Cile Catre Jë Tui Peteru

1. Tune kaa Peteru la angeic a öhne la iamamanyikeu i Iesu?

HNEI Peteru hna nue ifile jidri ka pexej, ngo pëkö ca tha i angeic. Iesu pa upi angeice jë ka hape: “Tro jë kowe la gaa jui, nge nue pi la itre ifile i nyipunie.” (Luka 5:4) Ame koi Peteru, pëkö i e cili, ngo hnei angeice kö hna drenge la hnei Iesu hna qaja. Xönë hi troa zezeny la itre ifile i Peteru me itre sine huliwa i angeic, ke tru palaha la itre ie ka jötr. Angatr asë a sesëkötr, ke ketre iamamanyikeu la hna kuca hnei Iesu! Öni Peteru: “Joxu, ananyi ni pi hnei nyipë, ke atre ka ngazo ni.” (Luka 5:​6-9) Ame koi Peteru, tha ijiji angeice kö troa hane easenyi Iesu.

2. Nemene la ini hne së hna xom qa ngöne la hna melën hnei Peteru?

² Nyipici hi la hna qaja hnei Peteru, “atre ka ngazo” angeic. Ame ngöne la Tusi Hmitrötr, hnei angeic hna qaja me kuca la itre ewekë hnei angeic hna ietran e thupen. Hapeu, hna hane fe traqa lai koi epun? Epuni kö a isi memine la ketre thiina maine hna majemine ka ngazo? Maine eje hi, tro la tulu i Peteru a ithuecatre koi epun. Maine ju, tha tro kö a qaja la itre tria i Peteru e hnine la Tusi Hmitrötr. Ngo hna amë itre ej, matre ini së. (2 Tim. 3:​16, 17) Casi hi la itre jol me itre mekune i Peteru me easë. Jëne la tulu i angeic, easa trotrohnine laka, tha aja i Iehova kö tro sa pexej. Nyidrëti pe a ajan tro sa nue trengecatr, matre nuetrij la itre hna majemine ka ngazo.

3. Pine nemen matre nyipiewekë tro sa cile catr?

³ Pine nemene matre loi e tro palahi sa nue trengecatr? Önine la ketre edromë, tro së lai a atreine huliwane la ketre jia ne huliwa, e hne së hna huliwan lapan. Pane mekune jë la: Tro la ketre atr a atreine lepe guitar, e tro angeic a elon lapan. Ame itre xaa ijin, troa tria la aqane lepe guitar, ngo e tro angeic a elo lapa, tro hë angeice lai a maca. Ngacama ka atreine hnyawa ha angeic elo, ngo tro palahi angeic lai a tria. Tha tro kö angeice lai a nuetrij la guitar. Ngo tro pe angeic a catre elo, matre maca hnyawa. Ketre tun, maine ase hë së nuetrij la ketre hna majemine ka ngazo, ngo ijije hi tro ej a fetra hmaca. Tha tro kö së lai a cil e cili, ke easë asë a qaja me kuca la itre ewekë ka ngazo. Ngo, maine tro sa isine troa nuetrij lai hna majemine cili, tro Iehova a xatua së. (1 Pet. 5:10) Ame ngöne la tane mekune celë, tro sa ce wange la aqane cile catre i Peteru, ngacama hnei angeice fe hna hane tria. Tro la aqane utipi angeic hnei Iesu a xatua së troa catre nyihlue i Iehova.

HNEI PETERU HNA CILE CATR ME KAPA LA ITRE MANATHITH

4. Ame ngöne Luka 5:​5-10, tune kaa la aqane qeje angeice kö hnei Peteru, nge nemene la hna kuca hnei Iesu?

⁴ Tha hnei Tusi Hmitrötre kö hna qaja la kepin, matre qaja jë Peteru ka hape, “atre ka ngazo” angeic, maine pena la ngazo hnei angeic hna kuca. (E jë la Luka 5:​5-10.) Maine jë, hnei angeic hna kuca la itre ngazo ka tru. Öhne hi Iesu laka, Peteru a xou troa easenyi nyidrë, ke ame koi angeic, tha ijiji angeice kö. Ngo, atre hi Iesu laka, ijiji angeic troa mele nyipici. Matre, öni nyidrëti jë hi koi Peteru ka hape, “The xou kö.” Hnei Iesu hna mejiune koi Peteru, nge celë hi ka saze la mele i angeic. E thupen, hnei angeic me Anederea, trejin me angeic, hna nuetrij la huliwa i nyidro matre xötrethenge la Mesia. Nge tru la itre manathith hnei nyidroti hna kapa qa ngön.—Mar. 1:​16-18.

