Iehova a Anyipicine Laka Tro Kö a Paradraiso La Ihnadro

1. Nemene la maca i Isaia perofeta kowe la angetre Isaraela?

ISAIA perofeta a qeje Iehova ka hape, “Akötesie ka nyipici.” Ame la hnëewekë hna ujën ka hape, “nyipici” ke kola hape, “amen.” (Is. 65:16) Ame la hnëewekë “Amen” ke kola hape, “troa aejën,” maine “eje hi lai.” Ame la kola huliwan la hnëewekë “amen” e hnine la Tusi Hmitrötr göi troa qeje Iehova maine Iesu, ke kolo hi lai a amamane laka, ka nyipici la hna qaja. Matre ka mama cile hi ngöne la maca i Isaia kowe la angetre Isaraela laka: Ame la hnei Iehova hna qaja, ke nyine tro sa mejiune kow. Celë hi hnei Iehova hna amamane la Nyidrëti a eatrëne la itre hnei Nyidrëti hna thingehnaean.

2. Pine nemene matre ijije hi tro sa mejiune kowe la itre hna thingehnaean hnei Iehova, nge nemene la itre hnying hne së hna troa ce wang?

² Epuni kö a mejiune kowe la itre hnei Iehova hna thingehnaean? Traqa koi 800 lao macatre thupei Isaia, hnei Paulo hna qaja la kepine matre loi e tro palahi sa mejiune kowe la itre hna thingehnaean hnei Akötresie. Öni Paulo: “Thatreine kö [Iehova] thoi.” (Heb. 6:18) Thatreine kö tro la ketre isinöe tune la maag a hamë wene pic. Haawe, thatreine kö tro Iehova, Akötresie ka nyipici, a thoi. Celë hi matre loi e tro sa mejiune kowe la nöjei trengewekë i Iehova, memine fe la itre hnei Nyidrë hna thingehnaean. Ame ngöne la tane mekun celë, tro sa ce ithanatan la lue hnyinge celë: Nemene la hnei Iehova hna thingehnaean? Nge nemene la ka amamane laka, tro kö itre ej a eatr?

NEMENE LA HNEI IEHOVA HNA THINGEHNAEAN?

3. (a) Nemene la hna thingehnaean hna wangatrun hnene la itre hlue i Iehova? (Hna Amaman 21:3, 4) (b) Tune kaa la itre atr la easa e koi angatr la hna thingehnaeane celë?

³ Nemene la ketre hna thingehnaean hna wangatrun hnene la itre hlue i Iehova? (E jë la Hna Amaman 21:3, 4.) Hnei Iehova hna thingehnaean la ijine laka, “pë hmaca kö mec, me hleuhleu, me treij, me akötr.” Alanyim thei easë ka e la xötre celë la kola qejepengöne la paradraiso kowe la itre atr hnei angatr hna cainöje kow. Tune kaa la itre atr la easa e koi angatr la hna thingehnaeane celë? Öni itre xan, “Mingöminge palaha lai, ka nyipici kö?”

4. (a) Nemene la hnei Iehova hna atre göne la itre hna thingehnaean? (b) Nemene la itre hnei Nyidrëti fe hna hamën?

⁴ Ame la Iehova a upi Ioane troa cinyanyine la hna thingehnaeane cili, ke atre hi Nyidrë laka, tro sa ce thawa la mejiune cili kowe la itre atr hne së hna cainöje kow. Ketre, atre hi Iehova ka hape, alanyimu la itre atr ka troa luelu, me tha mejiune kowe la “ite ewekë ka hnyipixe” cili. (Is. 42:9; 60:2; 2 Kor. 4:3, 4) Nemene la nyine tro sa kuca matre troa acatrene la mejiune së me itre xan, kowe la itre hna qaja ngöne Hna Amaman 21:3, 4? Loi e tro sa amamane ka hape, Iehova la ka thingehnaeane lai, nge hnei Nyidrëti fe hna hamëne la itre kepin matre loi e tro sa mejiun. Nemene la itre kepine cili?

