MEKENE 30
Tro Hmaca Kö a Mel La Itre Hnei Epun Hna Hnim!
Ame la kola mec la ketre sinee së, ke hace catre koi së. Öni Tusi Hmitrötr ka hape, ithupëjia la mec. (1 Korinito 15:26) Ngo loi pe, atre hë së jëne lo Mekene 27 ka hape, tro Iehova a apatrene la mec. Hapeu, tro kö Nyidrëti a kuca la ketre ewekë kowe la itre atr ka meci hë? Ame ngöne la mekene celë, tro epuni a atre ka hape, itre miliar lao atr hnei Iehova hna troa amelene hmaca. Nge tro angatr a mele uti hë epine palua. Nyipici kö lai? Nge, ame la itre ka mec, angatr a troa mele e koho hnengödrai maine e celë fen?
1. Nemene la hnei Iehova hna troa kuca kowe la itre sinee së ka mec?
Tru catre la aja Iehova troa amelene hmaca la itre ka mec. Celë hi hna mejiune kow hnei Iobu, ketre atr ka tru lapaun. Öni angeic ka hape, tha tro kö Akötresie a thëthëhmi angeic ngöne la mec. Angeic a qaja koi Akötresie ka hape: ‘Tro nyipëti a hë, nge tro ni a sa koi nyipë [qa ngöne la Hua].’—E jë la Iobu 14:13-15.
2. Hne së hna atre tune kaa ka hape, troa mele hmaca la itre ka mec?
Ame lo Iesu ekö e celë fen, hnei Akötresieti hna hamë nyidrëti la men, matre amelene hmaca la itre ka mec. Hnei Iesu hna amelene hmaca la nekönatre jajiny ka 12 lao macatre memine la nekön la ketre sine föe. (Mareko 5:41, 42; Luka 7:12-15) Thupene lai, hna mec hnei Lazaro, ketre sinee i nyidrë. Thupene la foa lao drai ne kelemi Lazaro, hnei Iesu hna amele angeic hmaca. Hnei nyidrë hna thith koi Akötresie me hë catre draië ngöne la hua ka hape: “Lazaro, lö pi! Ame hna lö pi hnene la atre ka mec” a mele hmaca ha. (Ioane 11:43, 44) Pane mekune jë së la madrinene la fami me itre sinee i Lazaro!
3. Nemene la ka troa traqa kowe la itre sinee së ka meci hë?
Öni Tusi Hmitrötr ka hape: ‘Troa hetre mele hmaca.’ (Itre Huliwa 24:15) Madrine catre lo itre atr hnei Iesu hna amelene ekö troa mel e celë fen. Tha hnei angatre kö hna elë hnengödrai eë. (Ioane 3:13) Easenyi hë matre amelene jë Iesu la itre miliar lao atr e celë fen, matre tro angatr a mele epine palua ngöne la paradraiso. Öni nyidrë ka hape, ame la itre atr “ka meköl hnine la itre hua ne amekunën,” tro hë angatr a mel, uti fe hë la itre atr hne së hna thëthëhmin, ke ka mele palahi angatr koi Iehova.—Ioane 5:28, 29.
TROA CE ITHANATAN
Tro sa ce wange la itre ka anyipicine ngöne la Tusi Hmitrötr ka hape, tro ha mele hmaca la itre ka mec. Nge tro sa ce ithanatan la aqane troa thuemejiune koi së me akeukawanyi së, hnene la itre hna thingehnaean.
4. Hnei Iesu hna amamane ka hape, ijije hi tro nyidrëti a amelene la itre ka mec
Tro sa ce wange la aqane amele Lazaro hnei Iesu. E jë la Ioane 11:14, 38-44, nge ce ithanatane jë cahu itre hnying:
Nemene la ka amamane ka hape, meci hnyawa ha Lazaro?—Wange ju la xötre 39.
Maine elë ju Lazaro a tro koho hnengödrai thupene la angeic a mec, hapeu tro hmaca kö Iesu a hë angeic a tro e celë fen?
5. Itre miliar lao atr hna troa amelene hmaca!
E jë la Salamo 37:29, nge ce ithanatane jë cahu hnying:
Troa mel ekaa la itre hna troa amelene hmaca?
Tha Iesu hmekuje kö a troa amelene hmaca la itre ka nyihlue Iehova. E jë la Itre Huliwa 24:15, nge ce ithanatane jë cahu hnying:
Drei la hnei epuni hna ajane troa amelene hmaca?
Tro Iesu a amelene la ketre atr, tune la ketre kem a ahlëne la nekö i angeic ka meköl
6. Tro la melehmaca a hamë mejiun me akeukawanyi epun
Hna akeukawane la itre ka meci sineen hnene la mele hmaca ne la nekö i Iairo jajiny. E jë la hna melëne cili ngöne Luka 8:40-42, 49-56.
Qëmekene la troa amelene la nekö jajiny, öni Iesu kowe la keme i angeic ka hape: “The xou kö, ngo lapaune jë pe.” (Wange ju la xötre 50.) Troa xatua epun tune kaa hnene la mejiun kowe la mele hmaca . . .
e traqa ju mec la ketre atr hnei epun hna hnim?
e traqa ju la ketre jol kowe la mele i epun?
Goeëne jë la VIDEO, nge ce ithanatane jë cahu hnying:
Hna xatuane tune kaa la kem me thine i Phelicity hnene la mejiune kowe la mele hmaca?
HNE SË HNA MAJEMINE DRENG: “Pëkö mele hmaca.”
Nemene fe la mekuna i epun?
Nemene la xötre nyine tro epuni a amamane ka hape, hetre mele hmaca?
HANE HI LA HNE SË HNA CE WANG
Tusi Hmitrötr a thingehnaeane ka hape, itre miliar lao atr hna troa amelene hmaca ke, aja i Iehova lai. Nge hnei Nyidrëti hna hamëne la men koi Iesu.
Nyine Amekunën
Nemene la ka uku Iehova me Iesu troa amelene hmaca la itre ka mec?
Tro la itre miliar lao atr a mel ekaa elany, e koho hnengödrai maine e celë fen? Hnauëne la epuni a qaja tune lai?
Hnauëne laka, xeci hnyawa koi epun ka hape, ame la itre atr hnei epun hna hnim ke, tro hmaca angatr a mel?
ITRE XAA NYINE WANG
Itre mekun ka troa xatua së, e traqa ju mec la ketre sinee së.
Ijije kö tro la Tusi Hmitrötr a xatuane la itre ka meci sineen?
Troa xatuane tune kaa la itre nekönatr ka meci sineen?
Hetre itre atre kö hna troa amelen, nge ka troa elë hnengödrai eë? Drei pë hë la itre hna tha troa amelen?