Tha Ka Xou Kö La Utha i Paulo

Tro sa pane wange la pengöne la ketre nekö trahmany ka amele Paulo aposetolo, mathine i angeic. Thatre kö së la ëje ne lai nekö trahmany, ngo casi hi laka hetre ketre ewekë ka tru hnei angeic hna kuca. Pi tro kö hmunë a hane atre la hnei angeic hna kuca?—

Hna akalabusi Paulo ekö e Ierusalema. Hna othi nyidrë, pine nyidrëti qeje Iesu. Ame la itre xa atr, tre, xele catr angatr ma wai Paulo, celë hi kepine matre, hetre ewekë ka ngazo hnei angatr hna thele troa kuca koi nyidrë. Öni angatr: ‘Pane sipone ju kowe la tane isi ka tru troa upe la itre soce i nyidrë troa traqa sai Paulo ngöne la hna kootr. Nge ame easë, tro sa zae e kuhu gojeny; matre ame ju hi la kola cili thenge hnene la itre soce me Paulo, tre, easë pë hë a ce uti pi koi angeic me humuthi angeic!’

Drei mejene hë hnene la utha i Paulo la ewekë cili. Nemene la hna kuca hnei angeic? Angeic a canga tro jë kowe la kalabus, me qaja koi Paulo la ewekë ka troa traqa. Paulo pë hë a upi angeice jë troa thuemacane lo tane isi ne la itre soc. Ka hmaloi kö kowe la utha i Paulo troa ithanata kowe la tane isi, nemene fe la mekuna i hmunë?— Ohea, pine laka ame la tane isi, tre, ketre atr ka tru. Ngo, tha xou kö la utha i Paulo troa ithanata koi nyidrë.

Atre hnyawa hi la tane isi la nyine tro nyidrëti a kuca. Nyidrëti pë hë a upe jë la 500 lao soc troa thupë Paulo! Nyidrëti a qaja ju koi angatr ka hape, troa xomi Paulo a tro Kaisaria e jidr. Hapeu, mele kö Paulo?— Öö, mele kö nyidrë, nge thatreine ju kö tro la ithupëjia a lepi nyidrë! Tha traqa ju kö angatr kowe la hnei angatr hna mekun.

Nemene la hna ini hmunë hnene la edromë celë?— Ijije tro hmunë a hane tune la utha i Paulo. Nyipi ewekë tro sa catr matre atreine së troa qeje Iehova kowe la itre atr. Tro fe kö hmunë a hane catr troa qeje Iehova?— Maine hmunë a kuca tune lai, tro hë hmunë a amelene la itre xan.