Ame la aqane troa amamane la ihnimi së kowe la itre trejin, ke ene la troa nyisinee i angatr. (2 Kor. 6:​11-​13) Ame ngöne la ekalesia, isa nöje i easë kö, nge isa aqane hetru easë kö. Tro së lai a hnime la itre trejin e tro sa goeëne la itre thiina i angatr ka lolo. Ame la easa goeëne la itre trejin tune la aqane goeë angatr hnei Iehova, ke easë hi lai a hnimi angatr. Nyipiewekë tro sa hnime la itre trejin ngöne la ijine akötr atraqatr. Nge ekaa la hnë tro sa zae ngöne la ijine cili? Tro sa ce wange la hnei Iehova hna qaja kowe la nöje i Nyidrë ngöne lo kola apatrenyi Babulona ekö. Öni Nyidrë: “Trojë fe, nöjeng; löjë kowe la hnahage i ’ö, nge thingeju la qëhnelö thupe i ’ö, nge [zae ju utihë] patë hë la elëhni.” (Isa. 26:20) Thatraqai easë fe la itre trengewekë celë, itre ka troa melëne la akötr atraqatr. w23.07 6-7 par. 14-​16

Isa hnyinge jë ka hape: ‘Tune kaa la aqane goeë ni hnei itre xan? Angatre kö a goeë ni tune la ketre atr, ka atreine tulu ewekë, me ka itrotrohni? Maine angatre pena goeë ni tune la ketre atr, ka catre fë mekun, me ka catre he? Eni kö a hane dreng, me kapa la mekuna i angatr?’ Ame la easa atreine tulu ewekë ke, easë hi lai a nyitipu Iehova me Iesu. Nyipiewekë tro sa atreine tulu ewekë, la kola saze la mele së. Ame cili, easa qëmeke kowe la itre jol ka hnyipixe. Alanyim la itre atr ka sesëkötr, la kola tithi angatr hnene la ketre mec ka pëkö nyin. Maine pena, kola pë mani la nöj, maine kola saze pena la mus. Tro la itre ewekë cili, a saze la mele së. (A. Cai. 9:​11) Tro fe lai a jole koi së, e troa saze la hnëqa së ngöne la organizasio. Ngo e tro sa trongëne la 4 lao ewekë e cahu, ke tro sa atreine cile catr: (1) kapa ju la itre ewekë ka saze ngöne la mele i epun, (2) the mekune hmaca kö lo mele i epuni ekö, (3) goeëne jë la itre ewekë ka loi ka traqa koi epun, nge (4) xatuane jë la itre xan. w23.07 21-​22 par. 7-8

Nekötrahmanyi ka co palakö Daniela, lo kola othi angeic me xomi angeic qa Iudra a tro Babulona. Kola hai angeic ngacama ka co petre kö angeic. Hnene la itre hene ka tru e Babulona hna canga “[goeëne] la ka mama.” Hnei angatr hna öhne laka, ketre nekötrahmanyi ‘ka mingöming’ Daniela, nge ketre matra i joxu. (1 Sam. 16:7) Celë hi matre hnei angeic hna hane sine la itre ini hna hamën hnei angetre Babulona, göne troa cilëne la itre hnëqa ka tru e cili. (Dan. 1:​3, 4, 6) Iehova a hnimi Daniela, ke ketre nekötrahmanyi ka loi thiina angeic. Maine jë 20 petre hi lao macatre i Daniela, lo Iehova a qeje angeic ka hape, ketre atr ka meköti tui Noa me Iobu. Ngacama itre macatre ne mele nyipici Noa me Iobu, ngo ame koi Iehova, ceitu i Daniela hi me nyidro. (Gen. 5:​32; 6:​9, 10; Iobu 42:​16, 17; Ezek. 14:14) Nge hnei Iehova hna hnimi Daniela utihë la angeic a mec.​—Dan. 10:​11, 19. w23.08 2 par. 1-2