TANE MEKUN 27
Nyipiewekë Tro Sa Xoue Akötresie!
“Tro hi a nyisinee i Iehova la itre ka xoue nyidrë.”—SAL. 25:14, NWT
NYIMA 8 Iehova La Hnapo Së
MEKUN KA TRUa
1-2. Thenge la Salamo 25:14, nemene la nyine tro sa kuca matre troa imelekeu me Iehova?
AME koi epun, nemene la nyine tro la lue treme sineene a kuca matre acatrene la imelekeu i nyidro? Maine jë tro epuni lai a qaja ka hape, loi e tro nyidroti a ihnimikeu me itö ixatua, ngo tha tro kö ketre a xoue ketre. Ame pe, kola qaja ngöne la xötr ka nyi tane la tane mekune celë ka hape, ame la atre ka pi imelekeu me Iehova, ke loi e tro angeic a ‘xoue nyidrë.’—E jë la Salamo 25:14.
2 Ngacama ekö ju hë së nyihlue i Iehova, maine ka xötrei pena, ngo loi e tro asë hi sa xoue Nyidrë. Kola hapeu la troa xoue Akötresie? Tune kaa la aqane tro sa akökötrene the së la xoue Nyidrë? Nge nemene la ini hne së hna xome qaathei Obadia atre thupëne la hnalapa i joxu, me Iehoiada Atre Huuj Ka Sisitria, me Ioasa Joxu göne la xoue Akötresie?
KOLA HAPEU LA TROA XOUE AKÖTRESIE?
3. Nemene la itre ewekë ka troa axouenyi së, nge nemene la eloine koi së?
3 Easa xou ke, xele së troa traqa la ketre ewekë ka ngazo koi së. Nge nyine loi la xou cili ke, ej a xatua së troa ujë tune la itre ka inamacan. Pine laka easa xou troa kei, tha easë kö a xötrëne la lelene la git. Nge easa kötrene la itre götrane gaa ngazo, ke xou i easë troa eatr e cili. Ketre, xou i easë troa iwesitrë memine la sinee së, matre tha easë kö a qaja maine kuca la itre ewekë ka troa akötrë angeic.
4. Nemene la aja i Satana?
4 Aja i Satana tro sa goeë Iehova tune la Akötresie ka iameköti, me ka elëelëhni, nge tro sa xoue Nyidrë. Angeic a ajan tro sa mekun tui Elifaza laka, tha ijiji së kö troa hane amadrinë Nyidrë. (Iobu 4:18, 19) Aja i Satana tro sa meci hnei xou, nge tha tro hmaca kö sa nyihlue i Iehova. Ngo tha celë kö lai aqane tro sa xoue Iehova, loi e tro pe sa metrötrë Nyidrë.
5. Kola hapeu la troa xoue Akötresie?
5 Ame la atr ka xoue Akötresie, ke ka hnimi Nyidrë me nyipiewekëne la aqane imelekeu i angeic me Nyidrë. Celë hi aqane “xoue Akötresie” hnei Iesu. (Heb. 5:7) Tha Iesu kö a mengömengön qëmeke i Iehova. (Is. 11:2, 3) Tru la ihnimi Iesu koi Iehova matre nyidrëti a drengethenge Iehova. (Ioane 14:21, 31) Tui Iesu, easa hnimi Iehova me metrötrë Nyidrë ke, Akötresie ka ihnim, me inamacan, me meköt, me ka trene men. Ketre, atre hi së laka, tru la ihnimi Nyidrë koi së, nge Nyidrëti a madrine la easa kapa la itre ini qaathei Nyidrë. Ngo ame la easa tha idrei, ke Nyidrëti a akötr.—Sal. 78:41; Ite edomë 27:11.
