Loi e Tro Së a Inamacane Ngöne La Aqane Tro Së a Huliwaane La Itre Ordinatör

¹ Hnei Paulo aposetolo hna thuemacane la itre keresiano ne lo pane hadredre lao macatre, laka tha tro kö a nue la itre xaa ewekë troa huli angatr, pine laka “xoxopate pe hi la ijin.” (1 Kor. 7:29) Hnene laka, easë a easenyi hë la pune la fene celë, nyipiewekë catre koi së troa ‘pane thele la baselaia i Akötesie, me thina ka meköti anganyidë,’ me troa ‘anyipiewekëne la nöjei ijin’! Sisitria catre la traem.​—⁠Mata. 6:⁠33; Efe. 5:⁠15, 16.

² Hna wangatrune me haine la teknolozi pine laka, ej’a thue ijine së ngöne la itre ewekë hne së hna troa kuca. Hanawange la ketre ceitun, tro hi a ketr la ketre buto hnei ketre atr, nge tro la ordinatör’a hamëne koi angeice la itre mekune ka nyimutre, me ithuemacanyi hnei angeice hna ajan. Tha ca menetre ju kö la eqeane la hna kuca hnene la itre ordinatör, ngo maine hna kuca ju jëne la itre xaa ewekë, ke, itre hawa maine itre wiike ne tro së a huliwa matre eatrëne lai hna kuca hnene la ordinatör. Ejehi laka, tro itr’ej’a itre jiane huliwa ka sisitria e hna huliwaane hnyawane itr’ej.

³ Hapeu, Eje Hnyawa Kö Laka Ka Thue Ijine Së?: Ame ngöne ketre götran, ke, tru la thupene la teknolozi​—⁠ngöne mani, me ngöne traeme fe. Tro lai a nyimu hawa ne tro së a inine la aqane troa huliwaane la ordinatöre thatraqane la itre götrane qa. Ketre mina fe, ame la atr ka sinethele la pengöne la teknolozi, ke, troa xom’atrune la itre traeme i angeic, nge pëhë ijine i angeice troa kuca la itre huliwa ka nyipiewekë. Celëhi matre nyipiewekë tro së a inamacane ngöne la götrane cili, me lapa mekune palahi la trepene meköti hnei Paulo aposetolo hna hamëne nyine ithuecatr, ene la troa tro “tune la ite ka inamacan, kola anyipiewekëne la nöjei ijin.”​—⁠Goeëne ju la 1 Korinito 7:⁠31.

⁴ Hetrenyi la itre trejine ka mekune troa huliwaane hnyawane la ordinatöre i angatr, maine troa lepe me thupëne hnin’ej la itre rapore ne la ekalesia. Nyipici laka, isa qanyi së kö mekune la aqane tro së a huliwaane la ordinatöre së. Ngo, ame la itre rapore ne la ekalesia hna hamëne ngöne pepa, ke, tha tro kö itr’ej’a lapahuti ngöne ordinatör, pine laka tha hna nue kö kowe la itre nekönatr, maine itre xaa atr menu troa hane goeën. Am’asë hi la itre rapore ne la ekalesia​—⁠itre hna ithingë, itre pepa ne la itretre cainöje ne la ekalesia, me itre xane ju kö⁠—​ke, loi e troa cinyihane itr’ej ngöne la itre pepa hna hamëne hnei Sasaiatri, nge tha tro kö a amë hutin’itr’ej hnine la ordinatör. Celëhi aqane troa thupëne la itre ewekë ne la ekalesia, ene lo itre ewekë hna tha tro kö a atre hnei nöjei atr.

⁵ Tro la itre atre thupe trene hnëqa a waipengöne hnyawa, ngöne la angatr’a athipi hnëqa göi Ini Ne Cainöje Qa Thei Akötresie, me göi porogarame ne Icasikeu Ne Cainöje Trootro. Nyipiewekë tro angatr’a lapa mekune la itre taane mekune hna troa ithahnataan. Ame ngöne ini, hna hamëne la itre xaa götraneqa kowe hi la alaxalaith, a itre ka ijije troa kuca itr’ej. Loi e troa wangatrune la aliene la itre götrane qa, memine fe la hna atreine hnene la itre ka troa cilefë, memine la aliene lai taane mekune hna troa ithahnataan. Tha qai ordinatöre kö troa kuca la hnëqa cili.

⁶ Tha loi kö tro la ketre trejine ka troa cilefë la götrane qa i angeice ngöne la itre icasikeu ne la ekalesia, a mejiune kowe la itre mekune hna hnëkëne hë hnine la ordinatöre hnene la ketre atr hnei angeice hna thatre, pine laka kola nyihnene la hna huliwa hnei ketre ngo tha sipu kuca kö la hnëqa hna athipe koi angeic. Tha hnene kö la itre keresiano trene hnëqa hna mekune troa hnëkëne la itre taane cainöje qa hnine la Tusi Hmitrötr, maine hnëkëne la itre götrane qa göi itre icasikeu, matre troa amë hutin’itr’eje hnine la ordinatöre göne la tro itre xane a hane xome pena me huliwaane itr’ej. Ngo, ejehi laka, nyipiewekë catre la itre jia ne huliwa hna hamë së hnei Sasaiatri, ene la ordinatör, memine la nöjei itusi ne la sasaiatri hna cinyihane hnin’ej, hna hëne ka hape CD-ROM, kola xatua së troa thele la itre mekune ka ijije ngöne la traeme ka xoxopatrehi.

