Hnei Hulda Hna Eatrëne La Mekuna i Angeic

MAINE hnei epuni hë hna hane tro Indonésie, ma ase jë hë epun iöhnyi memine la köni trejine föe, ngöne la hnangöni e Sangir. Hna atre angatr e cili, ke angatre palahi a cainöj me xatuane la itre atr troa trotrohnine la Tusi Hmitrötr. Ngo, hetre ketre huliwa kö hnei angatr hna kuca ngöne la hnangöni.

Angatre a pane ut e kuhu hnagejë, me hleme la itre ietë me kapa trongën utihë e koho hnangöni. Ame la itre xaa ietë, ke tune pi hi lo itre balo ne feni balo la etrun. E thupen, angatr a lapa të hune la itre sine ita, me thë la itre ej hnei hama matre nyi wene etë kaco, kösë itre neköi wakuja i gutu. Angatr a nyialiene la itre baketr hnene la itre wene etë me xututhe koi hnalapa. E thupen, angatr a neng la itre wene etë e hnine la itre ibëek ka tru, me atë hune la itre kamio, matre nyine kuci gojeny.

Hulda la ëjen la ketre trejin föe. Ijiji Hulda hi troa huliwa aqeany hune lo lai lue xan. Hnei angeic palahi hna xome asë la itre manie i angeic matre thupëne la fami angeic. Ngo ame e celë, angeic a huliwa, ke hetre ketre ewekë kö hnei angeic hna pi itön. Aja i angeic troa itöne la ketre tablet göne lo application JW Library^®. Atre hi Hulda laka, tro la itre video memine la itre xaa aliene la application cili, a xatua angeic troa atre hnyawa la Tusi Hmitrötr me akökötrene la huliwa ne cainöje i angeic.

Ame ngöne la ca treu me sine, hnei Hulda hna huliwa lue hawa e nöjei hmakany, me thi etë uti hë la tiqa la ca neköi kamio. Matre ijiji hë la manie i angeic troa itöne la tablet i angeic.

Öni Hulda, “Kucakuca catre ni, nge akötre menu la itreing thupene la hna thi etë. Ngo canga thëthëhmine hi ni la itre akötreng, la eni a nyiqane huliwane la tableteng ngöne la hna cainöj me hnëkëne la itre icasikeu.” Hnei angeic fe hna qaja ka hape, ixatua lai tablet ngöne la ijine COVID göne troa sine la itre icasikeu me ce cainöj memine la ekalesia. Madrine catre së laka, hnei Hulda hna eatrëne la mekuna i angeic.