AQANE TROA AKÖKÖTRENE THE SË LA XOUE AKÖTRESIE
6. Tune kaa la aqane troa akökötrene the së la xoue Akötresie? (Salamo 34:11)
6 Tha hna hnaho së kö memine la xoue Akötresie, matre nyipiewekë tro sa huliwan la thiina cili. (E jë la Salamo 34:11.) Nge ame la ka troa xatua së ngöne la götrane cili, ke ene la troa goeëne la itre hna xup. Ame la easa öhne la inamacan, me men, me ihnimi Akötresie ka mama ngöne “la itre ewekë hna xup,” ke kola akökötrene la metrötr me ihnimi së koi Nyidrë. (Rom. 1:20) Öni Adrienne, ketre trejine föe ka hape, “Ame la eni a goeëne la emingömingöne la itre hna xup, ke eni a öhne laka, ka inamacane Iehova, nge atre kö Nyidrë la ka loi koi ni.” Thupene la hnei eahlo hna lapa mekune lai, öni eahlo, “Xele ni ma kuca la ketre ewekë ka troa angazone la aqane imelekeung me Iehova, Atre hamë ni la mel.” Ame ngöne la wiik celë, xomi ijine jë troa lapa mekune la ketre ewekë hnei Iehova hna xup. Tro lai a akökötrene la metrötr me ihnimi epun koi Nyidrë.—Sal. 111:2, 3.
7. Tune kaa la aqane tro la thith a akökötrene the së la xoue Akötresie?
7 Ame la ketre aqane troa akökötrene the së la xoue Akötresie, ke ene la troa thithi lapa. Tro sa atre Iehova hnyawa, e tro sa thithi lapa koi Nyidrë. Ame la easa sipo ixatua koi Nyidrë matre cile kowe la ketre itupath, ke easa öhne la ecatrene la mene i Nyidrë. Ame la easa olene koi Nyidrë la thupene mel, ke easa hmaca mekune la etrune la ihnimi Nyidrëti koi së. Nge ame la easa thithi iele Nyidrë troa xatua së ngöne la ketre jol, ke easa öhne la inamacane i Nyidrë. Itre thithi lai ka akökötrene la metrötre së koi Iehova, me sewe së troa kuca la ketre ewekë ka troa thë la imelekeu së me Nyidrë.
8. Nemene la ketre aqane troa akökötrene the së la xoue Akötresie?
8 Ame la ketre aqane troa akökötrene the së la xoue Akötresie, ke ene la troa xomi ini qaathene la itre tulu ka loi me ka ngazo e hnine la Tusi Hmitrötr. Tro sa pane ce wang la tulu ka lolo ne la lue hlue i Iehova, ene Obadia atre thupëne la hnalapa i Ahaba joxu, me Iehoiada Atre Huuj Ka Sisitria. Nge tro sa ce wange la tulu i Ioasa, Joxu ne Iudra, ka mele nyipici koi Iehova lo xötrei, ngo ka nuetriji Nyidrë e thupen.
XOUE IEHOVA JË ME CATR TUI OBADIA
9. Nemene la ka amamane ka hape, Obadia a xoue Akötresie? (1 Ite Joxu 18:3, 12)
9 Öni Tusi Hmitrötr göi Obadiab ka hape: “Ketre atre ka xoue Iehova catr.” (E jë la 1 Ite Joxu 18:3, 12.) Matre tune kaa la aqane ujë i angeic? Angeic la ketre atr ka huliwa nyipici nge hna mejiune kow. Celë hi ka ukune la joxu troa acili angeic matre thupëne la hnalapa i nyidrë. (Wange ju fe la Nehemia 7:2.) Pine laka hetrenyi thei angeic la xoue Akötresie, matre angeic la ketre atr ka catr. Angeic a mel ngöne lo ijine kola musi hnei Ahaba Joxu, nge “ngazo catre kö la thiina i Ahaba koi Iehova, hune la itre [joxu] ka tro pa.” (1 Ite jo. 16:30) Nge ame pena Iezebela, föi Ahaba, ke ka hmi koi Baala. Cane methi eahlo lae Iehova matre hnei eahlo hna thele troa apatrene la nyipi hmi qa ngöne la 10 lao tribu ne Isaraela. Goi iupe fe eahlo troa humuthe la itre perofeta i Iehova. (1 Ite jo. 18:4) Easa trotrohnine laka, tha ka hmaloi kö koi Obadia troa nyihlue i Iehova ngöne la ijine cili.
