“Catre Pi, Nge The Enienije Kö”

1-2. Pine nemen matre loi e tro la keresiano a tune la batima atraqatr e Tokyo? (1 Korinito 15:58)

AME lo 1978, hna xupe la ketre batima atraqatr ka 60 lao étages e Tokyo (Zapo). Ame e cili, ke hna traqa lapa la itre sa. Matre itre atr a hnying ka hape, tro kö a cile catr lai batima. Hna xupe tune kaa lai batima matre tro ej a cile catr? Hnene la itre ka inamacan hna xupe lai batima cili, matre ame la kola traqa la ketre sa, ke eje hi a enienije ngo tha trotro lapa kö ej. Ceitune hi la itre keresiano memine lai batima cili. Tune kaa?

² Nyipiewekë tro la keresiano a cile catr, me atreine tulu ewekë. Ame göi troa trongëne la itre wathebo me itre trepene meköt, ke loi e tro angeic a catr. (E jë la 1 Korinito 15:58.) Angeic a ‘canga idrengethenge’ me mele nyipici, ngacama kola icilekeu. Ngo ame itre xaa ijin, loi e tro fe angeic a atreine tulu ewekë. (Iako. 3:17) Ame la keresiano ka atreine tulu ewekë, ke tha ka pi nyi ka meköti kö, maine kuci mekune pena. Ame ngöne la tane mekune celë, tro sa ce wange la aqane tro sa cile catr. Tro mina fe sa ce wange la 5 lao ewekë hnei Satana hna huliwan matre troa sewe së troa drengethenge Iehova, me aqane tro sa cile koi angeic.

EU LA TRO SA CILE CATR?

3. Nemene la itre wathebo hnei Iehova hna hamë ngöne Itre Huliwa 15:28, 29?

³ Iehova la Atre Acili Wathebo Ka Tru, matre hnei Nyidrëti palahi hna hamëne la itre wathebo ka lualai kowe la nöje i Nyidrë. (Is. 33:22) Hnene la lapa ne xomi meköt ekö, hna qaja la köni ewekë nyine tro la itre keresiano a trongëne hnyawan: (1) troa iananyi memine la kuci idrola, me thil koi Iehova hmekuj, (2) troa metrötrëne la wathebo i Iehova göi madra, me (3) troa trongëne la itre trepene meköt ka draië ne la Tusi Hmitrötr göi kuci ngazo. (E jë la Itre Huliwa 15:28, 29.) Tune kaa la aqane tro la itre keresiano enehila a catre trongëne la köni ewekë cili?

4. Tune kaa la aqane tro sa thil koi Iehova hmekuje hi? (Hna Amaman 4:11)

⁴ Easa iananyi memine la kuci idrola, me thil koi Iehova hmekuj. Hnei Iehova hna amekötine kowe la angetre Isaraela, troa thil koi Nyidrëti hmekuje hi. (Deu. 5:6-10) Ame lo kola tupathi Iesu hnei Diabolo, ke hnei nyidrëti hna qaja hnyawan ka hape, Iehova hmekuje hi la nyine tro sa thili kow. (Mat. 4:8-10) Celë hi matre, tha easë kö a hane thil kowe la itre idrola me itre hnasaatr. Ketre, tha easë kö a atrunela itre atr, tune la itre hene ne hmi maine itre hene politik. Nge tha easë kö a nyi idrolane la itre atr ka hlemu, tune la itre ka kuci sport, ka elo ngöne film, maine ka nyima. Easa thil hmekuje hi koi Iehova, Atre “xupe la nöjei ewekë asë.”—E jë la Hna Amaman 4:11.

