Atraqatre La Ithuecatre Hna Kapa Qa Ngöne La Kovasio Ne Distrik!—Loi e Troa Atrunyi Iehova Palahi o Drai!
1 Hna hnyinge hnei Paulo aposetolo ka hape “Ke maine tha mama kö la nine la trutru, dei la ate troa hnëkëne kowe la ishi?” (1 Kor. 14:8) Hapeu, la ithuecatre hna kapa qa ngöne la Kovasio ne Distrik hna hape “Itre Nyine Atrunyi Akötresie Ngöne La Madrin,” hna qaja atrune kö, nge hna trotrohnine hnyawaane kö? Ame la maca me mekune ka sisitria, ke, ene la hna hape ‘Troa atrunyi Iehova palahi o drai ngöne la madrin!’ Hapeue fe epun, hna hane ketri epuni fe kö hnene la aqane iupi celë? Nyimutre la itre ihaji ka catre hna hamëne jëne la porogarame ne la kovasio, celëhi itre kepine ka ijije troa xatua së palahi troa atrune palahi la Joxu ka epine palua, ene Iehova.—Sal. 35:27, 28.
2 Hna atrune la lolo i Iehova hnene la hnengödrai, me itre ewekën’ej, “kete drai koi kete drai.” (Sal. 19:1-3) E maine hna atrunyi Iehova hnene la nöjei ewekë hnei Nyidrëti hna xup, ka tha ithahnata kö, ke, hapeu, tha tro jë kö së, itre atr ka inamacan’a adraiëne la itre nine së troa atrunyi Nyidrëti palahi pine la itre thina i Nyidrë ka pë san, me itre ewekë hnei Nyidrëti hna eatrën? Drei la atr ka tru hune la Atre Xupi së, ka ijije tro së a atrun?—Sal. 145:3, 7.
3 Ketre Drai Koi Ketre Drai: Hnene la ketre atr ka cinyihane la tusi Salamo hna upe hnene la uati hmitrötre hna qaja ka hape: “Amamanejë qan’e kete drai uti hë la kete drai la iamele i nyidë. Ke atraqate Iehova, nge troa nyipi atrun.” (Sal. 96:2, 4) Hapeu, tro hmekujehi la itre pionie a trongëne la hna ithahnata celë? Ohea! Hapeu, tha kolo kö lai a upi së troa qeje Iehova koi itre xane e nöjei ijin, me ngöne la nöjei götrane hne së hna tro kow, ngacama itre ijine lai tha hne së kö hna mekune troa cainöje ngöne itre hnalapa trootro? Nyipici! Sisitria catre hë enehila troa atrunyi Iehova o drai, me qaja koi itre xane la aliene la iamele. Nyipiewekë tro la itre atr a atre laka Iehova la Joxu epine palua, nge hnei Nyidrëti hna hamëne la musi kowe la hupuna i Nyidrë hna acile troa joxu, ene Iesu Keriso. Kola upi së hnene la ihnimi së koi Iehova me kowe la itre xaa atr troa qaja trongëne palahi la maca celë, memine fe la itre hnei Iehova hna hnëkëne göi iamele, ngacama lapa ju hë ngöne la ketre götrane ne la fene hnene la itre atr.—Sal. 71:15.
4 Ngöne lo itre drai ne cainöje trootro Iesu e celë fen, ke, hnei nyidrëti hna amë la tulu ka sisitria, ene la troa atrunyi Iehova, nge pëkö troa xou. Hnei nyidrëti hna qaja ka hape: “Eni a ole koi enëtilai, Angakaka, Joxu ne hnengödrai memine la fen.” (Mata. 11:25) Hnei nyidrëti hna melëne la hna ewekë celë, ngacama nyidrëti ju hë ngöne ketre götran, hnei nyidrëti palahi hna atrunyi Iehova. Nge, ngacama hna itrohnyi hnene la ka alanyimu—ngöne itre sunago, maine ngöne uma ne hmi e Ierusalema, maine hune la wetr, maine ngöne-gejë pena—hnei nyidrëti palahi hna atrunyi Iehova. E maine hne së hna xötrethenge hnyawa la itre thupaca i Iesu, ngöne la troa aeatrëne la huliwa ne atrunyi Iehova o drai, ke, tro së a öhnyi loi qa ngön, me hetre madrin’atraqatr.
5 Loi e Troa Sa Xemine La Kola Ihë: Hapeu, hnei epuni kö hna nangëne la kola könë epuni hnei Iehova troa atrunyi Nyidrë qëmekene la nöjei atr, o drai? Pane mekune ju, tha tro kö a ajolë epuni hnene la macatre i epun. Salamo 148:12 a könëne la itre thupëtresij, me itre jajiny, me itre qatr, me itre nekönatre matre troa atrunyi Iehova. Itre thöthi fe, hapeu, tro kö epuni a atrunyi Iehova nyipine la itre sine ini epun, me itre ka ini epuni ngöne la macatre ne ini ka hnyipixe? Itre thupëtresiji fe, hapeu, hnei epuni kö hna xölehuje la itre ijine troa ithahnata kowe la itre sine huliwa i epun, matre hane fe angatre drenge la pengöi Iehova, memine la itre trepene mekune i Nyidrë? Tro asë hi së a isa catre qeje Iehova trootro, matre kösë ketre götrane ka tru ne la mele së, tune la easë a mano, me xen. Ngacama, tha ajane kö la itre atr troa drenge la hne së hna qaja, ngo hetre Atr ka drei së, nge celëhi ka troa amanathithi së.—Mal. 3:16.
6 Kola easenyi trootro la pune la fene celë, nge kola ketr la nöjei götrane ne la fene hnene la hna könën, kola hape: “Atrunyi Ia jë nyipunie!” (Sal. 106:1) Epi troa draië catre la itre nine atrunyi Iehova matre tro asë hi la nöjei atr a atre laka ame la Atr atrekë ëjëne la Iehova, ke, Nyidrëti hmekuje la ka Sisitria hune la nöjei ka mele ngöne la fene hnengödrai.—Sal. 83:18.