Mekene Truedri Waan
Hlemu Loi La Aqane Eatr La Aja i Iehova
1, 2. (a) Nemene la aja i Iehova nyine troa aeatrën hnene la itre hnei Nyidrëti hna xup ka inamacan? (b) Drei la itre atren la lapa ka caa hae ne la itretre nyihlue i Akötresie?
EPI tro asë hi la itre hnei Akötresieti hna xup ka inamacan a caas troa ce thili kowe la Akötresie ka caas, hetre madrine i angatre fe qa ngöne la aqane nuegufane la itre nekö i Nyidrë, hane hi lo lai aja i Iehova lo Akötresie ka ihnim. Ketre hna ajane mina fe lai hnene la itre atr ka thele la meköt.
2 Hna nyiqaan eatrën trongën la aja i Nyidrë ka tru cili, qa ngöne la qaan la xupi ewekë i Nyidrë. Ame la pane hnei Nyidrëti hna xup, tre, ene la Hupuna i Nyidrë; atre mama fë qaane lo ijine kola amele nyidrëti hmaca, la “hadehadeu ne la lolo i [Akötresie], me nyipi hnaiji nyidë.” (Heberu 1:1-3) Ka sisitria la pengöne la Hupuna i Nyidrëti cili, qa ngöne laka, nyidrëti hmekuje hi la hnei Akötresieti hna xupe caasin. Ame pë hë la nöjei hna xup e thupene lai, tre, kola hetrenyi pi jëne la Hupuna i Akötresie. Hna pane xupe la itre angela e hnengödrai, nge thupene lai itre atr e celë fen. (Iobu 38:7; Luka 3:38) Ame asë hi lai itre hna xupe hnei Akötresie, e koho hnengödrai me e celë fen, tre ketre lapa ka caa hae. Ame koi angatr asë, tre Iehova la Akötresi angatr, me Atre Musi e koho hnengödrai me e celë fen, nge Nyidrëti la Tretretro i angatr ka ihnim.
3. (a) Nemene la hne së asë hna xeni pun qaathene la lue pane keme me thine së? (b) Nemene la ketre hna amekötine ka lolo hnei Iehova hna hnëkëne thatraqane la itre matra i Adamu?
3 Ame ngöne lo kola ejin la lue pane atr pine la hnei nyidroti hna ena la wathebo, haawe, hnei Akötresie hna upe triji nyidroti qaa Edena, matre thatre nyidroti hë hnei Nyidrë. Thaa nyidroti hmaca kö a hane sine lo lai lapa ka caa hae i Nyidrë e koho hnengödrai me e cailo fen. (Genese 3:22-24; Deuteronomi 32:4, 5) Pine laka ka fetra asë hi së qaathei nyidro, haawe, hnaho së pi hi a atr ka ngazo. Ngo ame pe tre, atre hi Iehova laka, troa hetrenyi thene la itre matra i Adamu me Eva la itre ka troa ajane la meköt. Haawe, hetrenyi la ketre hna amekötine ka lolo hna hnëkëne hnei Nyidrëti thatraqane la itre atr cili, matre tro fe angatr a hane kapa la “hna nuegufane ka hadehadeu ne la ite nekö i Akötesie.”—Roma 8:20, 21.
Luuzi Hë La Göhnë Ka Lolo i Isaraela
4. Nemene la ewekë ka lolo catr hnei Iehova hna hamën kowe la Isaraela ekö?
4 Kola traqa kowe la 2 500 lao macatre thupene lo kola xupi Adamu, nge Iehova hmaca ha a fe gojenyine pi la itre xaa atr matre troa sisitria la aqane tro Nyidrë a imelekeu me angatr. Hnei Nyidrëti hna ië Isaraela troa nöje i Nyidrë me hamë angatre la Trenge Wathebo i Nyidrë. (Genese 12:1, 2) Hnei Nyidrëti hna kuca matre tro Isaraela a nöje i Nyidrë, nge hna xomi angatre hnei Nyidrë troa aejën la aja i Nyidrë. (Deuteronomi 14:1, 2; Isaia 43:1) Ngo eje hi lai laka, itre atr ka ngazo pala hi angetre Isaraela, nge edrö i angatre pala hi la mec, haawe, nyine tro hi lai a amamane ka hape paatre kö thei angatre fe lo inuegufa ka hadrehadreu hna hamë Adamu me Eva ekö ngöne la qaan.
