Draiangedic 16 Semitrepa
Hne huni hna mejiun me kapa laka, nyipëti hi la Atre Ka Hmitrötre i Akötresie.—Ioa. 6:69.
Ketre atr ka mele nyipici Peteru, ke tha hnei angeice kö hna nue la ketre ewekë troa sewe angeic troa xötrethenge Iesu. Celë hi ka mama lo Iesu a qaja la ketre ithuemacany hna tha trotrohnine hnene la itre xaa atre dreng. (Ioa. 6:68) Alanyimu e cili ka trotriji Iesu, ngo tha Peteru fe kö. Xecie koi angeic laka, thei Iesu hmekuje hi la “itre trengewekë ne mele ka pë pun.” Atre hi Iesu ka hape, tro Peteru me itre xaa aposetolo a nuetriji nyidrë lo jidr tixenuë i nyidrë e celë fen. Ngo ka mejiune Iesu koi Peteru, ke öni nyidrë, tro hmaca kö angeic a bëek me mele nyipici koi nyidrë. (Luka 22:31, 32) Trotrohnine hi Iesu laka, “canga ajane hi la hni, ngo kucakuca pe la ngönetrei.” (Mar. 14:38) Celë hi matre, tha hnei nyidrëti kö hna nuetriji Peteru thupene la angeic a qaja ka hape, thatre nyidrëti kö hnei angeic. Thupene la kola amele nyidrëti hmaca, hnei nyidrëti hna pane wai angeic. (Mar. 16:7; Luka 24:34; 1 Kor. 15:5) Hna akeukawanyi Peteru, ke tru catr la akötre i angeic la ijine cili! w23.09 22 par. 9-10
Draihnacian 17 Semitrepa
Madrine la itre atr hna nue ngazon, me itre hna köletriji ngazon.—Roma 4:7.
Iehova a nu, maine köletrij la ngazo ne la itre ka lapaune koi Nyidrë. Nyidrëti a nue hnyawan, me thëthëhmine la itre ngazo cili. (Sal. 32:1, 2) Pine la lapaune i angatr, matre ame koi Nyidrë, itre atr ka meköt, nge ka pë engazon angatr. Ngacama tha ka pexeje kö Aberahama, me Dravita memine la itre xaa hlue i Nyidrë, ngo hnei Nyidrëti hna jelemeköti angatr. Pine laka, itre ka lapaun angatr, matre ame koi Iehova, pëkö engazo i angatr. Tha ceitui angatre kö memine la itre ka tha nyihlue i Nyidrë. (Efe. 2:12) Tune la aqane qaja i Paulo aposetolo ngöne la tusi angeic, ka nyipiewekë la lapaun matre troa hetre imelekeu me Akötresie. Ame Aberahama me Dravita, ke lue sinee i Iehova, ke nyidro a lapaun koi Nyidrë. Ijiji easë asë hi troa hane tui nyidro. w23.12 3 par. 6-7
Draikaco 18 Semitrepa
The mano kö së huujëne koi Akötresie la itre huuj ne iatruny, ene la wene ne la itre ineqë së, itretre anyipicin la ëje i nyidrë qëmekene la ka ala nyim.—Heb. 13:15.
Ame enehila, ijiji easë asë troa tro fë huuj koi Iehova, ngöne la easa hamëne la traem, me trengecatr, me manie së thatraqane la itre huliwa ne la Baselaia i Akötresie. Easa amamane laka, easa wangatrune la hmi së koi Iehova ngöne la easa kuca asë la hne së hna atrein ngöne la huliwa i Nyidrë. Paulo a qaja la itre götran ne la hmi nyine tro palahi sa eatrën. (Heb. 10:22-25) Kola qaja la troa thith koi Iehova, me cainöj koi itre xan, me catre sine la itre icasikeu matre itö ithuecatrekeu ke, “calemi hë la drai i Akötresie.” Ame ngöne la pune la tusi Hna Amaman, önine la angela i Akötresie: “Nyihlue i Akötresieti jë!” (Hna Am. 19:10; 22:9) Alua qaja jë kö la angela, nyine amamane la enyipiewekën la eamo cili. Wangatrune jë së la hmi së koi Akötresie, nge the tro kö sa thëthëhmine la itre ini ka jui göne la uma ne hmi ka tru i Iehova! w23.10 29 par. 17-18