Aqane Troa Eköthe Hnyawa La Itre Thithi Së

1. Nemene la hnei Iehova hna upi së troa kuca? (Wange ju fe la iatr.)

DREI la atre hne së hna canga wang la easa aja ixatua? Atre asë hi së lai atre cili. Ijije hi tro sa easenyi Iehova jëne la thith. Celë hi hnei Nyidrëti hna upi së troa kuca. Aja i Nyidrë tro sa catre thith, matre “the mano kö thith.” (1 Thes. 5:17) Ijije hi tro sa qaja asë koi Iehova, me sipo Nyidrë troa xatua së ngöne la nöjei götrane la mele së. (Ite edomë 3:5, 6) Pine laka Akötresieti ka ham Iehova, Nyidrëti a nue së troa hë Nyidrëti ngöne la nöjei ijin.

2. Nemene la hne së hna troa ce wange ngöne la tane mekune celë?

² Ka tru koi easë la thith. Ngo ame itre xaa ijin, tru palaha la itre jole së matre pëkö ijine i easë troa thith. Ketre, easa öhne ka hape, ka tëtë hi la itre thithi së. Eloine pe, Tusi Hmitrötr a hamë së la itre eamo ka troa xatua së. Ame ngöne la tane mekune celë, tro sa ce wange la aqane tro sa xomi ijin troa thith tui Iesu. Tro fe sa ce wange la 5 lao ewekë nyine tro sa qaja matre lolo me jui la itre thithi së.

HNEI IESU HNA AMI IJIN TROA THITH

3. Nemene la hna atre hnei Iesu göne la thith?

³ Atre hi Iesu laka, ka nyipiewekë koi Iehova la itre thithi së. Qëmeken tro nyidrëti a uti a tro celë fen, hnei nyidrëti hna öhnyi Iehova a sa la itre thith ne la itre hlue i Nyidrë. Ce Iesu me Iehova lo Nyidrëti a sa la thithi Hana, me Dravita, me Elia, me itre xane ju kö. (1 Sam. 1:10, 11, 20; 1 Ite jo. 19:4-6; Sal. 32:5) Celë hi matre hnei Iesu hna upe la itretre drei nyidrë troa thithi lapa ce memine la lapaun!​—Mat. 7:7-11.

4. Nemene la tulu hnei Iesu hna hamë së göne la thith?

⁴ Tulu ka lolo la hnei Iesu hna hamën kowe la itretre dreng. Ame lo nyidrëti e celë fen, ke ka thithi lapa nyidrë. Ngacama tru hnei huliwa i Iesu, nge tru hnei atr ka xötrethenge nyidrë, ngo hnei nyidrëti palahi hna ami ijin troa thith. (Mar. 6:31, 45, 46) Ame lo ketre ijin, hnei nyidrëti hna ihlë hmakanyi matre troa pane lapa cas me thith. (Mar. 1:35) Hnei nyidrëti fe hna thith jidri ka pexej, qëmeken troa axeciën la ketre mekun ka tru. (Luka 6:12, 13) Ame lo jidr tixenuë i nyidrëti e celë fen, qëmeken troa humuthi nyidrë, ke hnei nyidrëti hna anyimua thith.​—Mat. 26:39, 42, 44.

5. Tro sa nyitipu Iesu tune kaa?

⁵ Hetre ini hne së hna xom qa ngöne la tulu i Iesu. Ngacama tru ju hë hnei huliwa së, ngo loi e tro palahi sa ami ijin troa thith. Maine jë, tro së lai a canga hlë e hmahmakany maine tro pena sa thithi e hej. Easë hi lai a amamane koi Iehova laka, ka sisitria la ahnahna cili qaathei Nyidrë. Tha thëthëhmine kö Lynne, ketre trejine föe la ijine angeic a atre ka hape, ijiji angeic troa ithanata koi Iehova jëne la thith. Öni angeic, “Ame la eni a atre ka hape, ijijinge hi troa ithanata koi Iehova e nöjei ijin, ke celë hi ka xatua ni troa goeë Nyidrë ceitu me ketre Sineeng. Nge kolo fe a thue aja koi ni troa hnëkë hnyawane la itre thithing.” Ma casi hi la mekuna së me Lynne. Tro pena sa ce wang la 5 lao ewekë nyine tro sa qaja ngöne la easa thith.