5. Tune kaa la aqane aluuzin hnei angetre Isaraela lo göhnë i angatr ka sisitria xajawa i Akötresie?
5 Ngo eje hi lai laka, ka sisitria la göhnë hnei Akötresie hna hamën koi angetre Isaraela. Celë hi matre hnëqa i angatr troa metrötrë Iehova ceitu me Tretretro i angatr, nge tro angatr a huliwa thenge la aja i Nyidrë. Hnei Iesu hna amamane hnyawa la enyipiewekën la tro angatr a eatrën la hnëqa cili. (Mataio 5:43-48) Ngo ame la ejolene tre, thaa hna kuca kö hnei Isaraela la hnëqa i angatr. Tune la hna qaja hnei Iesu laka ngacama angetre Iudra a hane qaja catrën ka hape “casi hi la keme hun, ene Akötesie,” ngo isazikeu kö la itre huliwa me itre mekune i angatr memine lo itre hnei angatr hna qaja. (Ioane 8:41, 44, 47) Ame ngöne lo 33 M.K., hnei Akötresie hna apën la Trenge Wathebo, memine fe la aqane imelekeu i Nyidrë me Isaraela. Hapeu, kolo lai a hape, pë hmaca kö atr hna troa hane kapa hnei Akötresie?
Kola Icaasikeun La “Nöjei Ewekë e Hnengödrai”
6. Nemene la kepin matre kola acil la “hna hnëkëne” hna qaja hnei Paulo ngöne Efeso 1:9, 10?
6 Hna amamane hnei Paulo laka, atreine hi tro la itre xaa atr a imelekeu hnyawa me Akötresie. Hanawang la ketre ceitun, thenge la hna amekötine hnei Akötresie laka ame koi itre ka lapaun, tre tro angatr a itre atren la lapa ka caa hae i Nyidrë; drei la hnei Paulo hna cinyihan, kola hape: “[Akötresie] a amamane koi shë la ewekë ka sihngödi ne la aja i nyidë, thenge la aja ka loi nyidë lo hna amë ekö thei nyidë, ngöne la hna hnëkëne apexejene la ite ijine mate casiju hi la nöjei ewekë asë koi Keriso, nöjei ewekë e hnengödrai, me nöjei ewekë e celë fen.” (Efeso 1:9, 10) Ame la “hnëkëne” cili, tre eje hna eköth hui Iesu Keriso. Hna jëne nyidrëti mina fe la kola kapa la itre atr hnei Akötresie. Ala xalaithe hi e angatr la hna iën troa mele e koho hnengödrai. Ngo tru catre kö la itre atr ka troa mele epine palua e celë fen.
7. Kola qeje drei hnene la xötrehnëewekë hna hape “nöjei ewekë e hnengödrai”?
7 Ame la hna pane kuca hnei Akötresie, tre, ene la troa pane hnëkën ngöne lo ijine Penetekos 33 M.K., la “nöjei ewekë e hnengödrai,” kola qaja lo itre ka troa ce musi me Keriso ngöne la Baselaia e hnengödrai. Qa ngöne laka, hnei angatr hna eköth la lapaune i angatr ngöne la mele hna huujën hnei Iesu, haawe, hna jele meköti angatre hë hnei Akötresie. (Roma 5:1, 2) Hnei Nyidrëti hna iacaasine trongën la angetre Iudra memine la angetre ethen, ene pe kola troa kökötre la “nöjei ewekë e hnengödrai,” 144 000 la etrun. (Galatia 3:26-29; Hna Amamane 14:1) Hetrenyi pala kö la thelene i angatr e celë fen.
Kola Acaasin La “Nöjei Ewekë e Celë Fen”
8. Drei la hna qaja hnene la xötrehnëewekë hna hape “nöjei ewekë e celë fen,” nge nemene la pengö i angatr me Iehova?
8 Kolo mina fe a acaasin hnene la hna hnëkëne cili la “nöjei ewekë e celë fen.” Itre milio la itre atr hna acaasin enehila, matre troa mele epine palua e celë fen. Angatr a caas memine lo lai thelen ne la itre xaa matrane la Baselaia, nge angatr a atrune la ëje i Iehova memine la hmi i Nyidrë. (Isaia 2:2, 3; Zefania 3:9) Angatre mina fe a hë Iehova ka hape “Tretretro,” pine laka, angatr a atrehmekune laka Nyidrëti hi la Qaane la mel. Kolo mina fe a kepe angatr hnei Akötresie, qa ngöne laka hnei angatr hna lapaune kowe lo madra hna anenin hnei Keriso. (Hna Amamane 7:9, 14) Ngo pine laka itre atr ka ngazo pala kö angatr, haawe, kola treqen la ijine tro Akötresieti elanyi a kepe angatr ceitune me itre nekö i Nyidrë.
