“Tro Hë Eö a Ce Me Eni Ngöne La Paradraiso”

1. Qëmekene tro Iesu a mec, nemene la hnei nyidrëti hna qaja kowe la ketre atrekënö ka thip ezi nyidrë? (Luka 23:39-43)

EASENYI hë tro Iesu memine la lue atrekënö hna ce athip me nyidrë a mec, matre tru catr la akötre i angatr. (Luka 23:32, 33) Tha lue atre drei Iesu kö nyidro, ke hnei nyidro hna pane hnyimasai nyidrë. (Mat. 27:44; Mar. 15:32) Ngo e thupen, saze pi hi la aqane ujë ne la ketre. Öni angeic: “Iesu, the thëthëhmi ni kö e lö jë nyipë kowe la Baselaia i nyipë.” Matre sa jë hi Iesu ka hape: “Nyipici, eni a qaja hnyawa koi eö enehila, tro hë eö a ce me eni ngöne la Paradraiso.” (E jë la Luka 23:39-43.) Tha hna qaja kö ka hape, hnene la atre cili hna kapa la maca ne “la Baselaia ne hnengödrai” lo hnei Iesu hna cainöjën. Nge tha ase kö Iesu qaja ka hape, tro fe angeic a hane lö kowe la Baselaia. (Mat. 4:17) Ngo nyidrëti pe a qaja lo paradraiso hna troa acil e celë fen. Hnauëne la easa qaja tune lai?

2. Nemene la ka amamane ka hape, atre Iudra la atrekënö ka ietra?

² Ketre atre Iudra lo atrekënö ka ietra. Öni angeic kowe la ketre atrekënö ka hape: “Tha xou i eö kö e Akötresie? Ke casi hi lai hna amekötine koi eö me nyidrë.” (Luka 23:40) Casi hi la Akötresie hna nyihluen hnene la angetre Iudra, ngo ame la itre atre ne fen ke, ka nyimu haze. (Eso. 20:2, 3; 1 Kor. 8:5, 6) Maine lue atre ne fene ju la lue atrekënö, ke tro pe la ketre a qaja ka hape, “Tha xou i eö kö la itre haze?” Ketre, tha hna upi Iesu kö kowe la nöjei atr asë, ngo hna upi nyidrëti hi kowe “la itre mamoe ka paatr ne Isaraela.” (Mat. 15:24) Hnei Akötresie hna amamane kowe la angetre Isaraela laka, tro kö Nyidrëti a amelene la itre ka mec. Atre hnyawa hi lai hnene la atrekënö. Nge ka xecie koi angeic laka, tro Iehova a amele Iesu hmaca me acili nyidrë troa joxu ne la Baselaia. Nge angeice fe a ajan tro Akötresie a amele angeic hmaca.

3. Ame kowe la atrekënö ka ietra, ka tune kaa la paradraiso hna qaja hnei Iesu? Qejepengöne jë. (Genese 2:15)

³ Pine laka, atre Iudra la atrekënö ka ietra, matre ame hi la paradraiso hnei angeic hna atre, ke kolo paradraiso hnei Iehova hna ami Adramu me Evati ngön. Celë hi matre ame la Iesu a qeje paradraiso, canga mekune hi angeic la ketre gatrane ka mingöming e celë fen.​—E jë la Genese 2:15.

4. Thenge la itre trengewekë i Iesu kowe la atrekënö, nemene la hna upi së troa kuca?

⁴ Itre trengewekë i Iesu kowe la atrekënö a upi së troa lapa mekun la mele së elanyi ngöne la paradraiso. Tru la itre ini hne së hna xom qa ngöne la aqane mel la itre atr fene la musi Solomona. Pine laka, sisitria catre kö Iesu hui Solomona, matre tha nyine qaja kö la mele së elanyi fene la musi nyidrë me itre hna iën. (Mat. 12:42) Ketre, loi e tro la ‘itre xa mamoe’ a atre la nyine tro angatr a kuca matre troa mele palua ngöne la paradraiso.​—Ioane 10:16.

TUNE KAA LA MELE SË ELANY NGÖNE LA PARADRAISO?

