Hnei Tusi Hmitrötr palahi hna qaja la Baselaia i Akötresie. Jëne la Baselaia cili, tro Iehova a eatrëne la mekuna i Nyidrëti ekö kowe la ihnadro. Nemene la Baselaia? Easë a atre tune kaa ka hape, musi hë ej enehila? Nemene hë la hnene ej hna eatrën? Nge nemene la hnene ej hna troa kuca ngöne la itre drai elany? Tro la mekene celë memine la lue xan e thupen a sa la itre hnyinge cili.

1. Nemene la Baselaia i Akötresie, nge drei la Joxu?

Ame la Baselaia ke, mus hna acile hnei Iehova. Ame la Joxu ke, Iesu Keriso, nge nyidrëti a mus qa koho hnengödrai. (Mataio 4:17; Ioane 18:36) Tusi Hmitrötr a qaja ka hape, tro Iesu “a mus . . . epine palua.” (Luka 1:32, 33) Nge nyidrëti a troa mus hune la nöjei atr asë e celë fen.

2. Drei la ka troa ce mus me Iesu?

Tha Iesu hmekuje kö la ka troa mus ngöne la Baselaia. Öni Tusi Hmitrötr ka hape, itre atr “qa ngöne la nöjei tribu, me nöjei qene hlapa, me nöjei hane ngönetrei, me nöjei nöj . . . tro hë angatr a itre joxu me musinëne la fen.” (Hna Amaman 5:9, 10) Ala ije angatr? Qaane lo Iesu e celë fen ke, itre milio lao atr ka xötrethenge nyidrë. Ngo tha angatr asë kö a tro koho hnengödrai troa ce mus me nyidrë. Ala 144000 hi lao atr ka troa ce mus me Iesu. (E jë la Hna Amaman 14:1-4.) Ngo ame pë hë la itre xan ke, itre jinine la Baselaia nge, ka troa mele pe e celë fen.—Salamo 37:29.

3. Pine nemene matre ka sisitria kö la Baselaia i Akötresie hune la itre musi atr?

Thatreine kö la itre ka kuci politik troa eatrëne la itre mekuna i angatr. Celë hi matre tro palahi a nyihnai angatr hnene la itre xan. Ngo ame la ka troa cilëne la Baselaia i Akötresie, tha nyine tro kö a nyihnan. Ke ame la Baselaia hnei Akötresie hna acil ke “tro ej’ a cile hut’ epine palua.” (Daniela 2:44) Ketre ame la aqane musi Iesu kowe la fen ke, tha ka ië hna hnime kö. Tro nyidrëti a inine kowe la itre atr la itre thiina, ene la ihnim, thiina ka loi, me meköt.—E jë la Isaia 11:9.

4. Musi ka catr nge ka troa cile hut uti hë epin

Pëkö ketre atr ka atreine mus tui Iesu Keriso, qane ekö utihë enehila. E jë la Mataio 28:18, nge ce ithanatane jë cahu hnying:

• Nemene la eisapengönene la aqane musi Iesu memine la itre atr?

Ame la itre musi atr ke, ka saze lapa, nge kola isa musinë nöjen. Nge ame la Baselaia i Akötresieti ke? E jë la Daniela 7:14, nge ce ithanatane jë cahu itre hnying:

• Ame la musi ne la Baselaia i Akötresie ‘ka pë pun.’ Pine nemene matre hetre eloin?

• Ame la Baselaia i Akötresie ke, eje a troa musi kowe la fene hnengödrai asë. Pine nemene matre hetre eloin?

5. Loi e troa saze la aqane mus

Pine nemene matre, loi e tro la Baselaia i Akötresie a nyihnan la itre musi ne la atr? Goeëne jë la VIDEO, nge ce ithanatane jë cahu hnying:

VIDEO: Nemene La Hna Hape Baselaia i Akötresie?—Extrait (1:41)

• Pine nemene matre thatreine kö la itre musi atr eatrëne la itre hna ajane hnene la itre atre hnei angatr hna musi kow?

