Itre Atr Ka Qeje Pengö i Iesu

Öhne hi hmunë cahu itre trahmany?— Mataio hi lai, me Mareko, me Luka, me Ioane, me Peteru, me Iakobo, me Iuda, me Paulo. Itre ka mele angatre ngöne lo hneijine i Iesu, nge hnei angatre hna cinyihane la itre itus ka qeje pengö i nyidrë. Tro nyiso a pane ce wange la pengö i angatr.

Ame lai köni xan, tre itre aposetolo angatr, itre ka ce cainöje trootro me Iesu. Atre hi hmunë ka hape drei?— Mataio, me Ioane, me Peteru. Ame Mataio me Ioane, tre atrepengöi Iesu hnyawa hi hnei nyidro, nge hnei nyidroti hna cinyihane la itre itus ka qeje pengöne la mele i Iesu. Hnei Ioane aposetolo hna cinyihane lo tusi Hna Amaman, memine lo köni tusi hna hëne ka hape, Tusi Hnapane i Ioane Aposetolo, Tusi Hnaaluene i Ioane Aposetolo, me Tusi Hnaakönine i Ioane Aposetolo. Ame pena Peteru tre, lue tusi hnei angeice hna cinyihan, ene lo Tusi Hnapane i Peteru Aposetolo, me Tusi Hnaaluene i Peteru Aposetolo. Ame e hnine la hnaaluene tusi Peteru, hnei angeice hna qeje pengöne lo ijine Iehova a ewekë qa hnengödrai, me qaja göi Iesu ka hape: ‘Hane hi la nekönge hniminang. Eni a madri nyën.’

Ame la itre xa trahmanyi ka mama e celë ngöne la iatr, tre angatre fe a qeje Iesu koi së, jëne la itre itusi angatr. Mareko la ketre. Ma ce me angeice fe hi lo kola othi Iesu, nge öhn asë hi angeic lo itre ewekë ka traqa koi Iesu. Ame la ketre, tre Luka. Ka droketre angeic, nge ma angeice pë hë a hane hmi Keresiano e thupene hë la kola meci hnei Iesu.

Ame la lue xa ka cinyihane la Tusi Hmitrötr e cahu ngöne iatr, tre, lue jini Iesu nyidro. Atre fe hi hmunë la lue ëje i nyidro?— Iakobo la ketre, nge Iuda la ketre. Tha hnei nyidroti kö hna canga lapaune koi Iesu. Goi mekune fe nyidro ka hape, ka nango menu nyidrë. Ngo ame hë e thupen, nyidro a hane lapaune koi Iesu, nge lue Keresiano fe hë nyidro.

Ame pë hë lai atre cinyihane la Tusi Hmitrötr e celë qëmeken, tre Paulo la ëje i angeic. Ame ekö lo tha Keresiano petre kö Paulo, tre Saulo la ëje i angeic. Methi angeice la itre Keresiano, nge ngazo catre la thiina i angeice koi angatr. Atre hi hmunë la kepine matre Keresiano jë Paulo?— Ame ngöne la ketre drai, Paulo a tro e kuhu gojeny, nge sesëkötre ju hi angeice la kola ewekë koi angeic hnene la ketre atr qa hnengödrai. Iesu la ka ewekë koi angeic! Öni nyidrëti e hnyinge koi Paulo ka hape: ‘Hnauëne laka ngazo la thiina i ’ö kowe la itre ka lapaune koi ni?’ Qaane ju hi la drai cili, saze pi hi Paulo, nge ketre Keresiano hë angeic. Footrine lao itus hnei Paulo hna cinyihan, qaane Roma uti hë Heberu.

Öhne hi hmunë la easa e Tusi Hmitrötr e nöjei drai?— Ame la easa e lapaane la Tusi Hmitrötr, easa inine hnyawane e cili la pengö i Iesu. Pi tro fe kö hmunë a hane atre hnyawa la pengö i nyidrë?—