Ka Hnëkë Kö Epun Kowe La Akötr Atraqatr?

1. Pine nemen matre nyipiewekë troa hnëkë kowe la itre hulö?

MAINE tro sa hnëkë hnyawa, ke tro sa mel. Celë hi ka mama ngöne la kola traqa la ketre hulö. Itre ka hnëkë hmekuje hi la itre ka troa mel, nge ka ijije troa xatuane la itre xan. Önine la ketre organizasio ne ixatua e Europe ka hape: “Emelene hi la atr la troa hnëkë.”

2. Pine nemen matre nyipiewekë tro sa hnëkë kowe la akötr atraqatr? (Mataio 24:44)

² Troa a ca tro traqa la “akötr atraqatr.” (Mat. 24:21) Ngo ame la eisapengöne ej memine la itre xaa hulö, ke atre hi së laka, tro ej a traqa. Traqa ha koi 2 000 lao macatre enehila, hnei Iesu hna upi së troa hnëkë kowe la drai cili. (E jë la Mataio 24:44.) Maine ka hnëkë hnyawa së, tro sa atreine cile kowe la drai cili me xatuane fe la itre xan.—Luka 21:36.

3. Pine nemen matre nyipiewekë tro sa atreine cile hut, me hetre utipin, me ihnim, qëmeken troa traqa la akötr atraqatr?

³ Tro sa ce wange la köni thiina ka troa xatua së, troa hnëkë kowe la akötr atraqatr. Nemene la nyine tro sa kuca e traqa jë upi së troa tro fë la maca ne iameköti, nge kola icilekeu me easë? (Hna ama. 16:21) Nyipiewekë tro sa atreine cile hut ngöne la ijine cili, matre troa drengethenge Iehova me mejiune laka, tro kö Nyidrëti a thupë së. Nemene la nyine tro sa kuca, e pë hnyawa ca ewekë ne la itre trejin? (Hab. 3:17, 18) Tro së lai a xatua angatr, e hetre utipine së. Nemene la nyine tro sa kuca, e upi së jë troa pane ce lapa memine la itre trejin thupene la isi Gog atre Magog? (Ezek. 38:10-12) Nyipiewekë troa tru la ihnimi së koi angatr, matre tro sa atreine melëne la ijine cili ka jol.

4. Nemene la aqane amamane Tusi Hmitrötr la enyipiewekëne tro palahi sa atreine cile hut, me utipin, me ihnim?

⁴ Tusi Hmitrötr a ithuecatre koi së troa atreine cile hut, me hetre utipin, me ihnim. Öni Luka 21:19: “Nge pine la hnei nyipunieti hna cile hut, tro hë nyipunieti a mel.” Kolose 3:12 a hape: “Hetrëne jë la utipin.” Nge kola qaja ngöne 1 Thesalonika 4:9, 10: “Akötresie la atre ini nyipunie troa ihnimikeu. . . . Ngo ange trejin, eahuni pe a iele nyipunie troa kuca apexejen.” Hna cinyanyine la itre xötre celë, kowe la itre keresiano ka hetrenyi hë la köni thiina cili. Nge nyipiewekë tro palahi angatr a huliwane itre ej. Ketre tu së fe. Celë hi matre, tro sa ce wange la aqane huliwane la köni thiina cili hnene la itre pane keresiano. Tro fe sa ce wange la aqane tro sa nyitipu angatr, me hnëkë kowe la akötr atraqatr.

TROA ATREINE CILE HUT

5. Nemene la ka xatuane la itre pane keresiano troa atreine cile hut?

⁵ Nyipiewekë tro la itre pane keresiano a cile hut. (Heb. 10:36) Hnei angatr hna qëmek kowe la itre jol ka traqa koi së asë, ngo hetre itre xaa jole palakö ka traqa koi angatr. Alanyim thei angatr la hna axösisine hnene la itre hene ne hmi, me itre ka cilëne la musi Roma, me itre sipu fami angatr. (Mat. 10:21) Goi cile fe angatr kowe la itre ka iamenumenu e hnine la ekalesia, memine la itre ini ka thoi. (Itre hu. 20:29, 30) Ame pe, hnei angatr palahi hna cile hut. (Hna ama. 2:3) Hnei angatr hna lapa mekun la itre tulu qa hnine la Tusi Hmitrötr, tui Iobu. (Iako. 5:10, 11) Hnei angatr fe hna thith matre troa hetre trengecatr. (Itre hu. 4:29-31) Nge hnei angatr hna lapa mekune la itre thangane ka loi hnei angatr hna troa kapa, qa ngöne la hnei angatr hna cile hut.—Itre hu. 5:41.