5. Nemene la itre manathithi hnei Peteru hna kapa, qaane lo angeic a xötrethenge Iesu?

⁵ Tru catre la itre iamamanyikeu hnei Peteru hna öhne lo angeic a xötrethenge Iesu. Hnei angeic hna öhnyi Iesu a aloine la itre ka wezipo, me helëne la itre dremoni, me amelene hmaca la itre ka mec.b (Mat. 8:​14-17; Mar. 5:​37, 41, 42) Goi meköle goeëne fe angeic la elolo i Iesu, la nyidrëti a cile ngöne la Baselaia. Ketre ewekë lai hnei angeic hna thatreine thëthëhmin! (Mar. 9:​1-8; 2 Pet. 1:​16-18) Maine tha xötrethenge Iesu ju hnei angeic, tha tro kö angeic a öhne la itre ewekë cili. Tru catre la madrine i angeic, ke hnei angeic hna nuetrij la itre mekun ka ajolë angeic, me kapa la itre manathithi ka tru!

6. Hapeu, hna canga saze kö hnei Peteru? Qejepengöne jë.

⁶ Ngacama tru catr la itre iamamanyikeu hnei Peteru hna öhn, ngo angeic palahi a tria. Ame lo Iesu a qejepengöne la itre hna perofetane laka, troa akötrëne me humuthi nyidrë, hnei Peteru hna ameköti nyidrë. (Mar. 8:​31-33) Nge anyimua iwesitrë angeic me itre xaa aposetolo matre troa atre ka hape, drei la ka tru e angatr. (Mar. 9:​33, 34) Ame lo jidr tixenuë i Iesu e celë fen, hnei Peteru hna thupa la hnangenyië ne la ketre trahmany. (Ioane 18:10) Nge ngöne palahi la jidri cili, hnei angeic hna xoue atr me akönia qaja ka hape, thatre Iesu kö hnei angeic. (Mar. 14:​66-72) E thupen, hnei angeic hna treije hleuhleu.—Mat. 26:75.

7. Thupene la kola amele Iesu hmaca, nemene la hnëqa hnei nyidrëti hna ahnith koi Peteru?

⁷ Tha hnei Iesu kö hna nuetriji Peteru. Thupene la hna amele Iesu hmaca, hnei nyidrë hna aijijë Peteru troa amamane la ihnimi angeic koi nyidrë. Hnei Iesu hna ahnith koi Peteru la ketre hnëqa, ene la troa thupëne hnyawane la itre nekö i mamoe i nyidrë. (Ioane 21:​15-17) Hnei Peteru kö hna kapa la hnëqa cili? Öö, ke ame ngöne lo ijine Penetekos, hnei angeice fe hna kapa la uati hmitrötr e Ierusalema.

8. Nemene la hna kuca hnei Peteru e Anetioka?

⁸ Ngacama hna ië Peteru hnei uati hmitrötr, ngo angeic palahi a tria. Ame lo macatre 36 M.K., ceme Peteru hi lo uati hmitrötr a ië Konelio atre ne fen hna tha xötrehatren. Kolo hi lai a amamane ka hape, “tha ka ië hna hnime kö Akötresie” nge Nyidrëti ha kapa la itre atre ne fen ngöne la ekalesia. (Itre hu. 10:​34, 44, 45) Qane ju hi lai, angeice ha ce xen memine la itre atre ne fen. (Gal. 2:12) Ngo, ame kowe la angetre Iudra ka xome la hmi keresiano, ke tha loi kö tro angatr a ce xen memine la itre atre ne fen. Matre, ame la angatr a traqa e Anetioka, hnei Peteru hna xou troa ce xen memine la itre xaa trejin, ke tha angetre Iudra kö. Öhne hi Paulo aposetolo la aqane ujë i angeic ka ngazo, matre hnei nyidrë hna haji angeic qëmeken la ka alanyim. (Gal. 2:​13, 14) Ngo tha celë kö ka sewe Peteru troa catre nyihlue i Iehova. Nemene la ka xatua angeic?

NEMENE LA KA XATUA ANGEIC TROA CILE CATR?

9. Nemene la ka amamane ngöne Ioane 6:​68, 69 ka hape, ka mele nyipici Peteru?

⁹ Ketre atr ka mele nyipici Peteru, ke tha hnei angeice kö hna nue la ketre ewekë troa sewe angeic troa xötrethenge Iesu. Celë hi ka mama lo Iesu a qaja la ketre ithuemacany hna tha trotrohnine hnene la itre xaa atre dreng. (E jë la Ioane 6:​68, 69.) Alanyimu e cili ka trotriji Iesu, ngo tha Peteru fe kö. Xecie koi angeic laka, thei Iesu hmekuje hi la “itre trengewekë ne mele ka pë pun.”