E jë la Ate Cainöj 8:9, nge ce ithanatane jë cahu hnying:

• Ame koi epun hnauëne laka, nyipiewekë catr troa nyihnan la itre musi atr hnene la Baselaia i Akötresie?

6. Ka itrotrohni la itre ka cilëne la mus

Hnei Iesu, Joxu ne la Baselaia hna pane mel e celë fen matre ijije hi tro nyidrëti a trotrohni së memine “la itre tria së.” (Heberu 4:15) Nge ame lo ala 144000 lo hnei Iehova hna iën troa ce mus me Iesu ke, itre trahmany me föe “qa ngöne la nöjei tribu, me nöjei qene hlapa, me nöjei hane ngönetrei, me nöjei nöj.”—Hna Amaman 5:9.

• Nemene la ka ketri epun, la epuni a atre ka hape, ame Iesu memine la ala 144000 ke ijije hi tro angatr a trotrohni së, memine la itre jol ka eje the së?

7. Itre wathebo ka sisitria

Kola acile la itre wathebo hnene la itre mus nyine loi kowe la nöj. Ketre tune la Baselaia i Akötresie, kola acile la itre wathebo thatraqane la itre atren. E jë la 1 Korinito 6:9-11, nge ce ithanatane jë cahu itre hnying:

• Ame koi epun, troa tune kaa elanyi la fen e tro la itre atr a xötrethenge la itre wathebo i Akötresie?a

• Ame koi epun, meköti kö tro Iehova a acili wathebo kowe la itre atr ka troa mel fene la musi Nyidrë? Pine nemen?

• Nemene la ka amamane ka hape, ame la itre atr ka tha xötrethenge kö la itre wathebo cili ke, ijije hi tro angatr a saze?—Wange ju la xötre 11.

HANE HI LA HNE SË HNA CE WANG

Ame la Baselaia i Akötresie ke, ketre mus e koho hnengödrai. Easenyi hë matre musinëne jë ej la fene hnengödrai.

Nyine Amekunën

• Drei la itre ka troa mus ngöne la Baselaia i Akötresie?

• Pine nemene matre sisitria kö la Baselaia i Akötresie hune la musi ne la atr?

• Iehova a ajane tro la itre atrene la Baselaia i Nyidrë a metrötrëne la itre wathebo. Hetre wathebo kö hnei epuni hna atre?

ITRE XAA NYINE WANG

Hnei Iesu kö hna qaja ka hape, ame la Baselaia ke eje e kuhu hni së?

“Le royaume de Dieu est-il dans votre cœur ?” (Itus jw.org)

Nemene la aqane tro la itre Temoë Iehova a nyipici kowe la Baselaia i Akötresie?

Itre Ka Mele Nyipici Kowe La Baselaia (1:43)

Itre ithuemacany hna hamëne hnei Tusi Hmitrötr göne lo lai ala 144000 hnei Iehova hna iën troa ce mus me Iesu.

“Qui va au ciel ?” (Itus jw.org)

Trotrohnine hë la ketre föe ka hape, Iehova casi hi la ka atrein isigöline la meköt.

“J’ai découvert la solution à l’injustice” (Hmeke Jë! Nofeba 2011)

Hna acile la Baselaia i Akötresie qane lo 1914 e koho hnengödrai. Nge qaane ju hi lai, easa melëne la itre drai ne la pun kowe la musi ne la atr. Hne së hna atre tune kaa? Jëne la itre hna thingehnaeane hnei Tusi Hmitrötr, memine la hne së hna goeën ngöne la fen qaane lo 1914. Tro sa ce wang.