FAIF LAO EWEKË NYINE TRO SA THITHI FË

6. Thenge la Hna Amaman 4:10, 11, nemene la nyine tro Iehova a kapa?

⁶ Atrunyi Iehova jë. Hnei Ioane aposetolo hna meköle goeëne la 24 lao qatr ka atrunyi Iehova e koho hnengödrai. Angatr a atrunyi Nyidrë me qaja ka hape, “Ijiji nyipë . . . troa kapa la lolo, me iatruny, me men.” (E jë la Hna Amaman 4:10, 11.) Nyimu kepin matre itre angela fe a nyihlue i Iehova me atrunyi Nyidrë. Ce angatr me Nyidrë e koho hnengödrai matre atrepengöi Nyidrëti hnyawa hi hnei angatr. Öhne hi angatr la itre thiina i Nyidrë ngöne la itre ewekë hnei Nyidrëti hna xup. Nge ame la angatr a öhne la aqane ujë i Nyidrë, ke kola uku angatr troa atrunyi Nyidrë.​—Iobu 38:4-7.

7. Pine nemene matre easa atrunyi Iehova?

⁷ Aja i easë fe troa atrunyi Iehova ngöne la itre thithi së, me qaja la itre ewekë hne së hna hain thei Nyidrë. Ame la epuni a e me lapa mekune la Tusi Hmitrötr, thele jë la itre thiina i Iehova. Nemene la itre thiina i Nyidrë ka ketri epun? (Iobu 37:23; Rom. 11:33) Qaja jë koi Nyidrë la itre thiina ka ketri epun, memine la kepin matre kola ketri epun. Loi e tro mina fe sa atrunyi Iehova pine la itre hnei Nyidrëti hna kuca koi së me kowe la itre trejin. Nyidrëti palahi a thupë së me hnimi së.​—1 Sam. 1:27; 2:1, 2.

8. Qaja jë la itre ewekë nyine tro sa olene koi Iehova. (1 Thesalonika 5:18)

⁸ Olene jë koi Iehova. Nyimutre catre la itre ewekë nyine tro sa olene koi Nyidrë. (E jë la 1 Thesalonika 5:18.) Nyipici, loi e tro sa olene koi Iehova la nöjei ewekë hne së hna kapa, ke qaathei Nyidrë la nöjei loi. (Iako. 1:17) Olene jë kowe la emingömingöne la ihnadro, kowe la itre hna xup, me kowe la fami së, me itre sinee së, memine la mel me mejiune hnei Nyidrëti hna hamë së. Ketre, loi e tro mina fe sa olene koi Nyidrë la hna aijijë së troa imelekeu me Nyidrë.

9. Pine nemene matre tha ka hmaloi kö troa hetre hni ne ole koi Iehova?

⁹ Eje hi, tha ka hmaloi kö troa hetre hni ne ole koi Iehova, me canga öhne la itre kepin matre loi e tro sa olene koi Nyidrë. Pine nemen? Ke easa mele ngöne la fen laka, ame la itre atr, ka pë hni ne ole. Ame la ka tru koi angatr, ke ene la troa thele la sipu aja i angatr. Tha angatre kö a thel troa olene kowe la itre ewekë hnei angatre hna hetreny. Maine tro sa xome la aqane waiewekë i angatr, ke tro pe hi sa sipo ngöne la itre thithi së. Celë hi matre nyipiewekë tro sa hetre hni ne ole kowe la itre ewekë hnei Iehova hna kuca koi së, matre tha tro kö sa hane tui angatr.​—Luka 6:45.

10. Nemene la ka xatuane la ketre trejin troa xomihnine la ketre jol? (Wange ju fe la iatr.)

¹⁰ Tro së lai a atreine xomihni e hetre hni ne ole së. Tro sa ce wange la hna melëne hnei Kyung-sook, ka mama ngöne la Ita Ne Thup ne 15 Januare 2015. Hnei droketre hna öhne ka hape, hetre cancer ngöne la idrefitre i eahlo. Öni eahlo: “Jole catre koi ni! Eni a xou, nge kösë pëhë aliene la meleng.” Nemene la ka xatua eahlo troa cile catr? Öni eahlo: “Qëmeken tro ni a meköl, eni a elë e koho hune la uma, me olene koi Iehova la 5 lao ewekë ka lolo ka traqa koi ni ngöne la drai. Thupene lai, tingetinge pi hi la hning, nge celë hi ka upi ni troa amamane la ihniminge koi Iehova.” Nge öni eahlo hmaca jë hi: “Ce Iehova palahi me easë ngöne la itre ijine jol, nge ame ngöne la mele së, tru kö la itre manathith hne së hna kapa hune la itre itupath ka traqa koi së.” Tui Kyung-sook, ngacama easë ju hë e hnine la itre itupath, ngo tru catre kö la itre ewekë nyine tro sa olene koi Iehova. Ame la easa olene koi Iehova, ke kola xatua së troa xomihnine la itre jol me atingetingëne la hni së.