10. Hnei Iesu hna amamane tune kaa la mejiune i nyidrë koi Peteru? (Wange ju fe la iatr.)

¹⁰ Tha hnei Iesu kö hna nuetriji Peteru. Atre hi nyidrë ka hape, tro Peteru me itre xaa aposetolo a nuetriji nyidrë lo jidr tixenuë i nyidrë e celë fen. Ngo ka mejiune Iesu koi Peteru, ke öni nyidrë, tro hmaca kö angeic a bëek me mele nyipici koi nyidrë. (Luka 22:​31, 32) Trotrohnine hi Iesu laka, “canga ajane hi la hni, ngo kucakuca pe la ngönetrei.” (Mar. 14:38) Celë hi matre, tha hnei nyidrëti kö hna nuetriji Peteru thupene la angeic a qaja ka hape, thatre nyidrëti kö hnei angeic. Thupene la kola amele nyidrëti hmaca, hnei nyidrëti hna pane wai angeic. (Mar. 16:7; Luka 24:34; 1 Kor. 15:5) Hna akeukawanyi Peteru, ke tru catr la akötre i angeic la ijine cili!

11. Hnei Iesu hna amamane tune kaa koi Peteru laka, tro kö Iehova a xatua angeic?

¹¹ Hnei Iesu hna amamane koi Peteru laka, tro kö Iehova a xatua angeic. Thupene la hna amele Iesu hmaca, hnei nyidrëti hna kuca la ketre iamamanyikeu lo Peteru me itre xaa aposetolo a nue ifile. (Ioane 21:​4-6) Ketre iamamanyikeu lai ka jelenyipicine koi Peteru laka, tro kö Iehova a hamën la ka nyipiewekë kowe la mele i angeic. Ame e cili, ma angeice hmaca jë a mekun lo hnei Iesu hna qaja göi Iehova laka, tro kö Nyidrëti a hamëne la ka nyipiewekë kowe la itre ka ‘thele panëne la Baselaia.’ (Mat. 6:33) Celë hi ka uku Peteru troa amë panëne la huliwa ne cainöj, nge pine pë hë la huliwa ne nyi i. Ame lo Penetekos macatre 33 M.K., hnei angeic hna catre cainöj, matre alanyimu catr la itre atr ka kapa la maca ka loi. (Itre hu. 2:​14, 37-41) Ame e thupen, hnei angeic hna xatuane la angetre Samaria me itre atre ne fen, troa atre me xötrethenge Iesu. (Itre hu. 8:​14-17; 10:​44-48) Eje hi, Iehova la ka aijijë Peteru troa xatuane la nöjei pengöne atr troa lö kowe la ekalesia.

ITRE INI KOI SË

12. Tro la tulu i Peteru a xatua së tune kaa, e ekö hë së isi memine la ketre hna majemine ka ngazo?

¹² Tro Iehova a xatua së troa cile catr. Tha ka hmaloi kö troa nuetrij la itre hna majemine ka ngazo hna kuca qaan ekö. Maine jë tro sa mekune ka hape, ka tru catre kö la jole hne së hna melën hui Peteru. Ngo, tro kö Iehova a xatua së troa cile catr. (Sal. 94:​17-19) Tro sa ce ithanatane la ketre trejin trahmany ka homosexuel ekö. Ame la angeic a atre Iehova, ke hnei angeic hna nuetrije hnyawane la aqane mele cili. Ngo hnei angeic hna pane isi memine la itre aja i angeic ka ngazo. Nemene la ka xatua angeic troa cile catr? Öni angeic: “Iehova a ithuecatre koi së. Jëne la uati hmitrötr . . . , trotrohnine hë ni laka, ijije hi tro sa melëne la nyipici . . . Iehova a huliwa ni, ngacama atr ka ngazo ni. Nge Nyidrëti palahi a hamë trengecatre koi ni.”

