Mekene 15
Loi e Troa Eköthe La Fami Matre Tro Eje a Atrunyi Akötresie
1-3. Pine nemene matre thatreine kö itre xane troa cile kowe la itre ejolene la faipoipo memine la itre jole ka eje thene la itre keme me thin, ngo pine nemene matre atreine tro Tusi Hmitrötre a hamë ixatua?
MEKUNE jë hi epuni troa hane xupe la uma i epun. Epuni a pane thele ihnepadro jë. Ame ngöne la he i epun, epuni pe hi a lapa treqene matre hetrenyi jë lai uma ka hnyipixe. Ngo ame pe, nemene la ewekë ka troa traqa e pëkö thei epuni la itre jiane huliwa, nge pëkö hnei epuni hna atreine ngöne la xupi uma? Drei la aqane troa gufa lo itre mekuna i epun!
2 Nyimutre la itre ka faipoipo ka nyiqane la mele ne trefëne cememine la ajane troa hetrenyi la mele ka loi, ngo ame la ejolene ke, paatre kö la itre jian, ene la itre thiina ka itretrengekeu memine la aja i angatre me aqane mele cememine la inamacan. Haawe, thaa qea ju kö thupene la hna faipoipo, nge zikoziko hë la aqane mele i nyidro. Ngöne la nöjei drai, nyidroti a isi maine iwesitrë. Ketre, mina fe ame hë la nyidroti a hetre nekönatr, thatreine kö eatrëne la hnëqa, thatre kö keme la hnëqa i kem, nge ketre thatre kö thine la hnëqa i thin, qa ngöne lai thaa ijije kö troa öhnyi manathithine la faipoipo.
3 Ame pe la eloin, eje e hnine la Tusi Hmitrötre la itre ixatua. Hna aceitunëne la itre ihaji ne iameköti ne la Tusi Hmitrötre memine la itre jiane huliwa, ene lo itre thiina ka ijije troa eköthe la mele ka loi ne la fami. (Ite Edomë 24:3) Hanawange la nyine anyipicin.
ITRE JIANE HULIWA KA IJIJE MATRE TROA MADRINE NGÖNE LA FAIPOIPO
4. Pine nemene matre thaa tro kö së a sesëkötre la kola traqa la itre jole hnine la faipoipo, nge nemene la itre tulu ka meköti hna hamëne hnei Tusi Hmitrötr thatraqane itre eje?
4 Maine nyipici laka atreine nyidroti ce mel, ngo nyimu götrane fe ka isapengöne thei nyidro, isapengöne la itre aliene hni nyidro, memine la mele i nyidro ngöne la nyidroti a isa nekönatr, ketre tune mina fe la aqane isa ini nyidro. Qa ngöne lai, trotrohnine hi së laka ijije troa traqa la itre hnepe jole thupene la faipoipo. Haawe, nemene la aqane tro nyidroti a cile kowe la itre jole cili? Eje hi lo laka, qëmekene troa acile la uma, loi e tro la atre xupi uma a pane xomi tulu hnyawa qa ngöne la hna siji tulu ne uma. Celë hi itre tulu lai nyine troa xötrethenge. Tusi Hmitrötre a hamëne la itre tulu ka meköti qa thei Akötresie, jëne madrine kowe la fami. Hanawange la itre xaa tulu nyine tro së a ce wang.
5. Nemene la aqane amamane hnene la Tusi Hmitrötre la enyipiewekëne la troa inyipicikeu hnine la faipoipo?
5 Inyipicikeu. Hnei Iesu hna qaja ka hape: “Qangöne lai, ame la hnei Akötresie hna isilekeun, the tro kö a shenge hnei at.”a (Mataio 19:6) Hnei Paulo apostolo hna cinyihane fe ka hape: “Loi e tro la nöjei ate asë a nyipine la troa lue trefën, memine la göhnë ka pë ethan; ke tro Akötresieti a ahnëjinë angatre angete nyixetë me angetre kuci ngazo.” (Heberu 13:4) Qa ngöne lai, tro la itre trefëne a wangatrune me trongëne la itre hna amekötine koi angatre hnei Akötresie, ngöne laka tro angatre a ce mele nyipici kowe la itre fö i angatr.—Genese 39:7-9.