11. Pine nemen matre nyipiewekë tro la itretre dreng a hetrenyi la catr thupene la Iesu a elë a tro hnengödrai?

¹¹ Sipo Iehova jë troa xatua së matre catre cainöj. Qëmeken tro Iesu a elë a tro hnengödrai, hnei nyidrëti hna amekunëne la itretre dreng la hnëqa i angatr, ene la troa tro fë la maca i nyidrë “e Ierusalema, me ngöne la nöje Iudra asë, me e Samaria, me ngöne la nöjei götrane gaa nany ne la fene hnengödrai.” (Itre hu. 1:8; Luka 24:46-48) Ngo e thupen, hnene la itre hene ne hmi i angetre Iudra hna othi Peteru me Ioane aposetolo. Hnei angatr hna tro sai nyidro kowe la Hnakootr Ka Tru, me thel troa axouenyi nyidro, nge hna wathebo nyidro troa cainöj. (Itre hu. 4:18, 21) Nemene la hnei nyidroti hna kuca ngöne la ijine cili?

12. Thenge la tusi Itre Huliwa 4:29, 31, nemene la hna kuca hnene la itretre dreng?

¹² Ngacama hna thel troa axouenyi Peteru me Ioane hnene la itre hene ne hmi, ngo öni nyidro: “Maine meköti qëmeke i Akötresie troa drei nyipunie hui Akötresie, qanyi nyipunieti kö. Ngo ame pë hë nyio, thatreine kö nyio cipane la itre ewekë hnei nyio hna öhne me dreng.” (Itre hu. 4:19, 20) Thupene la kola nue Peteru me Ioane, hnei nyidro memine la itre xaa atre dreng hna xëwe koi Iehova me qaja ka hape, “Aijijëne jë la itre hlue i nyipë troa catre cainöjëne la itre trengewekë i nyipë.” Ene pe, kapa ju hi Iehova la thithi angatr.​—E jë la Itre Huliwa 4:29, 31.

13. Nemene la hna ini së hnene la tulu i Jin-hyuk?

¹³ Maine tro la itre mus a wathebo epun troa cainöje trootro, nyitipune jë la itre pane keresiano ekö. Celë hi hna kuca hnei Jin-hyuk, ketre trejin hna akalabusine ke, xele angeic troa lö hnine la kuci politik. Hnene la itre hene ne la kalabus hna upi angeic troa thupëne la itre hna umëne casin, ngo tha tro kö angeic a hane qeje Tusi Hmitrötr koi angatr. Hnei angeic hna sipo Iehova troa xatua angeic troa cainöj koi angatr, nge tha tro kö a öhne hnene la itre ka thupë kalabus. (Itre hu. 5:29) Öni angeic: “Hnei Iehova hna hamë ni la catr me inamacan. Matre alanyim la itre hna umën hnenge hna ini Tusi memin koi 5 menetr ngöne la qene qënehlö i angatr. Ketre ame e hej, eni a cinyanyi tus göne troa hamë angatr e hmakany.” Ijije fe tro sa mejiun laka, tro Iehova a xatua së troa catre cainöj. Tui Jin-hyuk, loi e tro sa sipo Iehova la catr me inamacan.

14. Nemene la ka troa xatua së ngöne la kola traqa la itre jol? (Salamo 37:3, 5)

¹⁴ Sipo ixatua jë koi Iehova ngöne la kola traqa la itre jol. Alanyim the së la itre ka wezipo, me dépression, me ka meci sineen. Ame itre xan, ka hetre iwesitrë ngöne la fami, maine hna qanangazon, maine ka melëne pena la itre jol. Nge the qaja palaha ngöne la kola lepi easë hnene la itre mec ka ixötrekeu maine hnene pena la itre isi. Nemene la nyine troa kuca? Qaja jë koi Iehova la itre aliene ne hni epun. Ewekë jë koi Nyidrë tune la epuni a ithanata kowe la ketre sinee i epun. Nge tro kö Nyidëti a xatua epun.​—E jë la Salamo 37:3, 5.

