Itre Trejin Nekötrahmany​—Thele Jë Troa Macaj

1. Nemene la aliene la kola hape, “hni ne trahmanyi jë”?

ÖNI Dravita joxu koi Solomona nekö i nyidrë ka hape: “Tro eö a catr, nge hni ne trahmanyi jë.” (1 Ite jo. 2:​1-3) Nyipiewekë enehila tro la itre trejin trahmany a wangatrune la eamo celë. Ame la kola qaja ka hape, “hni ne trahmanyi jë,” ke kola qaja la troa drengethenge la itre wathebo i Akötresie me trongëne la itre trepene meköt ngöne la mele i angatr. (Luka 2:​52) Pine nemene matre nyipiewekë tro la trejin nekötrahmany a macaj ngöne la huliwa i Iehova?

2-3. Pine nemene matre nyipiewekë tro la trejin nekötrahmany a macaj ngöne la huliwa i Iehova?

² Ka tru la hnëqa ne la trahmany ngöne la fami, me ngöne la ekalesia. Itre trejin nekötrahmany, ma ase hë epun mekun la itre hnëqa hnei epun hna troa xom elany, tune la troa pionie, maine atre ixatua, maine qatre thup pena. Maine jë tro fe epuni lai a hane faipoipo me hetre nekönatr. (Efe. 6:4; 1 Tim. 3:1) Nyipiewekë tro epuni a macaj ngöne la huliwa i Iehova, matre troa eatrën la itre mekune cili.b

³ Loi e tro epun a hetre hna atrein, matre macaj ngöne la huliwa i Iehova. Tro sa ce wang la aqane tro epuni a hnëkë, matre kapa la itre hnëqa ka hnyipixe elany.

AQANE TROA MACAJ NGÖNE LA HULIWA I IEHOVA

4. Drei la itre tulu ka loi nyine tro epuni a nyitipun? (Wange ju fe la iatr.)

⁴ Nyitipune jë la itre ka macaj. Tusi Hmitrötr a qaja la tulu ne la itre nekötrahmany ka hnimi Iehova, me ka xom la itre hnëqa ka tru. Nyitipu angatre jë. Nge hetre tulu ka loi fe ngöne la fami epun, me ngöne la ekalesia. (Heb. 13:7) Ngo ame kö la tulu ka sisitria, ke ene la tulu i Iesu Keriso. (1 Pet. 2:​21) Xomi ijine jë troa lapa mekun la aqane ujë ne la itre trahmanyi cili, me itre thiina ka loi i angatr. (Heb. 12:​1, 2) E thupen, thele jë la aqane tro epuni a nyitipu angatr.

5. Tune kaa la aqane tro epuni a atreine waiewekë, nge pine nemene matre ka nyipiewekë? (Salamo 119:9)

⁵ Troa atreine waiewekë. (Ite edomë 3:​21) Kolo hi lai a hape, qëmekene troa axecië mekun, loi e troa pane mekune hnyawa. Tha ka traqa xane kö lai thiina cili, matre loi e troa huliwan lapan. Pine nemen? Pine laka alanyimu la itre jeunes enehila ka axecië mekun menu, me xötrethenge la sipu aja i angatr. (Ite edomë 7:7; 29:11) Ketre, ijije hi tro la tele, me itre film, me Ëternet, me itre réseaux sociaux, a ajojezine la aqane mekun me ujë i epun. Matre tune kaa la aqane tro epun a atreine waiewekë? Loi e troa pane atre hnyawa la itre trepene meköt. Tro hë epuni a öhne ka hape, ka loi itre ej koi epun. Thupene lai, axecië mekune jë thenge la itre trepene meköt cili. (E jë la Salamo 119:9.) E majemine hë epun kuca lai, epuni hë lai a nyiqane macaj ngöne la huliwa i Iehova. (Ite edomë 2:​11, 12; Heb. 5:​14) Tro sa ce wang la lue aqane tro epuni a amamane ka hape, ka atreine waiewekë epun: (1) aqane ujë i epun kowe la itre trejin föe me (2) aqane tro epuni a heetr me isej.

