Mele Hë Së Hnene La Ihnimi Gufa i Akötresie
“Tha tro kö a musinë nyipunie hnei ngazo ; ke . . . nyipunieti . . . [e] fene la ihnimi gufa.”—ROMA 6:14.
1, 2. Nemene la aqane xatua së hnei Roma 5:12?
ÖNI Roma 5:12: “Traqa ha la ngazo kowe la fene hnengödrai hnene la ate ka cas, nge meci fe pine la ngazo ; tune lai hna traqa la meci kowe la nöjei ate asë, ke ngazo asë hë.” Ketre xötre lai hne së hna atre hnyawa, nge hne së hna majemine xome ngöne la easa inine la Tusi Hmitrötr memine la itre atr.
2 Anyimua mama la xötre celë ngöne la itus hna hape, Nemene La Nyipi Ini Hna Hamën Hnei Tusi Hmitrötr? Ame la easa traqa kowe la mekene 3, 5, me 6 la easa ini Tusi memine la itre nekö së me itre xan ju kö, easë fe a e la Roma 5:12. Easë fe a xome la xötre cili ngöne la easa xatua angatr troa trotrohnine la kepine matre tha paradraiso kö la ihnadro, memine la kepine matre ka nyipi ewekë koi së la thupene mel, me kepine fe matre easë mec. Ngo, eje fe a xatua së asë troa akökötrene la hni ne ole së ke, lolo la aqane imelekeu së me Iehova. Kolo fe a aijijë së troa catre amadrinë Nyidrë, me trengeneune pala hi la itre ewekë hnei Nyidrëti hna thingehnaeane koi së.
3. Nemene la nyine tro sa lapa mekun göne la pengö së?
3 Ngazo pe, itre atr ka ngazo asë hi së. Easa tria e nöjei drai, ngo ka ihnimi Iehova, nge ka utipin. Atre hnyawa hi Nyidrë ka hape, atr ka tha pexeje kö së, matre hetre aja i Nyidrë troa nue la ngazo së. (Salamo 103:13, 14) Öni Iesu, nyipi ewekë tro sa sipo Akötresie matre troa nue la itre ngazo së. (Luka 11:2-4) E ase hë Iehova nue la ngazo hne së hna kuca ekö, tha tro hmaca kö sa lapa mekun itre ej. Tro sa ce wange la aqane nue Iehova la itre ngazo së.
AQANE NUE LA NGAZO SË HNEI IEHOVA
4, 5. (a) Nemene la itre xa mekene la tusi Roma ka aijiji së troa trotrohnine la aliene la Roma 5:12? (b) Nemene la aliene la “ihnimi gufa”?
4 Jëne la mekene 6 ne la tusi Roma, easa öhne la aqane nue la ngazo së hnei Iehova. Ame ngöne la mekene 3, easa atre laka, “ngazo asë hë la nöjei ate.” Thupene lai, öni Paulo: “Ketre ahnahna la kola jele meköti angatre hnene la ihnimi gufa i Akötresie, ke hna itö mele hnei Keriso Iesu.” (Roma 3:23, 24, MN) Ame la qene Heleni ne la hnaewekë “ihnimi gufa” e celë tre, kola qaja la ewekë ka lolo catr hna kuca hnei ketre koi ketre, ngo tha hna mekune kö troa të koi angeic; ketre ahnahna hna hamëne gufan, ngacama tha ijije kö troa kapa.
5 Hnene la ketre atr ka inamacan hna qaja ka hape, ame la hnëewekë qene Heleni ka qaja la ihnimi gufa i Akötresie maine Keriso tre, kola qaja la hnei nyidroti hna kuca göi troa thapa la atr qa ngöne la ngazo me mec. Celë hi matre hnene la Traduction du monde nouveau hna ujëne la hnaewekë cili qene Heleni ka hape, “ihnimi gufa.” Tro sa ce wange la hna kuca hnei Akötresie thatraqai së, me aqane kepe thangane së la ihnimi gufa i Nyidrë enehila, me aqane thue mejiune së hnene ej kowe la itre drai elany.
Hnene la ihnimi gufa i Iehova, matre hetre jëne mel, ene Iesu Keriso
6. Drei la ka kepe thangane la ihnimi gufa i Akötresie, nge kola kepe thangane tune kaa?
6 Hnene laka hna eni Wathebo hnei Adamu, ame hna löthe la nöjei atr hnene la ngazo me mec. Matre, öni Tusi Hmitrötr, “joxu la meci hnene la ca menu ne la ka ala cas.” Ngo, hnene la ihnimi gufa i Iehova, matre hetre jëne mele jë kowe la nöjei atr, ene “la ate ka ala cas, . . . Iesu Keriso.” (Roma 5:12, 15, 17) “Troa jele mekötine la ka ala nyimu hnene la idei ne la ka ala cas.” Matre, ijiji angatre hë troa mejiune kowe “la mele ka tha ase palua kö, jëne Iesu Keriso.”—Roma 5:19, 21.