5. Ame koi epun, ka tune kaa la mel ngöne la Paradraiso?

⁵ Ame koi epun, ka tune kaa la mel ngöne la paradraiso? Epuni jë a mekun la ketre gatrane ka mingöming, ka tune lo hnei Iehova hna tran e Edrena. (Gen. 2:7-9) Epuni fe a mekun lo hna perofetane hnei Mika ka hape, tro la itre hlue i Iehova “a isa lapa fene la ite vine i angate me fene la ite hmejienge i angat.” (Mika 4:3, 4) Maine epuni pena a mekun la itre xötr ka qaja ka hape, troa mana la xen e celë fen. (Sal. 72:16; Is. 65:21, 22) Pane mekune jë ka hape, epuni ngöne la ketre gatrane ka mingöming, me lapa ngöne la laulau ka tiqa hnei xen ka lolo. Nge kola pupui lolo la itre iengen me itre feja. Nge epuni a dreng la kola ihnyima la itre sinee i epun, nge ame la itre xan ke, itre hna amelene hmaca. Angatr a ce madrin. Tha pu ne jidr kö lai! Tro kö lai a eatr e celë fen. Ngo hetre huliwa fe hne së hna troa kuca ngöne la paradraiso.

6. Nemene la itre huliwa së ngöne la paradraiso? (Goeëne ju la iatr.)

⁶ Hnei Iehova hna xup la atr matre tro angeic a madrine ngöne la huliwa i angeic. (Ate cai. 2:24) Troa tru hnei huliwa së ngöne la 1 000 lao macatre ne musi Iesu. Tro la itre atr ka mele pe thupene la akötr atraqatr, memine la itre milio lao atr hna troa amelene hmaca a aja iheetr, me xen, me uma. Ketre huliwa lai ka hamë madrin. Hnëqa i Adramu me Eva ekö troa eënyi ngöne la gatrane e Edrena. Ketre tune mina fe, hnëqa së elanyi troa aparadraisone la ihnadro. Ketre, tro fe sa madrine elanyi troa inine la itre milio lao atr hna troa amelene hmaca, troa atre Iehova memine la aja i Nyidrë. Nge drei jë kö la madrine së troa xatuane la itre hlue i Iehova ka thatre Iesu troa trotrohnine la itre ini ka hnyipixe!

7. Nemen la ka xecie koi së, nge pine nemen?

⁷ Xecie koi së laka, tro sa tingeting me mele ka loi ngöne la paradraiso elany. Pine nemen? Pine laka, ase hë Iehova amaman la pengöne la mele së elanyi fen la musi Iesu. Tro sa ce wang la aqane mel la itre atr fene la musi Solomona joxu.

JËNE LA MUSI SOLOMONA MAMA HA LA PARADRAISO

8. Hna eatr tune kaa ekö la hna qaja ngöne Salamo 37:10, 11, 29? (Wange ju la “Itre Hnyinge Ne La Itre Ka e” ngöne la zonale celë.)

⁸ Jëne la uati hmitrötre i Iehova, hnei Dravita joxu hna qejepengöne la mele ne la itre atr fene la musi ne la ketre joxu ka inamacan me nyipici. (E jë la Salamo 37:10, 11, 29.) Hne së hna majemine e kowe la itre atr la tusi Salamo 37:11 ngöne la easa qaja la paradraiso. Ka nyipici hi, ke hnei Iesu fe hna amexeje la xötre celë ngöne lo Cainöj Hune La Wetr. Celë hi ka amamane laka, tro fe a eatr elanyi la xötre celë. (Mat. 5:5) Ngo, Dravita lo a qaja la aqane mele ne la itre atr fene la musi Solomona joxu. Ame fene la musi Solomona, tingetinge la nöje i Akötresie, nge angatr a mele madrine ngöne la nöj “ka di hnei zane thi me hani.” Öni Akötresie: “E tro nyipunie a trongëne la ite hnenge hna acil . . . , tro ni a hamë nyipunie la tingetinge ngöne la nöj, nge tro nyipunie a meköl, nge pëkö ate troa aqoun.” (Lev. 20:24; 26:3, 6) Hna eatr la itre hna thingehnaeane celë lo kola joxu hnei Solomona. (1 A. l. ite jo. 22:9; 29:26-28) Ketre, hnei Iehova hna qaja ka hape, tro ha ‘patr’ la itre atr ka ngazo. (Sal. 37:10) Haawe, ame la itre hna qaja ngöne Salamo 37:10, 11, 29 ke, ase hë eatrëne ekö, nge tro fe a hane eatr elany.

9. Nemene la hna qaja hnene la joxu föe ne Sheba göne la musi Solomona?

⁹ Hna drei mejen hnene la joxu föe ne Sheba la aqane hlemu me tingeting la angetre Isaraela fene la musi Solomona. Hnei eahlo hna tro qa gaa nany utihë Ierusalema matre jelenyipicine la hnei eahlo hna dreng. (1 Ite jo. 10:1) Matre öni eahlo koi Solomona: “Co hi la hna thue macanyi ni, nge tru la tha hna qaja. . . . Manathithi la ite ate i cilie, manathithi lai ite hlue i cilie, angete icilenyi o drai qëmeke i cilie me denge la inamacane i cilie.” (1 Ite jo. 10:6-8) Ngo, co hi la emingömingöne la mel fene la musi Solomona hune la mele së elanyi hna hnëkëne hnei Iehova fene la musi Iesu Keriso.

