Iehova “La Nyipi Madrineng”

1-2. (a) Tune kaa la itre atr enehila? (b) Nemene la hne së hna troa ce wang ngöne la tane mekune celë?

AME la itre atr enehila, angatr a thele jëne troa madrin. Ngo tha madrine pala hi angatr. Alanyim la itre atr enehila ka akötr me hace hni. Hna traqa fe lai kowe la itre hlue i Iehova. Pine laka, easa melëne la “itre drai ne la pun,” kola traqa koi së la itre jol, me itre mekun “hna thatreine xomihnin.”​—2 Tim. 3:1.

² Ame ngöne la tane mekune celë, tro sa ce wang la itre ewekë ka troa thapa la madrine së, memine la nyine tro sa kuca e pëhë madrine së. Ngo loi e tro sa pane atre ka hape, drei la Qane la nyipi madrin.

QANE LA NYIPI MADRIN

3. Ame la easa goeën la itre hna xup, nemene la ini hne së hna xom göi Iehova? (Goeëne ju fe la itre foto.)

³ Ka madrine pala hi Iehova. Nge aja i Nyidrë tro fe sa madrin. Celë hi hne së hna öhne ngöne la itre hna xup. Easa madrine troa goeëne la emingömingöne la ihnadro me itre han, memine la kola elo la itre öni, me ngöne la easa tupathe la ehnyapane la itre xen. Eje hi, tru la ihnimi Iehova koi së, nge aja i Nyidrë tro sa mele madrin!

Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images

4. (a) Pine nemene matre ka madrine Iehova, ngacama öhne hi Nyidrë la itre akötr ka traqa kowe la itre atr? (b) Nemene la hnei Iehova hna hamë së? (Salamo 16:11)

⁴ “Akötresie ka madrin” Iehova, ngacama öhne hi Nyidrë la itre akötr me itre jol ka traqa kowe la itre atr. (1 Tim. 1:​11) Pine nemene matre ka madrine pala hi Nyidrë? Pine laka, tha Nyidrëti kö a nue la itre ewekë cili troa thapa la madrine i Nyidrë. Atre hi Nyidrë laka, easenyi hë tro Nyidrëti a apatren itre ej. Nyidrëti pe a xomihni, me treqene hnyawane la ijin tro itre ej a patre palua. Nge ame la easa akötr, trotrohni së hi hnei Nyidrë, nge aja i Nyidrë troa xatua së. Troa tune kaa? Nyidrëti a hamë madrine koi së. (E jë la Salamo 16:11.) Tro sa ce wang la aqane hamë madrine Nyidrë koi Iesu.

5-6. Hnauëne la Iesu a madrin?

⁵ Pëkö ngöne la itre hna xup, ka madrin tui Iesu. Pine nemen? Hane hi la 2 kepin. (1) “Nyidrëti la hnaiji Akötresie ka tha mama kö,” matre ceitu hnyawa hi la aqane ujë i nyidrë me Iehova. (Kol. 1:​15; 1 Tim. 6:​15.) (2) Qea catre kö la ijine ce mele nyidrë me Iehova, lo Qane la madrin.

⁶ Madrine catre Iesu troa kuca la hnei Iehova hna upi nyidrë. (It. Ed. 8:​30, 31; Ioa. 8:​29) Matre madrine catre Iehova kowe la aqane mele nyipici i Iesu.​—Mat. 3:​17.

7. Tune kaa la aqane tro sa hetrenyi la nyipi madrin?

⁷ Tro fe së a hane madrin, e tro sa easenyi Iehova, Qane la madrin. Maine tro sa xomi ijin troa atre Iehova hnyawa, tro së lai a nyitipu Nyidrë, me madrin. Ame la easa kuca la aja i Iehova, me atre ka hape, Nyidrëti a kepe së, ke easa madrin.a (Sal. 33:12) Ngo tune kaa e kola hace la hni së? Kolo kö lai a hape, tha madrine kö Iehova koi së? Waea! Itre atr ka tha pexeje kö së, matre ame itre xaa ijin, easa akötr, me hleuhleu, me hace. Atre hi Iehova lai. (Sal. 103:14) Tro sa ce wang la itre ewekë ka troa thapa la madrine së, me aqane tro hmaca së a madrin.

THE NUE KÖ LA KETRE EWEKË TROA THAPA LA MADRINE I EÖ

8. Tune kaa la easa cil kowe la itre jole ne la mel?

⁸ Hnapan: Itre jole ne la mel. Hapeu, kolo kö a axösisi eö pine la lapaune i eö? Maine hna lepe la nöje i eö hnene la ketre hulö? Maine pena, eö a pë manie, maine wezipo, maine utipië trootro. Ijije hi tro la itre ewekë cili a thapa la madrine së, ke pëkö nyine tro sa kuca qëmekene lai. Celë hi matre, öni Tusi Hmitrötr, “kola ahacene la mekun, hnene la akötr.” (It. Ed. 15:13) Ame ngöne la 4 lao macatre, hna meci tretr la kem, me thin, me trejine i Babis ketre qatre thup. Öni angeic: “Kösë eni casi pe hi, nge pëkö ka atreine xatua ni. Ame itre xaa ijin, hace catre la hning, ke tha ase ju kö ni ce mele hnyawa me angatr, ke hetre jolenge pala hi.” Ijije hi tro la itre jole ka traqa ngöne la mele së a akucakucanyi së, me ahacene la hni së.

