Sabath 14 Semitrepa
Tro hë nyipunie a trotrohnine hnyawa la eisaisan, me eqean, me edraiën, me ejuine la nyipici.—Efe. 3:18.
Ame la epuni a troa itöne la ketre uma, ke aja i epun troa pane goeëne hnyawane la pengöne lai uma. Celë fe hi aqane tro sa e me inine la Tusi Hmitrötr. Maine tro epuni a e nyimenyimën, ke tro hi epuni a öhne la itre ini ka tëtë, kolo “itre pane ini ne la trengewekë i Akötresie.” (Heb. 5:12) Ngo tune lo uma e kula, loi e tro epuni a pane goeëne hnyawan maine thel ajuin, matre trotrohnine la hna qaja hnei Tusi Hmitrötr. Ame la ketre aqane tro sa ini Tus, ke ene la troa thel la aqane ce tro la itre igötranene la Tusi Hmitrötr. Thele jë troa trotrohnine la itre nyipici hnei epun hna mejiune kow, memine fe la itre kepin matre epun a mejiun kowe la itre ini cili. Maine easa ajan troa trotrohnine hnyawane la hna qaja hnei Tusi Hmitrötr, hetre nyipici nyine tro sa thel ajuin. Hnei Paulo aposetolo hna ithuecatr kowe la itre trejin troa inine hnyawane la Tusi Hmitrötr matre tro angatr “a trotrohnine hnyawa la eisaisan, me eqean, me edraiën, me ejuine la nyipici.” E cili, tro hë angatr a “cia waan, me fedr kowe la trepen ne la lapaun.” (Efe. 3:14-19) Celë fe hi nyine tro sa kuca. w23.10 18 par. 1-3
Thupenehmi 15 Semitrepa
Ange trejin, xomi tulu jë thene la itre perofeta ka ithanata ngöne la ëje i Iehova, ke hnei angatre hna xomiakötr me itreqe.—Iako. 5:10.
Hetre itre hlue i Iehova hna qaja e hnine la Tusi Hmitrötr ka hane xomihni. Wange ju la tulu i angatr, la epuni a ini Tusi cas. Tui Dravita, hna ië nyidrë troa joxu ne Isaraela, lo nekönatre petre kö nyidrë. Ngo qëmeken troa acili nyidrë ke, itre macatre hnei nyidrëti hna pane itreqe. Maine pena, la tulu i Simeona me Ana. Hnei nyidroti hna catre huliwa i Iehova utihë la nyidroti a öhne la Mesia. (Luka 2:25, 36-38) Ame la epuni a ini Tusi cas, ke sa jë la itre hnyinge celë: ‘Nemene la ka xatua angeic troa itreqe? Nge nemene la thangane lai koi angeic? Tro ni a nyitipu angeic tune kaa?’ Hetre ini fe nyine tro epuni a xome qaathene la itre atr ka thatreine itreqe. (1 Sam. 13:8-14) Hnyinge jë ka hape: ‘Hnauëne laka, tha hnei angatr kö hna xomihni? Nge nemene la pune koi angatr?’ w23.08 25 par. 15
Draiangedic 16 Semitrepa
Hne huni hna mejiun me kapa laka, nyipëti hi la Atre Ka Hmitrötre i Akötresie.—Ioa. 6:69.
Ketre atr ka mele nyipici Peteru, ke tha hnei angeice kö hna nue la ketre ewekë troa sewe angeic troa xötrethenge Iesu. Celë hi ka mama lo Iesu a qaja la ketre ithuemacany hna tha trotrohnine hnene la itre xaa atre dreng. (Ioa. 6:68) Alanyimu e cili ka trotriji Iesu, ngo tha Peteru fe kö. Xecie koi angeic laka, thei Iesu hmekuje hi la “itre trengewekë ne mele ka pë pun.” Atre hi Iesu ka hape, tro Peteru me itre xaa aposetolo a nuetriji nyidrë lo jidr tixenuë i nyidrë e celë fen. Ngo ka mejiune Iesu koi Peteru, ke öni nyidrë, tro hmaca kö angeic a bëek me mele nyipici koi nyidrë. (Luka 22:31, 32) Trotrohnine hi Iesu laka, “canga ajane hi la hni, ngo kucakuca pe la ngönetrei.” (Mar. 14:38) Celë hi matre, tha hnei nyidrëti kö hna nuetriji Peteru thupene la angeic a qaja ka hape, thatre nyidrëti kö hnei angeic. Thupene la kola amele nyidrëti hmaca, hnei nyidrëti hna pane wai angeic. (Mar. 16:7; Luka 24:34; 1 Kor. 15:5) Hna akeukawanyi Peteru, ke tru catr la akötre i angeic la ijine cili! w23.09 22 par. 9-10