6. Nemene la aqane tro la inyipicikeu a thupëne la faipoipo matre cile hut?
6 Eje hi laka, troa hetre ehmitrötrene me etingetingene la faipoipo e hna inyipicikeu hnene la lue trefën. Atre hi nyidro ka hape, maine troa traqa la ketre hnepe jol, ijiji nyidro troa ce ixomexatuane la hace. (Ate Cainöj 4:9-12) Sisitria nyidro hune la itre xaa trefëne ka canga sesë troa sei hna cil pine la itre hnepe jole ka traqa ngöne la mele i angatr. Itre ka canga mekune ka hape, ‘ngazo la aqane ië föe, thaa hna kuci angatre kö troa ce mel’, nge pine laka, ‘paatre hë thei angatre la ihnimi’, ma loi pena troa thele hnan. Ngo eje hi laka itre mekune hmo lai, pine laka thaa itre eje kö lai a nyijëne la föe troa akökötrene la trenge ihnimi angeice kowe la trahmanyi angeic. Ketre troa ngazo catre elanyi e tro la ka mele thoi me föe hmunë a faipoipo hmaca, pine laka tro hmaca kö lai a fetra lo itre jol, qaane ingazo i angeice ekö memine lo pane föe i angeic. Maine kola öhne hnene la ketre atr laka, xöla la uma i angeic, tro angeice a thelejëne troa pelethe la gaa xulu matre thaa neni ju la tim. Ngo thaa tro kö angeice a kötretrije la uma i angeice me tro kowe la ketre. Ceitune hi lai memine la itre aqane nyiqaane iwesitrë thene la lue trefën, laka thaa nyin kö la itre jole la troa saze föe maine trahmanyi pena. The canga sesë kö troa isalapa ngöne la kola traqa la itre jol, ngo catre pi pe matre troa cilehuti la faipoipo i epun. Ame la trefëne ka mele nyipici kowe la fö i angeic, ke, angeice a ahmitrötrëne la faipoipo ceitu me ketre ewekë nyine troa xupe acatren, me thupën, me nyine troa hnime hnyawa.
7. Pine nemene matre jole koi itre xaa ka faipoipo la troa ce wai mekun, ngo nemene la ixatua hna troa kapa e hna xetrëne la “at ka hnyipixe”?
7 Ce wai mekun. Öni Ite Edomë 15:22 ka hape: “Tha nyipi ewekë la itre mekune e thaa hna ithahnatan.” Ngo, nyipici laka, thaa ewekë ka hmaloi kö la troa ithahnata ce wai mekune thene la itre xaa trefën. Pine nemene? Thaa ceitune kö la aqane ithahnatane la itre atr. Celë hi ketre kepine matre thaa itrotrohni kö maine hace pena me latresi. Hnene jë la aqane heetru angatre matre thatreine kö angatre troa fe la aliene la hni angatr. Maine jë hnei angatre hna tru hnine la ketre fami gaa iwesitrë pala hi. Ame hë enehila la faipoipo hë angatr, thatreine kö angatre troa ithahnata kowe la fö i angatr, ngöne la hni ka menyik me thenge la ihnim. Ngo eje hi laka, thaa ijije kö troa thaipiëne la hnalapa i epuni kösë ‘uma ka tiqa hnei iwesitrë.’ (Ite Edomë 17:1) Tusi Hmitrötre a catre qaja ka hape, loi e troa xetrëne la “ate ka hnyipixe,” nge thaa loi kö e troa hna la itre trenge ewekë ka akötre me ka ngazo, maine icatrë me iqaqa.—Efeso 4:22-24, 31.