7. Pine nemene matre hatrene ihnim ka tru la ahnahna qaathei Akötresie, ene la thupene mel?
7 Pane mekune ju: Tha qanyi Nyidrëti kö ekö troa hamëne la nekö i Nyidrë nyine thupene mele ne la itre atr. Matre, hatrene la ihnimi ka tru i Nyidrë la Nyidrëti a thele jëne troa amele së qa ngöne la ngazo me mec. Ketre ahnahna ka tru la hnei Iehova me Iesu hna kuca gufan koi së matre tha ijiji së kö troa kapa. Celë hi matre, ketre manathithi ka tru koi së laka, ijije hë troa seng la itre ngazo së, me aijijë së troa mel epine palua! Amamane jë la hni ne ole së koi Akötresie jëne la aqane mele së.
IHNIMI GUFA I AKÖTRESIE—OLENE JË
8. Nemene la mekune nyine tro sa thipetrij?
8 Atre hnyawa hi së laka, aja i Akötresie troa seng la itre ngazo së, memine fe la itre ngazo ka tru. Ngo, tha tro pi kö sa xome la ihnimi gufa i Iehova matre troa kuca la ngazo, me mekune ka hape, ‘Tro kö Iehova a nue la ngazong.’ Ame ngöne la hneijine i ange aposetolo, hetre itre keresiano ka mekune tune lai. (E jë la Iuda 4.) Matre, loi e tro sa thupëne enehila wanga amenu së jë hnei itre xan, me hane traqa koi së la mekune cili.
9, 10. Nemene la aqane amele Paulo me itre xan qa ngöne la ngazo me mec?
9 Öni Paulo kowe la itre keresiano ka hape, tha meköti kö troa mekune ka hape, tro pala hi Akötresieti a nue la itre ngazo i angatr e tro angatr a catre kuca la ngazo. Öni angeic, loi e tro angatr a thipetrij la mekune celë ke “ame göi ngazo tre, meci hë [angatr].” (E jë la Roma 6:1, 2.)[1] (Wange ju la ithuemacanyi e kuhu pun.) Nemene la aliene la ithanata i angeic?
Tro sa kei thenge la itre mekune me aja së ka ngazo, maine tro sa isa xomehnöth itre ej
10 Jëne la thupene mel, hnei Akötresie hna nue la ngazo i Paulo me itre xa keresiano ekö. Angatr la itre atr hnei Iehova hna iëne ekö hnei uati hmitrötr matre itre nekö i Nyidrëti fe hë angatr. E hnei angatr hna mele nyipici koi Nyidrë, tro hë angatr a ce musi me Keriso e hnengödrai. Ngo pine laka, angatre pala kö a mel e celë fen ngöne la ijine cili, hnauëne laka, qaja jë Paulo ka hape, “ame göi ngazo tre, meci hë së”? Hnei Paulo hna xome la ketre ceitun matre troa amamane laka, saze hnyawa ha la aqane mele i angatr. Öni angeic thupene la hna meci hnei Iesu, hna amele nyidrëti hmaca matre troa mel ceitu me u ka tha tro kö a hane mec. Matre, ‘tha musi hë la mec hui nyidrë.’ Ketre tune fe la itre keresiano, kösë meci hë angatr. Saze hnyawa ha la mele i angatr ke, tha angatre hmaca kö a nue la itre aja ka ngazo troa musinë angatr. Ame e cili, angatr a isine troa mel thenge la aja i Akötresie. ‘Meci hë angatr kowe la ngazo, ngo mele kö angatr koi Akötresie jëne Iesu Keriso.’—Roma 6:9, 11.
11. Kola hapeu kowe la itre keresiano enehila la hna hape, “ame göi ngazo tre, meci hë së”?
11 Nge tune kaa fe së itre ka mejiune troa mel epine palua e celë fen? Kola hapeu koi së la kola hape, “ame göi ngazo tre, meci hë së”? Ame ekö, hetre itre ewekë ka ngazo hne së hna kuca, nge thatre kö së la aqane goeëne Iehova la itre huliwa së. Ceitu i easë me itre atr ka “nyi hlue ne la thina ka sisi memine la tha idei,” kola qaja la troa “nyi hlue ne la ngazo.” (Roma 6:19, 20) Ngo, ame la easa atre qa hnine la Tusi Hmitrötr la aja i Iehova tro sa mel, easë e cili a saze amekötine la mele së, me sa xepu koi Nyidrë, me xomi bapataiso. Tru la aja së troa drengethenge Iehova, me mele thenge la aja i Nyidrë. Matre ‘mele hë së qa ngöne la ngazo,’ nge “ite hluenë hë la thina ka meköt.”—Roma 6:17, 18.