⁷ Kola ithahnataane la hna alöne me hamëne trongëne la itre porogarame ne ordinatör, me itre lis, me itre xaa ewekë ju kö thatraqane la itre trejin, me hnëkëne me hamëne la isa götrane qa thatraqane la Icasikeu ne Cainöje Trootro, me göi Ini ne Cainöje Qa Thei Akötresie jëne elektoronik, maine jëne ketre ewekë pena, ke, ka loi kö kowe la itre trejine troa isa hnëkëne la sipu götrane qa i angatr, matre hamëne la ixatua ka ijij, hmekune la aja ne la itre atrene la icasikeu. (1 Tim. 4:​13, 15) Tha tro pi kö së a thele maniëne la itre hne së hna atre ngöne la ekalesia.

⁸ Tuneka fe la hna kuca hnei itre xan, ene la troa hamëne la itre mekene tusi hna fejane ngöne ordinatöre thatraqane la kola troa ce wange la Tour de Garde maine göi Ini Tusi ne la ekalesia? Ejehi laka, sisitria catre kö tro la itretre cainöj’a isa xomi not, me fejan’itr’ej hnine la Tusi Hmitrötr, ngöne la götrane maca, ketre tune fe la itre itusi hna troa ini ngön. Maine tro së a sine la icasikeu, nge eje the së la itre mekene tusi hna xome qa hnine la ordinatöre thatraqane la itre itusi hna troa ce wang, ke, troa pë aja së troa huliwaane la Tusi Hmitrötr, ene la troa thele la itre mekene tusi e hnin. Ejehi laka, ketre ini ka sisitria nge ka hetre thangane ka loi koi së la troa isa thele la itre mekene tusi hnine la Tusi hmitrötre ngöne la ijne Ini Tus, maine ngöne la itre xaa icasikeu; ketre aqane hnëkë së lai matre atreine së troa amamane hnyawa la Tusi Hmitrötre ngöne la easë a cainöje trootro. Kola öhne laka hetre thangane kö e troa ketre fe me e la itre xötre hnine la Tusi Hmitrötr, ngöne la kola troa xatuane la itre atrene la icasikeu troa isa xome itr’eje ngöne la Tusi Hmitrötr.

⁹ Itre Xaa Thethi Ka Tru: Tune la hna amamane ngöne La Tour de Garde ne 1 ogas, 1993, götrane 17, ijije troa angazo së ngöne la götrane ua, hnene la hna lö hnine la itre “serveurs télématiques.” Ketre mina fe, tro la itre atr ka ngazo thina a aliine la caa “virus”​—⁠ene la troa kuca la ketre porogarame matre troa apatrene trije la itre “fichiers informatiques”⁠—​itre ka icilekeu me Iehova, maine itre keme ne hmi, maine itre atr ka xeci e kuhu hni angatre troa angazone la mekune ne la itre xaa atr, ke, ijije tro angatr’a qaja amamane la mekune i angatre hna apoizinëne jëne la ewekë celë. Hawe, loi e troa löhnine la “serveur” hna ati ëjene ka hape “Réservé aux T.J.,” ke, hna thupëne hnyawaan, ngo ame pe, ke, hna aijijëne hmekujehi lo itre hlue i Iehova ka macaje, me ka huliwa nyipici, pine laka ijije troa ajojezine la ketre keresiano hnene la “ate angazone la thina ka loi.” (1 Kor. 15:33) Hna kapa hnei Sasaiatri la itre rapore ka hape hetrenyi la itre “réseaux privés” hna huliwaane göi troa qejemekune thatraqane la itre taane mekune ngöne la ua, ngo kolo fe a hamë eamo ka ngazo, me ixöjetrij, me hamëne trongëne la mekune ka thoi, me troa hamëne la itre mekune ka tha ithuecatre kö, me amejëne la itre hnying, me alueluën, ene la nöjei pengöne ewekë ka troa angazone la lapaune ne la itre xan, me troa qaja trongëne la itre sipu mekune i angatre kö ngöne la itre xötre ne la Tusi Hmitrötr. Ejehi laka, e tro së a e, ke, ma tro së a mekune ngöne la xötrei ka hape ewekë ka loi koi së, la itre ithuemacanyi me itre ini hna hamë së ngöne la ordinatör, ngo ame pe, ke, hetrenyi la itre mekune hna apoizinën. Itre keresiano a mejiune kowe la “hlue ka nyipici me ka inamacan” troa hamëne la xeni ngöne la ua ngöne la ijine ka ijij, me hamëne la itre mekune matre trotrohnine hnyawa palahi angatre la aja i Akötresie. (Goeëne ju La Tour de Garde ne 1 julai, 1994, götrane 9-11.) Ketre hnëqa ka tru kowe la keresiano troa thupëne la lapaune i angeice wanga troa angazon’ej hnene la itre ewekë ne fen, nge nyipiewekë fe tro palahi angeic’a atre la itre hnei angeice hna majemine ce ithahnata memin.​—⁠Mata. 24:​45-47; 2 Ioane 10, 11.

