Troa ce huliwa tune la ka xomi avio, memine la ka ixatua ka lapa ezin
KOI ITRE TREFËN
2 Ce Huliwa Jë
ALIEN
Ceitune hi la aqane ce huliwa la lue trefën memine la ka xomi avio me sine huliwa i angeic ka lapa ezin. Maine troa traqa la itre jol, loi e troa ce hnei lue trefën, me hape, “nyio,” ngo tha tro pi kö a huliwa cas, me hape, “eni.”
TREPENE MEKÖT NE LA TUSI HMITRÖTR: “Tha ala lue hmaca kö, ngo ca ngönetei hë.”—Mataio 19:6.
“Tha loi kö troa huliwa cas hnene la trahmanyi maine föe. Loi e tro nyidroti a ce huliwa matre troa tro loi la faipoipo i nyidro.”—Christopher
ENYIPIEWEKËN
Ame la kola iwesitrë hnei lue trefën, ka loi palahi e ka ce huliwa nyidro. Ngo, maine tha ka ce huliwa kö nyidro, canga tro hi nyidroti a iupekeune la jol, ngo tha thele nyin pe. Maine jol ka co hi ngöne la qaan, tro ha tru e thupen.
“Troa tro loi la faipoipo, e hna ce huliwa la lue trefën. Maine tha ka ce huliwa kö ni me föeng ke, kösë ceitui nyio hi memine la lue ka ce thawa la ketre uma, ngo tha lue ka faipoipo kö. Troa jole catr elanyi troa axeciën la itre mekun ka tru. —Alexandra
NYINE TRO EPUNI A KUCA
ISA TUPATHE JË
Hapeue la eni a huliwa mani, manienge casi hi?
Hapeue maine eni a thel troa madrin, tro kö ni a iananyi memine la föeng?
Hapeu ka xele ni ma wai fami föeng, ngacama ka epe catre ju hë angeic koi angatr?
CE ITHANATANE JË MEMINE LA FÖI EPUN
Nemene la itre götrane la mele i nyio lue trefën, nyine tro nyio a ce huliwan?
Nemene la nyine tro nyio a catre huliwan?
Nemene la nyine tro nyio a kuca matre tro palahi nyio a ce huliwa?
IXATUA
Pane mekune jë laka, epon a elo tennis, nge isa ekipe i epone kö. Nemene la nyine tro epon a kuca matre troa ce elo ngöne la ca ekip?
The qaja kö ka hape, ‘Nemene la aqane tro ni a hun?,’ ngo qaja jë pe ka hape, ‘Nemene la aqane tro nyiso a hun?’
“The iupezö kö. Ame la ka sisitria tre, ene la troa tingeting la lue trefën, me cas ngöne la faipoipo.”—Ethan
TREPENE MEKÖT NE LA TUSI HMITRÖTR: “The isa wai ewekëne kö, ngo loi e isa wange la ite ewekë i ite xan.”—Filipi 2:3, 4.