6. Nemene la hnei Merita hna kuca matre troa atreine cile hut qëmeken la icilekeu? Nge nemene la ini koi së?

⁶ Tro fe sa atreine cile hut, e tro sa e me lapa mekune la itre tulu ne la itre atr ka hane cile hut. Itre ej a mama e hnine la Tusi Hmitrötr, me hnine la itre itusi së. Celë hi hna kuca hnei Merita, ketre trejin qa Albanie, ngöne la kola icilekeu hnene la fami angeic. Öni angeic: “Hna ketri ni hnene la hna melëne hnei Iobu. Akötre catre Iobu. Ngacama thatre kö angeic la qaane la itre itupathe ka traqa koi angeic, ngo öni angeic: ‘Tro palahi ni a thiina ka meköt, uti hë la tro eni a mec!’ (Iobu 27:5) Eni a öhn e cili laka, ka pë pengöne la itre jol hnenge hna melën hui Iobu. Ame la eisapengöi nyio, ke atre hi ni ka hape, drei la qaan la itre jol ka traqa koi ni.”

7. Nemene la nyine tro sa kuca enehila, ngacama tha easë kö a cile kowe la ketre itupathe ka tru?

⁷ Ame la ka troa xatua së troa atreine cile hut, ke ene la troa thithi lapa koi Iehova, me qaja koi Nyidrë la itre hne së hna hnehengazon. (Fil. 4:6; 1 Thes. 5:17) Maine jë, tha epuni kö a cile kowe la ketre itupathe ka tru enehila. Ngo hapeu, epuni kö a thith koi Iehova la epuni a hnehengazo, me akötr, maine xou? Maine tro palahi epuni a thithi koi Nyidrë göne la itre jol ka co, ke tha jole hë lai koi epuni elanyi troa thithi koi Nyidrë göne la itre jole ka tru. Xecie hë lai koi epun laka, tro kö Nyidrëti a xatua epun ngöne la nyipi ijin.—Sal. 27:1, 3.

8. Nemene la hna ini së hnene la tulu i Mira, göne la aqane tro sa atreine cile hut kowe la itre itupath enehila? (Iakobo 1:2-4) (Wange ju fe la iatr.)

⁸ E atreine hi së cile kowe la itre itupath enehila, ke tro hë së lai a cile catr ngöne la ijine akötr atraqatr. (Rom. 5:3) Hnauëne laka easa qaja tune lai? Alanyim la itre trejin ka qaja ka hape, ame la angatr a cile kowe la ketre jol, ke celë hi ka xatua angatr troa cile kowe la itre xaa jol e thupen. Jëne la hnei angatr hna cile hut, xecie koi angatr laka, tro kö Iehova a xatua angatr ngöne la itre ijine jol. Nge tro la lapaune i angatr, a xatua angatr troa atreine cile kowe la itre xaa jol. (E jë la Iakobo 1:2-4.) Hnei Mira, ketre pionie qa Albanie hna öhne ka hape, jëne la hnei eahlo hna cile hut ngöne la itre jol ekö, atreine hë eahlo cile hut ngöne la itre jol ka traqa e thupen. Ame itre xaa ijin, eahlo a mekune ka hape, eahlo casi hi la ka cil kowe la itre jol. Ngo mekune hmaca jë hi eahlo, la aqane xatua eahlo hnei Iehova ngöne la 20 lao macatre ka ase hë. Matre öni eahlo: ‘Mele nyipici jë. Catre jë nyihlue i Iehova enehila, ke hnei Nyidrëti hna xatua eö ngöne la itre macatre ne eö a cile kowe la itre jol.’ Ketre tui epun, mekune jë fe la aqane xatua epun hnei Iehova. Öhne hi Nyidrë la epuni a cile kowe la itre itupath, nge tro kö Nyidrëti a amanathithi epun. (Mat. 5:10-12) Ame la kola nyiqane la akötr atraqatr, atreine hë epun cile hut, ke hnei epuni palahi hna cile catr ngöne la itre jol enehila.

TROA AMAMANE LA UTIPIN

9. Tune kaa la aqane amamane la ekalesia ne Anetioka la utipine i angatr?

⁹ Tro sa ce wange la ka traqa kowe la itre keresiano ne Iudra, ngöne lo kola jiin atraqatr. Hnene la ekalesia ne Anetioka hna drenge la ewekë ka traqa kowe la itre trejin ne Iudra, me utipi angatr. Celë hi ka ukune la ekalesia troa xatuane la itre trejine cili. Matre hnei angatr “hna axeciëne troa isa iupi fë ewekë kowe la itre trejin ne Iudra, thenge la hnei angatr hna isa hetreny.” (Itre hu. 11:27-30) Ngacama ka lapa gaa nanyi la itre trejin hna ketr hnene la jiin, ngo ajane catre la itre keresiano ne Anetioka troa xatua angatr.—1 Ioane 3:17, 18.