¹⁰ Hnene palahi lai hna cinyihane e hnine La Tour de Garde hna amamane laka nyipiewekë troa metrötrëne la itre “droits d’auteur,” ene la itre atrekë ewekëne la itre porogaram. Nyimutre la itre sosiete ka hnëkëne me salemëne la itre porogaram, nge angatr’a ati ëje itr’ej, me hamëne la ketre pepa qa thei musi göne la aqane troa huliwaane la itre porogaram. Hna cinyihane ngöne lai pepa ka hape ame la atr ka troa huliwaan’ej, ke, tha tro kö angeic’a fejane la itre porogarame göi itre xaa atr; ejehi laka, ame la troa fejan’itr’ej, ke, kolo lai a sasaithe la itre wathebo i musi thatraqane la nöjei nöj’asë göne la itre “droits d’auteur.” Nyimutre la itre atr ka aja mani, nge ka tha xou troa sasaithe la wathebo. Ngo ame la itre keresiano, ke, angatr’a metrötrëne la wathebo i mus, me hamëne koi Kaisara la itre ewekë i Kaisara.​—⁠Mata. 22:21; Rom. 13:⁠1.

¹¹ Nyimutre la itre sosiete ka tru ka salemëne la itre ordinatöre cememine la itre porogaram, me itre pepa sinetrongen. Ngo, tha hnene kö la itre xaa magazë hna hamëne la pepa sinetrongen, pine laka ame la itre porogame hna amë hnine la ordinatör, ke, itre hna fejane hmaca ka tha meköti qëmekei mus; celë hi matre, ame la atr ka itöne me huliwaane la itre porogarame cili, ke, angatr’a sasaithe la wathebo i mus. Hawe, tha tro kö la itre keresiano a alöön, qa ngöne la “serveur télématique,” maine ketre jëne pena, la itre “fichiers” hna fejane hë (tune la itre itusi ne la Sasaiatri), ngo tha hna nue pe hnene la atrekë ewekën.​—⁠Heb. 13:18.

¹² Tru catre la ixatua qa ngöne la teknolozi, ngo ame pe, ke, loi e troa hmekëne hnyawa la itre ewekë ka ngazo qa ngöne la aqane troa huliwaan’ej. Tune la televizio, hetre thangane ka loi qa ngön, ngo hetre ewekë ka sisi hna amamane enehila kowe la fene hnengödrai, matre kola qaja amamane hnene la itre xaa atr ne fene ka hape, ketre jole ka tru hë enehila. Ame la itre picine la itre ordinatör, ke, kola ketr la fene hnengödrai, nge ijije troa kapa ngöne la itre hnalapa me itre hnë huliwa, la itre mekune me ithuemacanyi ka kösau. Ejehi laka, ketre ixatua katru la ordinatöre enehila hneijine së kowe la itre sosiete, maine kowe la itre xaa atr ka tru huliwane pena, ke, angatr’a ajane troa atrepengöne la etrune la itre ewekë i angatr, maine itre mani pena hna thel. Nge, ngöne palahi la ijine cili, ke, kolo fe a mama la itre ewekë ka ngazo, tune la kuci ngazo, maine itre mekune ka imethinë nyine aisaijee së, maine itre mekune göne la aqane troa kuca la ngazo.

¹³ Nyimutre la itre nyipi kepine ka upe matre tro la keresiano a troa thupëne la aqane tro angeic’a huliwaane la ordinatör. Alanyimu la itre ka kapa madrine La Traduction du monde nouveau ngöne disket, memine lo lue itusi Étude perspicace, memine lo porogagarame GetVerse, hnei Sasaiatri hna hnëkëne thatraqai së. Hnei itre xane hna xome la nöjei itusi ne la Sasaiatri Watchtower jëne CD-ROM, matre hmaloi troa thele mekun. Nyipici laka, troa wangatrune la teknolozi, ngo tro la atr ka huliwaane hnyawaane lai a hmek, me ketre thupë angeice kö, me itre xane qa ngöne la itre götrane ka ngazo then’ej. Nyipiewekë koi së troa thupëne la aqane tro së a huliwaane la teknolozi, ngacama itre götrane ka loi, ngo troa hmekëne la itre traeme hne së hna xome thatraqane la teknolozi, tha tro kö a tru menu la itre hawa cili, wanga xome fe la itre hawa hne së hna nue koi Iehova, maine kolo pena ajeanyi së qa ngöne la huliwa ka sisitria, me itre mekune hna ajane troa traqa kow.​—⁠Mata. 6:22; 28:​19, 20.