Lue Xaa Trejin Ka Nyiatrene La Lapa Ne Xomi Meköt

AME lo 5 Okotropa 2024, ngöne lo icasikeu ka tru ne la macatre, hna thuemacanyi easë ka hape, ame trejin Jody Jedele me trejin Jacob Rumph, ke nyidroti ha sine la Lapa Ne Xomi Meköt Ne La Itre Temoë Iehova. Itre macatre ne mele nyipici nyidro koi Iehova.

Trejin Jedele: Hna hnaho nyidrë e Missouri (Etazini), nge hna hetru nyidrë ngöne la nyipici. Angatr a mel ngöne la ketre götrane laka, tha tru kö hnei Temoë. Matre hnei nyidrëti hna iatre memine la itre trejin ka traqa qa ngöne la itre xaa traon matre cainöj. Hna ketri nyidrë hnene la aqane ihnim me casi angatr. Ame lo 15 Okotropa 1983 hna bapataiso nyidrë, nge jeune pala kö nyidrë. Madrine catre nyidrë troa cainöj trootro, matre thupen la nyidrëti a sorti qa ngöne lycée lo Semitrepa 1989, hnei nyidrë hna xome la huliwa ne pionie lapa.

Ame lo co petre kö nyidrë me xa i nyidrë, hnene la kem me thine i nyidro hna lapa tro sai nyidro kowe la Bethela. Celë hi ka aciane la aja thei nyidro troa hane lö kowe la Bethela, nge eje hi lai hnei nyidro hna isa kuca e thupen. Hnei trejin Jedele hna lö kowe la Bethela e Wallkill lo Semitrepa 1990. Hnei nyidrëti hna pane kuci menag, nge e thupen hna upi nyidrë troa okupe la itre ka wezipo ngöne la Bethela.

Ame ngöne la itre ijine cili, kola aja trejin trahmany ngöne la itre ekalesia ka qene Espagnole. Matre hnei trejin Jedele hna saze ekalesia me inine la qene Espagnole. Thupene lai, hnei nyidrëti hna iöhnyi me Damaris ketre pionie ne la sirkoskripsio cili. Hnei nyidro hna faipoipo, nge hnei eahlo hna lö kowe la Bethela.

Ame lo 2005, hnei nyidroti hna tro qa ngöne la Bethela matre troa thupëne la kem me thine i nyidro, me xome la huliwa ne pionie lapa. Hnei trejin Jedele hna hamë ini ngöne la itre Ini Koi Itre Pionie, me sine la Komite Göi Itre Ejolen e Pital me Komite Ne Xupi Uma.

Ame lo 2013, hna hë trejin Jedele me föi nyidrë kowe la Bethela, matre troa sine la huliwa ne xupi uma e Warwick. E thupen, hnei nyidroti hna huliwa e Patterson me Wallkill. Hnei trejin Jedele hna huliwa ngöne la LDC me ngöne la buro ka hamë ithuemacany kowe la itre CLH e cailo fen. Ame hë lo Maac 2023, hna acili nyidrë troa atre ixatua ngöne la Komite Göi Huliwa Ne Cainöj. Ame la nyidrëti a mekune hmaca la itre hnëqa i nyidrë, öni nyidrë: “Easa xou la easa kapa la ketre hnëqa ka hnyipixe. Ngo kolo hnyawa hi lo ijine tro sa mejiune koi Iehova, ke Nyidrëti la ka aejën.”

Trejin Rumph: Hna hnaho nyidrë e Californie (Etazini). Ame lo nyidrëti a nekönatr, ka nanazij la thine i nyidrë, ngo hnei eahlo hna isine troa ini nyidrë la itre nyipici qa hnine la Tusi Hmitrötr. Ame e nöjei macatre, nyidrëti a wange la qaaqa i nyidrë ka mele nyipici. Eahlo la ka acian e kuhu hni nyidrë la ihnim koi Iehova, matre ame lo kola 13 lao macatre i nyidrë, hnei nyidrë hna sipone troa ini Tus. Ame lo 27 Semitrepa 1992, hnei nyidrë hna xomi bapataiso, ngacama jeune petre kö nyidrë. Madrine catre nyidrë, ke hnene la thine i nyidrë hna bëeke hmaca kowe la ekalesia, nge hna xomi bapataiso hnene la kem me itre trejin me nyidrë.

Ame lo Trejin Rumph a jeune, hnei nyidrë hna öhne la madrin ka ej thene la itre pionie. Celë hi matre, ame lo nyidrëti a sorti qa ne lycée, lo Semitrepa 1995, hnei nyidrë hna xom la huliwa ne pionie lapa. Ame lo 2000, hnei nyidrë hna fek a tro Équateur matre troa cainöj ngöne la itre götran gaa aja ixatua. Ame e cili, hnei nyidrëti hna iöhnyi me Inga, ketre pionie qa Canada, nge hnei nyidro hna faipoipo. Thupene la nyidroti a faipoipo, hnei nyidro hna lapa ngöne la ketre traon e Équateur laka, tha tru kö hnei itre ka cainöj. Ame enehila, hetre ekalesia hë e cili.

E thupen, hna acili Trejin Rumph me föi nyidrë troa pionie hut, nge hnei nyidrëti fe hna thupë sirkoskripsio. Ame lo 2011, hna hë nyidro troa sine la hna 132 Ini Ne Gileada. Thupene lai, hna upi nyidro koi nyimu götrane la fen, nge hnei nyidro hna huliwa ngöne la Bethela, me mesinare, me thupë sirkoskripsio. Hna hane acili Trejin Rumph troa hamë ini ngöne la Ini Koi Itre Ka Cainöj.

Ame la kola nyiqane la COVID-19, hnei Trejin Rumph me föi nyidrë hna bëek a tro Etazini. Hna hë nyidro troa huliwa ngöne la Bethela e Wallkill. Hnei Trejin Rumph hna kapa la formasio qaathene la Biero Thatraqane La Huliwa Ne Cainöj. E thupen, hna upi nyidro kowe la Bethela e Équateur, me acili nyidrë troa atrene la Filial. Ame lo 2023, hnei nyidro hna bëek a tro Warwick. Nge ame lo Januare 2024, hna acili Trejin Rumph troa atre ixatua ngöne la Komite Göi Huliwa Ne Cainöj. Ame la nyidrëti a mekun la itre götran hna upi nyidrëti kow, ke öni nyidrë, “Ame la ka mingöming, ke tha itre götrane kö, ngo itre trejin pe hnenge hna ce huliwa memin.”

Madrine catre së kowe la itre huliwa hna kuca hnene la itre trejin cili, nge easë pala hi a “hnim la itre atre ka tun.”​—Fil. 2:​29.