Catre Jë Trongëne La “Gojenyi Ka Hmitöt”

1-2. Nemene la mekune ka tru hna troa xome hnene la itre hene ne fami ka mel e Babulona? (Ezera 1:2-4)

TRAQA ha la ithuemacanyi Joxu! Ijine hë tro la angetre Iudra hna othe e Babulona a 70 hë lao macatre, a bëeke hmaca kowe la nöje i angatr e Isaraela. (E jë la Ezera 1:2-4.) Iehova hmekuje hi la ka atreine eatrëne lai. Pine nemene matre qaja jë së lai? Ke tha majemine kö la angetre Babulona nue hmaca la itre hna oth. (Is. 14:4, 17) Pine laka hna ngaa Babulona, matre hnene la joxu hna hnyipi acil hna nue la angetre Isaraela troa bëek kowe la nöje i angatr. Haawe, hetre mekune ka tru nyine tro la itre hene ne fami a axeciën, ene la troa tro maine lapa e Babulona. Pine nemen?

² Ame la itre xan thei angatr ke qatre hë, nge nanyi pena la gojeny. Ketre, alanyim la itre hna hnahone e Babulona, nge ka tru e cili. Matre ame koi angatr, tha zi angatre kö e Isaraela, ngo zine pe la itre xötrapane i angatr. Ame la itre xan, ke ka trenamo e Babulona, matre xele angatr ma nue la hnalapa me huliwa i angatr troa tro kowe la ketre nöje trenyiwa.

3. Nemene la manathithi hna lapa treqen hnene la angetre Iudra ka pi bëeke hmaca a tro Isaraela?

³ Ame kowe la angetre Iudra ka mele nyipici koi Iehova, tru catre kö la itre manathithi hnei angatr hna troa kapa elanyi e Isaraela hune la itre trengecatr hnei angatr hna kuca. Nge ame la ketre manathithi ka tru, ke ene la troa acile hmaca la hmi angatr. Ame e Babulona, traqa koi 50 lao uma ne hmi thatraqane la itre haze, ngo pëkö ca uma ne hmi thatraqai Iehova. Goi pë fe ita ne huuj me itretre huuj matre tro fë huuj thenge lo hna amekötine hnene la Wathebo i Mose. Ketre, ame la itre atr e cili, ke ka thili koi haze nge pëkö metrötre i angatr koi Iehova me kowe la itre trepene meköti Nyidrë. Matre tha alanyim kö la ka nyihluene la nyipi Akötresie. Celë hi matre angatr pe hi a treqene la ijine troa bëeke a tro Isaraela, me acile hmaca la hmi ka wië.

4. Nemene la hnei Iehova hna troa kuca kowe la angetre Isaraela ka bëeke a tro Isaraela?

⁴ Tro lai a 4 lao treu ne trongë i hnadro qa Babulona a tro Isaraela, nge tha ka loi kö la gojeny. Ngo hnei Iehova hna qaja kowe la angetre Iudra ka hape, tro kö Nyidrëti a apatrene la itre ewekë ka ajolëne la tronge i angatr. Öni Isaia perofeta: “Nyihnyawane jë epun la gojeny i Iehova, amekötine jë ngöne la hnapapa la gojenyi ne la Akötresi së . . . Nge tro ha amekötine la ga qaliqali, nge tro ha hnapapa la itre ga xozaxoza.” (Is. 40:3, 4, NWT ) Pane mekune jë la ketre gojenyi ka tru ka thupa la hnapapa memine la itre wetr. Ma drei jë kö la madrine i angatr troa trongëne lai gojenyi cili! Hmaloi hi koi angatr troa trongëne la gojenyi ka tru nge ka tro meköt, hune la troa eli wetr maine sasala! Tro angatre lai a canga traqa e Isaraela.

5. Hna hëne tune kaa la gojenyi ka tru, ka tro qa Babulona a tro Isaraela?

⁵ Ame enehila, hetre ëjen nge hna numerane la itre gojeny. Hapeu, hetre ëjene kö la gojeny ka tru hna qaja hnei Isaia? Öö. Öni angeic: “Troa hete [gojenyi ka tru] e cili, memine la gojeny, nge troa ati ëjen’ eje gojenyi ka hmitöt ; tha tro kö a trongën’ eje hnei ite ka ngazo.” (Is. 35:8) Nemen la aliene lai kowe la angetre Isaraela, me koi easë mina fe enehila?