10. Nemene la aqane tro sa amamane la utipine së kowe la itre trejine hna lepe hnei hulö? (Wange ju fe la iatr.)

¹⁰ Ijije hi tro fe sa amamane la utipine së la kola lepe la itre trejine hnene la ketre hulö. Easa amamane la utipine së, la easa qaja kowe la itre qatre thup la aja së troa ixatua, maine kuië mani, maine thithi fë la itre hna lepe hnei hulö.b (Ite edomë 17:17) Ame lo 2020, hna acile la 950 lao Komite Ne Ixatua ngöne la fen asë, matre xatuane la itre atr hna ketr hnei COVID-19. Loi e tro sa olene kowe la itre trejin ka huliwa ngöne la itre komite cili. Tru la utipine i angatr kowe la itre trejin, matre hnei angatr hna thewe xen me itre ewekë, me xatuane la itre trejin troa catre nyihlue i Iehova. Nge hnei angatr fe hna nyihnyawane maine xupe hmaca la itre uma, me Uma Ne Baselaia.—Wange ju fe la 2 Korinito 8:1-4.

11. Kola atrunyi Iehova tune kaa hnene la itre huliwa së?

¹¹ Canga öhne hi la itre atre ne fen la easa xatuane la itre trejin hna lepe hnei hulö. Ame lo 2019, hnene la udreli Dorian hna thë la ketre Uma Ne Baselaia e Bahamas. Hnene la itre trejin ka xupe hmaca la Uma hna sipo devis kowe la ketre entrepreneur ka tha hmi kö. Öni nyidrë: “Eni a pi hamë epun la itre masin, me itre jia ne huliwa, memine fe la itre ka ixatua . . . Ke ajang troa xatuane la organizasio i epun. Eni a haine la aqane hnime epun la itre sine hmi epun.” Alanyim la itre atr ka thatre Iehova. Ngo öhne hi angatr la aqane ujë ne la itre Temoë Iehova. Tru la madrine së troa atre laka, itre huliwa së a ea la itre atr kowe la Akötresie ka tru trenge “utipin”!—Efe. 2:4.

12. Pine nemen matre ame la easa utipine la itre trejin enehila, ke kola hnëkë së kowe la akötr atraqatr? (Hna Amaman 13:16, 17)

¹² Pine nemen matre nyipiewekë tro sa utipine la itre trejin ngöne la akötr atraqatr? Öni Tusi Hmitrötr, ame la itre ka xel ma lö hnine la kuci politik, ke tro angatr a ixelë memine la itre jol enehila, me ngöne la akötr atraqatr. (E jë la Hna Amaman 13:16, 17.) Maine jë, tro la itre xaa trejin a aja ixatua, matre troa hetrenyi la ka nyipiewekë. Epi tro Iesu a öhnyi së a utipine la itre trejin ngöne la ijine nyidrëti a traqa. Ame cili, tro fe nyidrëti a hane hë së troa ‘kapa la Baselaia.’—Mat. 25:34-40.

TROA ACATRENE LA IHNIM

13. Thenge la Roma 15:7, tune kaa la aqane acatrene la itre pane keresiano la ihnimi angatr?

¹³ Hna wangatrehmekune la itre pane keresiano, hnene la aqane ihnimikeu i angatr. Ngo hapeu, ka hmaloi kö koi angatr troa ihnimikeu? Tro sa ce wange la itre trejin ka nyiatrene la ekalesia ne Roma ekö. Ame thei angatr, hetrenyi la angetre Iudra, hna hetrune fene la wathebo i Mose. Nge hetrenyi fe la itre atr ka traqa qa ngöne la itre xaa nöj laka, ketre aqane mele i angatre kö. Ame la itre xan ekö, ke itre hlu maine ka trene hlu. Hnei angatr hna acatren tune kaa la ihnimi angatr ngacama ka isapengöne catr angatr? Hnei Paulo aposetolo hna upi angatr troa “itö ikep.” (E jë la Roma 15:7.) Kola hapeue lai? Ame la hnaewekë “ikep” ke, kola qaja la troa kapa hnyawane la ketre atr ngöne la hnalapa së, maine nyisinee i angeic. Hnei Paulo hna upi Filemona troa kepe Onesimo, ketre hlu ka kötr. Öni Paulo: “Kepe angeice hnyawa ju.” (Filem. 17) Ketre, hnei Perisila me Akula hna kepe Apolo, me ce tro me angeic ngacama thatre hnyawa kö angeic la itre ini göi Iesu. (Itre hu. 18:26) Tha hnene kö la itre keresiano cili hna nue la eisapengöi angatr troa thë la casi angatr. Ngo hnei angatre pe hna itö ikep.