IEHOVA A ANYIPICINE LA HNEI NYIDRË HNA THINGEHNAEAN

5. Nemene la itre kepin ka amamane laka, loi e tro sa mejiun kowe la itre hna thingehnaean, nge kola mama ekaa?

⁵ Ame ngöne la itre xötr e thupen, tro sa öhne la itre kepin matre loi e tro sa mejiun kowe la itre hna thingehnaean hnei Iehova göne la paradraiso. Kola qaja ka hape: “Önine la atre lapane la theron ka hape: ‘Hanawang! Eni a ahnyipixene la nöjei ewekë asë.’ Öni nyidrëti hmaca jë: ‘Cinyianyine ju, ke nyine mejiune kow, nge ka nyipici la itre trengewekë celë.’ Nge öni nyidrëti fe koi ni ka hape: ‘Eatre hë itre ej! Eni la [Alefa me Omega], nge qaane me pun.’ ”​—Hna ama. 21:5, 6a.

6. Pine nemene matre kola acatrene la mejiune së hnene la tusi Hna Amaman 21:5, 6?

⁶ Pine nemene matre kola acatrene la mejiune së hnene la lue xötre celë? Önine la ketre itus ka hape: “Ame ngöne la lue xötre celë, kösë Iehova a sija la ketre pepa nyine anyipicine koi së laka, tro kö a eatr la itre hnei Nyidrë hna thingehnaean.” Easa e la hna thingehnaean hnei Iehova ngöne Hna Amaman 21:3, 4. Nge ame ngöne la xötre 5 me 6, Nyidrëti a sija, me anyipicine laka, ka nyipici la hnei Nyidrë hna qaja. Tro sa ce wang la aqane amamane Iehova laka, ijije hi tro sa mejiun koi Nyidrë.

7. Nemene la aqane nyiqane la xötre 5, nge pine nemene matre ka hetre aliene lai?

⁷ Kola nyiqane la xötre 5 ka hape: “Önine la atre lapane la theron.” (Hna ama. 21:5a) Akönia qaja hi la itre hnëewekë celë ngöne la tusi Hna Amaman, nge Iehova la ka ithanata ngöne la hna meköle goeën. Matre tha ketre angela, maine Iesu hna amelene hmaca la ka ithanata, ngo Iehova kö! Haawe, kolo hi lai a anyipicine la hna qaja e thupen. Pine nemene matre easa qaja lai? Ke “Akötresie ka thatreine thoi” Iehova. (Tito 1:2) Matre ame pë hë la hna qaja ngöne Hna Amaman 21:5, 6 ke, ka nyipici.

“HANAWANG! ENI A AHNYIPIXENE LA NÖJEI EWEKË ASË”

8. Nemene la aqane amamane Iehova ka hape, tro kö a eatr la itre hna thingehnaean? (Isaia 46:10)

⁸ Tro pena sa ce wang la hnëewekë “Hanawang!” (Hna ama. 21:5) Anyimua qaja la hnëewekë qene Geres goi “Hanawang!” ngöne la tusi Hna Amaman. Önine la ketre itus ka hape, “Hna huliwan la hnëewekë cili matre troa ukune lai ka e, troa mekun hnyawane la itre hnëewekë hna troa qaja e thupen.” Nemene la hna qaja e thupen? Öni Akötresie: “Eni a ahnyipixene la nöjei ewekë asë.” Nyipici, Iehova a qaja la itre ewekë hna tha eatrëne palakö. Ngo pine laka, ka xecie koi Nyidrë ka hape, tro itre ej a eatr, matre Nyidrë a ithanata kösë eatre hë.​—E jë la Isaia 46:10.

9. (a) Kola hapeu la hnëewekë “ahnyipixene la nöjei ewekë asë”? (b) Nemene la ka troa traqa kowe la “hnengödrai me fene” enehila?

