Itre Ini Qa Ngöne La Lue Tusi Peteru

1. Qëmekene tro Peteru a mec, nemene la hnei angeic hna kuca?

ITRE macatre ne catre huliwa Peteru koi Iehova. Ame ngöne la itre macatre cili, hnei angeic hna ce tro me Iesu, me fe la itre xaa teritoar, me hane sine la lapa ne xomi meköt. Ngo, qëmekene tro angeic a mec hnei Iehova hna ahnith koi angeic la ketre huliwa. Ame ngöne lo itre macatre 62 koi 64 M.K., hnei angeic hna cinyanyine jëne la uati hmitrötr la lue tus hna hape, 1 me 2 Peteru. Aja i angeic tro la lue tusi cili a xatuane la itre keresiano, elanyi e meci hë angeic.—2 Pet. 1:​12-15.

2. Hnauëne laka, kola traqa ijij la lue tusi Peteru?

² Hnei Peteru hna cinyanyine la lue tusi angeic lo ijine kola ‘akötrëne la itre trejin hnene la itre itupath.’ (1 Pet. 1:6) Itre atr ka ngazo a amenune la ekalesia hnene la itre ini ka thoi me aqane ujë ka sis. (2 Pet. 2:​1, 2, 14) Ketre, easenyi hë tro la itre keresiano ka mele e Ierusalema a öhne “la pune la nöjei ewekë asë.” Troa apatrene la traon me uma ne hmi hnene la trongene isi angetre Roma. (1 Pet. 4:7) Hnene la lue tusi Peteru hna xatuane la itre keresiano cili, troa cile catr qëmekene la itre itupath me hnëkë angatr kowe la itre ka troa traqa.b

3. Pine nemene matre ka nyipiewekë fe koi së enehila la lue tusi Peteru?

³ Hna cinyanyine la lue tusi Peteru kowe la itre pane keresiano. Ngo hnei Iehova hna amë lue ej e hnine la Tusi Hmitrötr, matre tro fe së enehila a hane xomi ini qa ngön. (Rom. 15:4) Ame enehila, alanyimu la itre atr ka kuca la itre huliwa ka sis, matre easa isine troa mele nyipici koi Iehova. Ketre, easenyi hë troa traqa la akötr atraqatr, ketre akötr ka tru catre kö hune la hna melëne hnene la angetre Iudra ekö. Matre tru catre la itre eamo ka lolo nyine tro sa xome qa ngöne la lue tusi Peteru. Tro lue ej a xatua së troa treqene hnyawane la drai Iehova, me elë hun la xoue atr, me ihnimikeu. Tro mina fe lue ej a xatuane la itre qatre thup troa thupëne hnyawane la itre mamoe i Akötresie.

ITREQE HNYAWA JU

4. Thenge la 2 Peteru 3:​3, 4, nemene la ka troa ananazijëne la lapaune së?

⁴ Alanyimu la itre atre enehila ka tha lapaune kö kowe la itre hna perofetan hnei Tusi Hmitrötr. Itre xan a hnyimasai së, ke ekö hë së cainöjëne la pune la fen celë. Ame koi angatr tha tro fe kö lai a traqa. (E jë la 2 Peteru 3:​3, 4.) Maine tro la ketre sinee së, maine sine huliwa së, me ketre atr hne së hna cainöj kow a qaja tune lai, ke tro hë lai a ananazijëne la lapaune së. Ijije hi tro la hna cinyanyine hnei Peteru a xatua së.

5. Maine hmitre palaha koi së la drai Iehova, nemene la ka troa xatua së troa atreine waiewekë hnyawa? (2 Peteru 3:​8, 9)

⁵ Maine jë, easa mekune ka hape, hmitre palaha Iehova troa nyipune la fen celë. Ngo, tro la itre hna qaja hnei Peteru a xatua së troa atreine waiewekë hnyawa. Peteru a amamane laka, isapengöne kö la aqane e drai easë me Iehova. (E jë la 2 Peteru 3:​8, 9.) Ame la ca drai koi Nyidrë, ke ca thauzan lao macatre. Ketre, Nyidrëti a xomihni, ke xele Nyidrë troa apatrene la ketre atr. Ngo e traqa ha la drai Nyidrë, ke tro ha apatrene la fen. Celë hi matre, ijine hi la tro sa catre cainöj kowe la nöjei atr e cailo fen.

