“Hna Hian Ngöne La Nöjei Wesi Ula Ne La Lapaun”

¹ Nyipi ewekë tro sa catre thele pala hi troa trongëne la aja i Akötresie. (1 Tim. 4:​7-​10) Maine tro sa sipu thele troa ujë tune lai, tro hi së a canga kucakuca me thixötr. (Is. 40⁠:​29-​31) Ame la ketre aqane tro sa kapa la trenge catr qaathei Iehova, tre, qa ngöne la “hna hian ngöne la nöjei wesi ula ne la lapaun.”​—1 Tim. 4⁠:⁠6.

² Xeni Ka Pipixenyë Ngöne La Götrane La Ua: Jëne la Wesi Ula i Nyidrë memine fe la “hlue ka nyipici me ka inamacan,” Iehova a hamën la xeni ka pipixenyë ngöne la götrane la ua. (Mat. 24⁠:45) Easë kö a hane thele troa hane kepe thangane ka loi qa ngön? Easë kö a hane e la Tusi Hmitrötr ngöne la nöjei drai? Easë kö a hane ami ijine troa isa inin la Tusi Hmitrötr me troa thele ewekë ngön? (Sal. 1:​2, 3) Tro la xeni ka lolo cili ngöne la ngöne la götrane la ua, a xatua së me thupë së qa ngöne la itre ethanyine la fene i Satana ka iananazijë. (1 Ioane 5:​19) Maine tro sa nyialien la he së hnene la itre ewekë ka loi me trongëne itre ej ngöne la mele së, tro hë Iehova a ce me easë.​—Fil. 4:​8, 9.

³ Iehova fe a hamë egöcatre koi së jëne la itre icasikeu ne la ekalesia. (Heb. 10⁠:​24, 25) Jëne la ini ngöne la götrane la ua memine la itre enehmu ka lolo ngöne lai itre icasikeu cili, kola acatren la lapaune së troa cile catr ngöne la itre itupath. (1 Pet. 5:​9, 10) Hna qaja hnene la ketre Keresiano thöth ka hape: “Eni a tro ngöne la nöjei drai troa ini, nge jole catre koi ni. Ngo eloine pe tre ceitune la itre icasikeu memine la ketre tim ka qeqe ngöne la hnapapa, nge e cili eni a pane thele keukawa hmaca qëmekene troa xejë la ini.” Drei la manathith hne së hna kapa qa ngöne la hne së hna sin la itre icasikeu!

⁴ Troa Cainöjën La Nyipici: Ame koi Iesu, tre, ceitune la troa cainöj kowe la itre xan memine la xen. Eje a hamë trenge catr koi nyidrë. (Ioane 4:​32-​34) Ketre, ame ngöne la easë a ce ithanatan memine la itre xan la itre ewekë ka lolo hnei Akötresie hna thingehnaean, kösë kola aegöcatrenyi së. Maine tro sa catre cainöj, tro fe ha eje hnyawa e kuhu hni së me ngöne la itre mekuna së la Baselaia, memine la itre manathith hna troa kapa qa ngön, laka calemi hë. Celë hi ka akeukawan la itre hni së lai.​—Mat. 11⁠:​28-​30.

⁵ Drei kö la madrine koi së troa kapa la xeni ne la ua ka lolo, hnei Iehova hna hamën kowe la nöje i Nyidrë enehila! Epi tro pala hi së a atrunyi Nyidrë cememine la madrine ka tru.​—Is. 65⁠:​13, 14.

Paatr 5: Aqane Troa Eatrongëne La Itre Etid Ka Kökötr

Troa Atrehmekun La Etrun La Itre Mekun Nyine Troa Ce Wang

¹ Ame ngöne la Iesu a inine la itre atr, hnei nyidrë hna wangatrun la hna atrein troa trotrohnin hnene la itretre drei nyidrë; ene pe nyidrëti a ithanata koi angatr “thenge la hnei angate hna ateine deng.” (Mar. 4:​33; Ioane 16⁠:12) Ketre tune mina fe, nyipi ewekë troa xome enehila la tulu i nyidrë hnene la itre ka hamë ini ngöne la Wesi Ula i Akötresie, ene la troa tuluth la itre mekun nyine troa ithanatan ngöne la kola etid. Ame la etrune la itre mekun hna troa ce wang, tre troa xome itre ej thenge la hna atrein memine la aqane mele ne la ka hamë ini memine la hnainin.

² Troa Acatren La Lapaun: Maine jë tro la itre xaa hnainin a alu maine akönia etud ngöne la ketre topik ka caas; ame pena ha itre xan, tre ma tro hi angatr a acaa etidin la topike cili. Thaa ajane kö së troa kuca nyimenyimën la itre etid, nge thaa trotrohnine hnyawa pe hnene la hnainin. Nyipi ewekë troa eköthe hnyawa hnene la nöjei hnainine asë la lapaune i angatr kowe la Wesi Ula i Akötresie.​—Ite edomë 4⁠:7; Rom. 12⁠:⁠2.

³ Ame ngöne la easë a xomiujine la etid ngöne la nöjei wiik, xome jë la traeme ka ijij matre troa xatuan la hnainin troa trotrohnine me kapa la itre ini hna xome qa hnine la Wesi Ula i Akötresie. Troa thupën matre thaa tro kö a goeën nyimenyimëne la etid, wanga tro pena a pë ecatrene la itre ini ka tru hna hamën. Xome jë la traeme ka ijij, matre troa wange hnyawa la itre mekune ka tru, me wangatrun la itre xötr kii ne la Tusi Hmitrötr ka nyitrepen la itre ini.​—2 Tim. 3:​16, 17.

⁴ Loi e Thaa Tro Kö a Ananyin La Topik Hna Ithanatan: Maine thaa tro kö sa kuca nyimenyimëne la etid, ngo loi e tro mina fe sa thupën matre thaa tro kö a jea qa ngöne la topik hna ithanatan. Maine kola ajan hnene la ketre hnainin troa ithanatan la ketre mekune e tröne la topik hna ce wang, maine jë tro së a ce ithanatane ej thupene la hna etid.​—Ate Cai. 3⁠:⁠1.

⁵ Ame ngöne la ketre götran, tre maine nyipici laka hetre madrine së kowe la nyipici, ngo tro mina fe sa thupën wanga tro sa tru menu la hna ithanata ngöne la easë etid. (Sal. 145:​6, 7) Eje hi lai laka ame ngöne la itre xaa ijin, ijije hi tro sa qaja la ketre mekun maine ketre ewekë pena hna melën hnene la itre xaa atr, ngo thaa tro pi kö a nyimutre maine qea menu, wanga tro pena a thunge la hnainin troa kapa la atrehmekune ne la itre ini qa hnine la Tusi Hmitrötr.

⁶ Maine tro sa xome la itre mekune ka ijij ngöne la nöjei easë a etid memine la ketre atr, tro hë së a xatua angatr troa “trongëne la lai Iehova.”​—Is. 2⁠:⁠5.