⁹ Tro pena sa ce ithanatane la hnëewekë ka mama ngöne la tusi Hna Amaman 21:5. Kola hape: “Ahnyipixene la nöjei ewekë asë.” Ame ngöne la mekene celë, kola qaja la lue ewekë hnei Iehova hna troa kuca. Tro Nyidrëti a pane apatrene lo fen hnapan. Nge thupene lai, tro Nyidrëti a acil la ketre mus. Ame ngöne Hna Amaman 21:1, kola hape: “Patre hë lo hnengödrai me fene hnapan.” Ame la ‘hnengödrai hnapan,’ ke kola qaja la itre mus hna musinën hnei Satana me itre dremoni. (Mat. 4:8, 9; 1 Ioane 5:19) Ame ngöne la Tusi Hmitrötr, kola huliwan la hnëewekë “fene” matre qaja la itre atr. (Gen. 11:1; Sal. 96:1) Matre, ame la “fene hnapan” ke, kola qaja la itre atr ka ngazo enehila. Tha tro kö Iehova a nyidrawan hnyawan la “hnengödrai” me “fene” enehila, ngo tro pe Nyidrëti a apatrene lue ej. Tro Nyidrëti a nyihnane lue ej hnene la “hnengödrai ka hnyipixe me fene ka hnyipixe,” ene la ketre mus ka hnyipixe ka troa mus kowe la itre atr ka meköt.

10. Nemene la hnei Iehova hna troa ahnyipixen?

¹⁰ Ame ngöne Hna Amaman 21:5, kola qaja e thupen la itre ewekë hnei Iehova hna troa ahnyipixen. Tha hnei Iehova kö hna qaja ka hape: “Eni a kuca la nöjei ewekë ka hnyipixe.” Ngo öni Nyidrëti pe: “Eni a ahnyipixene la nöjei ewekë asë.” Matre tro Iehova a ahnyipixene la ihnadro me itre atr, nge tro hë angatr a pexej. Tune la hna qaja hnei Isaia, tro Iehova a aparadraison la ihnadro, matre tro ej a ceitu memine lo hlapa e Edrena. Tro fe Nyidrëti a ahnyipixenyi së. Tune kaa? Troa aloine la itre sine meci së. Ame elany, troa aloine la itre ka peje ca, me itre timek, me itre ka simi hnangeny, nge tro fe a amelene la itre ka mec.​—Is. 25:8; 35:1-7.

“NYINE MEJIUNE KOW, NGE KA NYIPICI LA ITRE TRENGEWEKË CELË. . . . EATRE HË ITRE EJ!”

11. Nemene la hnei Iehova hna upi Ioane troa kuca, nge nemene la kepin?

¹¹ Nemene la ketre hnei Iehova hna qaja ka anyipicine koi së laka, tro kö a eatr la hnei Nyidrëti hna qaja? Öni Iehova koi Ioane: “Cinyianyine ju, ke nyine mejiune kow, nge ka nyipici la itre trengewekë celë.” (Hna ama. 21:5) Tha hnei Iehova hmekuje hi hna upi Ioane ka hape, “cinyianyine ju.” Hnei Nyidrëti fe hna qaja la kepin. Öni Nyidrë: “Nyine mejiune kow, nge ka nyipici la itre trengewekë celë.” Kolo hi lai a hape, ka nyipici la itre trengewekë i Akötresie, nge nyine tro sa mejiune kow. Easa olene koi Ioane la hna drengethenge la kola upi angeic troa “cinyanyine.” Celë hi ka aijijë së troa e la itre hna thingehnaean göne la paradaiso, me lapa mekun la itre manathith ka troa traqa.

12. Hnauëne laka, nyipici Iehova la Nyidrëti a qaja ka hape: “Eatre hë itre ej!”?

¹² Nemene la hnei Akötresie hna qaja e thupen? “Eatre hë itre ej!” (Hna ama. 21:6) Ame e celë, kösë Iehova a qaja ka hape, eatr asë hë la itre hna thingehnaean göne la paradraiso. Nge nyipici Nyidrëti hi, ke pëkö ewekë ka troa sewe Nyidrë troa eatrëne la aja i Nyidrë. Hetre ketre ewekë kö hnei Iehova hna qaja matre anyipicine koi së laka, tro kö Nyidrëti a eatrëne la aja i Nyidrë. Nemene jë lai?