8. Nemene la ewekë ka troa xatua epun, maine thaa iloi kö epuni memine la fö i epun?
8 Nemene la nyine tro la lue trefëne a kuca e ka isazikeu la itre mekune i nyidro? Maine epuni a öhne laka kolo ha paatre la xomihni thei epuni maine thene la fö i epun, ke, loi e tro epuni a xötrethenge la eamo hna hamëne ngöne Ite Edomë 17:14: “Tije pi la ikelikelë e tha kaca petrekö.” Celë hi matre the sa kö la kola ithahnata, ngo pane treqene ju matre paatre pi la elëhni. (Ate Cainöj 3:1, 7) Nge maine kola traqa tune koi epuni lai, loi e tro epuni a “canga dreng, me hnöthe troa ewekë, me hmite troa elëhni.” (Iakobo 1:19) Ame la nyine tro epuni a ajan, ke, ene la troa iloi ngo thaa ene kö la troa pi hun. (Genese 13:8, 9) Qa ngöne lai, iëne jë la itre trenge ewekë ka loi memine la aqane troa qaja itre ej, ngo loi e pane uqa hnine pi la wesitre i epuni kowe la fö i epun. (Ite Edomë 12:18; 15:1, 4; 29:11) Ngo ame la ka nyipi ewekë, thaa tro kö epone a lapa fë wesitr, ngo ngöne la hni ka ipië, thele jëne jë pe tro epone a sipo ixatua koi Akötresie jëne la thith.—Efeso 4:26, 27; 6:18.
9. Pine nemene matre ijije troa qaja ka hape, ame la ce wai mekune ke, ka fetra ej qa kuhu hni?
9 Kola edromëne hnei Tusi Hmitröte ka hape: “Ame la hni ne la ate ka inamacan, te, ate inine la qe i angeic, me nyixane la inamacane kowe la ukeineqe i angeic.” (Ite Edomë 16:23) Nyipici laka, troa öhnyi loi hnene la lue trefëne ngöne la aqane tro nyidroti a ithahnata e loi la lue hni nyidro, ke, thaa ngöne që hmekuje kö la troa atreine ithahnata. Nemene la aqane ujë i epuni kowe la fö i epun? Tusi Hmitrötre a hamë ithuecatre kowe la itre keresiano troa hetrenyi la “feje hnin” ene la troa imekunekeun. (1 Peteru 3:8) Hapeu hane fe kö epuni ujë tune lai ngöne la kola traqa la hace ka tru kowe la fö i epun? Maine eje hi, ke, atreine hi tro epuni a ithahnata kowe la föe i epuni me sa thenge la hace ka eje thei angeic.—Isaia 50:4.
10, 11. Nemene la aqane tro la trahmanyi a xötrethenge la eamo hna hamëne ngöne 1 Peteru 3:7?
10 Iatrunyi me Metrötr. Hna qeje itre trahmanyi ka hape tro angatre a ce lapa memine la itre fö i angatr, “thenge la inamacan, nge atrune jë la fö, ke nyidroti la inege ka kucakuca.” (1 Peteru 3:7) Nyipi ewekë troa wangatrune la föe, e ajane së troa atrunyi angatr. Ame la trahmanyi ka ce lapa memine la fö i angeice “thenge la inamacan,” ke, angeice a wangatrune la itre aliene hni ne la föe i angeic, me ekucakuca i angeic, memine la inamacan, memine la enyipiewekëne la föe i angeic. Loi e tro fe angeice a atre me kapa la aqane goeëne hnei Iehova la itre föe memine la aja i Nyidrë troa metrötrë angatr.
11 Hanawange la ketre ceitun, hnine la uma i epuni ke, hetrenyi la ketre inege ka nyipi ewekë catr, ngo ame pe la hnepe ejolene ke ka kaqakaqa. Hapeu tro jë kö epuni a thupëne la aqane troa enijëne eje wanga kaqa pi? Haawe, caa pengöne hi lai memine la hnaewekë hna qaja hnei Peteru, lo hna hape, “inege ka kucakuca,” nge celë fe kepine ka upe la keresiano trahmanyi troa wangatrune la föe hnei angeice hna hnim.
