Meken 120

Kola Wanaxoeë Iesu Ngöne La Hna Kootr

THUPENE la hna nue triji Iesu pe ngöne la hne hlapa ne Gethesemane, me ce kötre mele memine la itre xaa aposetolo, hna pane cile hnei Peteru me Ioane. Maine jë nyidroti a traqa ijije la kola lö sai Iesu kowe la tane i angetre huj, ene Ana. Ene pe upi nyidrëti pena ju koi Kaiafa, ketre tane i angetre huj, nge kola xötrethenge nyidrëti qaa gaa nanyi hnei Peteru me Ioane, pine laka, maine jë kola xoue mec, nge kolo jë mina fe a hnehengazo göi Iesu, joxu i nyidro.

Traqa ha Ioane ngöne la hnalapa i Kaiafa, angeice a hane lö jë hnine la uma, thaa jole ju kö pine laka, atre angeice hi hnene la tane i angetre huj. Ame Peteru, angeice pë hë ngöne la elesitr, nge ezine la qëhnelö. Nge kola bëeke hnei Ioane me ithahnata memine la ka cilë qëhnelö, ketre hlue föe; nyidroti a hane nue jë i Peteru jë fe.

Kola athi eë hnene la itre hlue ne la uma, memine la itretre thupe ne la tane i angetre huj, pine laka, kolo ha nyiqaane hnötr. Ame hnei Peteru hna hane easenyine la eë me hlenge treqene la pune la kootre i Iesu. E cili, kola öhnyi Peteru hnyawa hnene lo hlue ka alö angeice hnine la uma. Öni nyidroti ka hape: “Eö hi lo ate ce me Iesu ate Galilaia!”

Hace pi hë la mekune i Peteru ke hetre ka wangatrehmekunyi angeic, ngo angeice a kelikelë me qaja ka hape, thatre Iesu kö hnei angeic. Öni angeice e sa ka hape: “Tha ’te kö ni, nge tha wangate hmekune kö ni la hnei eö hna qaja.”

Angeice a easenyine la qëhnelö, ene pe wangatrehmekunyi angeice ju pena hnene la ketre hlue föe, me qaja kowe la itre atr ka cile ezi nyidroti ka hape: “Nyëne hi lai lo ate ce me Iesu ate Nazareta.” Peteru a kelikelë hmaca, me sisiny, ka hape: “Tha ’te kö ni lai atr!”

Peteru e tröne la uma, nge angeice a thele troa sihngödre kowe la itre atr ezi angeic. Maine jë kolo ha troa kaqa ne lai, matre kola hmekesesë hnei angeice ngöne la kola kukahleke la ketre trotro. Nge ame la ijine cili, thaa fenesi pala kö la kootre i Iesu, hna hnen ngöne la hnahage e hune la hna hlenge hnei Peteru memine la itre xaa atr ka itreqe. Maine jë angatre a öhne la kola itroitria la nöjei hna hëne troa anyipicine ngöne la hna kootr.

Caa hawa ha thupene lo hna wangatrehmekunyi Peteru, ceitune me ketre sine trongei Iesu. Enehila, kola easenyi angeice hnene la itre xaa atr ka cile ezi angeice me qaja ka hape: “Nyipici eö hi la sine i nyuden; ke hna amamai ’ö hnene la aqane ewekë i ’ö.” Thei angatre lo ketre sine i Maliko, ene lo atr hna thupa hnangenyëne hnei Peteru. Angeice a hnyingë Peteru ka hape: “Ke tha öhnyi eö kö ni thei nyëne ngöne la hnepe hlapa?”

Peteru a sa amenyine ka hape: “Tha ’te kö ni lai ate!” Ketre, angeice a thele troa pi hune fë la mekune i angeic, me qaqa me sisinyi ka hape, tro angeice a hnëjin, e trenga thoi la hnei angeice hna qaja.

Peteru petre hi a akönia kelikelë Iesu, nge kukahleke jë hi la trotro. Nge ngöne la ijine cili, kola lö pi hnei Iesu qa hnine la hnahag, nyidrëti a ujë me goeë Peteru; ene pe mekune hmaca jë hi angeice lo hna qaja hnei Iesu ngöne lo ijine pui ne xeni ne Paseka, lo hna hape: “Tro eö a köni a kelikelë ni, nge tha kukahleke pete kö la trotro.” Ame hnei Peteru hna lö pi me treije hleuhleu.

Hna tune kaa matre traqa pi la ewekë cili? Ngacama kola mama hnyawa e cili la etrune la lapaune i Peteru, ngo hnauëne kö la angeice a akönia kelikelëne la joxu i angeic, la itre hnepe hawa thupen? Maine jë hna asesëkötrë angeice hnene la aqane traqa nyimenyimene la itre ewekë. Kola thele troa athixötrëne la nyipici, me aceitunë Iesu me atr hna methinëne nge ka ihumuth. Matre kösë kola kuca matre ame la meköt ke tro pena eje a tria, nge ame la ka pë ethan, tro pena ha jele angazon. Pine laka, catrehnine catre pala ha la itupath, thatreine hë Peteru troa cile catre ngöne la lapaun. Ene pe hajihaji ju hi la ajane i angeice troa mele nyipici; atraqatre la hleuhleu i angeic, pine laka, hna nga angeice hnene la xoue atr. Epi thaa tro pi kö a hane traqa tune lai koi së! Mataio 26:57, 58, 69-75; Mareko 14:30, 53, 54, 66-72; Luka 22:54-62; Ioane 18:15-18, 25-27.

▪ Tune kaa la aqane lö Peteru me Ioane ngöne la elesitre ne la uma ne la tane i angetre huj?

▪ Ame ngöne la Peteru me Ioane e kuhu ngöne la elesitr, nemene la hna kuca hnine la uma?

▪ Aija kukahleke la trotro, nge aija kelikelë Keriso hnei Peteru?

▪ Nemene la aliene la Peteru a ieji me sisiny?

▪ Nemene la ka upi Peteru troa kelikelë Iesu?