12. Nemene la mekune nyine tro sa isa axeciën?
12 Ngo, hetre mekune nyine tro pala hi së a isa axeciën. Öni Paulo: “The joxu kö la ngazo ngöne la ngönetei nyipunie ka troa mec, ene la denge thenge hnei nyipunie la ite aja ne ej.” (Roma 6:12) Matre, hetre nyine tro sa kuca, ene la troa kei thenge la itre mekune me aja së ka ngazo, maine pena tro sa isa xomehnöth itre ej. Isa waipengöi epuni jë me hape: ‘Eni kö a nue la itre ajang ka ngazo troa kökötr e kuhu hning uti hë la eni a kuca itre ej? Maine pena, eni kö a canga lepe trij itre ej?’ Maine atraqatr la hni ne ole së kowe la ihnimi gufa i Akötresie, tro së lai a isine troa amadrinë Nyidrë.
ISI JË MEMINE LA NGAZO
13. Nemene la ka aijiji së troa kuca la meköt?
13 Ame ngöne lo hneijine la itre pane keresiano, hetrenyi ekö e Korinito la itre ka atrekënö, me itre ka qene sodroma (trahmanyi ka ce meköl me trahmanyi, maine föe ka ce meköl me föe), me itre ka nyi xetë, me itre ka thili koi idrola, me itre ka hmo hnei ka haitr. Ngo, ame hë la angatre a atre Iehova, me hnimi Nyidrë, ujë pi hi angatr. Hmahma ha angatr pine la hnei angatr hna majemine kuca ekö. (Roma 6:21; 1 Korinito 6:9-11) Nyipi ewekë fe tro la itre keresiano ne Roma a amekötine la mele i angatr. Öni Paulo koi angatr: “The nuejë kö la ite hnepe ngönetei nyipunie kowe la ngazo nyine ite jia ne la thina ka tha meköti kö ; ngo nue nyipunieti pi koi Akötesie, tui ange ka mele hmaca qa hna mec, nge ite hnepe ngönetei nyipunie nyine ite jia ne la thina ka meköti koi Akötesie.” (Roma 6:13) Ame koi Paulo, ijiji angeic troa kuca la meköt, me kepe thangane pala hi la ihnimi gufa i Akötresie.
14, 15. Tro së a isa waipengö së tune kaa?
14 Ketre tune mina fe enehila, hetrenyi la itre trejin ka mel tune la itre trejin ne Korinito ekö. Ngo ame la angatr a atre Iehova, ujë pi hi angatr, kösë hna awië angatr. Hne së asë hi hna saze amekötine la mele së matre troa amadrinë Iehova. Easë fe enehila a amamane la hni ne ole së kowe la ihnimi gufa i Akötresie. Matre eje hë e kuhu hni së troa lepetrij la itre aja së ka ngazo, me nue la mele së kowe la huliwa i Iehova.
15 Eje hi laka, tha tro kö sa kuca la itre ngazo hna kuca hnene la itretre Korinito. Thatreine kö tro sa ujë tune lai me mekune ka hape, tro sa kapa la ihnimi gufa i Akötresie, nge tro fe Nyidrëti a nue la ngazo së. Ngo tune kaa la itre ngazo hna mekune laka, itre ngazo ka co? Eje kö e kuhu hni së troa drengethenge Iehova ngöne la nöjei götrane la mele së?—Roma 6:14, 17.
16. Pine nemene matre tha itre ewekë ka mama hmekuje kö ngöne 1 Korinito 6:9-11 la nyine tro sa thipetrij?
16 Pane mekune ju la pengöi Paulo aposetolo. Öni angeic: “Ate ne ngönetei kö ni, hna itöne kowe la ngazo. Ke ame la hnenge hna kuca, te, tha ’te kö ni ; ke tha kuca kö ni la hneng hna ajan ; loi pe la hnenge hna methinën, celë hi hnenge hna kuca.” (Roma 7:14, 15) Maine nyipici laka, tha angeice kö a kuca la itre ewekë ka mama ngöne 1 Korinito 6:9-11, ngo atrehmekune pala hi angeic ka hape, atre ka tria angeic. Tru la aja i angeic troa amadrinë Iehova, ame hnei angeic hna isine matre tha tro kö angeic a kuca la ngazo. (E jë la Roma 7:21-23.) Catre jë së nyitipune la tulu i angeic, me isine troa drengethenge Iehova.