6. E ka atreine waiewekë la trejin nekötrahmany, nemene la aqane tro angeic a metrötrëne la itre föe?

⁶ Tro la itre trepene meköti Iehova a xatua eö troa metrötrëne la itre föe. Tha ka ngazo kö tro la trejin nekötrahmanyi a nyisineen la itre trejin föe. Ngo loi e tro angeic a atreine waiewekë. E tha pi faipoipo kö angeic, tha tro kö angeice a qaja, maine kuca, maine cinyany kowe la ketre trejin jajiny, matre aciane la ihnim thei xapo. (1 Tim. 5:​1, 2) Nge e angeic a iatre memine la ketre trejin föe, loi e tro angeic a isin matre tro palahi a hetre ka ce tro me nyidro, matre tha tro kö a qaja angazone lai trejin föe.​—1 Kor. 6:​18.

7. Tune kaa la aqane tro la trejin nekötrahmanyi a atreine waiewekë ngöne la aqane heetr me isej?

⁷ Tro la trejin nekötrahmanyi a amamane ka hape, ka atreine waiewekë angeic, ngöne la aqane heetr me isej. Ame la itre ka ca imaano enehila ke, tha angatre kö a metrötrën la itre trepene meköti Iehova. Celë hi hne së hna öhn enehila, itre iheetr a fedr koi ngönetrei, nge itre trahmanyi a heetr tui itre föe. Ame la eö a ië iheetr, pane mekune jë la itre trepene meköt, me aqane heetr ne la itre trejin ne la ekalesia. Aqane tro eö lai a amamane ka hape, eö a ajan troa macaj ngöne la huliwa i Iehova. Isa hnyinge jë ka hape: ‘Ka inamacane kö la aqane axecië mekuneng, nge eni kö a metrötrë itre xan? Kolo kö a mama ngöne la aqane heetreng ka hape, eni a nyihlue i Akötresie?’ (1 Kor. 10:​31-​33; Tito 2:6) Maine tro eö a atreine waiewekë, tro ha metrötrë eö hnene la itre trejin, me Iehova fe.

8. Nemene la nyine tro eö a kuca matre tro la itre trejin a mejiune koi eö?

⁸ Loi e tro la itre xan a mejiune koi eö. Ame la trejin trahmanyi hna mejiune kow, ke angeic a eatrën asë la itre hnëqa hna athip koi angeic. (Luka 16:10) Pane mekune jë la tulu i Iesu. Tha hnei nyidrëti kö hna wangacone la itre huliwa i nyidrë. Hnei nyidrë hna eatrën asë la itre hnëqa hnei Iehova hna ahnithe koi nyidrë, ngacama ka jole ju hë. Goi nue fe nyidrë la mele i nyidrë kowe la itretre dreng, me kowe la nöjei atr. (Ioane 13:1) Maine tro eö a eatrën asë la itre hnëqa hna athipe koi eö, ke eö hi lai a nyitipu Iesu. Nge e thatre kö eö la aqane troa kuca, ke sipo ixatua jë kowe la ketre trejin trahmanyi ka macaj. The kuca nyimenyimën kö la huliwa, ngo kuca hnyawane jë. (Rom. 12:11) Ketre, kuca asë jë la itre huliwa “koi Iehova, ngo tha koi itre atre kö.” (Kol. 3:​23) Eje hi, pëkö atr ka pexej e celë fen, matre loi e tro eö a ipië, me qaja amamane la itre tria i eö.​—Ite edomë 11:2.

TROA HETRE HNA ATREINE KUCA

9. Pine nemene matre tro la trejin trahmanyi a hetre hna atreine kuca?

⁹ Itre trejin trahmanyi ka macaj a huliwa catr kowe la ekalesia, me hnim la itre xan, me thupëne hnyawan la fami angatr. Matre loi e tro angatr a hetre hna atreine kuca. Tro sa ce wang la köni ewekë nyine tro angatr a atreine kuca.

10-11. Pine nemene matre nyipiewekë tro eö a atreine e me cinyany hnyawa? (Salamo 1:​1-3) (Wange ju fe la iatr.)

¹⁰ Troa atreine e me cinyanyi hnyawa. Maine easa ajan troa madrin ngöne la mele së, loi e tro sa xomi ijin troa e me lapa mekun la Tusi Hmitrötr. (E jë la Salamo 1:​1-3.) Maine tro eö a e Tusi Hmitrötr e nöjei drai, tro hë eö a atre la aqane mekune i Iehova, me trongëne la itre eamo i Nyidrë. (Ite edomë 1:​3, 4) E majemine hë eö kuca tun, tru la ixatua hnei eö hna troa hamën kowe la ekalesia. Pine nemen?

