pe a hetrenyi la mele ka pë pun.” (Ioa. 3:16) Celë hi ka aijijë së troa hetre imelekeu me Iehova.

6. Nemene la itre ini qa hnine la Tusi Hmitrötr hne së hna troa ce wang ngöne la tane mekun celë, nge pine nemen?

⁶ Nemene la aqane tro la ahnahna cili a të la itre “gufa” së, maine itre ngazo së? Tro sa ce wang la itre hnaewekë qa hnine la Tusi Hmitrötr, kola iloi hmaca hnei Akötresie me itre atr, me aqane iloi, me thupene mel, me kola të la itre ngazo, nge kola jelemeköti së. Ame ngöne la tane mekun celë, tro sa ce ithanatan la itre mekune cili, me ce wang la hnei Iehova hna goeën matre nue la itre ngazo së. E tro sa lapa mekun la itre ini celë, tro lai a akökötrene la hni ne ole së kowe la aqane nue Iehova la itre ngazo së.

IEHOVA A ILOI ME ITRE ATR

7. (a) Nemene la ewekë ka sisitria hna aluzin hnei Adramu me Eva? (b) Ame easë itre matra i Adramu me Eva, nemene la nyine tro sa kuca? (Roma 5:10, 11)

⁷ Tha ijiji Adramu hmaca kö me Eva troa mel utihë epine palua, nge hnei nyidro fe hna aluzine la imelekeu i nyidro me Iehova. Lue ka sin ekö la fami Iehova. (Luka 3:38) Ngo ame hë la nyidro a tha idrei, ke hnei Nyidrë hna helë nyidro. Pë palakö nekö i nyidro la ijin cili. (Gen. 3:23, 24; 4:1) Matre ame easë, itre nekö i nyidro, loi e tro sa iloi hmaca me Iehova. (E jë la Roma 5:10, 11.) Kolo lai a hape, loi e tro sa thel troa imelekeu hmaca me Nyidrë. Önine la ketre itus, ame la hnaewekë qene Geres hna hape, “troa iloi” ke, kola hape, “troa nyisineene la ithupëjia.” Ame la ka mingöming, ke Iehova la ka pane thel troa iloi me easë. Tune kaa la aqane kuca i Nyidrë?

AQANE ILOI IEHOVA ME EASË

8. Nemene la hnei Iehova hna kuca?

⁸ Hnei Iehova hna thel la aqane troa he la ngazo, matre tro la itre atr a imelekeu hmaca me Nyidrë. Hnei Nyidrë hna nyihnane lo ewekë hna aluzin hnei Adramu, hnene la ketre ewekë ka ihmeku. Ame ngöne la Itre Hna Cinyihane Qene Geres, kolo fe a qaja la aqane kuca i Iehova matre tro la atr a nyisinee i Nyidrëti hmaca.​—Roma 3:25.

9. Nemene la hnei Iehova hna acil ekö matre troa nue la ngazo ne la angetre Isaraela?

⁹ Ame ekö, hnei Iehova hna acil la ketre hna amekötin, matre troa nue la ngazo ne la angetre Isaraela me aijijë angatr troa hetre imelekeu me Nyidrë. Ame e Isaraela, kola atrune la Drai Ne Tha Xen e nöjei macatre. Ame la drai cili, atre huuj ka sisitria a huujëne la itre öni thatraqane la nöj. Ngo pine laka, sisitria kö la atr hune la öni, matre thatreine kö la itre huuj cili troa he hnyawan la itre ngazo ne la nöj. Matre tro Iehova a kepe angatr e tro pala hi la angetre Isaraela ka ietra a tro fë huuj. (Heb. 10:1-4) Ame la itre huuj hna tro fë ngöne la Drai Ne Tha Xen, me ngöne la itre xaa ijin, ke kola amekunëne la angetre Isaraela laka, itre atr ka ngazo angatr, nge loi e troa hetre huuj ka sisitria.

10. Nemene la hnei Iehova hna kuca matre troa nue hnyawane la ngazo ne la itre atr?

¹⁰ Nemene la hnei Iehova hna acil matre troa nue hnyawane la ngazo ne la itre atr? Hnei Iehova hna kuca matre tro hi a aca huujëne la nekö hnimina i Nyidrë matre “thu la itre ngazo ne la ka ala nyim.” (Heb. 9:28) Hnei Iehova hna hamëne la mele i Iesu “nyine nyi thupene mel kowe la ka ala nyim.” (Mat. 20:28) Nemene la thupene mel?