15. Tro la thith a xatua së tune kaa troa ‘cile huti hnine la itupath’? Qaja jë la ketre ceitun.

¹⁵ Maine tro sa thithi lapa, ke tro hë sa ‘cile huti hnine la itupath.’ (Rom. 12:12) Öhne hi Iehova la hna melëne hnene la itre hlue i Nyidrë, nge ‘Nyidrëti a dreng la angatr a treije koi Nyidrë.’ (Sal. 145:18, 19, NWT ) Hna jelenyipicine lai hnei Kristie, ketre trejin pionie ka 29 lao macatre. Hna tithi angeic hnene la ketre mec ka ngazo catr matre hnei angeic hna nyiqane dépression. Thupene lai, hna tithe la thine i angeic hnene la ketre mec ka pë nyin. Öni Kristie: “E nöjei drai, eni a thithi koi Iehova matre hamë trengecatreng. Hnenge hna isine troa sine lapane la itre icasikeu me ini Tusi cas.” Öni angeic hmaca jë hi: “Hnene la thith hna xatua ni ngöne la itre ijine jol. Atre hi ni laka, ce Iehova palahi me ni, nge celë hi ka akeukawanyi ni. Nyipici laka, tha patre kö la mecing, ngo hnei Iehova palahi hna sa la itre thithing me hamë ni la tingeting.” The thëthëhmine kö së laka, “atre kö Iehova la aqane troa thapa la itre ka nyipici koi nyidrë qa ngöne la itupath.”​—2 Pet. 2:9.

16. Pine nemen matre loi e tro sa sipo ixatua koi Iehova matre troa atreine cile kowe la itupath?

¹⁶ Sipo ixatua jë koi Iehova matre troa atreine cile kowe la itupath. Hnene laka, itre atr ka tha pexeje kö së, matre easë palahi a isi memine la aja së troa kuca la ngazo. Ketre, Satana a kuca asë la hnei angeic hna atreine matre troa akeinyi easë. Angeic a thele troa löthe la itre mekune së hnene la itre nyine iamadrinë ka ngazo. Ijije hi tro itre ej a nyialiene la itre mekune së hnene la itre ewekë ka sis, nge ka uku së troa kuca la ngazo.​—Mar. 7:21-23; Iako. 1:14, 15.

17. Nemene la nyine tro sa kuca matre troa ihmeku la aqane ujë së memine la itre thithi së? (Wange ju fe la iatr.)

¹⁷ Maine easa ajane troa cile kowe la itupath, ke nyipiewekë tro sa sipo ixatua koi Iehova. Ame ngöne la tulu ne thith, hnei Iesu hna upe la itretre dreng troa sipo Akötresie ka hape: “The troxomi huni kö kowe la itupath, ngo thepe huni pe qaathei Satana.” (Mat. 6:13) Aja i Iehova troa xatua së, ngo loi e tro sa pane sipo Nyidrë. Loi e tro mina fe a ihmeku la aqane ujë së memine la itre thithi së. Celë hi matre nyipiewekë tro sa hmekëne la itre ewekë ka troa uku së troa xome la aqane waiewekë i fen. (Sal. 97:10) Nyialiene jë la itre mekune së hnene la itre ewekë hne së hna e me inine e hnine la Tusi Hmitrötr. Nge catre jë sine la itre icasikeu me cainöj matre thupëne la itre mekune së. Ketre, tha tro jë kö Iehova lai a nue së kowe la itupath hne së hna thatreine xomihnin.​—1 Kor. 10:12, 13.

18. Nemene la aqane tro sa thith?

¹⁸ Loi e tro sa catre thith matre mele nyipici koi Iehova ngöne la hneijine la pun. Xomi ijine jë troa ithanata koi Iehova e nöjei drai. Iehova a ajan tro sa ‘nenge la itre hni së qëmeke i nyidrë’ ngöne la thith. (Sal. 62:8) Atrunyi Iehova jë nge olene jë kowe la itre ewekë hnei Nyidrëti hna kuca. Sipo Nyidrëti jë fe troa xatua epuni troa catre cainöj. Ketre, sipo ixatua jë koi Nyidrë matre troa atreine cile kowe la itre jol me itre itupath. The nue pi kö la ketre ewekë troa sewe epuni troa thithi lapa koi Nyidrë. Ngo tro Iehova a sa tune kaa la itre thithi së? Tro la tane mekune e thupen a sa la hnyinge celë.