¹¹ Nyipiewekë kowe la ekalesia, troa hetre trejin trahmanyi ka atreine hamë ini, me hamë eamo qa hnine la Tusi Hmitrötr. (Tito 1:9) Maine tro eö a atreine e hnyawa, tro hë eö a maca ngöne la eö a cile fë cainöj, me hamë mekun ngöne la itre icasikeu. Nge e ka atreine cinyanyi hnyawa eö, tro ha hmaloi koi eö troa xomi note la eö a ini Tusi cas, me ngöne la itre icasikeu me asabele. Tro ha catr la lapaune i eö, nge ijije fe tro eö a ce thawa me itre xan la hnei eö hna xomi note.

12. Nemene la ka troa xatua eö troa trotrohni itre xan?

¹² Troa atreine dreng me ithanata amenyiken. Loi e tro la trejin trahmanyi a inin troa dreng me ithanata amenyiken. Kolo lai a hape, troa atreine dreng me trotrohnine la aqane mekuna i itre xan. (Ite edomë 20:5) Kolo fe a hape, troa atreine trotrohnine la atr jëne la nine i angeic, aqane ujë me aqane enije i angeic. Tro eö a atreine trotrohni itre xan tune kaa, e tro palahi eö a ithanata jëne message, me mail? Eje hi, nyipiewekë troa iqëmekë memine la atr. Haawe, isine jë tro palahi a “ithanata iqëmekë” me itre xan.​—2 Ioane 12.

13. Tro eö a hnëkë tune kaa troa hetre huliwa? (1 Timoteo 5:8) (Wange ju fe la iatr.)

¹³ Troa hnëkë troa hetre huliwa. Ame la trejin ka macaj, ke atreine angeic thupëne la mele i angeic me fami angeic. (E jë la 1 Timoteo 5:8.) Ame ngöne la itre xaa nöj, itre nekötrahmanyi a inine la huliwa ne la keme i angatr maine ketre atrene la fami. Maine pena, angatr a inine la ketre métier e koilo hna ini. Eje hi, loi e tro la itre nekötrahmanyi a hetre hna atreine kuca, matre öhnyi huliwa elany. (Itre hu. 18:​2, 3; 20:34; Efe. 4:​28) Ame la eö a formasio, ke huliwa hnyawa jë, matre tro la itre atr a öhne ka hape, eö la ketre nekötrahmanyi ka huliwa catr, me nyine troa mejiune kow. Tro hë eö a canga öhnyi huliwa. Tro pena sa ce wang la aqane tro la itre thiina me itre hna atreine kuca hne së hna ce ithanatan e caha, a xatua eö ngöne la itre xaa hnëqa elany.

HNËKË JË KOWE LA ITRE HNËQA ELANY

14. Nemene la aqane tro eö a hnëkë qëmekene troa huliwa i Iehova drai ka pexej?

¹⁴ Troa huliwa i Iehova drai ka pexej. Alanyimu la itre trejin trahmanyi ka pionie lo angatr palakö a jeunes. Ame la easa pionie, easa ce huliwa memine la itre trejin ka isapengöne kö me easë. Ketre, easë fe a inin troa huliwan hnyawan la mani, me melën la hna hetreny. (Fil. 4:​11-​13) Ame la itre xaa pionie lapa, ke hnei angatr hna pane pionie ka ixatua. Ame enehila, itre xan a huliwa ngöne la hnë xupi Uma maine ngöne la Bethela. Haawe, nyiqane jë troa hane pionie ka ixatua.

15-16. Nemene la nyine tro la trejin trahmanyi a kuca matre troa atre ixatua maine qatre thup?

¹⁵ Troa hane atre ixatua maine qatre thup. Loi e tro la nöjei trejin trahmanyi a isine troa qatre thup ngöne la ekalesia. Tusi Hmitrötr a qaja ka hape, ame la atr ka “ajane troa atre thup, [ke] ka loi lai.” (1 Tim. 3:1) Qëmekene troa qatre thup, tro la trejin trahmanyi a pane atre ixatua. Itretre ixatua a ce huliwa memine la itre qatre thup ngöne la ekalesia. Angatr asë a ce huliwa kowe la itre trejin, me catre cainöj. Qëmeken tro la ketre trejin trahmanyi a 20 lao macatre, ijije hi troa acili angeic troa atre ixatua. Nge maine angeic palahi a catre huliwa koi Iehova, tro ha acili angeic troa qatre thup, ngacama tha 25 palakö lao macatre i angeic.

