Ini 11

Kötrene Jë La Hmi Ka Thoi!

Thaa aja i Satana kö me itre dremoni angeic, tro nyipunie a nyihlue i Akötresie. Angatre a kuca la hnei angatre hna atrein, troa ananyine la itre atr qaathei Akötresie. Nemene la aqane kuca angatre lai? Angatre a jëne la hmi ka thoi. (2 Korinito 11:13-15) Ka thoi la hmi, e thaa inine kö hnene eje la nyipici qa hnine la Tusi Hmitrötr. Ceitune la hmi ka thoi, memine la manie ka thoi​—öni së pena kö nyipi ewekë, ngo wange hnyawa ju hi së a pëkö eloin, ke ka gufa. Nyimutre la itre jole ka troa xulu qa ngöne ej.

Thatreine kö troa kapa la itre atr ka hmi thoi, hnei Iehova, Akötresie ka nyipici. Ame ngöne lo Iesu ekö e celë fen, hna thele troa humuthi nyidrë hnene la ketre caa lapa ne la itre ka hmi. Angatre a mekune ka hape, ka meköti la aqane hmi angatr. Hnei angatre hna qaja ka hape: “Casi la keme hun, ene Akötesie.” Hna kapa kö la mekune cili hnei Iesu? Ohe! Öni nyidrëti koi angatre ka hape: “Keme i nyipunie la diabolo.” (Ioane 8:41, 44) Ame enehila, nyimutre la itre atr ka mekune ka hape, angatre a hmi koi Akötresie, ngo thatre kö angatre ka hape, angatre a nyihlue i Satana me itre dremoni angeic!​—1 Korinito 10:20.

Ceitune la sinöe ka ngazo ka thaa wa loi kö, memine la hmi ka thoi, itre atrene eje a kuca la itre ewekë ka ngazo. Pine laka, kola kuca hnene la itre atr la itre ewekë ka ngazo, haawe, kola tiqa la fene enehila hnene la nöjei jole ka nyimutre. Kola e la kuci ngazo, me isi, me atrekënö, me iwajahuj, me ihumuth, me angazone la ketre atr. Nyimutre la itre atr ka kuca la itre ewekë ka ngazo, a itre ka hmi fe angatr, ngo thaa upi angatre kö hnene la hmi angatre troa kuca la loi. Thaa ijije kö tro angatre a hane itre sinee i Akötresie, nge ketre thatreine jë kö angatre troa trije la itre thiina ka ngazo.​—Mataio 7:17, 18.

Kola inine la itre atr hnene la hmi ka thoi troa thithi kowe la itre idrola. Akötresieti a qaja ka hape, thaa tro kö a thithi kowe la itre idrola. Ka meköti la mekune cili. Hapeu, madrine kö nyipunieti kowe la ketre atr ka thaa hane kö ithahnata koi nyipunie, a kolo hmekuje hi a ithahnata kowe la iahnu i nyipunie hna foton? Hapeu, ijije kö troa sinee i nyipunie la atr celë? Ohe, thaa ijije kö. Iehova a ajane tro la itre atr a ithahnata koi Nyidrë, ngo thaa kowe kö la ketre hna sa atr, maine ifoto pena, laka, thaa ka mele kö.​—Esodo 20:4, 5.

Kola inine hnene la hmi ka thoi laka, ijije troa ihumuthi ngöne la ijine isi. Hnei Iesu hna qaja ka hape, tro la itre sinee i Akötresie a ihnimekeu. Thaa tro jë kö së a humuthe la itre atr hne së hna hnim. (Ioane 13:35) Ketre thaa loi kö e troa humuthe la itre atr ka ngazo. Ame ngöne lo kola tro hnene la itre ithupëjia me Iesu troa xölehuji nyidrë, thaa hnei nyidrëti kö hna nue la itretre drei nyidrë troa isigöli nyidrë.​—Mataio 26:51, 52.

Kola inine fe hnene la hmi ka thoi ka hape, itre atr ka ngazo a akötre hnine la ifereno. Ngo kolo pe a inine hnei Tusi Hmitrötre ka hape, ame la thupene la ngazo, ke, mec. (Roma 6:23) Akötresie ka ihnimi Iehova. Hapeu, nyipici kö laka, tro la Akötresie ka ihnimi a axösisine palua la itre atr? Ohea! Caasi hi elanyi la hmi ngöne la paradraiso, ene la hmi hnei Iehova hna kapa. (Hna Amamane 15:4) Tro ha paatre la nöjei hmi asë ka xupi trepene la itre ini angatr, hune la itre trenga thoi hna sile hnei Satana.