MEKENE 55
Ce Huliwa Jë Memine La Ekalesia i Epun
Ame ngöne la fene hnengödrai, traqa koi itre milio la itre Temoë Iehova, me itre thauzane la itre ekalesia. Madrine catre la itre Temoë la angatr a kapa la itre ini, memine la aqane ini angatr. Nge tru la aja i angatr troa xatuane la itre ekalesia. Epuni fe kö a hane kapa la madrine cili ngöne la ekalesia i epun?
1. Nemene la aqane tro epuni a hamëne la traem me trengecatre i epun kowe la ekalesia?
Ame e hnine la ekalesia, nyipiewekë tro sa itö ixatua. Maine hetre qatr me qatre föe me itre ka adikape ngöne la ekalesia i epun, xatua angatre jë troa sine la itre icasikeu, maine pena troa tro sai angatr troa komisio, maine nyidrawane la hnalapa i angatr. (E jë la Iakobo 1:27.) Nge ijije fe hi tro sa hane ixatua ngöne la kola nyidrawane la Uma Ne Baselaia. Ngo ame pe, tha tro pi kö ketre a musinë së matre tro sa hane ixatua. Ihnimi së koi Iehova me kowe la itre trejine la ka troa upi së, ‘troa huujë së kö.’—Salamo 110:3.
Nyimu aqane troa ixatua hnene la itre ka xomi bapataiso hë. Ijije hi troa acile la itre trejin trahmany troa atre ixatua me qatre thup, e ka trongëne angatr la itre hna amekötine hnei Tusi Hmitrötr. Ijije fe tro la itre trejin trahmanyi me föe a xome la huliwa ne pionie, matre troa catre cainöjëne la maca ka loi. Ame itre xan, angatr a ixatua ngöne la huliwa ne xupi uma ne Baselaia, maine feke pena kowe la ketre götrane troa xatuane la ketre ekalesia.
2. Tro sa xatuane tune kaa la ekalesia hnene la itre mo së?
Tusi Hmitrötr a upi së troa “atrunyi Iehova hnene la itre mo [së].” (Ite Edomë 3:9, MN) Ka ithue madrine la tro sa hamëne la manie së, me itre xaa ewekë së, matre xatuane la ekalesia së memine la huliwa ne cainöj hna eatrëne ngöne la fene hnengödrai. (E jë la 2 Korinito 9:7.) Ame mina fe la mani hne së hna kuiën ke, göne fe la huliwa ne ixatua. Hnene palahi la itre Temoë Iehova, hna “isa ami mani acony” thatraqane la itre ahnahna. (E jë la 1 Korinito 16:2.) Angatr a kuiëne la itre ahnahna jëne la site donate.jw.org, maine ngöne itre trengene mani ka ej e hnine la itre Uma Ne Baselaia. Aqane tro hi së lai a amamane koi Iehova ka hape, easa hnimi Nyidrë.
TROA CE ITHANATAN
Tro sa ce wang la itre aqane tro sa xatuane la ekalesia.
3. Troa hamëne la itre mo së
Ka tru catre koi Iehova me Iesu, la itre atr ka ham cememine la madrin. Ame ngöne la ketre drai, hnei Iesu hna öhne la ketre föe ka pë ewekë a kuië ahnahna. E jë la Luka 21:1-4, nge ce ithanatane jë cahu itre hnying:
Hapeu, kolo kö a upi së troa hamën atrune matre troa amadrinë Iehova?
Nemene la mekuna i Iehova me Iesu la easa hamën qa kuhu hni së?
Maine easa pi atre la aqane huliwane la itre ahnahna, goeëne jë la VIDEO. Nge ce ithanatane jë cahu hnying:
Hna huliwane tune kaa la itre ahnahna hne së hna kuiëne ngöne la ekalesia?
4. Troa ixatua
Ame ekö, tha itre hlue i Iehova hmekuje kö a kuië mani thatraqane la itre uma ne hmi. Angatre fe a thupëne me nyihnyawane itre ej. E jë la 2 Aqane lapa ite Joxu 34:9-11, nge ce ithanatane jë cahu hnying:
Nemene la hna hamëne hnene la atre Isaraela matre ahnyipixene la uma ne hmi?
Hane hi cahu aqane nyihnyawane la itre Uma Ne Baselaia ne la itre Temoë Iehova. Goeëne jë la VIDEO. Nge ce ithanatane jë cahu itre hnying:
Pine nemene matre tro palahi a nyidrawane la itre Uma Ne Baselaia?
Nemene la itre aqane tro fe epuni a hane ixatua?
5. Troa huliwa kowe la ekalesia
Tusi Hmitrötr a ithuecatre kowe la itre trejin trahmany troa ixatua ngöne la ekalesia. Goeëne jë la VIDEO, nge ce ithanatane jë cahu hnying:
Hnauëne laka, ajane jë Ryan troa huliwa catr kowe la ekalesia?
Hetrenyi e hnine la Tusi Hmitrötr, la itre thiina nyine troa eënyine hnene la itre trejine trahmany ka ajane troa atre ixatua maine qatre thup. E jë la 1 Timoteo 3:1-13, nge ce ithanatane jë cahu itre hnying:
Nemene la itre thiina hna troa huliwane hnene la trejin trahmany ka ajane troa atre ixatua maine qatre thup?
Nemene la itre hna amekötine nyine tro la fami angeic a trongën?—Goeëne ju lai xötr 4 me 11.
Nemene hë la thangane kowe la ekalesia e tro la itre trejine trahmany a hetrenyi la itre thiina cili?
IJIJE HI TROA HNYINGË EPUN: “Ka trene mani la hmi epun. Qa kaa la manie i epun?”
Tro epuni a sa tune kaa?
HANE HI LA HNE SË HNA CE WANG
Madrine catre Iehova la easa hamëne la traem, me trengecatr, me manie së kowe la ekalesia.
Nyine Amekunën
Tune kaa la aqane tro sa nue la traem, me trengecatre së kowe la ekalesia?
Tune kaa la aqane tro sa xatuane la ekalesia hnene la itre mo së?
Nemene la itre aqane tro fe epuni a hane xatuane la ekalesia i epun?
ITRE XAA NYINE WANG
Ame ngöne la hneijine së, Akötresieti kö a musinë së troa kuië mani?
Tusi Hmitrötr a thue hnëqa ne la itre trahmany ka bapataiso hë. Ngo tune kaa ju hë e itre föe la ka cilën?
Aqane Troa Musi e Hnine La Ekalesia (Ita Ne Thup ne Febuare 2021)
Hna nue trengecatre hnene la itre Temoë, matre tro fë la itre itus kowe la itre trejine me angatr.
Hna nyithupene kö la itre huliwa hna kuca ngöne la hmi ne la itre Temoë i Iehova?