9. Nemene la hna thingehnaeane hnei Roma 8:21 göne la itre atr?
9 Ame kowe la itre ka troa mele e celë fen, tre, angatr a treqene hnyawa la drai ne troa nue la “[itre atr hna xup] qa ngöne la hna othe hnene la ka hnyeqet.” (Roma 8:21) Troa nyiqaan la inuegufa cili thupene la hnei Keriso memine la trongene isi nyidrëti hna xomi ujin la akötr atraqatr uti hë la pun, ene e Amagedo. Kolo lai a hape tro ha apaatren la fene ka ngazo i Satana, ene pe troa traqa la itre manathith fene la Musi Keriso Ka Caa Thauzane Lao Macatre.—Hna Amamane 19:17-21; 20:6.
10. Nemene la nyima ne iatrunyi hna troa thinge hnene la itre hlue i Iehova?
10 Drei la ketre madrine atraqatr la kola caas hnene la itre hlue i Iehova ka troa mele e celë fen, matre mexemi jë fe e celë lo itre ewekë hna suene madrin hnene la itre hlue i Nyidrë e koho hnengödrai, kola hape: “Hmapati me nyine haine la ite huliwa i cilie, Joxu ne la nöjei nöj. Joxu fe, deti la ate ka tha tro ha qou, me atrune la atesiwa i cilie ? ke cilieti casi hi la ka hmitöt ; ke tro ha tropi la nöjei nöj’ asëjëihë troa thili xajawa i cilie, ke mama ha la ite hna ameköti cilie.” (Hna Amamane 15:3, 4) Eje hi, tro asë hi la itre hlue i Iehova a caas matre troa thili koi Nyidrë, lo nyipi Akötresie ka caas. Tro mina fe a mele hmaca la itre ka meci hë, nge ijiji angatre fe troa hane sue madrin me atrunyi Iehova.—Ite Huliwa 24:15.
Ketre Inuegufa Ka Nyipi Lolo
11. Nemene la inuegufa ka nyipi lolo ka troa eje thene la itre atr ka troa mele pe qa ngöne la akötr atraqatr?
11 Thupene la hna nyipune la akötre atraqatr e Amagedo, tro ha apaatren la iangazo qa ngöne la hune ihnadro asë, tro ha paatre fe hnei Satana Diabolo lo “haze ne la fen.” Thaa tro hmaca kö la itre hlue i Iehova a cile kowe la iajojezine la Atre ka icilekeu me Nyidrë, ene Satana. (2 Korinito 4:4; Hna Amamane 20:1, 2) Thaa tro hmaca kö la hmi ka thoi a sili trenga thoi Iehova, me nyi jëne gomegome kowe la mele ne la atr. Thaa tro hmaca kö la itre hlue ne la nyipi Akötresie a xeni pune la itre huliwa ka thaa meköti kö hna kuca hnene la itre atr, nge ketre thaa tro hmaca kö a qanangazo angatr hnene la itre ka mus. Hane petre hi elanyi lai ketre inuegufa ka nyipi lolo!
12. Tune kaa la aqane troa nuegufan la itre atr qa ngöne la ngazo memine la itre ethane ej?
12 Iesu la “Arenio i Akötesie, la ate geigeietine la ngazo ne la fene hnengödrai,” nyidrëti a troa xome la esisitriane la mele i nyidrë hna huujën thatraqane la itre atr, matre troa apaatren la ite ngazo i angatr. (Ioane 1:29) Ame ngöne lo ijine Iesu e celë fen, hnei nyidrëti lo hna senge la ngazo ne la ketre atr, ene pe loi pi la mecin lo lai atr, nyine tro hi lai a anyipicin ka hape, atreine hi nyidrëti senge la itre ngazo së. (Mataio 9:1-7; 15:30, 31) Ketre, tro mina fe Iesu Keriso lo Joxu ne la Baselaia i Akötresie a aloine hmaca la itre ka ti mek, me itre ka hum, me itre ka simi hnangenyë, me itre sine atr, me itre ka meci ne he me itre xaa ka wezipo ju kö. (Hna Amamane 21:3, 4) Tro asë hi la itre ka drengethenge a apën la ethane la “wathebo ne la ngazo,” ene pe troa amadrinë angatr hnene la itre mekun memine la itre huliwa i angatr, a koi angatr me koi Akötresieti mina fe. (Roma 7:21-23) Ame hë ngöne la pune la Musi Ka Caa Thauzane Lao Macatre, tro ha pexeje la itre atr, tro hë angatr a ‘hnaijin me tune’ la nyipi Akötresie.—Genese 1:26.