10. Pine nemene matre ka sisitria kö Iesu hui Solomona?

¹⁰ Sisitria kö Iesu hui Solomona. Tha ka pexeje kö Solomona matre ka tria la aqane ameköti ewekë i angeic. Nge kola xeni pun hnene la nöje i Akötresie la aqane axecië mekune i angeic. Ngo ka pexeje Iesu, nge ka meköti palahi la aqane axecië mekune i nyidrë. (Luka 1:32; Heb. 4:14, 15) Hnei nyidrëti hna cile catr qëmekene la itre itupathe i Satana. Kolo hi lai a amaman ka hape, tha tro pi kö nyidrëti a tria me kuca la ketre ewekë ka troa akötrëne la itre hlue i nyidrë. Madrine catre së troa hetre Joxu ka tune lai!

11. Drei la itre ka troa xatua Iesu?

¹¹ Tro Iesu memine la ala 144 000 lao ka ce musi me nyidrë a eatrëne la aja i Iehova kowe la ihnadro. (Hna ama. 14:1-3) Ame lo ala 144 000 palakö e celë fen, hnei angatr hna cile kowe la itre itupath me xomihnine la itre akötr. Celë hi matre, ijiji angatre hi troa trotrohni së. Nemene la huliwa hnei angatr hna troa kuca?

NEMENE LA HNËQA NE LA ITRE HNA IËN?

12. Nemene la hnëqa ne la ala 144 000?

¹² Ka tru catre kö la hnëqa i Iesu memine la itre ka troa ce musi me nyidrë hune la hnëqa i Solomona ekö. Hnei Solomona hna thupën me xatuane la itre milio lao atr ngöne hi la nöje i angeic. Ngo ame la itre ka troa mus ngöne la Baselaia i Akötresie ke, tro angatr a thupën me xatuane la itre miliar lao atr ngöne la fen asë. Ketre hnëqa ka tru lai kowe la ala 144 000!

13. Nemene la huliwa ka tru hna troa kuca hnene la itre hna iën?

¹³ Tui Iesu, tro la ala 144 000 lao hna iën a xome la hnëqa ne joxu me itretre huuj. (Hna ama. 5:10) Fene la Wathebo i Mose, pane hnëqa ne la itretre huuj troa thupëne la mele ne la nöj me xatua angatr troa drengethenge Iehova. Ame la Wathebo ke, “iahnue ne la itre ewekë ka loi ka troa traqa.” Celë hi matre, tro fe la itre ka ce musi me Iesu a thupëne la mele ne la nöje i Iehova me xatua angatr troa mele nyipici koi Nyidrë. (Heb. 10:1) Thatre palakö së la aqane tro la itre hna iën a hamëne la itre ithuemacanyi kowe la itre atr e celë fen. Ngo xecie koi së laka, ame ngöne la paradraiso, ke tro kö la itre atr a kapa la itre hna amekötin ngöne la nyipi ijin.​—Hna ama. 21:3, 4.

NEMENE LA NYINE TRO SA KUCA MATRE MEL NGÖNE LA PARADRAISO?

14. Tune kaa la aqane cas la ‘itre xa mamoe’ memine la itre trejin me Iesu?

¹⁴ Hnei Iesu hna hëne la itre ka troa ce musi me nyidrë ka hape, “itre mamoe ka xalaith.” (Luka 12:32) Nge hnei nyidrë hna hëne la hnaaluene gurup ka hape, ‘itre xa mamoe.’ Nge tro hë la lue gurup cili a ca hnë axö mamoe. (Ioane 10:16) Ame enehila, angatre a ce huliwa, nge tro palahi angatr a ce huliwa utihë la kola aparadraisone la fen. Ame ngöne la ijine cili, tro la “itre mamoe ka xalaith” a elë e hnengödrai, nge tro la ‘itre xa mamoe,’ a mele palua e celë fen. Ngo hetre nyine tro la ‘itre xa mamoe’ a kuca enehila matre mele ngöne la paradraiso.

15. (a) Nemene la aqane tro la ‘itre xa mamoe’ a xatuane la itre trejin me Iesu? (b) Nemene la aqane tro epuni a nyitipune la trejin ngöne la farmasi? (Goeëne ju la iatr.)