10. Hnei Obadia hna amamane tune kaa la catre i angeic?
10 Hnei Obadia hna amamane tune kaa la catre i angeic? Ame lo Iezebela a thele troa humuthe la itre perofeta i Iehova, ke hnei Obadia hna juetrëne la ala 100 thei angatr. Hnei angeic hna “thewe gurup ne 50, matre juetrë angatr hnine la itre ngönemenyi, me thue falawa me timi koi angatr.” (1 Ite jo. 18:13, 14) Maine atre ju Iezebela la hna kuca hnei Obadia, ke tro eahlo lai a humuthi angeic. Drei jë kö la xoue Obadia, ke xele angeic ma mec. Ngo tru kö la ihnimi angeic koi Iehova me kowe la itre hlue i Nyidrë hune la sipu mele i angeic.
Ngacama hna wathebone la hmi së, ngo ketre trejin a tro fë itusi trootro kowe la itre xaa trejin (Wange ju la paragarafe 11)d
11. Tui Obadia, itre hlue i Iehova enehila a amamane tune kaa la catre i angatr? (Wange ju fe la iatr.)
11 Ame enehila, alanyim la itre trejin ka mele ngöne la itre nöje hna wathebone la hmi së. Ngacama angatr a metrötrëne la itre mus, ngo tui Obadia, tha angatre kö a nue itre ej troa sewe angatr troa nyihlue i Iehova. (Mat. 22:21) Angatr a amamane ka hape, ka xoue Iehova la angatr a drengethenge Nyidrë hune la itre atr. (Itre hu. 5:29) Angatr palahi a catre cainöjëne la maca ka loi, me icasikeu juetrë. (Mat. 10:16, 28) Nge angatre fe a isin tro la itre xaa trejin a kapa la itre ini qaathei Iehova. Tro sa ce wange la ka traqa koi Henri, ketre trejin ka mel ngöne la ketre nöj e Afrik lo ijine kola wathebone la hmi së. Ame ngöne la ijine cili, hnei angeic hna saen troa tro fë la itre itusi së kowe la itre trejin. Öni angeic: “Ame ni ke, ketre atr ka lapa pe hi. Ngo ame la ka xatua ni troa kuca la huliwa cili, ke ene la metrötreng koi Iehova.” Hapeu, tro jë kö epuni lai a hane catr tui Henri? Tro epuni lai a catr, e tro palahi epuni a akökötren thei epun la xoue Akötresie.
XOUE IEHOVA JË ME MELE NYIPICI TUI IEHOIADA
12. Hnei Iehoiada me föi nyidrë hna mele nyipici tune kaa koi Iehova?
12 Hnei Iehoiada Atre Huuj Ka Sisitria, hna mele nyipici koi Iehova me isigöline la nyipi hmi. Pine nemen? Pine laka, nyidrëti a xoue Iehova. Kola mama lai ngöne lo Athalia, nekö i Iezebela jajiny, a thapa la mus e Iudra. Ka ngazo catr thiina i eahlo nge ka pi mus, matre ketre föe hna xouen. Hnei eahlo hna thele troa humuth asë la itre matra i joxu, ene lo itre sipu api eahlo! (2 A. l. ite jo. 22:10, 11) Ngo mele ju kö Ioasa, ketre api eahlo, ke hna kötresai nyën hnei Ioseba föi Iehoiada. Nge e thupen, hnei nyidro hna juetrën me thupë nyëne hnyawa. Aqane thupëne nyidroti hi lai, la itre matra i Dravita. Hnei Iehoiada hna mele nyipici koi Iehova, me tha xoue Athalia.—Ite edomë 29:25.
13. Tune kaa la aqane amamane hmaca Iehoiada ka hape, ka mele nyipici nyidrë koi Iehova?
13 Ame lo kola 7 lao macatre i Ioasa, hnei Iehoiada hna amamane hmaca ka hape, ka mele nyipici nyidrë koi Iehova. Hnei nyidrëti hna mekun troa acili joxu Ioasa sipu matra i Dravita. Maine troa eatre la mekuna i nyidrë, ke tro hë nyën a joxu. Ngo e tha eatre kö, ke troa humuthi nyidrë. Eloine pe, eatre ju kö la mekuna i nyidrë jëne la ixatua i Iehova. Hnene la itre hene nöj, memine la angetre Levi, hna xatua Iehoiada troa acili joxu Ioasa, me humuthi Athalia. (2 A. l. ite jo. 23:1-5, 11, 12, 15; 24:1) Thupene lai, “hnei Iehova hna jëne Iehoiada, matre tro la joxu memine la nöj a isisinyikeu me nyidrë laka, tro pala hi angatr a nöje i Iehova.” (2 Ite jo. 11:17) Nge hnei Iehoiada mina fe hna acile “la itre ka thupë qëhnelö, ngöne la itre hnë lö ne la uma ne hmi Iehova. Hna kuca lai, matre tha tro kö a lö hnene la atre ka tha ahmitrötrë angeice kö.”—2 A. l. ite jo. 23:19.