13. Nemene hë la hna troa kuca hnei Keriso ngöne la pune la Musi Ka Caa Thauzane Lao Macatre, nge nemene la thangane lai?
13 E ase jë Keriso elanyi eatrongën la itre atr uti hnyawa ha la pexeje angatr, tro nyidrë a nue hmaca kowe la Tretretro i nyidrë lo musi hna hamë nyidrë thatraqane la huliwa i nyidrë: “Tro nyidëti a nue la baselaia koi Akötesie, ene la Tetetro ; e ase hë nyidëti apatene la ite joxu asëjëihë, me itete mus, me ite mene asëjëihë. Ke ijiji nyidëti troa musi uti hë e ase hë amë fene la lue ca i nyidë la nöjei ithupëjia asëjëihë.” (1 Korinito 15:24, 25) Tro ha eatrën la itre hna ajan troa traqa kow hnene lo lai Musi Ne La Baselaia Ka Caa Thauzane Lao Macatre; haawe, thaa nyipi ewekë hmaca kö lo lai baselaia cili, ene lo musi ka eje e nyipi Iehova memine la itre atr. Ketre, ase fe hë lo hnëqa i Iesu, ene la Atre Itö, thaa nyipi ewekë hmaca kö la hnëqa cili pine laka, paatre palua ha la ngazo memine la mec, nge ase hë itö mele ne la itre atr. Kola qaja hnei Tusi Hmitrötr ka hape: “E ase hë aipiëne la nöjei ewekë asëjëihë fe i nyidë, ame hnei Hupuna hna ipië koi nyidëti ate aipiëne la nöjei ewekë asëjëihë fe i nyidë, mate Akötesieti la ka sisitia cate hun’ asë.”—1 Korinito 15:28.
14. Nemene la hnei Akötresie hna amë qëmekene la itre atr ka pexeje hë, nge nemene kepine lai?
14 Thupene lai, troa aijijën la itre atr ka pexej troa amaman maine angatre jë kö a hane iën, troa nyihluene epine palua la Akötesie ka caas. Eje hi lai laka, qëmekene troa xomi angatr ceitun me itre nekö i Nyidrë, tro Iehova a pane tupathi angatr asë, celë hi itupath tixenuë. Troa pane nue Satana hmaca me itre dremoni i angeic qa hnine la hnaop. Thaa tro kö a akötrën menune ju pë hë la itre atr ka catre hnimi Iehova. Ngo eje hi lai laka, ame asë pe kö la itre atr ka thipe triji Nyidrë, ange hna amenune hmaca hnei Satana troa xele ma drei Nyidrë, tro ha apaatrenyi angatr epine palua cememine lo atre icilekeu ekö me itre dremoni i angeic.—Hna Amamane 20:7-10.
15. Nemene hmaca ha elanyi la pengöne aqane mele ne la itre hnei Iehova hna xup ka inamacan?
15 Haawe, thupene lai tro hë Iehova a xome me kapa ceitune me itre nekö i Nyidrë la itre atr ka pexej ka cilëgölin la Musi Cile i Nyidrë, ngöne la itupath tixenuë cili. Qaane ju hi lai, tro hë la itre atr a madrine atraqatr la inuegufa ka hadrehadreu ne la itre nekö i Akötresie, ene la itre atren la lapa i Nyidrë e hnengödrai me e celë fen. Tro hë la itre hna xupe ka inamacan e koho hnengödrai me e celë fen, a caasi hmaca ngöne la hmi ka wië ne la nyipi Akötresie ka caas. Tro ha ketre manathithi ka nyipi lolo la aja i Iehova! Ajane fe kö epuni troa ketre atrene lai lapa ka caa hae e koho hnengödrai me e celë fen, ka madrin nge ka troa cile hut epine palua? Maine eje hi, eahuni a ithuecatre koi nyipunie troa dreng la hna qaja hnei Tusi Hmitrötr ngöne 1 Ioane 2:17: “Kola pate la fene hnengödrai, memine la hna aja kow ; ngo troa cile huti epine palua la atr kuca la aja i Akötesie.”
Revizio
• Qëmekene la icilekeu ekö e Edena, tune kaa la aqane imelekeu ne la itre hlue i Iehova asë me Nyidrë?
• Nemene la hnëqa ka eje thene la itre hlue i Akötresie?
• Drei pala kö la itre ka troa itre nekö i Akötresie, nge nemene la itretrengekeu ne la ewekë cili memine la aja i Akötresie göne la caasi hnine la hmi?
[Iatr ne la götran 190]
Tro la itre atr ka drengethenge a mele madrin ngöne la paradraiso e cailo fen