12. Nemene la aqane tro la föe a amamane laka atraqatre la metrötre i angeice kowe la fö i angeic?
12 Ngo nemene la eamo hna hamëne hnei Tusi Hmitrötre kowe la föe? Hnei Paulo hna cinyihane ka hape: “Nge ame la föe troa metötëne la trahmany.” (Efeso 5:33) Ame la aja ne la föe, ke, ene la troa atrunyi angeice me hnimi angeice hnene la fö i angeic, ketre tune fe, ame la aja ne la trahmany, ke, ene la troa metrötrë angeice hnene la föe i angeic. Thaa loi kö tro la föe a qaja trongëne la itre ngazo ne la fö i angeic, ceitune hi e ka hmi maine ka thaa hmi kö. Ketre, thaa loi kö troa apui ngazonyi angeice me waja huji angeic, ceitune hi la nyidroti a lapa caas, maine nyipine pena la ka alanyim.—1 Timoteo 3:11; 5:13.
13. Nemene la aqane troa qaja la itre mekune ngöne la tingeting?
13 Ngo thaa kolo kö lai a qaja ka hape, thaa tro kö la föe a hane hamëne la itre mekuna i angeic. Maine hetre ewekë hnei angeice hna hnehengazo fë, ke, ijije tro angeice a hane fe amaman, ngo ngöne pala hi la metrötr. (Genese 21:9-12) Atreine tro së a aceitunëne la föe a fe la mekune i angeice kowe la fö i angeice memine la angeice a hna la balo kowe la fö i angeic. Maine angeice a ajane troa hamëne la balo kowe la fö i angeic, ka loi hi troa nango kuiëne hmidrane matre loi e troa xöl, ngo e ihlothine hë ke tro hë lai a ieatrë. Drei la kepine matre thaa loi kö tro la lue trefëne a ihnakeune la itre trenge ithahnata ka akötr, ngo loi pe troa hamëne hnyawa itre eje cememine la hnenyinawa ka menyik.—Mataio 7:12; Kolose 4:6; 1 Peteru 3:3, 4.
14. Nemene la nyine tro epuni a kuca maine thaa ajane kö la fö i epuni troa trongëne hnine la faipoipo la itre trepene wathebo qa hnine la Tusi Hmitrötr?
14 Tune la hne së hë hna ce wange, ijije tro la itre trepene wathebo a xatua epuni troa eköthe la faipoipo matre hetrenyi la manathith. Ngo nemene la nyine tro epuni a kuca e thaa kapa kö hnene la fö i epuni la ithuemacanyi qa hnine la Tusi Hmitrötr? Hetre thangane ka loi koi epuni e tro epuni a kuca hnyawa la hnëqa i epuni hna amekötine jëne la atrehmekune i Akötresie. Hnei Peteru hna cinyihane ka hape: “Loi e tune fe nyipunie itre fö, denge thenge ju la ite fö i nyipunie; thatraqan’e hetretre thaa drenge thenge la wesi ula, mate ahmalanyi angate hnene la thina ne la ite ifënekö i angat, ngo tha hnei wesi ula; e goeëne hnei angatre la thina i nyipunie a pë ethan, nge kola qou.” (1 Peteru 3:1, 2) Eje hi laka thatraqane fe la trahmanyi la eamo cili, maine pë kö aja ne la föe i angeice kowe la Tusi Hmitrötr. Ngacama thaa tro kö a ceitune la itre mekune i epon, haawe, nue pi la itre trepene meköti qa hnine la Tusi Hmitrötre troa xatua nyipo troa föe ka sisitria. Ketre, jëne la atrehmekune i Akötresie, ijije tro epuni a itre keme me thine ka atreine kuci hnëqa hnyawa.