“INI LA ALEFA ME OMEGA”

13. Pine nemene matre qaja jë Iehova ka hape: “Ini la Alefa me Omega”?

¹³ Tune la hne së hna ce wang e kula, akönia ithanata Iehova ngöne la itre hna meköle goeën hnei Ioane. (Hna ama. 1:8; 21:5, 6; 22:13, Lifu Bible) Ame ngöne la köni ijine cili, öni Iehova: “Ini la Alefa me Omega.” Ame la mataitus alefa ke, pane mataitus qene Geres, nge omega ke, mataitus tixenuë. Ame la Iehova a qaja la hnëewekë “Alefa me Omega,” ke Nyidrëti a amamane ka hape, e ase hë Nyidrë nyiqane la ketre huliwa, tro kö Nydrëti a afenesin.

14. (a) Qaja jë la ketre ijin, kösë hnei Iehova hna qaja ka hape, “Alefa” me “Omega.” (b) Nemene la hna anyipicine ngöne Genese 2:1-3?

¹⁴ Thupene la Iehova a xupi Adramu me Eva, hnei Nyidrëti hna qaja la aja i Nyidrë kowe la atr me kowe la ihnadro. Öni Tusi Hmitrötr: “Akötresieti a amanathithi nyidroti ju, me hape: ‘Hnaho pi me mana, nyialiene jë la ihnadro me musinën.’ ” (Gen. 1:28) Kösë e cili la Iehova a qaja ka hape, “Alefa.” Hnei Nyidrëti hna qaja hnyawan la aja i Nyidrë: Tro la itre matra i Adramu me Eva ka pexej me idrengethenge a nyialiene la ihnadro me aparadraisone ej. Nge e eatrëne hë elanyi la aja i Nyidrë, kösë tro Nyidrëti a qaja ka hape, “Omega.” Ketre, thupene la Iehova a “afenesine la hnengödrai me ihnadro, me itre ewekë e hnin,” ke hnei Nyidrë hna qaja la ketre ewekë ka amamane laka, tro kö Nyidrëti a eatrën la aja i Nyidrë. Kola mama lai ngöne la Genese 2:1-3. (E jë.) Hnei Iehova hna ahmitrötrën la hna 7 ne drai koi Nyidrë. Kola hapeue lai? Tro kö Iehova a eatrëne la aja i Nyidrë kowe la atr me kowe la ihnadro ngöne la pun ne la hna 7 ne drai.

15. Pine nemene matre kösë hnei Satana hna acilëne la aja i Akötresie?

¹⁵ Thupene la hnei Adramu me Eva hna tha idrei, lue atr ka ngazo hë nyidro, nge hnei nyidro hna hamën la ngazo me mec kowe la itre matra i nyidro. (Rom. 5:12) Matre kösë hnei Satana hna acilëne la aja i Akötresie, ene la troa nyialiene la ihnadro hnene la itre atr ka pexej me ka idrengethenge. Kösë hnei Satana hna sewe Akötresie troa eatrëne la aja i Nyidrë, matre pëhë nyine tro Akötresie a kuca. Ma angeice jë a mekun ka hape, tro Akötresie a apatrenyi Adramu me Eva me xup hmaca la lue xaa trefën, matre eatrëne la aja i Nyidrë. Ngo maine kuca ju lai hnei Akötresie, ke tro hë Satana lai a jele thoi Nyidrë. Pine nemen? Pine laka, ame ngöne Genese 1:28, ase hë Iehova qaja ka hape, matra i Adramu me Eva la ka troa nyialiene la fen.

16. Pine nemene matre Satana a mekun ka hape, luzi hë lo aja i Akötresie?

¹⁶ Ame koi Satana, nemene la hnei Akötresie hna troa kuca? Maine jë, Satana a mekun ka hape, tro Iehova a nue Adramu me Eva troa hnaho, ngo tha tro fe kö a hane pexej la itre nekö i nyidro. (Ate cai. 7:20; Rom. 3:23) Ame e cili, tro hë Diabolo a qaja ka hape, luzi hë lo aja i Iehova. Pine nemen? Pine laka, tha tro kö la mekune cili a eatrëne lo aja i Akötresie laka, troa nyialiene la paradraiso hnene la itre matra i Adramu me Eva ka idrengethenge me ka pexej.