13. Thenge la Itre Huliwa 4:​13, 29, 31, tro sa nyitipu Peteru tune kaa? (Wange ju fe la iatr.)

¹³ Tune lo hne së hna ce wang, anyimua tria Peteru, hnene la xou. Ngo ame la angeic a mejiun kowe la trengecatre i Iehova, ke angeic a cile catr. (E jë la Itre Huliwa 4:​13, 29, 31.) Ijiji së fe troa elë hune la xou. Celë hi hna öhne hnei trejin Horst ka mel fene la Allemagne nazie. Anyimua keithenge angeic la mekuna i itre xan ngöne la uma ne ini, me qaja ka hape, “Heil Hitler!” Ngo tha hna wesitrë angeice kö hnene la keme me thine i angeic. Hnei nyidroti pe hna ce thith me angeic, me sipo Iehova troa xatua angeic troa cile catr. Jëne la ixatua ne la kem me thine i Horst memine la mejiune i angeic koi Iehova, atreine hë angeic cile catr qëmekene la itupath. Öni angeic e thupen: “Tha hnei Iehova kö hna nuetriji ni.”c

14. Tro la qatre thup a akeukawane tune kaa la ketre trejin ka dekurag?

¹⁴ Tha tro jë kö Iehova me Iesu a nuetriji së. Thupene lo hnei Peteru hna qaja ka hape, thatre Iesu kö hnei angeic, nyipiewekë tro angeic a axecië mekun. Hapeu, tro kö angeic a nuetriji Iesu maine cile catr? Hnei Iesu hna xëwe koi Iehova, matre tha tro kö a patre la lapaune i Peteru. Ketre, hnei Iesu hna qaja koi Peteru ka hape, hnei nyidrëti hna thithi sai angeic, nge loi e tro angeic a acatrene la lapaun ne la itre trejin e bëeke hë angeic. (Luka 22:​31, 32) Drei jë kö la madrine i Peteru, la angeic hmaca a mekun la itre hna qaja hnei Iesu! Qëmekene tro sa xom la itre mekune ka tru, ijije hi tro Iehova a upe la itre qatre thup troa ithuecatre koi së me xatua së troa mele nyipici koi Nyidrë. (Efe. 4:​8, 11) Paul, ketre qatre thup ka hekö hë, a thel troa akeukawane la itre trejin. Nyidrëti a xatuane la itre ka dekurag troa mekune hmaca la aqane e angatr ekö hnei Iehova. Thupene lai, nyidrëti a qaja koi angatr ka hape, Akötresie ka nyipici Iehova, matre tha tro jë kö Nyidrëti a nuetriji angatr. Öni Paul, “Eni a öhne ka hape, Iehova a xatuane la itre trejin ka dekurag troa cile catr.”

15. Kola jelenyipicine tune kaa la hna qaja hnei Mataio 6:33 hnene la hna melën hnei Peteru me Horst?

¹⁵ Tune la aqane hamëne Iehova la ka nyipiewekë koi Peteru me itre xaa aposetolo, tro fe Nyidrëti a hamë së la ka nyipiewekë, e tro sa amë panëne la Baselaia ngöne la mele së. (Mat. 6:33) Thupene la Hnaaluene Isi Katru, aja i Horst, lo trejin hna qaja ha e caha, troa xome la huliwa ne pionie. Ngo ame pe, pëkö ca ewekë i angeic. Matre ame koi angeic, tha ijiji angeice kö troa hane pionie. Nemene la hnei angeic hna kuca? Ame la kola vizitëne la ekalesia i angatre hnene la atre thupëne la sirkoskripsio, ke hnei angeic hna cainöj e nöjei drai. Ame hë lo pune wiik, angeic a sesëkötr la kola hamëne koi angeic hnene la atre thupëne la sirkoskripsio, la ketre enveloppe. Thatre kö angeic ka hape, qaathei drei. Jëne lai mani cili, ijiji Horst hë troa hane pionie koi nyimu treu. Ame koi angeic, Iehova hi lai a amamane ka hape, tro kö Nyidrëti a xatua angeic. Hnei angeic hna catre huliwa i Iehova uti hë la angeic a mec.—Mal. 3:10.

16. Hnauëne laka, ka nyipiewekë la hna melën hnei Peteru me itre hnei angeic hna cinyianyin?

¹⁶ Tru la madrine i Peteru la angeic a öhne ka hape, tha hnei Iesu kö hna nuetriji angeic! Hnei Iesu hna xatua angeic troa ketre aposetolo ka mele nyipici, me tulu kowe la itre xaa keresiano. Hetre itre ini nyine tro së asë a xome qa ngöne la aqane ini Peteru hnei Iesu. Hnei Peteru hna qaja itre ej ngöne la lue tus hnei angeic hna cinyianyine kowe la itre ekalesia ne la itre pane keresiano. Ame ngöne la tane mekun e thupen, tro sa ce wange la itre mekun hna qaja e hnine la lue tusi cili, me aqane tro sa trongëne enehila.