6. Nemene la nyine tro sa kuca matre ‘tha tro kö a thëthëhmine’ la drai Iehova? (2 Peteru 3:​11, 12)

⁶ Peteru a ithuecatre koi së laka, ‘tha tro kö a thëthëhmine’ la drai Iehova. (E jë la 2 Peteru 3:​11, 12.) Tro sa tune kaa? Loi e tro sa lapa mekun e nöjei drai la itre manathithi hne së hna troa kapa, ngöne la fen ka hnyipixe. Pane mekune jë la ijin tro epuni a manone la eny ka lolo, me xeni hnyawa, me kapa la itre sinee i epun ka mec, me inine kowe la itre hna amelene hmaca la aqane eatr la itre hna perofetan. Maine tro sa lapa mekune lai, tro sa atreine treqene hnyawane la fene ka hnyipixe. Nge tro ha xecie koi së laka, easa melëne la pune la fen celë. Pine laka, “atre hë” së la itre ewekë ka troa traqa elany, tha easë kö a nue la itre ka ini thoi troa “huli” së.—2 Pet. 3:17.

TROA ELË HUNE LA XOUE ATR

7. Nemene la thangane la xoue atr?

⁷ Pine laka, tha thëthëhmine kö së la drai Iehova, matre easa catre cainöjëne la maca ka loi. Ngo ame itre xaa ijin, easa xou troa cainöj. Pine nemen? Pine laka, easa xoue atr. Celë hi ka traqa koi Peteru. Ame lo kola kootrë Iesu, xou Peteru troa qaja laka, ketre atre drei Iesu angeic, nge göi qaja fe angeic ka hape, thatre nyidrëti kö hnei angeic. (Mat. 26:​69-75) Ngo, hnei angeic hna qaja e thupen ka hape: “The xouene kö la ka iaxoueny, nge the hnehengazo menu kö.” (1 Pet. 3:14) Peteru hi lai a amamane laka, ijije hi troa elë hun la xoue atr.

8. Nemene la ka troa xatua së troa elë hun la xoue atr? (1 Peteru 3:15)

⁸ Nemene la ka troa xatua së troa elë hun la xoue atr? Öni Peteru: “Atrehmekune ju ngöne la isa hni i nyipunie ka hape, Keriso la Joxu, nge ka hmitrötre nyidrë.” (E jë la 1 Peteru 3:15.) Kolo lai a hape, troa lapa mekun la hnëqa i Iesu Keriso memine la mene i nyidrë. Maine xou i epun troa qaja la maca ka loi, ke mekune ju la Joxu së. Meku nyidrëti jë a lapa hune la theron, nge kola lapa xötreithi nyidrë hnene la itre milio lao angela. The thëthëhmine kö laka, “ase hë Akötresieti nue koi [Iesu] troa musi hune la nöjei ewekë e hnengödrai me e celë fen,” nge ‘tro pala hi nyidrë a ce me epun uti hë la troa nyipune la fene celë.’ (Mat. 28:​18-20) Peteru a ithuecatre koi së tro palahi a “hnëkë” matre tro sa atreine isigöline la lapaune së. Hapeu, aja i epuni kö troa cainöj kowe la itre sine huliwa maine sine ini epun,c maine cainöj pena kowe la itre atr hnei epun hna ixelë memin? Nga thele ijine jë, hnëkë jë, nge sipo trengecatre jë koi Iehova. The luelue kö laka, tro kö Iehova a xatua epun troa elë hun la xoue atr.—Itre hu. 4:29.

“CATRE JË IHNIMIKEU”

9. Eu lo Peteru a pë ihnim kowe la itre trejin? (Wange ju fe la iatr.)

⁹ Hnei Peteru hna inine la aqane tro sa ihnim. Ce me angeice fe hi lo Iesu a qaja ka hape: “Eni a hamë nyipunie la ketre wathebo ka hnyipixe, qa i nyipunie troa hnimi ketre me ketre; tune la aqane hnimi nyipunieti ni, qa i nyipunie troa ihnimikeu.” (Ioane 13:34) Ngo ame ju hi lo ketre ijin, xele pi hi angeic ma ce xen memine la itre xaa trejin ke, tha angetre Iudra kö, nge wanga qaja angazo angeic pi hnene la itre trejin ne Iudra. Hnei Paulo aposetolo hna qaja la aqane ujë i Peteru ka hape, “aqane ujë thoi,” maine ka iaö. (Gal. 2:​11-14) Hnei Peteru kö hna kapa la ihaji qaathei Paulo? Öö. Hnei angeice fe hna xomi ini qa ngön. Öni angeic ngöne la lue tusi angeic ka hape, tha tro hmekuje kö sa hnim la itre trejin, ngo loi e tro fe sa amamane la ihnimi easë.