HETRUNE JË LA ITRE NEKÖNATRE THENGE LA ATREHMEKUNE I AKÖTRESIE
15. Hna ihamënekeune tune ka la itre aqane ihia ka ngazo, nge nemene la aqane troa saze la itre hna majemine cili?
15 Thaa hnene kö laka hetre gili me hama ne la ketre atr, ke tro hë a qeje angeice ka hape menizie ka hetre talane catr. Ketre tune mina fe, thaa hnene kö laka hetre neköne la lue trefëne matre tro hë a qeje nyidro ka hape, keme me thine ka atreine ini kuku. Ma thatre jë kö nyidro ka hape nyidroti pala hi a hetrune la itre nekö i nyidro thenge la itre aqane ihia ekö; qa ngöne laka, itre xötratre pala hi a xötrethenge la itre tulu ka ngazo hna ihamënekeun. Celë hi matre kola eatre la hna qaja hnene la ketre edromë qene Heberu ka hape, “Hnei itre keme hna iji la itre wene vine ka ija matre megi pe la itre inyö ne la ite nekön.” Itre hna cinyihane lai a qaja kowe la itre nekönatre ka hape, thaa hna huli angatre kö troa xötrethenge la itre tulu ne la itre keme me thin. Ketre ijiji angatre hë troa ketre thele gojeny, ene la troa nue la itre trepene meköti Iehova troa amekötine la gojenyi hnei angatre hna iëne troa xötrën.—Ezekiela 18:2, 14, 17.
16. Pine nemene matre nyipiewekë tro epuni a hamëne la itre hna ajane hnene la fami i epun, nge nemene la ketre nyine troa kuca?
16 Ame la hnei Iehova hna ajane thene la itre keme me thine keresiano, ke, ene la tro angatre a thupëne la itre nekönatre me amamane kowe la itre nekö i angatre la itre jë i Iehova. Hnei Paulo hna cinyihane ka hape: “Maine ketre ate a tha thupëne hnyawa la ite sine i angeic, o thinene hi la lapa ka cahae me angeic, angeic’a kelikelëne la lapaun, nge atraqatre la ngazo i angeice hune la ate tha lapaune kö.” (1 Timoteo 5:8) Drei la ketre trenge ewekë ka catr! Ngo eje hi laka ketre götraneqa lai ka sisitria nge hnëqa ne la atr ka thina ka ijiji Akötresie, troa thupëne la itre nekö i angeic, maine troa hamëne la itre ewekë thatraqane la ngönetrei, me ua, me itre ewekë ka ketr la itre hni i nyudren. Tusi Hmitrötre a hamëne la itre trepene meköti ka troa xatuane la itre keme me thine troa eköthe la ketre hnalapa gaa madrine thatraqane la itre nekö i angatr. Tro sa pane ce wange la itre xaa trepene meköt.
17. Nemene la nyine troa kuca matre troa ej e hnine la itre hni ne la itre nekönatre la itre trenge wathebo i Akötresie?
17 Hamëne jë la tulu ka loi. Hna qaja kowe la itre keme me thine ne isaraela ka hape: “Nge tro eö a inin’it’eje kowe la itre nekö i’ö, me ithahnatan’it’ej e lapa eö hnine la uma i’ö, me tro e kuhu gojeny, nge eö a meköle me mejë hmaca.” Nyipi ewekë tro la itre keme me thine a inine la itre trepene meköti Iehova kowe la itre nekö i angatr. Ngo angatre pe a troa kapa la ithuecatre celë, kola hape: “Nge tro ha eje e kuhu hni ö la nöjei tenge ewekë celë ini a ahnithe koi ’ö ngöne la drai celë.” (Deuteronomi 6:6, 7) Eje hi laka thatreine kö tro la itre keme me thine a hamëne la ewekë ka pëkö thei angatr. Maine epuni a ajane troa amë la itre wathebo i Akötresie e kuhu hni ne la itre nekö i epuni, ke, loi e tro epuni a pane kapa ngöne la itre hni epun.—Ite Edomë 20:7; wange ju la Luka 6:40.