THUPENE MEL

11. (a) Ame ngöne la Tusi Hmitrötr, nemene la thupene mel? (b) Drei la ka ijij troa nyi thupene mel?

¹¹ Ame ngöne la Tusi Hmitrötr, ke ame la thupene mel, ke celë hi ka aijijëne la itre atr ka ngazo troa iloi hmaca me Akötresie. Ame koi Iehova, loi e troa hamëne la thupene cili, matre tro hmaca a kapa lo hna aluzin. Mekune hi eö lo, hnei Adramu me Eva hna aluzine lo mel ka pexej me ka pë pun. Matre nyipiewekë tro la atr ka troa huujën la mele i angeic nyine thupene mel a tui Adramu. (1 Tim. 2:6) Ame la ka ijij troa hamën la thupene mel ke, ketre thupëtresij (1) ka pexej; (2) ka ijij troa mel palua e celë fen; nge (3) ka hetre aja troa nue la mele i nyidrë thatraqai së. Ka nyipiewekë la köni ewekë cili matre tro la mele i angeic a nyihnan la mel hna aluzin hnei Adramu.

12. Pine nemene matre Iesu hi la ka ijij troa nyi thupene mel?

¹² Tro sa ce wang la köni kepin ka amamane ka hape, Iesu hi la ka ijij troa nyi thupene mel. (1) Ka pexeje nyidrë, ke “pëkö ngazo i nyidrë.” (1 Pet. 2:22) (2) Pine laka, atre ka pexeje nyidrë, ijiji nyidrëti hi troa mel palua e celë fen. (3) Aja i nyidrë troa mec me nue la mele i nyidrë thatraqai së. (Heb. 10:9, 10) Atr ka pexeje Iesu, matre ka ihmeku hi la mele i nyidrë memine lo pane atr, Adramu, qëmekene tro angeic a tria. (1 Kor. 15:45) Jëne la meci nyidrë, hnei nyidrë hna të la gufa së qaathei Adramu, ene la troa nyihnan la mel hna aluzin hnei angeic. (Roma 5:19) Matre Iesu la “Adramu tixenuë.” Tha nyipiewekë kö tro la ketre atr ka pexej a traqa, me nyithupene hmaca lo mel hnei Adramu hna aluzin, ke ase hë Iesu “aca kuca lai thatraqane la nöjei hneijin.”​—Heb. 7:27; 10:12.

13. Nemene la hnei Iehova hna kuca matre tro hmaca së a imelekeu hnyawa me Nyidrë?

¹³ Nemene la hnei Iehova hna kuca matre tro hmaca së a imelekeu hnyawa me Nyidrë? Hne së hna ce wang ka hape, hetre hnei Iehova hna kuca matre nue la itre ngazo së, me aijijë së troa hetre imelekeu me Nyidrë. Troa eatrëne lai, e hetre thupene mel. Ame la kola anenine la madra i Iesu koi së, ke nyidrëti hi lai a hamëne la thupen.​—Efe. 1:7; Heb. 9:14.

TRO HA NYITHUPENE LA ITRE NGAZO SË ME JELEMEKÖTI SË

14. Nemene la hne së hna troa ce ithanatan, nge pine nemen?

¹⁴ Nemene la itre thangane ka loi hne së hna kapa qa ngöne la hnei Iehova hna kuca koi së? Tro sa ce ithanatane la lue hnaewekë hna huliwan hnei Tusi Hmitrötr, ka xatua së troa trotrohnine la thangan matre kepe së hmaca jë hnei Iehova.

15-16. (a) Ame ngöne la Tusi Hmitrötr, kola hapeu la troa nyithupene la ngazo? (b) Nemene la ka ej e kuhu hni së la easa mekun la hnei Iehova me Iesu hna kuca koi së?