10. Nemene la ka troa xatua së troa hetreny la “ihnim trejin ka pë thoi ngön?” Qejepengöne jë. (1 Peteru 1:22)

¹⁰ Öni Peteru, loi e tro sa hetrenyi la “ihnim trejin ka pë thoi ngön.” (E jë la 1 Peteru 1:22.) Tro sa hetrenyi la ihnim cili, e tro sa “drengethenge la nyipici.” Kola ini së hnene la nyipici cili laka, “tha ka ië hna hnime kö Akötresie.” (Itre hu. 10:​34, 35) Haawe, maine tro hi sa hnime la itre xaa atrene la ekalesia, ke tha easë kö a trongëne la hna amekötine hnei Iesu. Eje hi, tui Iesu, hetre trejine kö hne së hna epe kow. (Ioane 13:23; 20:2) Ngo Peteru a ithuecatre koi së troa ‘hnim la itre trejin,’ tune la aqane hnimi së la itre atrene la fami së.—1 Pet. 2:17.

11. Kola hapeue la troa ‘catre ihnimikeu qa kuhu hni’?

¹¹ Peteru fe a ithuecatre koi së troa ‘catre ihnimikeu qa kuhu hni.’ Ame la kola qaja ka hape, “catre jë ihnimikeu” ke, kola qaja la troa hnime la ketre atr, ngacama tha ka hmaloi kö. Ngo tune kaa e traqa ju la ketre trejin akötrë së? Tro kö sa të koi angeic, maine hnimi angeic? Hnei Iesu hna ini Peteru laka, tha aja i Iehova kö tro sa itëkeune la ngazo. (Ioane 18:​10, 11) Öni Peteru: “The tro kö a të la ngazo hnei ngazo, me iqaqa hnei iqaqa, ngo të jë hnei manathith.” (1 Pet. 3:9) Maine ka catre la ihnimi së kowe la itre trejin, ke tro së lai a thiina ka loi me metrötrë angatr, ngacama hnei angatr hna akötrë së.

12. (a) Nemene la nyine tro sa kuca e ka tru la ihnimi së kowe la itre trejin? (b) Thenge la video Préservons l’unité, un cadeau précieux, nemene la nyine tro epuni a kuca?

¹² Ame ngöne la pane tusi Peteru, angeic a qaja ka hape, e tro sa ‘catre ihnimikeu,’ ke tro së lai a atreine he “la nöjei pengöne ngazo.” (1 Pet. 4:8) Maine jë, mekune palakö Peteru lo ini hna hamëne hnei Iesu göi aqane troa nue la ngazo. Ame ekö, angeic a mekun ka hape, tro hi a nue la ngazo ne la trejin “a seven,” nge ka tru catre hë lai. Ngo öni Iesu troa nue la ngazo a “77 pe.” Kolo lai a hape, tro palahi a nue la ngazo hna kuca koi angeic. (Mat. 18:​21, 22) Maine jole koi epun troa trongëne la eamo celë, ke the dekurage kö! Jole koi së asë troa nue la ngazo i ketre. Ngo ame la ka nyipiewekë, ke tro epuni a isine troa nue la ngazo ne la trejin, me iloi me angeic.d

ITRE QATRE THUP, THUPËNE HNYAWA JU LA ITRE MAMOE

13. Pine nemene matre jole kowe la itre qatre thup troa eatrëne hnyawane la hnëqa i angatr?

¹³ Tha thëthëhmine kö Peteru lo trengewekë i Iesu koi angeic, thupene lo kola amele nyidrëti hmaca, ka hape: “Tro xome hnyawa jë la itre neköi mamoeng.” (Ioane 21:16) Maine ketre qatre thup epun, ke thatraqai epuni fe la eamo celë. Ngo, jole pi hë kowe la itre qatre thup troa eatrëne la hnëqa celë, pine laka tru catre la itre huliwa i angatr. Ame la pane hnëqa i angatr, ke ene la troa thupëne la fami angatr. Loi e tro angatr a isine tro la fami angatr a hetre xen, me mele ka loi, me easenyi koi Iehova. Ketre angatre fe a catre cainöjëne la maca ka loi, me hnëkë cainöj nyine cile fë ngöne la itre icasikeu me ijine asabele. Ame la itre xan, angatr a sine la Komite Ka Ixatua Göi Itre Ejolene e Pital (CLH) maine huliwa kowe la LDC. Tha hnëqa ka co kö la hna xome hnene la itre qatre thup!