9. Nemene la ka troa xatua së troa madrin hmaca? (Ieremia 29:​4-7, 10)

⁹ Nemene la ka troa xatua së troa madrin hmaca? Tha tro kö sa seseu menu pine la itre jol ka traqa koi së, ngo tro pe sa hetre hni ne ole. Itre atre ne fen a mekun ka hape, tro sa madrin e ka tro loi la mele së. Ngo tha eje kö lai. Ame lo angetre Iudra e Babulona, tha ka hmaloi kö la mele i angatr. Ngo hnei Iehova hna upi angatr troa lapa hnyawa e cili, me thel troa hetre mel ka loi. (E jë la Ieremia 29:​4-7, 10.) Nemene la ini koi së? Ngacama tha nyipi loi kö la mele së, ngo loi e tro sa madrine kowe la itre ewekë hne së hna kapa, me olen. Ketre, the thëthëhmine kö laka, tha tro kö Iehova a nuetriji eö. (Sal. 63:7; 146:5) Hnei Effie hna aksida matre thatreine hë angeic tro. Öni angeic: “Tru catr la hnei Iehova hna xatua ni jëne la faming me ekalesiang. Ame la eni a madrin, ke eni hi lai a amamane la hni ne olenge koi angatr.”

10. Pine nemene matre ijije hi tro sa madrin, ngacama easa cil kowe la itre jol?

¹⁰ Ngacama tha ka loi kö la mele së, maine hna traqa la ketre jol koi së maine fami së, ngo ijije hi tro sa madrin.b (Sal. 126:5) Pine nemen? Pine laka, tha easë kö a madrin ke, ka lolo la mele së. Hane hi la hna qaja hnei Maria, ka pionie: “Ame la easa cil kowe la itre jol, easa madrin, ke easa mekun lo itre hnei Iehova hna thingehnaean. Tha kolo kö lai a qaja ka hape, tha tro kö sa treij, maine amamane la itre aliene hni së. Ngo Iehova a xatua së troa hetre madrin, ngacama easa akötr.” The thëthëhmine kö laka, ngacama tru ju hë la itre jole hne së hna melën, ngo tha ka huti kö itre ej. Ceitu itre ej me itre thupaca hune la hnangöni. Easenyi hë tro itre ej a patre palua.

11. Tune kaa la aqane tro la tulu i Paulo a ithuecatr koi eö?

¹¹ Nemene la nyine tro sa kuca e easa mekun ka hape, tha Iehova kö a kepe së? Pane mekune jë la itre hlue i Iehova ka mele nyipici ngöne la itre jol, tui Paulo aposetolo. Hnei Iesu hna ië angeic troa cainöjëne la nyipici “kowe la itre nöj, me itre joxu, me itre nekö i Isaraela.” (It. Hu. 9:​15) Ketre manathithi ka tru lai! Ame pe, tru la itre jol ka traqa koi angeic. (2 Kor. 11:​23-​27) Kolo kö lai a qaja ka hape, tha Iehova hmaca kö a kepe angeic? Waea! Kolo pe a amamane hnene la aqane catre i angeic laka, Iehova a amanathithi angeic. (Roma 5:​3-5) Matre tune kaa fe eö? Eö fe a catre mele nyipici ngöne la itre jol. Haawe, the luelue kö laka, Iehova a kepe eö.

12. Pine nemene matre tha madrine hë së e tha eatrëne kö së la itre xaa objectifs?

¹² Hnaaluen: Tha eatrëne kö së la hne së hna mekun. (It. Ed. 13:12) Pine laka, tru la ihnimi së koi Iehova, nge hetre hni ole së, matre easa thel troa eatrëne la itre objectifs ngöne la huliwa i Nyidrë. Ngo e tha ijiji easë kö, tro së lai a dekurag. (It. Ed. 17:22) Öni Holly ketre trejin ka pionie ka hape: “Eni ekö a pi sine la Ini Koi Itre Ka Cainöj (EER) me cainöj ngöne ketre nöj maine hane huliwa ngöne la hnë xupi uma e Ramapo. Ngo hetre ewekë ka saze ngöne la meleng, matre tha ijijinge hë troa eatrëne la itre objectifs cili. Dekurag hnyawa ni. Ame la easa pi kuca la itre ewekë, nge tha ijiji së pe, ke tha ka hmaloi kö.” Alanyimu la itre ka mekun tui Holly.