14. Tune kaa la aqane amamane Anna me föi angeic, la hnimi nyidro kowe la itre trejin?

¹⁴ Ame la ketre aqane troa amamane la ihnimi së kowe la itre trejin, ke ene la troa nyisinee i angatr. Nge tro fe angatre lai a ketre hnimi së. (2 Kor. 6:11-13) Tro sa ce wange la hna melëne hnei Anna me föi angeic. Thupene ju hi la nyidroti a fek a tro Afrique de l’Ouest troa mesinare, hna nyiqane la mec COVID-19. Pine laka nyidroti hi a hnyipi traqa, matre tha iöhnyi kö nyidro memine la itre trejine ne la ekalesia. Tune kaa la aqane amamane nyidroti la ihnimi nyidro? Hnei nyidroti hna hëne la itre trejin jëne vidéo conférence, matre qaja la aja i nyidro troa atre angatre hnyawa. Hna ketr la itre fami, matre hnei angatr e thupen hna ihë lapa, me icinyanyikeu me nyidro. Nemene la ka upi nyidro troa ujë tune lai? Öni Anna, “Ame ekö, tru la hna hnimi ni memine la faming hnene la itre trejin. Celë hi ka upi ni enehila, troa hane hnime la itre xaa trejin.”

15. Nemene la ini hne së hna xome qa ngöne la tulu i Vanessa göne la aqane troa hnime asë la itre trejin? (Wange ju fe la iatr.)

¹⁵ Ame ngöne la ekalesia, isa nöje i easë kö, nge isa aqane hetru easë kö. Tro së lai a hnime la itre trejin e tro sa goeëne la itre thiina i angatr ka lolo. Ame Vanessa, ketre trejine föe qaa Nouvelle-Zélande, thatreine kö eahlo nyisineene la itre xaa atrene la ekalesia i eahlo. Matre hnei eahlo hna mekun troa ce tro lapa me angatr, hune la troa kötre angatr. Celë hi ka xatua eahlo troa öhne la itre thiina i angatr hna wangatrun hnei Iehova. Öni eahlo: “Qaane lo kola xome la huliwa ne iwai trootro hnene la föeng, ce nyio palahi memine la itre trejin ka isapengön, nge hmaloi hë koi ni troa ce mele me angatr. Madrine catre ni troa ce huliwa memine la itre trejin ka isapengön. Ketre tui Iehova fe, hnei Nyidrëti hna ea kowe la organizasio i Nyidrë la itre atr ka isapengön.” Ame la easa goeëne la itre trejin tune la aqane goeë angatr hnei Iehova, ke easë hi lai a hnimi angatr.—2 Kor. 8:24.

16. Pine nemene matre nyipiewekë tro sa hnime la itre trejin ngöne la ijine akötr atraqatr? (Wange ju fe la iatr.)

¹⁶ Nyipiewekë tro sa hnime la itre trejin ngöne la ijine akötr atraqatr. Nge ekaa la hnë tro sa zae ngöne la ijine cili? Tro sa ce wange la hnei Iehova hna qaja kowe la nöje i Nyidrë ngöne lo kola apatrenyi Babulona ekö. Öni Nyidrë: “Trojë fe, nöjeng; löjë kowe la hnahage i ’ö, nge thingeju la qëhnelö thupe i ’ö, nge [zae ju utihë] patë hë la elëhni.” (Is. 26:20) Thatraqai easë fe la itre trengewekë celë, itre ka troa melëne la akötr atraqatr. Maine jë, ame la hnaewekë “hnahage” e celë, ke kola qaja la itre ekalesia së. Ame ngöne la akötr atraqatr, tro kö Iehova a thupë së, e tro sa cas memine la itre trejin me easë. Celë hi matre enehila hi la ijin tro sa cas me hnime la itre trejin. Aqane tro hi së lai a mel ngöne la akötr atraqatr!

IJINE HNËKË HI LA!

17. Maine ka hnëkë së enehila, nemene la hne së hna troa kuca ngöne la ijine akötr atraqatr?

¹⁷ Tha aqane tro kö a akötr la itre atr, ngöne la “drai ka tru i Iehova.” (Zef. 1:14, 15) Nge tro fe lai a hane ketr la itre hlue i Nyidrë. Ngo maine tro sa canga hnëkë enehila, ke tha tro kö sa nyiape hmohmo, ngo tro pe sa xatuane la itre xan. Tro së lai a atreine cile hut qëmekene la itre jol. Ame la kola traqa la jol kowe la itre trejin, tro së lai a utipi angatr me hamë angatr la ka nyipiewekë. E tro sa catre hnime la itre trejin enehila, ke hmaloi hi troa hnimi angatr elany ngöne la ijine jol. E cili, tro hë Iehova a amanathithi së me hamë së la mel ka pë pun ngöne la fen laka, pëhë akötr.—Is. 65:17.