14. Nemene la ka troa xatuane la itre qatre thup troa thupëne la itre mamoe i Akötresie? (1 Peteru 5:​1-4)

¹⁴ Öni Peteru kowe la itre qatre thup ekö ka hape, “Thupëne hnyawa ju la itre mamoe i Akötresie.” (E jë la 1 Peteru 5:​1-4.) Itre qatre thup fe, atre hi eahun laka, hnime catre epun la itre trejin, nge aja i epun troa thupë angatr. Ngo ame itre xaa ijin, epuni a mekun ka hape, tru palaha la itre jole i epun, maine kucakuca catr epuni matre eatrëne la hnëqa cili. Nemene la nyine troa kuca? Fe pi la hni epun koi Iehova. Öni Peteru: “Maine tro ketre a nyihlu, nue angeice pi troa kuca thenge la trengecatr hna hamë angeic hnei Akötresie.” (1 Pet. 4:11) Ame la itre xaa trejin, angatr a cile kowe la itre jole laka, tro hi a patr ngöne la fen ka hnyipixe. The thëthëhmine kö laka, Iesu Keriso “tane la itretre thup,” la ka ijije troa xatua angatr. Tro kö nyidrëti a xatua angatr enehila me elany ngöne la fen ka hnyipixe. Ame la aja i Iehova, ke tro epuni a hnim me thupëne la itre trejin, me ‘nyi tulu kowe la hnënge mamoe.’

15. Tune kaa la aqane amamane la ketre qatre thup la enyipiewekën troa thupën la itre neköi mamoe? (Wange ju fe la iatr.)

¹⁵ Trotrohnine hi William, ketre qatre ka hekö hë, la enyipiewekëne troa thupën la itre neköi mamoe. Ame lo kola nyiqane la COVID-19, hnei nyidrë me itre xaa qatre thup ne la ekalesia, hna isine troa hën e nöjei wiik la itre trejin ne la isa gurup ne cainöje i angatr. Ka nyipiewekë catre koi angatr la huliwa cili. Öni William: “Alanyim la itre trejin ka lapa cas ngöne la uma i angatr, matre canga tro hi a traqa koi angatr la itre mekune ka ngazo.” Ame la kola traqa la jol kowe la ketre trejin, William a drei angeic hnyawa matre trotrohnin la hnei angeic hna hnehengazon. E thupen, nyidrëti a thel itre itusi së me itre video ka troa xatuane lai trejin. Öni nyidrë: “Ka nyipiewekë enehila troa thupën la itre neköi mamoe. Easa nue trengecatr troa xatuane la itre atr troa atre Iehova. Matre loi e tro fe sa nue trengecatr troa thupëne la itre neköi mamoe i Iehova, me xatua angatr troa mele nyipici koi Nyidrë.”

NUE IEHOVA PI TROA APEXEJENE LA INI EPUN

16. Tro sa trongëne tune kaa la itre ini qa ngöne la lue tusi Peteru?

¹⁶ Hne së hna ce wang la itre xaa ini ngöne la lue tusi Peteru. Öhne kö epun la ketre götran nyine tro palakö epun a huliwan? Maine jë, troa ami ijine troa lapa mekune la itre manathith hna troa kapa elany. Maine troa cainöj kowe la itre sine huliwa maine sine ini epun, me kowe la itre atr hnei epun hna iöhny memin. Maine tro pena a amamane la ihnimi epun kowe la itre trejin. Nge maine epun la ketre qatre thup, epuni kö a isine troa thupëne la itre mamoe i Akötresie memine la hni ka pexej? Maine tro sa waipengö së, tro së lai a öhne la itre nyine troa saze, ngo the dekurage pi kö së! Ka “lolo la Joxu,” matre tro kö nyidrëti a xatua së. (1 Pet. 2:3) Peteru a ithuecatre koi së ka hape: “Tro hë la Akötresie . . . a sipu apexejene la ini i nyipunie. Tro nyidrëti a acatrenyi nyipunie, tro nyidrëti a aegöcatrenyi nyipunie, nge tro nyidrëti a acile huti nyipunie.”—1 Pet. 5:10.

17. Nemene la manathith hne së hna troa kapa, e tro sa catr me nue Iehova troa ini së?

¹⁷ Hnei Peteru hna mekun ka hape, tha ijiji angeic kö troa hane cile ezine la nekö i Akötresie. (Luka 5:8) Ngo, jëne la ixatua me ihnimi Iehova me Iesu, hnei angeic hna catre xötrethenge Iesu. Matre hna aijijë angeic troa lö kowe “la Baselaia ka epine palua, lo Baselaia ne la Joxu së me Atre Amele së, Iesu Keriso.” (2 Pet. 1:11) Ketre manathith ka tru lai! Maine tro epuni a catr tui Peteru, me nue Iehova troa ini epun, tro fe epun a hane kapa la mele ka pë pun. Nge ame hë cili, tro epuni a “kapa la iamele, pine la lapaune i nyipunie.”—1 Pet. 1:9.