17. Pine nemene matre hetre aja së troa huliwa nyipici?
17 Atre hi easë lo ka hape, nyipi ewekë tro sa huliwa nyipici matre troa nyihlue i Iehova. (E jë la Ite Edomë 14:5; Efeso 4:25.) Tha aja së kö troa ujë tui Satana, “keme ne [la thoi].” Mekune pala kö së lo laka, hna meci hnei Anania me föi angeic pine nyidroti thoi. Haawe, the tro pi kö sa thoi. (Ioane 8:44; Ite Huliwa 5:1-11) Ngo, loi e tro fe sa huliwa nyipici ngöne la itre xa götrane la mele së e hetre hni ne ole së kowe la ihnimi gufa i Akötresie.
18, 19. Nemene la aliene la kola hape, troa nyipici?
18 Hetre itre ijine laka, tha easë kö a nyipici, ngacama tha hne së kö hna thoi. Öni Iehova kowe la angetre Isaraela: “The tro kö nyipunie a ënö, nge the hnihni [maine, iaö] kö, nge the thoi kö hnei kete ate koi kete.” Pine nemene matre nyipi ewekë tro angatr a trongëne lai? Öni Iehova: “Hmitöteju nyipunie ; ke hmitöte ni Iehova Akötesi nyipunie.” (Levitiko 19:2, 11) Maine nyipici laka, tha hne së kö hna thoi, ngo ame pe, e tro sa qaja la itre ithanata matre tro pë hë itre xan a mekune menune koilo, tha easë kö lai a nyipici.
Thupëne kö wanga thoi jë me iaö (Wange ju la paragarafe 19)
19 Kola qaja hnene la ketre atr kowe la maseta me kowe la itre sine huliwa i angeic ka hape, angeic a troa canga nue huliwa göi troa wai droketre. Ngo, angeice hi a troa nyithupene maine pena, troa xomi drösinöe ngöne farmasi. Matre tha sipu kepine kö lo hna qaja, ngo göne hi matre troa canga nue huliwa. Hapeu, aqane ujë ne atr ka nyipici lai maine ka iaö? Hnene lai atr hna thele jëne matre tro la itre atr a jele nyipicine la ketre ewekë ka thoi. Ame itre xa ijin, itre atr a amenune la itre xan matre tro angatr a kapa la ketre ewekë hnei angatr hna thel, maine pena matre tha tro kö a tranyi angatr. Ngo, ame easë, easa drengethenge Iehova, öni Nyidrë: “The hnihni [maine, iaö] kö.” Easa thele troa kuca la ka meköt me ka hmitrötr koi Nyidrë.—Roma 6:19.
20, 21. Nemene la itre ewekë nyine tro sa ananyin?
20 Nyipici laka, tha easë kö a nyixetë, me hmo hnei ka haitr, me itre xa ewekë ju kö ka ngazo. Ngo, loi e tro fe sa ananyine la nöjei ewekë hna xelen hnei Iehova. Ka tune la troa kuci huliwa ka sis, loi e tro sa ananyine la nöjei nyine iamadrinë ka amamane la itre iatr ka sis. Ka tune fe la troa hmo hnei kahaitr, tha loi kö troa ij uti hë la drenge së ka hape, nango hmo hë së. Loi e tro sa thele troa cile catr ngöne la itre itupath ka tune la, ke ijije hi.
21 Haawe, thele jë së troa eatrëne la hna qaja hnei Paulo ka hape: “The joxu kö la ngazo ngöne la ngönetei nyipunie ka troa mec, ene la denge thenge hnei nyipunie la ite aja ne ej.” (Roma 6:12; 7:18-20) Nyipici laka, thatreine kö së troa kötrene la nöjei huliwa ka ngazo, ngo e hne së hna isine troa cile catr qëmekene la nöjei itupath, easë hi lai a amamane ka hape, hetre hni ne ole së kowe la ihnimi gufa i Akötresie me Iesu.
22. Nemene la thupene koi së, e hetre ole së kowe la ihnimi gufa i Iehova?
22 Iehova a nue la ngazo së, nge tha mano kö Nyidrë ujë tune lai. Tru la ole së kowe la ihnimi gufa i Nyidrë! Haawe, catre jë së ananyine la itre ewekë hnei Nyidrëti hna methinëne, ngacama itre ewekë lai hna goeën aloine hnei itre xan. Nemene la thupene koi së, e hne së hna ujë tune lai? Öni Paulo: “Enehila gufa ha nyipunie ene la ngazo, nge ite hlue i Akötesieti hë, hetenyi hë nyipunie la ite wene i nyipunie uti hë e hmitöt, nge mele ka tha ase palua kö la pun.”—Roma 6:22.