14. Tune kaa la aqane atrunyi Iehoiada hnei Iehova?
14 Hnei Iehova hna qaja ekö ka hape: “Tro ni a atrunyi angat’ anget’ atrunyi ni.” Nge celë hi hnei Nyidrëti hna kuca koi Iehoiada. (1 Sam. 2:30) Hnei Nyidrë hna amë e hnine la Tusi Hmitrötr, la itre hna kuca hnei Iehoiada, matre troa ini së. (Rom. 15:4) Nge ame hë la kola meci hnei Iehoiada, “hna kelemi [nyidrë] memine la itre joxu ngöne la Traon i Dravita, ke hnei [nyidrë] hna kuca la loi e Isaraela, kowe la nyipi Akötresie memine la uma ne hmi i nyidrë.”—2 A. l. ite jo. 24:15, 16.
Tui Iehoiada, tro la xoue Akötresie a uku së troa xatuane la itre xaa trejin (Wange ju la paragarafe 15)e
15. Nemene la hna ini së hnene la tulu i Iehoiada? (Wange ju fe la iatr.)
15 Tro la hna melëne hnei Iehoiada a xatua së troa akökötrene the së la xoue Akötresie. Loi e tro la itre qatre thup a nyitipu Iehoiada me isine troa thupëne hnyawane la ekalesia. (Itre hu. 20:28) Ketre tune la itre trejine ka qatr, loi e tro epuni a xomi ini qaathei Iehoiada. Maine tro epuni a xoue Iehova me mele nyipici koi Nyidrë, ke tro kö Nyidrëti a thue huliwa i epun ngöne la organizasio i Nyidrë. Tha tro jë kö Iehova lai a thëthëhmi epun. Nge ame epun itre jeunes, loi e tro epuni a nyitipune la aqane ujë i Iehova koi Iehoiada. Loi e tro epuni a metrötrëne la itre trejin ka qatre hë, nge ka nyipiewekë catre lai kowe la itre trejin ka nyihlue i Iehova hë qaan ekö. (Ite edomë 16:31) Ketre, loi e tro asë hi sa xomi ini qaathene la itre hene nöj, me angetre Levi ka xatua Iehoiada. Tui angatr, loi e tro palahi sa drengethenge “la itre ka elemeken.”—Heb. 13:17.
THE NYITIPU IOASA JOXU KÖ
16. Pine nemen matre tha joxu ka catre kö Ioasa?
16 Ame lo Ioasa a nyiqane joxu, ke hnei Iehoiada hna xatua nyën troa hetre thiina ka loi. (2 Ite jo. 12:2) Matre ame ngöne la ijine cili, aja i Ioasa troa amadrinë Iehova. Ngo thupene la kola mec hnei Iehoiada, hnei nyën hna dreng la itre hene nöj ne Iudra, ka iamenumenu. Nge nemene hë la thangane lai? Hnei angeic me itre ka nyihlue i angeic hna thil kowe la “itre ipoto ka hmitrötr me itre idrola.” (2 A. l. ite jo. 24:4, 17, 18) Ngacama akötre catre Iehova, ngo hnei Nyidrëti palahi hna “upe koi angatr la itre perofeta, matre troa abëekë angatr koi nyidrë. . . , ngo xele pala hi angatr ma dreng.” Goi xele fe angatr ma drei Zakaria, nekö i Iehoiadac, ngacama perofeta angeic me atre huuj, nge trejine fe me Ioasa. Pëkö hni ne ole i Ioasa kowe la fami ka thupë angeic ekö, matre hnei angeic hna iup troa humuthi Zakaria.—2 A. l. ite jo. 22:11; 24:19-22.
