Hna Waipengö Së Hnei Iehova—Pine Nemene Matre Hetre Thangane Ka Loi?
1 Ame la ajane la nöjei atr’asë, ke, ene laka tha tro kö a hane tithi angatre hnene la ketre mec. Celëhi ewekë lai ka troa thuemadrine koi angatr. Ngo, alanyimu la itre atr tha hna tithe kö hnei meci, ngo canga saqei angatre palahi troa wai droketre troa waipengöi angatr. Pine nemen? Angatr’a thele la itre meci ka eje thei angatr, matre canga thele la itre nyin’itr’ej. Ejehi laka, sisitria catre kö troa thupëne la ecatrene la mele ngöne la ua. E ajane së troa kepe së hnei Iehova, ke, loi e tro palahi së a “cate kowe la lapaun.”—Tito 1:13.
2 Enehila la ijine ka ijije troa waipengö së hnei Iehova. Pine nemene? Pine laka, qa ngöne la ene ka hmitrötre i Nyidrë, Iehova a waipengöne la hni ne la nöjei atr asë. (Sal. 11:4, 5; Ite Edom. 17:3) Loi e tro së a xötrethenge la tulu i Davita, ngöne laka hnei nyidrë hna sipo Iehova troa waipengöi nyidrë: “Iehova fe, thele ni jë, nge tupathi ni ju; thelejë la mekuneng.”—Sal. 26:2.
3 Nyipiewekë tro së a hmekëne la itre ewekë ka troa angazone la ecatrene la mele së ngöne la ua, ke, ijije tro hmaca itr’ej’a fetra qa ngöne laka atr ka ngazo së. Hawe, kola haji së ngöne Ite Edomë 4:23 ka hape: “Nyipi thupëne hnyawa ju la hni ö, ke xulu hë la mele qa ngön’ej.”
4 Ijije hi troa ananazijëne la ecatrene la mele së ngöne la ua hnene la ngazo, ka eje thene la fene ka tha amamai tulu ka loi. E maine hne së hna easenyine la fene celë ka ngazo, ke, tro fe hë së a nyiqaane mekune tune la itre atr ne fen, me troa ujë tui angatr. Maine pena, tro së a xome la aqane mele ne la fen, me pi mama, pine laka xötre hë koi së la mekune ne la fene hnengödrai.—Efe. 2:2, 3.
5 Satana a nyijëne la itre iaxösisi, maine itre iangazo hna kuca mekötine koi së matre troa ajolë së ngöne la ua. Ngo, tru catre kö la itre nyine madrine hnei angeice hna nyimajane matre huli së. Peteru a thuecatre koi së troa ‘inamacan, me hmek,’ pine laka hna qeje Satana “kösë liona a ho, kola thele tha i nyën.” Kola upi së troa ‘thipe tiji nyën, nge cile huti ngöne la lapaun.’—1 Pet. 5:8, 9.
6 Nyipiewekë catre troa thupëne la ecatrene la mele së ngöne la ua, ene la troa cile huti palahi ngöne la lapaune së jëne la hna acatrenyi eje o drai. Hnei Paulo aposetolo hna thuecatre koi së tro palahi së a wange la pengöne la lapaune së. Tune la easë xötrethenge hnyawa la itre hna amekötine koi së hnene la ketre droketre ka atrepengöne hnyawa la huliwa i nyidrë, hawe, tro fe së a drei Iehova ngöne la Nyidrëti a waipengö së ngöne la ua, me amamane koi së la ketre hnepe jole nyine troa apatrene trij. Ejehi laka, tro la aqane kuca celë a aijijë së troa “ameköti së.”—2 Kor. 13:5, 11.
7 Iehova la Atre atreine tuluthi së. Ame la aqane tuluthi së hnei Nyidrë, ke, ka meköti palahi itr’ej. Atre pengöne hnyawa hi Nyidrëti la hne së hna ajan. Jëne la Wesi ula i Nyidrë, memine la ‘hlue ka nyipici,’ Nyidrëti a ahnithe la xeni thatraqane la ecatrene la mele së ngöne la ua. (Mata. 24:45; 1 Tim. 4:6) Maine hne së hna majemine xeni palahi la xeni cili, ene la xeni ka loi thatraqane la ua, ke, tro lai a xatua së troa cile huti ngöne la ua. Tru la thangane ka loi hna troa kapa e hna catre ngöne la huliwa ne cainöje trootro, me sine la itre xaa huliwa ne ua. Qa ngöne lai, tro së a kapa madrine la kola waipengö së lapa hnei Iehova, nge easë a lapaune laka tro Nyidrëti a thupë së hnyawa matre tro së a cile huti ngöne la ua.