“GOJENYI KA HMITÖT”—EKÖ ME ENEHILA

6. Pine nemene matre kola hëne la gojenyi ka tru ka hape, “Gojenyi Ka Hmitöt”?

⁶ “Gojenyi Ka Hmitöt”: ketre ëje la ka mingöminge hna hamëne kowe la ketre gojenyi ka tru! Hnauëne la kola ati ëjen ej tune lai? Pine laka ame thene la angetre Isaraela ka troa lapa ngöne la Nöje Hna Thingehnaean, ke tha tro kö a hetre atr “ka ngazo.” Kola qaja la angetre Iudra ka kuca la itre huliwa ka sis, me thili koi idrola, me itre xaa huliwa ka ngazo ju kö. Tro la angetre Iudra ka bëeke a tro Isaraela a ketre “nöje ka hmitöt” koi Iehova. (Deu. 7:6) Tha kolo kö lai a hape, pëkö nyine tro angatr a saze. Hetre nyine tro palahi angatr a kuca matre amadrinë Iehova.

7. Nemene la itre ewekë nyine tro la angetre Iudra a saze? Qaja jë la ketre ceitun.

⁷ Tune la hne së hna qaja ha, alanyim thene la angetre Iudra hna hnahon e Babulona, ka xome la aqane mekune me aqane ujë ne la angetre Babulona. Itre macatre thupene la angatre a bëek a tro Isaraela, hnei Ezera hna öhne ka hape, alanyim thei angatr la ka xome la itre föe trenyiwa. (Eso. 34:15, 16; Ezera 9:1, 2) Ketre, kola sesëkötr hnei Nehemia Gavena laka, tha ka Qene Heberu kö la itre nekönatr hna hnahon e Isaraela. (Deu. 6:6, 7; Neh. 13:23, 24) Tro nyudren a hnim me nyihlue i Iehova tune kaa, nge tha trotrohnine pe nyudren la Qene Heberu, lo qene hlapa hna cinyanyine la Trengewekë Akötresie? (Ezera 10:3, 44) Eje hi, hetre nyine tro palakö la angetre Iudra a saze. Ngo tro lai a hmaloi, e angatre hë e Isaraela, hnë acile hmaca la hmi ka wië.​—Neh. 8:8, 9.

8. Hetre ini kö hne së hna xom qa ngöne la hna melëne ekö hnene la angetre Iudra? (Wange ju la icetrön.)

⁸ Maine jë, tro itre xan a qaja ka hape, ‘Ka loi pi hë lai, ngo hetre ini kö koi së enehila la hna melëne ekö hnene la angetre Iudra?’ Öö, ke easë fe enehila a tro ngöne la “Gojenyi Ka Hmitöt.” Ngacama hna ië së ju hë troa mele e koho hnengödrai maine e celë fen, ngo loi e tro asë hi së a lapa ngöne la “Gojenyi Ka Hmitöt.” Eje hi, tro së lai a kapa la itre manathithi qa ngöne la paradraiso ka ketrepengön enehila, me qaathene la Baselaia elany, e tro sa lapa ngöne la gojenyi cili.b (Ioane 10:16) Qane lo 1919, traqa koi itre milio lao trahmany, me föe, me nekönatr ka trotriji Babulona Atraqatr, me nyiqane trongëne la gojenyi cili. Maine jë epuni fe hi la ketre. Itre hadredre hë lao macatre ne kola trongëne la gojenyi cili, ngo ekö catre kö nyiqane la huliwa ne jigojeny.

ITRE HULIWA NE JIGOJENY

9. Thenge la Isaia 57:14, nemene la huliwa hna kuca qëmeken troa fe la “Gojenyi Ka Hmitöt”?

⁹ Hnei Iehova hna nyidrawane la gojenyi kowe la angetre Iudra ka tro qa Babulona. (E jë la Isaia 57:14.) Tune kaa pena kowe la “Gojenyi Ka Hmitöt” enehila? Itre macatre qëmekene la macatre 1919, hnei Iehova hna upe la itre atr ka metrötrë Nyidrë troa nyidrawane la gojenyi kowe la itre atr ka trotriji Babulona Atraqatr. (Wange ju fe la Isaia 40:3.) Kösë hnei angatr hna nyiqane jë la gojeny. Ka nyipiewekë catr la huliwa cili, ke kola aijijëne la itre atr e thupen troa trotrije la hmi ka thoi, me nyihlue i Iehova pena memine la nöje i Nyidrë. Nemene la itre huliwa hnei angatr hna kuca? Tro sa ce wange la aqane hnëkëne angatr la gojenyi cili.