5. Pine nemen matre easa metrötrëne la wathebo i Iehova göne la mel me madra?

⁵ Easa metrötrëne la wathebo i Iehova göne la mel me madra. Pine nemen? Öni Iehova ame la madra, ke mele ne la atr, nge ketre ahnahna qaathei Nyidrë. (Lev. 17:14) Ame lo Iehova a nue la itre atr troa öni mitr, ke hnei Nyidrëti hna wathebo angatr troa öni madra. (Gen. 9:4) Hnei Nyidrëti hmaca hna amexeje la hna amekötine cili, lo Nyidrëti a hamëne la Wathebo i Mose kowe la angetre Isaraela. (Lev. 17:10) Nge jëne la lapa ne xomi meköt, hnei Nyidrëti hna upe la itre pane keresiano “troa iananyi memine la . . . madra.” (Itre hu. 15:28, 29) Ame enehila, easa drengethenge la hna amekötine cili, la easa thel troa nyinyine la meci së.b

6. Nemene la nyine tro sa kuca matre trongëne la itre trepene meköt ka draië i Iehova?

⁶ Easa trongëne la itre trepene meköt ka draië i Iehova göi kuci ngazo. (Heb. 13:4) Jëne la ketre ceitun, Paulo a upi së troa “humuthe” la itre hnepe ngönetrei së, ene la troa lepetrije la itre aja ka ngazo. Celë hi matre tha tro kö sa goeën, maine kuca la ketre ewekë, ka troa uku së troa kuci ngazo. (Kol. 3:5; Iobu 31:1) Ame la kola tupathi së troa kuca la ngazo, ke loi e tro sa canga lepetrije la itre mekun maine itre huliwa ka troa thë la imelekeu së me Iehova.

7. Nemene la hne së hna isine troa kuca, nge pine nemen?

⁷ Aja i Iehova tro sa “drengethenge [nyidrë] qaa kuhu hni.” (Rom. 6:17) Nyine loi koi së la itre trepene meköti Iehova, nge tha ka saze kö la itre wathebo i Nyidrë. (Is. 48:17, 18; 1 Kor. 6:9, 10) Easa isine troa amadrinë Iehova, me nyitipune la atre cinyihane la Salamo. Öni angeic: “Xeci e kuhu hning troa trongëne la wathebo i nyipë utihë la pun.” (Sal. 119:112, NWT) Ame pe, tro Satana lai a thel troa akeinyi së. Nge nemene la itre nyinyithiina i angeic?

KOLA AKUCAKUCANYI SË TUNE KAA HNEI SATANA?

8. Nemene la ewekë hnei Satana hna huliwan matre akucakucanyi së?

⁸ Iaxösisi. Satana a axösisi së me axouenyi së, matre troa akucakucanyi së. Angeic a “thele tha,” me thel troa thë la imelekeu së me Iehova. (1 Pet. 5:8) Ame ekö, hna qanangazon, me lep, me humuthe la itre pane keresiano, matre troa akucakucanyi angatr. (Itre hu. 5:27, 28, 40; 7:54-60) Ame enehila, Satana palahi a axösisine la itre hlue i Iehova. Celë hi ka traqa kowe la itre trejin e Russie, me ngöne la itre xaa nöj. Itre ithupëjia a axösisi angatr, me qanangazo angatr.

9. Pine nemen matre tro sa thupëne la itre aqane iaö së hnei Satana? Qaja jë la ketre hna melën.

⁹ Satana a thel troa iaö së. Tha Satana hmekuje kö a huliwane la iaxösisi, hetre itre xaa nyinyithiina i angeice kö. (Efe. 6:11) Hane hi la hna melëne hnene la ketre trejin, Bob la ëje i angeic. Hnei angeic hna lö e pital, ke kola troa xöji angeic. Hnei angeic hna thuemacanyine la itre droketre laka, tha tro kö angeic a xomi madra. Nge hna kapa la mekuna i angeic hnene la droketre ka troa ixöj. Ngo ame lo jidr qëmekene troa xöji angeic, hnene la anesthésiste hna wai angeic thupen la kola tro hnene la fami angeic. Öni nyidrë koi Bob, tha tro kö nyidrëti a hamë madra koi angeic, ngo tro kö nyidrëti a hnëkën amë e traqa ju la ketre jol. Ma nyidrëti a mekune ka hape, tro Bob a saze mekun, ke paatre hë la fami angeic. Ngo hnei Bob hna cile catr, me qaja hnyawane kowe la droketre ka hape, tha saze kö la mekuna i angeic, nge traqa ju hë la ketre jol, tha tro kö a hamë madra.

