Keriso, Ketre Tulu Kowe La Itre Thöth
1 Qea ha hna ithahnataane la Tusi Hmitrötr, nge önine jë hi la ketre thöthi: “Eni a haine la thiina i Iesu, ketre atr ka catr. Drei lai hene ka tru tro ni a mejiune kow.” Tha tro kö a xome ceitu nyidrë me itre hene kuci politik, maine itre ka mama qa ngöne la hna kuci elo, maine itre ka hlemu pine la hna kuca la itre nyine amadrinën. Tha tro kö la itre nyipi keresiano a nyitipune la itre ka xomi tulu thene la itre atr ka mama ne la fene ka tha ihmeku kö la mele memine la keresiano.—Sal. 146:3, 4.
2 Loi e troa mama kowe la itre thöth, laka e tro angatr’a troa lapaune koi Iesu Keriso, ke, angatre hi lai a amamane laka, angatr’a ceitu memine la itre mamoe i Akötresie, nge atre angatre fe hnei Iesu. Hnene la Atre thupë mamoe ka loi hna kukehni angatr. (Ioane 10:14, 15, 27) Manathithi la itre thöthi ka xomi Keriso nyine tulu i angatr.
3 Ngöne la angeice petrekö a eitre lao macatre, hnene la ketre trejine ka huliwa enehila ngöne Bethela e Burukilin hna mekune ekö troa traqa kowe la götrane hnëqa cili. Hna thuecatre koi angeic, ene la troa goeëne la huliwa hnine la Bethela kösë ketre aqane troa xomi tulu thei Iesu ngöne la angeic’a tru. Hnene la keme me thine i angeic, me itre atre thupe ka wange trongëne la itre ekalesia, hna qaja lapaane la mekune celë qëmekei angeic. Hnei angatre hna xatua angeice troa mele tune la ketre atrene la fami ne Bethela, nge tro fe a ixatua göi troa nyihnyawaane la uma ne Baselaia, me tro fe a maca ngöne la huliwa ne cainöje trootro. Nyimutre hë la itre macatre enehila ne huliwa nyidrë hnine la Bethela, nge tru la madrine i nyidrë, laka ame la nyidrëti a tru trootro, ke, hnei nyidrëti hna thele troa xötrethenge la tulu i Keriso.
4 Tha hnei Iesu kö hna ajane troa huliwa kowe la fen; hnei nyidrëti pe hna iëne la huliwa ne cainöje trootro. Hnene la ketre söre thöthi hna ajane troa hane pionie, ngöne la angeic’a fenesi hna ini, ngo hnei angeice hna luelue, pine laka, pëkö huliwa hnei angeice hna öhne ka ihmeku memine la pepa i angeic, nge troa huliwa pena ngöne hi la sine la drai. Hnei angeice pe hna lapa mekune ka hape: ‘Ame la pane ewekë, ke, tro ni a pane öhnyi huliwa, nge thupene lai, tro ni a xome la huliwa ne pionie.’ Hnene la ketre qatre thupe hna amamane hnyawaane laka, e qea ha la hna treqen, ke, tro fe a kökötre la aja i angeice kowe la itre huliwa ngöne la drai ka pexej, pine laka pëkö kepine ka catre matre tro angeic’a atreine troa thipën. Hnei angeice hna qaja ka hape: “Hnenge hna thithi koi Iehova matre sipone la ua i Nyidrëti göi troa eatrongë ni.” Ene pe canga xome jë hi angeice la huliwa ne pionie ka ixatua, nge thupene lai, angeice pë hë a pionie lapa. Tha qea ju kö thupene lai, nge angeice hi a öhnyi huliwa ka ihmeku memine la porogarame ne pionie i angeic.
5 Hnei Iesu hna catre qaja trongëne la maca ne la Baselaia koi nöjei atr. (Mata. 4:23) Hawe, tro fe la itre thöthi keresiano a hane inine troa catre cainöj, nge tha tro pi kö a nango xoue itre xan. Hnene la ketre temoë ka 14 lao macatre hna qaja ka hape: “Atre asë hi la nöjei atrene la hna ini, la aqane meleng, eje ngöne la melenge la thiina ne keresiano . . . Atre hnyawa angatre la götrane cili, matre ame la eni a öhne la ketre sine ce ininge ngöne la huliwa ne cainöj, ke, pëkö hmahmang. Hna pune drenge palahi hnene la itre ka ce ini me ini, nge alanyimu hë thei angatre la itre ka xomi itus.”
6 E troa waipengöne la tulu i Keriso, ke, ijije troa xatuane la itre thöthi troa wangatrehmekune hnyawa la itre nyine kuca thatraqane la mele i angatre ngöne la itre drai ka troa xulu. Tha angatre kö a kukehnine la itre aja ne fen, ngo angatre pe a ‘mekune la ate xupi angatr,’ ngöne la angatr’a catre huliwa i Iehova. (Ate Cai. 12:1) Tui Keriso Iesu, angatr’a akökötrene la “aja koi Tetetro” ka atreine hamëne la manathithi ka sheminge me ka sisitria kö hune la nöjei ewekë hna hamëne hnene la fen. Tha aja i angatre kö troa “pate” memine la fene celë, ngo angatre pe a mejiun, me ajane troa ‘cile huti epine palua.’—1 Ioane 2:15-17.