17. Nemene la aqane nyinyine Iehova la icilekeu i Satana memine la lue pane atr, nge nemene hë la thangan? (Wange ju fe la iatr.)

¹⁷ Hna asesëkötrë Satana la aqane nyinyine Iehova la jol hnei angeic hna aciane e Edrena thene la lue pane atr. (Sal. 92:5) Hnei Iehova hna nue Adramu me Eva troa hetre nekönatr, matre tro kö a eatr la itre trengewekë i Nyidrë, me anyipicine laka, tha ka hane kö Nyidrëti thoi. Ketre, hnei Nyidrë hna amamane laka, e ase hë Nyidrë qaja la ketre ewekë, ke tro kö lai a eatr. Hnei Nyidrëti palahi hna eatrëne la aja i Nyidrë ngöne la Nyidrëti a hamëne la ketre “matrane” ka troa amelene la itre nekö i Adramu me Eva ka idrengethenge. (Gen. 3:15; 22:18) Hna asesëkötrë Satana hnene la aqane ameköti ewekë i Iehova göne la thupene mele cili! Pine nemen? Pine laka, ihnim la ka nyitrepene la thupene mel. (Mat. 20:28; Ioane 3:16) Patre fe kö la thiina cili thei Satana, ke angeic a sipu meku angeice hi. Matre nemene hë la thangane la thupene mel? Ame ngöne la pun la 1 000 lao macatre ne musi Iesu, tro hë la itre matra i Adramu me Eva ka idrengethenge, nge ka pexej a lapane la ihnadro hna aparadraison. Kolo hi lo aja i Akötresie ngöne la qaan. Ame e cili, kösë Iehova a qaja ka hape, “Omega.”

AQANE TRO SA ACATRENE LA MEJIUNE SË KOWE LA PARADRAISO ELANY

18. Nemene la köni kepin hnei Akötresie hna hamë së? (Wange ju la hna eköhagen hna hape, “Köni Kepine Matre Easa Mejiun Kowe La Itre Hna Thingehnaean Hnei Iehova.”)

¹⁸ Ame ngöne la tane mekune celë, hne së hna ce wang la itre kepin ka amamane laka, tro kö a paradraiso la ihnadro elany. Nemene la aqane tro sa anyipicine lai koi itre xan? Ame la hnapan, Iehova la ka thingehnaeane lai. Kola qaja ngöne la tusi Hna Amaman ka hape: “Önine la atre lapane la theron ka hape: ‘Hanawang! Eni a ahnyipixene la nöjei ewekë asë.’ ” Ka inamacan, nge ka trene mene Nyidrë, nge aja i Nyidrëti fe troa eatrëne la hnei Nyidrëti hna thingehnaean. Ame la hnaaluen, ka xecie hnyawa koi Nyidrë laka, troa eatr la aja i Nyidrë, matre kösë ame koi Nyidrë, eatre hë. Celë hi matre öni Nyidrë: “Nyine mejiune kow, nge ka nyipici la itre trengewekë celë. . . . Eatre hë itre ej!” Ame la hnaakönin, ame la Iehova a nyiqane la ketre ewekë, Nyidrëti a afenesin. Celë hi matre öni Nyidrë: “Ini la Alefa me Omega.” Tro kö Iehova a amamane ka hape, ka thoi lae Satana, nge ka iaö.

19. Nemene la aqane tro epuni a sa kowe la atr ka tha mejiun kowe la paradraiso?

¹⁹ The thëthëhmine kö laka, ame la epuni a ce thawa me itre xan la itre hna thingehnaean, epuni hi lai a acatrene la mejiune i epun. Matre e traqa ju epun ce thawa me ketre la hna thingehnaean göne la paradraiso, tune la ka mama ngöne la tusi Hna Amaman 21:4, nge tro angeic a qaja ka hape, “Lolo palaha lai, ngo ka nyipici kö?” Tro epun a sa tune kaa? E jë la xötre 5 me 6, nge qejepengöne jë. Amamane jë la aqane anyipicine Iehova laka, tro kö a eatr la itre hna thingehnaean.​—Is. 65:16.