10. Pine nemen matre ka ngazo catr la aqane waiewekë ne la itre atre ne fen? (1 Korinito 3:19, 20)

¹⁰ Aqane waiewekë ne la itre atre ne fen. Maine tro sa xome la aqane waiewekë i angatr, ke tro së lai a iananyi me Iehova, memine la itre trepene meköti Nyidrë. (E jë la 1 Korinito 3:19, 20.) “Inamacane i fen” a ukune la itre atr troa keithenge la itre sipu aja i angatr ka ngazo. Hnene la itre xaa keresiano ne Peregamo me Thuataira, hna nyitipune la aqane ujë ne la itre atrene la traone i angatr, ka thili koi idrola me kuci ngazo. Hnei Iesu hna hajin la itre trejin ne la lue ekalesia cili, pine angatr nue la kuci ngazo e hnine la ekalesia. (Hna ama. 2:14, 20) Enehila mina fe, itre atr a uku së troa hane xome la aqane waiewekë i angatr. Ijije hi tro la fami së, me itre sinee së a iaö së ka hape, itre wathebo i Iehova a xomehnöthe la mele së. Matre angatr a uku së troa wangacon itre ej. Öni angatr ka hape, pëkö engazone la troa kuci ngazo, nge ka hekö hë la itre trepene meköt ne la Tusi Hmitrötr.

11. Nemen la nyine tro sa neën, e aja së troa cile catr?

¹¹ Ame itre xaa ijin, easa mekune ka hape, tha ka lualai kö la itre hna amekötin hnei Iehova. Matre, tro së lai a thel troa elë hune la itre “hna cinyihan.” (1 Kor. 4:6) Celë hi hna kuca hnene la itre hene ne hmi ngöne lo hneijine i Iesu. Hnei angatr hna nyi ehnefe ne la itre atr, la angatr a nyixane la Wathebo i Mose hnene la itre wathebo i atr. (Mat. 23:4) Iehova a hamë së la itre hna amekötin ka lualai, jëne la Tusi Hmitrötr me organizasio i Nyidrë. Matre, tha nyipiewekë kö troa nyixan la itre hnei Nyidrëti hna qaja ha. (Ite edomë 3:5-7) Ketre, tha tro kö sa elë hun la itre hna cinyihane e hnine la Tusi Hmitrötr, me musinëne la lapaune ne la itre xaa trejin.

12. Tune kaa la aqane huliwane Satana la “itre mekune ka pë alien”?

¹² Itre mekun ka tria. Satana a huliwan la “itre mekune ka pë alien,” me “hna wangatrun hnei fen,” matre iaön me aisane la itre atr. (Kol. 2:8) Ame ngöne lo hneijine ne lo itre pane keresiano, hna nyitrepene la itre mekune cili ka pë alien, hnene la itre ini atr, me qenenöje i angetre Iudra ka isazikeu memine la hna qaja hnei Tusi Hmitrötr. Nge kolo fe a qaja la ini laka, tro la itre keresiano a metrötrëne la Wathebo i Mose. Itre mekune lai ka amenune la itre atr, nge ka ananyi angatr qaathei Iehova, Qeqe ne la nyipi inamacan. Ame enehila, Satana a huliwane la itre nuvel me itre réseaux sociaux, matre haöthe la fen hnene la itre trengathoi, me itre ithuemacany ka tria qaathene la itre hene politik. Nge mama catre pi hë koi së, lo ijine COVID-19.c Eloine pe, tha hnehengazo menu kö la itre Temoë Iehova ngöne la ijine cili, ke hnei angatr hna drenge la itre eamo qaathene la organizasio i Iehova, ngo tha ene kö la itre ithuemacany ka tria.—Mat. 24:45.