10-11. Hnene la huliwa ne feja itus me ujë qene hlapa hna xatuane tune kaa la itre atr troa atre la nyipici? (Wange ju fe la iatr.)

¹⁰ Huliwa ne feja itus. Hna fejane palahi hnei wanakoime la Tusi Hmitrötr uti hë lo macatre 1450. Nge pine laka kola fejan hnei wanakoim, matre tha tru kö hnei Tusi Hmitrötr, nge tru pena ha la thupen. Ngo ame hë la kola hetre masine ne feja itus, hmaloi hë troa fejan atrun la Tusi Hmitrötr me thawa kowe la nöjei atr.

¹¹ Huliwa ne ujë qene hlapa. Qane ekö, casi hi la qene hlapa hna ujëne la Tusi Hmitrötr, ene la Qene Latin. Kolo qene hlapa hna trotrohnine hi hnene la itre ka inamacan. Ngo jëne la itre masine ne feja itus, hnene la itre atr ka metrötrë Akötresie hna ujëne la Tusi Hmitrötr ngöne la itre qene hlapa hna atre hnene la itre atrene la nöj. Mama ha kowe la itre ka e Tusi Hmitrötr la eisapengöne ne la itre ini hna hamën hnei hmi ka thoi memine la itre ini qa hnine la Tusi Hmitrötr.

12-13. Qaja jë la ketre hna melën ka amamane ka hape, hnene la itre ka ini Tusi Hmitrötr hna nyiqane qaja amaman la itre ini ka thoi?

¹² Itre itus ne ini Tusi Hmitrötr. Hnene la itre atr ka metrötrë Akötresie hna inine ajuine la Tusi Hmitrötr, matre trotrohnine hë angatr la itre ini qaathei Nyidrë. Hnei angatr hna ce thawa me itre xan la itre ini cili, ngacama tha madrine kö la itre hene ne hmi. Ame lo macatre 1800, hnei angatr hna fejane la itre tarak ka qaja amamane la itre ini ka thoi hna hamëne hnene la itre hene ne hmi.

¹³ Ame lo 1835, hnei Henry Grew, ketre atr ka xoue Akötresie, hna fejane la ketre tarak ka qaja la pengöne la itre atr ka mec. Hnei nyidrëti hna amamane jëne la Tusi Hmitrötr laka, ame la mel ka pë pun ke, ketre ahnahna qaathei Akötresie. Nge tha nöjei atr asë kö la ka kapa lai ahnahna cili, thenge lo hna ini angatr hnene la itre hene ne hmi. Ame lo 1837, hnei George Storrs ketre atre ka hmi, hna öhne la tarak cili ngöne la train. Thupene la hnei angeic hna e, xecie pi hi koi angeic ka hape, celë hi la nyipici. Ame hnei angeic hna ce thawa me itre xan la hnei angeic hna e. Ame lo 1842, anyimua cile fë nyidrë la cainöj hna hape “Tro Kö a Mele Epine Palua La Itre Atr Ka Ngazo?” Nge ame la ketre atr hna ketr hnene la itre hna ithel hnei George Storrs, ke ketre nekö trahmany, ene Charles Russell.

14. Tune kaa la aqane kepe thangane trejin Russell me itre sine huliwa i nyidrë qa ngöne la hna jigojeny hnene lo itre ka tro pa hui angatr? (Wange ju fe la iatr.)

¹⁴ Tune kaa la aqane kepe thangane trejin Russell me itre sine huliwa i nyidrë qa ngöne la hna jigojeny hnene lo itre ka tro pa hui angatr? Hnei angatr hna xome la itre lexiques, me itre concordances, me itre Tusi Hmitrötr hna ujëne hë ekö hnene la itre ka tro pa hui angatr matre troa ithel. Hnei angatr fe hna hane kepe thangane la huliwa ne ithel hna kuca hnei Henry Grew, me George Storrs, me itre xane ju kö. Nge hnei angatr fe hna hane ixatua ngöne la huliwa ne jigojeny, la angatr a fejane la itre itus me tarak ka qaja la itre ini ne la Tusi Hmitrötr.

