Tro Ha Amelene La Nöjei Atr Asëjëihë
1 Iehova a ajane “la nöjei ate asëjëihë troa mele me wangate hmekune la nyipici.” (1 Tim. 2:4) Ngacama kola mama la aqane ujë ne la itre atr qangöne la madra i angatr, me aqane mele i angatre ekö, me götrane hnei angatre hna mele ngön, ngo thaa hna hnöthe kö la mele i angatr, atreine hi tro angatre a ketre iëne la nyine tro angatre a kuca thatraqane la mele i angatr. Atreine hi tro angatre a kuca la loi, nge tro hë angatre a mel maine tro pena a kuca la ngazo, nge e cili tro angatre a mec. (Mata. 7:13, 14) Tro la mekune celë a ujëne tuneka la aqane tro së a trotrohnine la itre atr hne së hna troa cainöje kow?
2 Thatreine jë kö tro së a canga mekune ju hi laka, ame la itre ewekë ka upe la ketre atr troa kapa la nyipici ke, ene la nöje i angeic, maine qene nöj, maine hnëqa ka tru hna cilën. Ijije fe tro la nyipici a hane ketr la itre atr ka qa hna inine la itre ini ka tru, maine ka thaa qa pena kö hna hane ini, maine itre ka kuci politik, me itre ka huliwa mani, me itre wanaithihlë, me itre ka thatre Akötresie ngöne laka, pëkö hatrene ka mama nyine anyipici Nyidrë, nge itre xane ju kö ka kuca amamane la ngazo. Ngacama isa pengöne ekö la hna melëne hnene la itre atr, memine la aqane mele i angatre enehila, ngo hnei angatre hna saze la aqane ujë i angatr, nge enehila angatre a thele troa hane kapa la mele qa thei Akötresie ngöne la fene ka hnyipixe. (Ite Edo. 11:19) Qa ngöne lai, loi e thaa tro pi kö së a luelue troa qaja la ithuemacanyi ne Baselaia kowe la nöjei pengöne atr.
3 Hanawange La Itre Tulu: Hnene la ketre trahmanyi hna mekune troa humuthe la keme ne la föe angeic, ngo thaa kuca ju kö. Thupene lai, angeice a mekune ju pena troa hnöjua, ngo pë ju kö trengecatre troa aeatrëne lai mekun. Thupene la hna kalabusi angeice pine atrekënö me kuci dorog, hna ngazo fe la mele i angeice me föe i angeic. Ame hë enehila, kola mele nyipici hnei angeic, nge atraqatre fe la madrine hnine la faipoipo, ketre lolo mina fe hë la aqane imelekeu i angeice memine la hmihmi i angeic. Nemene la ka sazene la aqane mele i angeic? Hnei angeice hna inine la Tusi Hmitrötre memine la itre Temoë i Iehova me trongëne la ini hnei angeice hna kapa. Thaa hnei Iehova kö hna wangaconyi angeice kösë ketre atr nyine tro pëhë a nuetrij.
4 Ngacama hna jele loine hnei nöjei atr la ketre föe ka elo film ngöne Televizio, ngo pë pi kö ca madrine hnei eahlo hna kapa qa ngön. Ene pe, ketri eahlo ju hi hnene la eloine la aqane ujë ne la itre Temoë, haawe, ajane ju hi eahlo troa inine la Tusi Hmitrötr, nge ame ju fe kö lai thupen, eahlo fe hë a hane xatuane la itre xaa atr troa atre la maca ka loi ne la Baselaia. Hna hehe eahlo ngöne la nöjei jë ne cainöje eahlo, itre hnalapa trootro, ngo hnei eahlo hna madrine troa qejepengöne laka, ame la hnei eahlo hna ajan, ke, ene la tro eahlo a hlemu loi kösë ketre Temoë i Iehova, ngo thaa tune hmaca kö la ka elo film.
5 Ngöne la kola isapui troa etid hnene la ketre Temoë föe memine la ketre atr ka abone ngöne a La Tour de Garde, hna drei nyidro e ithahnata hnene la ketre atr ka lapa ezine la hnalapa, matre hane ju fe hi angeice sine lai ini tus. Hnei angeice hna canga wangatrehmekune e cili lo nyipici hnei angeice pala hi hna hna thel! Ngacama ase hë nyidroti ce mekune troa itrij, ngo thaa sija ju kö eahlo memine la trahmanyi eahlo, la pepa ne sei hna cil; caasi hi tingetinge hmaca ha la faipoipo i nyidro. Ketre, ngacama ka catre thele eahlo la itre hatrene loinöje jëne la itre waetresij, nge catrehnine hmi koi haze, ngo thaa hnei eahlo kö hna luelue troa trije la itre itusi eahlo ka tru thupen, me itre xaa ewekë i eahlo ju kö nyine hëne la itre dremoni. Celë hi matre canga hane ju fe hi eahlo tro kowe la itre hna icasikeu, me hane qaja kowe la itre sinee me itre enehmu i eahlo la pengöne la hmi hna xötrei öhn. Ame hë enehila, eahlo hë a hane madrine troa anyipicine kowe la itre xan.
6 Thaa tro jë kö së a canga qeje meköti thatraqane la ketre atr, nge thatre pe së la pengöi angeice elany. Loi e tro pe së a catre troa cainöjëne la maca ka loi kowe la nöjei atr asë. Nyimu kepine matre ijije troa lapaune koi Iehova, atre “wange la hni,” tro hë Nyidrë a “Ate amelene la nöjei ate asëjëihë.”—1 Sam. 16:7; 1 Tim. 4:10.