13. Pine nemen matre loi e tro sa hmekëne la itre nyine iamadrinë?

¹³ Itre nyine iamadrinë. Loi e tro palahi sa atreine “tuluthe la ka nyipiewekë.” (Fil. 1:9, 10) Ijije hi tro la itre nyine iamadrinë a xome la traem me trengecatre hne së hna nue kowe la itre huliwa ka nyipiewekë. E tha hmeke kö së, ke tro la itre ewekë hne së hna majemine kuca, tune la xen, me ij, me mano, me huliwa a tro pa ngöne la mele së. (Luka 21:34, 35) Ketre, ame e nöjei drai kola mama ngöne la itre nuvel, la kola icilekeu la nöj me mus, memine la itre mekune qaathene la itre ka kuci politik. Loi e tro sa thupën wanga huli së pi fe hnene la itre mekune cili. Nge tro hë së lai a nyixölene la ketre partie politik e kuhu hni së. Eje hi, Satana a huliwane la itre hnö hna qaja e caha, matre troa akucakucanyi së. Tro pena sa ce wang, la nyine tro sa kuca matre troa cil kowe la itre hnö i angeic, me cile catr.

TRO SA CILE CATR TUNE KAA?

14. Nemene la ka troa xatua së troa cile catr?

¹⁴ Mekune jë la itre kepin, matre hnei epuni hna nue mel me xomi bapataiso. Hnei epun hna axecië mekune tun, ke aja i epun troa nyihlue i Iehova. Mekune hmaca jë lo itre ewekë ka axeciëne koi epun laka, epuni hi ngöne la nyipici. Hnei epuni hna inine troa atrepengöi Iehova, me metrötrë Nyidrë, me hnimi Nyidrë. Hnei epuni hna akökötrene la lapaune i epun, nge celë hi ka upi epun troa ietra. Hnei epuni hna nuetrij la itre huliwa hna sisin hnei Iehova, me mele thenge la aja i Nyidrë. Nge hna akeukawanyi epun la epuni a atre laka, hnei Akötresie hna nue la itre ngazo i epun. (Sal. 32:1, 2) Hnei epuni fe hna nyiqane sine la itre icasikeu, me ce thawa me itre xan, la itre ewekë ka mingöming hnei epuni hna inin qa hnine la Tusi Hmitrötr. Ame enehila, epuni hë ngöne la gojenyi ne mel, nge xecie koi epun tro palahi a lapa ngöne la gojenyi cili.—Mat. 7:13, 14.

15. Pine nemen matre ka nyipiewekë troa inin me lapa mekune la Tusi Hmitrötr?

¹⁵ Inine jë me lapa mekune la Trengewekë i Akötresie. Tune la isinöe ka cile catr hnene la itre iwaan ka jui, ijije hi tro fe sa cile catr e ka catrecatre la lapaune së koi Iehova. Ame la kola tru la isinöe, ke itre iwaan ej palahi a xuxu, me nyinyap. Ame la easa inin me lapa mekune la Tusi Hmitrötr, ke kola acatrene la lapaune së, nge xecie koi së laka, ka lolo palahi la itre jë i Akötresie. (Kol. 2:6, 7) Lapa mekune jë la aqane xatuan me thupëne la itre hlue i Iehova ekö, hnene la itre hna amekötin, me itre eamo i Nyidrë. Ame ekö, hnei Ezekiela hna goeëne hnyawa la angela a tuluthe la uma ne hmi. Hnene la hna meköle goeëne cili, hna akeukawanyi Ezekiela, me hamë ini koi së göne la aqane troa metrötrëne la itre trepene meköti Iehova ngöne la hmi ka wië.d (Ezek. 40:1-4; 43:10-12) Ketre tu së fe, easa kepe thangan la hne së hna inin, me lapa mekune la itre ini ka jui ne la Tusi Hmitrötr.