¹⁵ Pë ju kö ijin kowe la atrekënö ka ietra troa olene koi Iesu la hnei nyidrë hna kuca koi angeic. Ngo ame easë enehila, nyimu aqane tro sa amamane la hni ne ole së koi Iesu. Ame la ketre aqane tro sa amamane la ihnimi së koi nyidrë, ke ene la troa xatuane la itre trejin hna iën. Celë hi ka troa amamane koi Iesu ka hape, ketre mamoe hi së. (Mat. 25:31-40) Easa xatuane la itre trejin me Iesu ngöne la easa catre cainöj me inine la itre atr. (Mat. 28:18-20) Haawe, loi e tro sa huliwane hnyawan la itre itus hna kuca nyine ini Tus, tune la itus Gojenyi Kowe La Nyipi Mel! Maine pë palakö atr hnei epuni hna ini Tusi memin, catre jë thele la ketre atr ka ajan troa ini Tus.

16. Nemene la aqane tro sa hnëkë matre mel ngöne la paradraiso?

¹⁶ Tha tro kö sa treqene troa lö ngöne la paradraiso matre troa saze la itre thiina së. Ngo enehila hi la tro sa nyipici ngöne la aqane ujë me aqane ithanata, me tuluth la itre hne së hna majemine kuca. Ketre loi e tro sa nyipici koi Iehova, me kowe la föi easë, me kowe la itre trejin ne la ekalesia. Maine tro sa isine troa trongëne la itre trepene meköti Iehova enehila ngöne la fene ka ngazo, ke tro ha hmaloi elanyi ngöne la paradraiso. Loi e tro fe sa huliwan la itre thiina ka loi me itre hne së hna atrein, matre hnëkë së troa mel ngöne la paradraiso. Wange ju la tane mekune hna hape, “Ka Hnëkë Hë Eö Troa ‘Mel Ngöne La Nöj’ Ka Hnyipixe?” ka mama ngöne la zonale celë.

17. Tro kö sa hace fë la itre ngazo hne së hna kuca ekö? Qejepengöne jë.

¹⁷ Ketre, tha tro hmaca kö sa hace fë la itre ngazo hne së hna kuca ekö. Ngo thupëne kö, hmitrötr e troa xome la thupene mel matre “kuca atrene la ngazo.” (Heb. 10:26-31) Maine hne së hna kuca la ketre ngazo ka tru, nge e thupen hne së hna ietra, me kapa la ixatua i Iehova me saze, ke ase hë Iehova köletrij la ngazo së. (Is. 55:7; Itre hu. 3:19) The thëthëhmine kö lo hnei Iesu hna qaja kowe la itre Faresaio, ka hape: “Eni a hëne la itre ka ngazo, ngo tha itre ka meköti kö.” (Mat. 9:13) The luelue kö laka, ijije hi tro la mel hna huujën hnei Iesu a köletrij la itre ngazo së.

TRO SA MELE PALUA NGÖNE LA PARADRAISO

18. Nemene la hnei epun hna troa porotrikën memine lo atrekënö ka ietra?

¹⁸ Pane mekune jë la ijine tro epuni a porotrik memine lo atrekënö ka ietra ngöne la paradraiso. Tro epon lai a isa qaja la hni ne ole i epon kowe la thupene mel. Maine jë tro epuni a hnyingë angeic ka hape, “Tune kaa Iesu qëmekene tro nyidrëti a mec?” nge “Tune kaa eö lo nyidrëti a kapa la aja i eö?” Nge tro pena angeic a hnyingë epun la aqane mele i easë fene la musi Satana. Tru la madrine së elanyi troa ini Tusi Hmitrötr kowe la itre atr ka tui angeic!​—Efe. 4:22-24.

19. Pine nemene matre tro palahi a hetre nyine tro sa kuca ngöne la paradraiso? (Wange ju la icetrön.)

¹⁹ Hetre nyine tro palahi sa kuca ngöne la paradraiso. Nge hetre xaa atre hne së hna troa iöhnyi memin, me itre huliwa ka lolo hne së hna troa kuca. Ngo ame la ka sisitria, ke tro sa atre Iehova hnyawa, me kapa madrin la itre manathith qaathei Nyidrë. Nge hetre ewekë ka hnyipixe hne së hna troa atre göi Iehova me göne la itre hna xup. Troa tro la itre drai, nge troa kökötr la ihnimi së koi Nyidrë. Easa olene koi Iehova me koi Iesu la hna aijijë së troa hane mele palua ngöne la paradraiso!