“Loi e Kuca La Nöjei Ewekë Asë Nyine Akeukawan”
1 Loi e tro pala hi së a akeukawane la itre trejine hne së hna ce mele memin. Kola hape, tro sa hane hnehengazone la itre aja i angatre ngöne la ua. Haawe, easë a neëne la nöjei ewekë ka troa athixötrë angatr, maine ngöne la easë a mekune troa huliwa i maseta, nge kola upi së troa salem, maine troa kuca la ketre götraneqa pena—2 Kor. 6:3; Fil. 1:9, 10.
2 Ame itre xan, angatre a lö hnine la itre huliwa ne salem, matre angatre a canga goeëne la itre trejine keresiano, ceitune me itre ka troa itö thei angatr. Ame itre xaa uma ka salem, ke angatre a canga iupe troa canga alamekëne la itre ka troa itö thei angatr—tune lo itre ka ce hmi. Ame la itre xaa trejine ke hnei angatre hna kuca la itre icasikeu, matre troa ukune la itre Temoë troa hane lö hnine la huliwa i angatr. Ame itre xan, angatre a canga nyenyape troa salemëne kowe la itre trejine la itre ewekë, me itre boroshür, maine itre kaset video me kaset ne ikaho, me ithuemacanyi göi internet, ngo thaa hna sipone pe hnene la itre trejin. Hapeu, ka loi kö e troa xome hnene la keresiano la hmi, matre troa nyi gojenyi angeice troa salemëne la itre ewekë kowe la itre sine ce hmi me angeic? Ohe!—1 Kor. 10:23, 24, 31-33.
3 Loi e Tro La Itre Trejine a Hmek: Thaa kolo kö la a hape, thaa tro kö la keresiano a itö me isalemënekeune la itre ewekë. Isa qanyi mekuna së kö. Ngo ame itre xan, hnene la meciu manie, matre angatre a thele la itre aqane troa salem, ene pe kola ukune la itre sine hmi troa hane ce huliwa, me ami manie thei angatr. Nyimutre la itre huliwa a thaa ie kö, haawe, lapa pala pë hë la itre gufa ne la itre atren. Maine hna lö hnine la ketre huliwa hnene la ketre atr, qa ngöne laka, angeice a ajane troa canga kapa la itre manie ka tru, ame koi atrekë mekune ne lai, thatreine kö troa mekune laka thaa zö i angeice kö elanyi e thaa ie ju la huliwa. Haawe, loi e tro angeice a pane canga wange hnyawa la thangane elanyi kowe la itre trejin, ngöne la götrane la ngönetrei memine la ua, wanga thaa cile huti ju la huliwa. Loi e troa thupëne fe hnene la itre trene hnëqa hnine la ekalesia ngöne la angatre a huliwa i maseta, pine laka, kola metrötrëne me mejiune koi angatre hnene la itre xaa trejin. Thaa tro pi kö a nyiahnane la mejiune cili, nyine troa iaöne la itre trejin. Maine thaa hna metrötrëne kö hnene la ketre trejine la itre xan, haawe, atreine hi troa ami angeice qa ngöne la itre götraneqa hna cilëne hnine la ekalesia.
4 Drei la aja së laka, “loi e kuca la nöjei ewekë asë nyine akeukawan.” (1 Kor. 14:26) Thaa tro pi kö së a alöne hnine la ekalesia la nöjei aqane troa thele mani, me iaöne la itre trejin, me kuci salem. Pëkö göhnene la itre ewekë cili ngöne la itre icasikeu së, thaa ihmeku kö itre eje memine la itre aliene matre easë a icasikeu, itre kepine ka eje e hnine la Wesi Ula i Akötresie.—Heb. 10:24, 25.