¹⁵ Öni Tusi Hmitrötr, pine laka, hna nyithupene la itre ngazo së hnene la thupene mel, matre mele hë së. Peteru a qaja ka hape: “Atre hi nyipunie ka hape, tha hnei itre ewekë ka hnyiqetre kö, maine sileva me gool la ka thepe nyipunie [Ger., “itö mele i nyipunie”] qa ngöne la mele ka pë alien, lo hna hamë nyipunie hnei itre qaaqaa i nyipunie. Ngo hna jëne la madra ka tru alameken, kösë madra ne neköi mamoe ka pë ethan, nge ka pë engazon, lo madra i Keriso.”​—1 Pet. 1:18, 19; ithuemacany.

¹⁶ Hnene la thupene mel hna thepe së qa ngöne la ngazo me mec ka akötrë së enehila. (Roma 5:21) Pine laka, hna anenine la madra ka sisitria i Iesu matre nyithupene la itre ngazo së, loi e tro sa olene koi Iehova me koi Iesu.​—1 Kor. 15:22.

17-18. (a) Pine nemene matre ijiji fe hi troa hane jelemeköti së? (b) Nemene la thangan la troa jelemeköti së?

¹⁷ Öni Tusi Hmitrötr, ijije hi tro Iehova a jelemekötine la itre hlue i Nyidrë. Kola hape, tha Nyidrëti kö a hë thupene koi së la itre ngazo hne së hna kuca. Iehova e cili a trothenge la itre trepene meköti Nyidrë. Tha Iehova kö a jelemeköti së ke, hetre hne së hna kuca, nge tha Nyidrëti kö a wangacone la itre ngazo së. Ngo Nyidrëti pe a apëne la itre gufa së, ke easa lapaune kowe la hnei Nyidrë me Iesu hna kuca, matre hamëne la thupene mel.​—Roma 3:24; Gal. 2:16.

¹⁸ Kola hapeue lai koi së isa ala cas? Ame la itre hna iën ka musi me Iesu e hnengödrai, ke ase hë jelemeköti angatr, nge itre nekö i Akötresieti hë angatr. (Tito 3:7; 1 Ioa. 3:1) Ase hë nue la itre ngazo i angatr. Kösë itre ka pë ngazon angatr, matre ijiji angatre hë troa hane sine la Baselaia. (Roma 8:1, 2, 30) Ame la itre ka mejiun troa mel e celë fen, ke troa jelemeköti angatr, matre itre sinee i Akötresieti hë angatr, nge tro fe a nue la itre ngazo i angatr. (Iako. 2:21-23) Ame la ka alanyimu atraqatr ka troa mele pe e Amagedro, ke tha tro hë angatr a mec. (Ioa. 11:26) Nge ame la “itre ka meköt” me “ka tha meköti kö,” troa hane amele angatr hmaca. (It. Hu. 24:15; Ioa. 5:28, 29) Ame la itre hlue i Iehova ka troa mele nyipici pe e celë fen, ke “tro ha nuamacanyi angatr tune la itre nekö i Akötresie.” (Roma 8:21) Pane mekune jë, ijiji së fe troa iloi memine la Keme së Iehova! Ketre manathith ka tru lai!

19. Pine nemene matre lolo hë la mele së? (Wange ju la hna eköhagen, “Kola Hapeue Lai Koi Së.”)

¹⁹ Ceitune hi la pengö së memine lo nekötrahmanyi hne së hna qaja e kula laka, pëhë manie i angeic, nge tru la itre gufa, matre thatreine kö angeice të. Eloine pe, hna xatua së hnei Iehova. Lolo hë la mele së, ke hnei Nyidrëti hna iloi me easë, me hamëne la thupene mel. Hnene la lapaune së koi Iesu Keriso, matre hna itö mele së, me thepe së qa ngöne la ngazo me mec. Ame la Iehova a nue la itre ngazo së, ke kösë pëkö ngazo së. Ngo ame kö la ka sisitria, ke ijiji easë fe hë enehila troa imelekeu memine la Keme së ka tru ihnimin, Iehova.

20. Nemene la hne së hna troa ce wang ngöne la tane mekun e thupen?

²⁰ Ame la easa lapa mekun la hnei Iehova me Iesu hna kuca koi së, ke tru catre la ole së koi nyidro. (2 Kor. 5:15) Maine patre ju nyidro, ka luzi hnyawa ha së! Ame ngöne la tane mekun e thupen, tro sa ce ithanatan la itre ceitun ka amamane la aqane tro sa kepe thangan qa ngöne la thupene mel.