13. Nemene la nyine tro eö a kuca e tha ijiji eö kö troa huliwa atrune koi Iehova?

¹³ Nemene la ka troa xatua së troa madrin hmaca? The thëthëhmine kö laka, tha ka imusinë kö Iehova. Tha Nyidrëti kö a upi së troa kuca la hne së hna thatrein. Nge tha Nyidrëti kö a wangatrunyi së thenge la hnëqa së ngöne la organizasio i Nyidrë. Aja i Iehova tro sa mele nyipici, me atreine tulu ewekë. (Mika 6:8; 1 Kor. 4:2) Ka tru kö koi Nyidrë la ka ej e kuhu hni së, hune la itre huliwa hne së hna kuca. Matre hapeu, tro kö sa isine troa eatrëne la itre objectifs, nge tha ijiji së pe?c Waea! Matre e tha ijiji eö kö troa huliwa atrune koi Iehova, thele jë la itre objectifs ka ihmeku me eö. Ijiji eö kö troa xatuane la itre jeunes troa macaj, me ithuecatr kowe la itre qatre ne la ekalesia? Ijiji eö kö troa tuëne la ketre trejin, maine hë angeic, maine iupi fë message matre ithuecatr? Maine tro eö a isine troa eatrëne la itre objectifs cili, tro kö Iehova a amanathithi eö, me thue madrine i eö. The thëthëhmine kö laka, ame ngöne la fen ka hnyipixe, nyimu aqane tro sa nyihlue i Iehova! Öni Holly, lo trejin hne së hna qaja e kula: “Tro ni a mel utihë epine palua ngöne la fen ka hnyipixe. Matre tro kö Iehova a xatua ni troa eatrëne la itre objectifs elany.”

14. Nemene la ka troa thapa la madrine së?

¹⁴ Hnaakönin: Troa amë panëne la itre nyine iamadrinë. Itre xan a amamane ngöne la itre réseaux sociaux laka, tro sa madrin, e tro sa amë panëne la itre nyine iamadrinë. Matre ame itre xan, angatr pala hi a kuca la hnei angatr hna ajan, me itö, me kanothe la fene hnengödrai. Tha ka ngazo kö. Hnei Iehova hna xupi easë matre tro sa madrine kowe la itre ewekë cili. Ngo itre atr a öhne laka, kolo pe a thapa la madrine i angatr hnene la itre nyine iamadrinë. Öni Eva ka pionie, “Maine tro pala hi sa thele catrëne la itre nyine iamadrinë, tha tro kö së lai a mej hna thel.” Eje hi, e tro sa thele panëne la itre nyine iamadrinë, tro së lai a hleuhleu me dekurag.

15. Nemene la hna ini së hnei Solomona joxu?

¹⁵ Solomona joxu a amamane koi së la itre thangan e tro sa thele panëne la itre nyine iamadrinë. Hnei nyidrë hna thel la nyimu aqane troa madrin, tune la troa xen la itre xen ka hnyapa, me drei miuzik, me itöne la itre ewekë ka tru thupen. Nemene la thangane lai? Pëkö eloine la itre ewekë cili. Öni nyidrë: “Tha meji kö la alamek troa goeën; tha tiqa kö la hnangenyë troa dreng.” (A. Cai. 1:8; 2:​1-​11) Itre atr a mekun ka hape, tro angatr a madrin, e tro angatr a hetre mani me kuca la hnei angatr hna ajan. Ngo pu ne jidri lai! Tha tro kö la itre ewekë cili a thue madrine së.

16. Pine nemene matre tro sa madrin e tro sa xatua itre xan? (Goeëne ju fe la itre foto.)

¹⁶ Nemene la ka troa xatua së troa madrin hmaca? Öni Iesu lo, “Sisitria catre kö la madrine ne la atre ham, hune la atre kapa.” (It. Hu. 20:35) Öni Alekos ketre qatre thup: “Eni a thel troa xatua itre xan. Ngacama co hi la hnenge hna hamën, ngo eni a madrin, ke tha eni kö a mekun la itre sipu ajang.” Nemene la nyine tro eö a kuca koi itre xan? Maine eö a öhne la ketre atr ka akötr, thuecatrenyi angeice jë. Tha tro kö a patre la itre jole i angeic. Ngo tro eö a akeukawanyi angeic e tro eö a drei angeic hnyawa, me utipi angeic, me ithuecatr koi angeic troa nue la ehnefe i angeic koi Iehova. (Sal. 55:22; 68:19) Xatua angeice jë troa öhne laka, tha hnei Iehova kö hna nuetriji angeic. (Sal. 37:28; Isa. 59:1) Maine pena, hnëkë xeni jë koi angeic, maine ngenu sai angeice jë. Nge tro fe angeic a madrin e tro eö a ce cainöj me angeic. Haawe, nue Iehova pi troa akeukawanyi itre xan jëne eö. Tro sa madrin e tro sa meku itre xan, nge pine pë hë la itre sipu aja së!​—It. Ed. 11:25.

17. Nemene la nyine tro sa kuca matre troa madrin? (Salamo 43:4)

¹⁷ Maine tro pala hi sa easenyi Iehova, tro së lai a kapa la nyipi madrin. Öni Tusi Hmitrötr, Iehova “la Akötresie ne la nyipi madrineng.” (E jë la Salamo 43:4.) Matre e hetre jol hne së hna cile kow, tha tro pi kö sa xou. E tro pala hi sa meku Iehova, Qane la nyipi madrin, tro sa madrin utihë epin palua!​—Sal. 144:15.