15. Nemene la itre ewekë ka traqa ngöne lo macatre 1919?

¹⁵ Ame lo 1919, pëhë thangane la itre ini qaathei Babulona Atraqatr, kowe la nöje i Akötresie. Ame ngöne la macatre cili, hna acile fe “la hlue ka nyipici me ka inamacan,” matre troa xatuane la itre atr ka ajane troa trongën la “Gojenyi Ka Hmitöt” hna xötrei fe. (Mat. 24:45-47) Jëne la huliwa hna kuca hnene lo itre ka jigojenyi ekö, hna xatuane la itre atr ka xötrei tro ngöne la gojenyi cili troa trotrohnine la aja i Iehova. (Ite edomë 4:18) Nge ijiji angatr hë troa mele thenge la itre hna amekötin hnei Iehova. Ngo tha hnei Iehova kö hna upe la itre hlue i Nyidrë troa canga saze la aqane ujë me aqane hmi angatr. Ame ngöne la itre macatre, hnei Nyidrëti hna amekötine trootro la aqane ujë i angatr. (Wange ju la hna eköhagen “Hnei Iehova Hna Nue Ijin Kowe La Itre Hlue i Nyidrë Troa Saze Trootro.”) Drei jë kö la madrine së elanyi troa kuca asë la itre ewekë ka amadrinë Iehova!​—Kol. 1:10.

HNA FE PALAKÖ LA “GOJENYI KA HMITÖT”

16. Qane lo 1919, nemene la itre huliwa hna kuca matre nyidrawane la “Gojenyi Ka Hmitöt”? (Isaia 48:17; 60:17)

¹⁶ Nyipiewekë troa nyidrawane lapane la itre gojeny. Qane lo 1919, kolo palahi a nyidrawane la “Gojenyi Ka Hmitöt” matre aijijëne la itre atr troa trotriji Babulona Atraqatr. Ame ju kö la kola acile la hlue ka nyipici me ka inamacan, ke eje fe hë a nyiqane la huliwa. Nge ame lo 1921, hnene ej hna fejane la ketre itus nyine ini Tus hna hape, La Harpe de Dieu. Alanyim catr la ka atre la nyipici jëne la itus cili. Nge traqa koi 6 milio lao itus hna fejan ngöne la 36 lao qene hlapa. Ame enehila, easë pena huliwane la itus Gojenyi Kowe La Nyipi Mel! Jëne la itusi cili, hmaloi catre hë tro sa ini Tus me itre atr. Qane lo kola nyiqane la itre drai ne la pun, tha mano kö Iehova hamëne la xen jëne la organizasio i Nyidrë matre xatua së troa lapa ngöne la “Gojenyi Ka Hmitöt.”​—E jë la Isaia 48:17; 60:17.

17-18. Tro la “Gojenyi Ka Hmitöt” a troxomi së a tro ië?

¹⁷ Ame la ketre atr a nyiqane ini Tus, ke angeic hë lai a trongëne la “Gojenyi Ka Hmitöt.” Ame la itre xan, ke tha qea ju kö nge angatre hmaca trotrije lai gojenyi cili. Ngo ame pena la itre xan, angatr a isine troa lapa ngöne la gojenyi cili utihë la angatr a traqa kowe la hna ie. Ekaa lai?

¹⁸ Ame kowe la itre ka mejiune troa mel e koho hnengödrai, tro la “Gojenyi Ka Hmitöt” a troxomi angatr kowe “la paradraiso i Akötresie.” (Hna ama. 2:7) Ame pena la itre ka mejiune troa mel e celë fen, tro la gojenyi cili a troxomi angatr kowe la mele ka pexej thupene la 1 000 lao macatre ne musi Iesu. Maine epuni hë ngöne la gojenyi cili, ke the xei hutrö hmaca kö. Nge the trotrije pi kö la gojenyi cili, e tha traqa palakö epun ngöne la fen ka hnyipixe! Haawe, ange catre pi!