17. Nemene hë la pune koi Ioasa?
17 Tha hnei Ioasa kö hna akökötrene thei angeic la xoue Iehova, matre hnei angeic hna xeni pune la itre huliwa i angeic. Öni Iehova lo ka hape: “Troa hmahma angat’ angete [methinë] ni.” (1 Sam. 2:30) Ngacama xalaithe hi la trongene isi angetre Suria, ngo hnei angatr hna ngaane “la trongene isi ka tru” i Ioasa. Nge ka eatre hnyawa Ioasa. Ame hë la kola tro la trongene isi angetre Suria, hna humuthi angeic hnene la itre sipu hlue i angeic, ke hnei angeic hna humuthi Zakaria. Nge tha hna hane kö kelem la joxu cili ka ngazo “ngöne la itre hua ne la itre joxu.”—2 A. l. ite jo. 24:23-25.
18. Thenge la Ieremia 17:7, 8, nemene la nyine tro sa kuca matre tha tro kö sa tui Ioasa?
18 Nemene la ini hne së hna xome qa ngöne la hna melëne hnei Ioasa? Ceitu i Ioasa memine la ketre isinöe hna sajuën, ke tha ka jui kö la itre iwaan. Thupene la kola meci hnei Iehoiada, atre “sajuë” angeic, kola traqa la itre ka iamenumenu, matre canga nuetriji Iehova pi hi hnei angeic. Kola amamane hnene la hna melëne celë laka, tha tro kö sa drengethenge Akötresie ke, kola amamai tulu ka loi hnene la itre sinee së me itre trejine ne la ekalesia. Ngo maine aja i easë troa catr la imelekeu së me Akötresie, ke nyipiewekë tro sa acatrene la ihnim me metrötre së koi Nyidrë. Ketre, loi e tro mina fe sa akökötrene the së la xoue Nyidrë, jëne la hna e Tus Hmitrötr, me lapa mekun ej, me thithi lapa.—E jë la Ieremia 17:7, 8; Kol. 2:6, 7.
19. Nemene la hnei Iehova hna ajane koi së?
19 Tha aja i Iehova kö tro sa huliwa mec koi Nyidrë. Ngo ame la aja i Nyidrë ke, tro sa trongëne la hna qaja ngöne Ate Cainöj 12:13, kola hape: “Qouju e Akötesie, me trongëne la nöjei wathebo i nyidë ; ke celë hi qâne la nöjei ate asë.” Tro sa atreine cile kowe la itre jol tui Obadia me Iehoiada, e tro sa xoue Akötresie. Nge pëkö ketre ewekë ka troa thë la aqane imelekeu së me Nyidrë.
NYIMA 3 Trenge Catre Hun, Mejiune Hun, Me Hna Troa Qale Kow
a Ame ngöne la Tusi Hmitrötr, nyimu aliene la hnaewekë hna hape “xou.” Maine jë, kola qaja la easa meci hnei xou, maine kolo pena qaja la etrune metrötre së kowe la ketre atr. Ame ngöne la tane mekune celë, tro sa ce ithanatane la xou ka troa xatua së troa catre mele nyipici koi Iehova.
b Ame la Obadia hna qaja e celë, ke tha kolo kö a qaja lo perofeta ka mele pë hë e thupen, nge ka cinyanyine la ketre itus ne la Tusi Hmitrötr ka xome la ëje i angeic.
c Ame ngöne Mataio 23:35 kola hë Zakaria ka hape, nekö i Barakaia. Kola mekune ka hape, hnaaluene ëje i Iehoiada lai, tune la itre xan ngöne la Tusi Hmitrötr ka lue ëj (wange ju ngöne Ma 9:9 me Mrk 2:14). Maine pena, ame Barakaia ke, qaaqaa i Zakaria maine ketre xötrapane i angeic.
d ITRE IATR: Ketre trejin ka mele ngöne la ketre nöj hna wathebone la hmi së, a tro fë itusi trootro kowe la itre trejin.
e ITRE IATR: Ketre nekö jajinyi a inine troa cainöj jëne telefone memine la ketre trejin ka qatre hë. Ketre trejine trahmany ka qatre hë a amamai tulu la nyidrëti a cainöj ngöne la gaa tru atr. Ketre trejin ka atrein a amamane la aqane troa nyihnyawane la Uma Ne Baselaia.