16. Hna thupë Bob tune kaa hnene la aqane axecië mekune i angeic? (Salamo 112:7)

¹⁶ Loi e xecie la hni së. Hnei Dravita joxu hna amamane la ihnimi nyidrëti koi Iehova ngöne la nyidrëti a hape: “Akötesieti fe, xecië hë la hning.” (Sal. 57:7) Ketre tu së fe, loi e troa xecie la hni së, ene la troa mejiun koi Iehova. (E jë la Salamo 112:7.) Tro sa ce wange la aqane xatua Bob, lo hna qaja ha e caha. Ame lo kola ithuemacanyi angeic ka hape, hetre madra ha hna hnëkën, ke öni angeic jë hi, e tro angatr a hamë madra, ke tro angeic a trotrije la pital. Öni Bob e thupen, “Tha luelue kö ni kowe la mekune hnenge hna axeciën, nge tha xounge kö la itre ewekë ka troa traqa.”

17. Nemene la ini hne së hna xom qa ngöne la tulu i Bob? (Wange ju fe la iatr.)

¹⁷ Hnei Bob hna cile catr, ke ka hnëkë hnyawa angeic qëmekene troa lö e pital. Nemene la ka uku angeic troa hnëkë hnyawa? Ame la hnapan, aja i angeic troa amadrinë Iehova. Ame la hnaaluen, hnei angeic hna ithel hnyawa ngöne la Tusi Hmitrötr me ngöne la itre itusi së göne la ehmitrötrene la mel me madra. Ame la hnaakönin, xecie koi angeic laka, tro kö Iehova a amanathithine la aqane idrengethenge i angeic. Ketre tu së fe, loi e tro sa cile catr ngöne la kola traqa la itre itupath.

18. Kola ini së tune kaa hnene la tulu i Baraka troa mejiune koi Iehova? (Wange ju la pane iatr.)

¹⁸ Mejiune jë koi Iehova. Tro sa ce wange la aqane hune Baraka ngöne la isi, ke hnei angeic hna mejiune koi Iehova. Ame ngöne la ijine cili, pëkö ca petr me jo i angetre Isaraela. Ngo hnei Iehova hna upi Baraka troa isi memine la trongene isi Sisera, ka tiqa hnei jia ne isi. (A. ame. 5:8) Hnei Debora perofeta föe hna upi Baraka troa uti kowe la hnapapa, matre troa itronyi me Sisera, memine la 900 lao ikariota i angeic. Ngacama atre hi Baraka ka hape, tro lai a jole kowe la angetre Isaraela troa isi memine la itre ikariota i Sisera ngöne la hnapapa, ngo hnei angeic hna idrengethenge. Hnei Iehova hna kuca matre trotro pi la mani atraqatr, ngöne lo kola uti la itre sooc qa ngöne la Wetr e Tabora. Ame hna lö la itre wil ne la itre ikariota i Sisera ngöne la trëtr, nge e cili hi la Iehova a aijijë Baraka troa ngaa angatr. (A. ame. 4:1-7, 10, 13-16) Ketre tun, tro Iehova a xatua së troa ngaa Satana, e tro sa mejiune koi Nyidrë, me kowe la itre hnei Nyidrëti hna amekötin, jëne la organizasio i Nyidrë.—Deu. 31:6.

AJA SË TROA CILE CATR

19. Pine nemen matre aja i epun troa cile catr?

¹⁹ Nyipiewekë tro palahi sa cile catr ngöne la fen celë. (1 Tim. 6:11, 12; 2 Pet. 3:17) Loi e tro sa isin troa cile catr ngöne la iaxösisi, me thupëne wanga iaö së jë hnei Satana. Nge loi e tro mina fe sa thipetrije la itre aqane waiewekë ne la itre atre ne fen, me itre mekune ka tria, me itre nyine iamadrinë ka ngazo. (Efe. 4:14) Catre jë pe së hnimi Iehova me drengethenge la itre hnei Nyidrëti hna amekötin. Ketre, nyipiewekë fe tro sa atreine waiewekë. Ame ngöne la tane mekun e thupen, tro sa ce wange la tulu ne la lue ka atreine waiewekë, ene Iehova me Iesu.