Mekun Palahi Së?
Hnei epuni kö hna e la itre Ita Ne Thup ne la macatre celë? Atreine kö epuni sa la itre hnyinge celë:
Nemene la itre eloine e tro palahi sa ithanata koi Iehova, me drei Nyidrë me meku Nyidrë?
Tro hë sa axecië mekune hnyawa, me hamë ini, me acatrene la lapaune së me ihnimi së koi Iehova.—w22.01, g. 30-31.
Pine nemen matre nyipiewekë tro sa mejiun koi Iehova me kowe la itre hnei Nyidrëti hna acil?
Enehila hi la ijine tro sa mejiun kowe la aqane ameköti ewekë i Iehova, nge tha tro kö sa luelu kowe la aqane axecië mekun ne la itre qatre thup. Ame hë la kola nyiqane la akötre atraqatr, tha tro kö sa cile troa idrengethenge, ngacama tha trotrohnine kö së la itre mekun hna xom.—w22.02, g. 4-6.
Nemen la hna qaja hnene la angela koi Zakaria la kola qaja la “tulu ne acile ngöne la iwanakoime i Zerubabela [gavena]”? (Zaka. 4:8-10)
Hnene la hna meköle goeëne celë hna amamane kowe la nöje i Akötresie laka, ngacama tha ka mingöming kö la uma ne hmi hna xup hune lo uma ne hmi hna xup ekö hnei Solomona, ngo hna xupe ej thenge la hna amekötine hnei Iehova.—w22.03, g. 16-17.
Tune kaa la aqane tro sa amamai “tulu . . . göi aqane ithanata”? (1 Tim. 4:12)
Loi e tro sa metrötr ngöne la easa cainöj, me nyima me hamë mekun ngöne la itre ijine icasikeu, me qaja palahi la itre trenge ewekë ka nyipici, ngo tha itre trenge ka akötre kö.—w22.04, g. 6-9.
Hnauëne laka, hna acasine la foa lao öni ka ses (maine baselaia) hna qaja hnei Daniela mekene 7 ngöne hi la ca öni hna qaja ngöne Hna Amaman 13:1, 2?
Ame la öni ka ses hna qaja ngöne Hna Amaman 13 ke tha eje kö a nyihatrene la ca mus, tune la musi Roma. Ngo eje pe a nyihatrene la itre mus hna acil qane ekö.—w22.05, g. 9.
Nemen la ketre aqane tro sa amamane la mejiune së kowe la meköti Iehova?
Maine hna akötrë së me qaqa së, tha tro kö sa elëhni me itëkeun, nue Iehova pi troa nyinyine la jol. Tro kö Iehova elany a apatrene la ngazo.—w22.06, g. 10-11.
Nemene la nyine tro la trejin trahmany a thupën la angeic a thith ngöne la ijine icasikeu?
Tha tro kö angeic a amekötine la ekalesia me qaja la itre ithuemacany. Ame la angeic a cile fë la thith ne nyiqan, tha tro kö angeic a ithanata aqeany. (Mat. 6:7)—w22.07, g. 24-25.
Nemen la alien la kola hape, troa amelene hmaca la “itre ka kuca la ngazo kowe la iameköti”? (Ioane 5:29)
Tha tro kö a ameköti angatr thenge la itre huliwa i angatr ekö. Ngo tro pe a ameköti angatr thenge la aqane mekun me huliwa i angatr thupene la hna amele angatre hmaca.—w22.09, g. 18.
Nemen la hnei trejin Rutherford hna upi së troa kuca, ngöne lo ijine asabele ne Semitrepa 1922?
Ame lo ijine asabele e Cedar Point (Etazini), öni nyidrë: “Musi hë la Joxu! Epuni la ka troa tro fë la maca. Celë hi matre, cainöjëne jë, cainöjëne jë, cainöjëne jë la Joxu memine la Baselaia i nyidrë!”—w22.10, g. 3-5.
Thenge la tusi Isaia mekene 30 nemen la köni aqane xatua së hnei Iehova matre tro sa xomihnine la itre jol?
Kola amamane hnene la mekene celë laka, Iehova a (1) drenge me sa la itre thithi së, (2) xatua së, me (3) amanathithi së enehila me elany.—w22.11, g. 9.
Nemene la ka amaman laka, ame la hna qaja ngöne Salamo 37:10, 11, 29 ke hna eatre hë ekö nge tro fe a eatr elany?
Dravita a qaja la aqane mele ekö la angetre Isaraela fene la musi Solomona. Nge ame la Iesu a qaja la xötre 11, ke nyidrëti a qaja la paradraiso ka troa traqa elany. (Mat. 5:5; Luka 23:43)—w22.12, pp. 8-10, 14.