18. Nemene la tulu ka sisitria hna hamëne hnei Iehova kowe la itre keme me thin, ngöne la aqane troa amamane la ihnim?
18 Amamane jë la ihnimi epuni koi angatr. Ngöne la ijine kola bapataiso Iesu, ke, hnei Iehova hna qaja ka hape: “Nyipëti la Nekönge hniminang; ini a madi Nyipë.” (Luka 3:22) Qa ngone lai, hnei Iehova hna wangatrehmekune la hupuna i Nyidrë, me qaja amamane laka Nyidrëti a kepe Iesu me hnimi nyidrë. Hna qaja pë hë hnei Iesu ngöne la ketre ijine ka hape: “Ke hnei cilieti hna hnimi ni, nge tha hna nyitrepene petrekö la fene hnengödrai.” (Ioane 17:24) Haawe tro fe epuni itre keme me thine a fe amamane la ihnimi epuni kowe la itre nekö i epuni jëne la aqane ewekë memine la aqane ujë i epun—nge loi e troa eje pala hi e nöjei drai la tulu ka loi cili. The thëthëhmine pi kö epuni laka, “ame la ihnimi, te, ate akeukawan.”—1 Korinito 8:1.
19, 20. Nemene la aqane troa hajiine hnyawane la itre nekönatr, nge troa xomi tulu tune ka thei Iehova hnene la itre keme me thin?
19 Ihaji. Tusi Hmitrötre a amamane la enyipiewekëne la ihaji hna hamëne ngöne la ihnim. (Ite Edomë 1:8) Maine tro la itre keme me thine a nanazijëne troa kuca la hnëqa i angatr, ene la troa hajine la itre nekö i angatre enehila, ke, nyipici laka tro angatre elanyi a xeni pune me xomi akötre qa ngöne la hnei angatre hna lapatrije la itre hnëqa i angatr. Ngo hetrenyi hë la ithuemacanyi hna kapa hnene la keme me thin, ithuemacanyi ka aijijë nyidro troa tuluthe la aqane troa hamëne la ihaji matre thaa tro kö a sasaithi tulu. Hna cinyihane hnei Paulo ka hape: “Ange kem, the aelëhnine kö la ite nekö i nyipunie, wanga huketö jë angatr.” (Kolose 3:21) Thaa loi kö tro la itre keme me thine a hamëne la itre ihaji ka troa huketöne la itre nekö i angatr, me qaja lapaane hmaca la itre ngazo hnei angatre hna kuca ha, maine tro pena a jele ngazone lo itre huliwa hnei angatre hna kuca ha cememine la hni ka pexej.
20 Hna hamë tulu ngöne la aqane troa hamë ihaji hnene la Tretretro së e koho hnengödrai, Iehova Akötresie. Thaa ka sasaithi tulu kö Nyidrë ngöne la aqane hamëne Nyidrë la wameuce ne ihaji. Hnei Nyidrëti hna qaja kowe la nöje i Nyidrë ka hape: “Tro ni a nyi thupene koi ’ö thenge la meköt.” (Ieremia 46:28) Ngöne la götrane celë, loi e tro la itre keme me thine a nyitipu Iehova. Nyipici, maine ka sasaithi tulu la aqane ihaji së nge thaa hna qeje pengöne hnyawa kö la aliene eje memine la ini hna troa xomi tulu qa ngön, eje hi laka ihaji ka gufa, nge tro pena ha lai a iaelëhni.