¹⁶ Ijiji eö kö troa xom la itre hnëqa cili? Tusi Hmitrötr a qaja la itre thiina nyine troa melëne hnene la trejin ka pi xome la hnëqa ne atre ixatua maine qatre thup. Ngo the thëthëhmine kö laka, ihnim koi Iehova, me kowe la fami eö me kowe la ekalesia la ka troa uku eö troa xom la itre hnëqa. (1 Tim. 3:​1-​13; Tito 1:​6-9; 1 Pet. 5:​2, 3) Xomi ijine jë troa lapa mekune la itre thiina cili. Nge thithi jë koi Iehova matre xatua eö troa melën itre ej.c

17. Nemene la nyine tro eö a kuca enehila matre troa hnëkë qëmeken troa faipoipo? (Wange ju fe la iatr.)

¹⁷ Troa faipoipo. Tune la hna qaja hnei Iesu, ijije hi tro la itre trejin ka macaj a tha faipoipo. (Mat. 19:12) Ame la trejin ka iën troa faipoipo, ke angeic a thu la ketre hnëqa, ene la troa thupëne la fami angeic. (1 Kor. 11:3) Iehova a ajan tro la itre trahmanyi a hnim la itre föi angatr, me thupë nyudren, me acatrene la aqane imelekeu i nyudren me Nyidrë. (Efe. 5:​28, 29) Maine tro eö a faipoipo elany, tro la itre thiina me itre hna atreine kuca hne së hna ce wang, a xatua eö troa xom hnyawa la hnëqa i eö. Eje hi, nyipiewekë tro la trahmanyi ka faipoipo a atreine waiewekë, me metrötrën la itre föe, me ketre atr hna mejiune kow.

18. Nemene la aqane tro la trejin nekötrahmanyi a hnëkë kowe la hnëqa ne kem?

¹⁸ Troa hetre nekönatr. Thupene la faipoipo, ijije hi tro eö a hetre nekönatr. Nemene la itre ini nyine tro eö a xom qaathei Iehova, matre xom hnyawa la hnëqa ne kem? Tru catr la itre ini. (Efe. 6:4) Hnei Iehova hna qaja amamane la ihnimi Nyidrë me madrine i Nyidrë koi Iesu. (Mat. 3:​17) Eje hi, loi e tro la kem a qaja amamane la ihnimi nyidrë kowe la itre nekö i nyidrë. Nge tha tro kö nyidrëti a cil troa qaja aloinyi angatr. Ketre, nyidrëti a nyitipu Iehova la nyidrëti a xatuane la itre nekö i nyidrë troa macaj ngöne la huliwa i Akötresie. Ame la ketre aqane troa hnëkë kowe la hnëqa cili, ke ene la troa amaman enehila, la ihnim me madrine i eö kowe la fami eö me kowe la ekalesia. (Ioane 15:9) Tro hë lai a wangatrunyi eö hnei Iehova, me fami eö, me itre trejin ne la ekalesia.

CATRE PI!

19-20. Nemene la nyine tro la itre trejin nekötrahmanyi a kuca, matre troa macaj ngöne la huliwa i Iehova? (Wange ju la icetrön.)

¹⁹ Itre trejin nekötrahmany, loi e tro epuni a nue trengecatr matre macaj ngöne la huliwa i Iehova. Nyipiewekë tro epuni a nyitipune la itre tulu ka loi, me atreine waiewekë, me hane ketre atr hna mejiune kow. Thele jë troa hetre hna atreine kuca, me hnëkë kowe la itre xaa hnëqa elany.

²⁰ Maine jë, eö a mekun laka, jole palaha la itre hne së hna ce wang. Ngo ijiji eö hi! Tru catr la aja i Iehova troa xatua eö. (Is. 41:​10, 13) Ketre tun la itre trejin ne la ekalesia. Tro kö Iehova a xatua eö troa macaj. Ame e cili, tro hë eö a madrin ngöne la mele i eö. Tru catr la ihnimi eahun koi epun, itre trejin nekötrahmany! Epi tro Iehova a amanathithine la itre trengecatre i epun, matre troa macaj ngöne la huliwa i Nyidrë.​—Ite edomë 22:4.