21. Nemene la aqane tro la itre keme me thine a atre laka angatre a hajine hnyawane la itre nekö i angatr?
21 Tro la itre keme me thine a atre tune ka ka hape ka loi la aqane hamëne angatre la ihaji? Maine jë, tro angatre a isa thele ka hape: ‘Nemene hë la thangane la ihaji hnenge hna hamëne kowe la itre nekong?’ Loi e troa hetre ini hna kapa qa ngöne la ihaji matre troa traqa kowe la pune ka loi. Celë hi matre loi e tro la itre nekö i epuni a trotrohnine hnyawa la aliene la itre ihaji hna hamën. Nge thupene lai thaa tro kö a lapa xetietë ngo akötrehnine jë troa atrepengöne ka hape traqa kö kowe la pune ka loi lo itre ihaji hna hamën. Nyipici, tro la itre nekönatre a pane wesitre pine la hna haji angatr. (Heberu 12:11) Ngo ame pe thaa tro pi kö a axouenyi angatr, nge thaa tro kö nyudrene a drenge ka hape ceitui nyudrene me nekönatre ka lapa neköeng, maine tro pena ha nyudrene a mekune ka hape ka pë hnyawa pala pi hë eloi nyudren. Qëmekene tro Iehova a amekötine la nöje i Nyidrë, hnei Nyidrëti hna qaja ka hape: “The qou kö, . . . ke ce ini hë me eö.” (Ieremia 46:28) Celë hi matre, loi e tro pala hi epuni a hajine me amekötine hnyawa la nekö i epun, matre tro angeice a atre hnyawa e kuhu hni angeice ka hape epuni itre keme me thine a hnimi angeice me xatua angeic.
AQANE TROA HETRENYI LA “ATREINE TROA ELEMEKEN”
22, 23. Nemene la aqane tro epuni a hetrenyi la atreine troa elemeken, ewekë ka sisitria matre troa eköthe la ketre fami ka manathith?
22 Loi e tro sa olene koi Iehova la hnei Nyidrëti hna hamëne la itre jiane ka ijije nyine troa eköthe la imelekeu ka loi ngöne la fami. Ngo thaa tro hmekuje kö a lapa fë la itre ewekë cili, ene lo itre hne së hna inine hë. Ka sisitria catre kö la troa melën. Hanawange la nyine ceitun, hnene la ketre atre xupi uma hna majemine troa hna amine la itre jiane huliwa i angeic. Thaa hna xötrethenge kö la aqane troa huliwane itre ej. Qa ngöne la aqane huliwa cili, haawe, gufa la pun. Ketre tune fe, atre hnyawa kö epuni la itre thiina ka ej hë e hnine la fami i epun. Ame itre xan, ke, ma cia hlöeë hë itre ej, matre jole catre hë e troa saze. Xotrethenge ju pe la eamo qa hnine la Tusi Hmitrötr, hna hape: “Tro la ate ka inamacan’a denge me nyixane la inamacanei angeic; nge tro la ate trotrohnin’a hetre inamacane nyine mus.”—Ite Edomë 1:5.
23 Ijije tro epuni a atreine troa cilëmeken, e hnei epuni pala hi hna thele me kapa la atrehmekune i Akötresie. Canga wangatrehmekune ju la itre trepene wathebo qa hnine la Tusi Hmitrötre ka ihmeku memine la mele ne la fami, nge thele jë la aqane tro epuni a trongëne itre ej. Goeëne hnyawane jë la itre keresiano ka macaje ka hamë tulu ka loi ngöne la aqane aeatrëne angatre la hnëqa i angatr, maine itre trefën, maine itre keme me thin. Ithahnata jë me angatr. Nge e hune la nöjei ewekë cili, fe jë koi Iehova jëne la thithi la itre aliene la hni epun, ene la itre jole hnei epuni hna lapa fë. (Salamo 55:22; Filipo 4:6, 7) Eje hi laka atreine tro Nyidrë a xatua epuni matre manathithi la lapa i epun, nge celë hi aqane troa atrunyi Iehova lai.
[Ithueamacany]
a Caasi hi la kepine qa hnine la Tusi Hmitrötre ka aijijëne la lue trefëne troa sei hna cile me faipoipo hmaca, ene hi lo “kuci ngazo”—maine nyixetë.—Mataio 19:9.
HAPEUE LA HNEI EPUNI HNA ININ
Nemene la aqane tro la inyipicikeu, me aqane ce wai mekun, memine la metrötre a hamë madrine ngöne la faipoipo?
Nemene la aqane tro la itre keme me thine a amamane hnyawa la ihnimi angatre kowe la itre nekö i angatr?
Nemene la itre nyine troa wangatrune ngöne la kola ihaji?