1. Nemene la hna thingehnaeane hnei Tusi Hmitrötr?

Kola qaja ngöne la tusi Daniela ka hape, ame la kola nyipune lo ijine hna hape, ‘seven lao ijin’ ke celë hi kola nyiqane la Baselaia i Akötresie. (Daniela 4:16, 17) Nge itre macatre thupen, hnei Iesu hna hëne la ijine cili ka hape, “hneijine ne la itre nöj,” nge tha fenesi pala kö ngöne la hneijine i nyidrë. (Luka 21:24) Nge tro sa ce wange ka hape, ame la seven lao ijine cili, ke hna nyipun lo 1914.

2. Nemene la hnei easë hna öhne ngöne la fen qaane lo 1914?

Hnene la itretre drei Iesu hna hnyingëne koi nyidrë ka hape: “Nemene fe la hatrene laka, celë hë nyipë, memine la hatrene la pune la fene celë?” (Mataio 24:3) Nge Iesu a sa koi angatre ka hape, ame la nyidrëti a troa nyiqane mus ngöne la Baselaia i Akötresie e koho hnengödrai, ke troa hetre itre ewekë ka troa traqa ngöne la fen. Tune la itre isi, me itre jiin, me itre sa. (E jë la Mataio 24:7.) Nge Tusi Hmitrötr fe a qejepengöne la aqane ujë ne la itre atr “ngöne la itre drai ne la pun” nge tha hmaloi kö troa xomihnine la itre “akötr” ne la mel. (2 Timoteo 3:1-5) Nge celë hi hne së hna goeëne qaane lo 1914.

3. Hnauëne la kola ngazo catre la fen qaane lo kola acile la Baselaia i Akötresie?

Ame la kola ase acili Iesu troa mus ngöne la Baselaia, hnei nyidrëti hna isi e koho hnengödrai me Satana me itre dremoni. Hna ngaa Satana. Öni Tusi Hmitrötr, “hna ukapië angeic kowe la ihnadro; nge hna ce ukapië angeic me itre angela i angeic.” (Hna Amaman 12:9, 10, 12) Matre atre hi Satana ka hape, easenyi hë tro angeic a patr. Celë hi matre elëhni catre angeic. Nge angeice hi la qaane la itre akötr e celë fen hnengödrai asë. Easa trotrohnine la kepine matre kola jole catre la fen! Ngo, tro kö la Baselaia i Akötresie a nyipune la itre ewekë cili.

TROA CE ITHANATAN

4. Easë a atre tune kaa ka hape, e 1914?

VIDEO: Hna Nyiqane Mus La Baselaia i Akötresie Lo 1914 (5:02)

Hna traqa la ketre pu ekö qaathei Akötresie koi Nebukaneza, Joxu ne Babulona. Nge ame lai pu memine la hna qejepengöne hnei Daniela ke, kola thingehnaean la itre ewekë ka troa traqa koi Nebukaneza memine la Baselaia i Akötresie.—E jë la Daniela 4:17.a

E jë la Daniela 4:20-26, nge wange ju cahu iatr me sa la itre hnying:

• (A) Nemene la hnei Nebukaneza hna puj?—Wange ju la xötre 20 me 21.

• (B) Nemene la ka traqa kowe lai sinöe?—Wange ju la xötre 23.

• (C) Nemene la ka traqa ngöne la pun lo “seven lao ijin”?—Wange ju la xötre 26.

Isinöe Hna Puj a Nyihatren La Baselaia i Akötresie

HNA PEROFETAN (Daniela 4:20-36)

Hnanyijoxu

(A) Isinöe atraqatr

Hnanyijoxu hna thupatën

(B) “Thupatrije pi lai sinöe,” koi “seven lao ijin”

Cile hmaca ha la mus

(C) “Tro hmaca kö a hamëne koi eö la mus”

Hna pane eatre la hna perofetan . . .

• (D) Drei la hna nyihatren hnene lai sinöe?—Wange ju la xötre 22.

• (E) Tune kaa la aqane thupatëne la musi angeic?—E jë la Daniela 4:29-33.

• (F) Nemene la ka traqa koi Nebukaneza ngöne la pun lo lai “seven lao ijin”?—E jë la Daniela 4:34-36.

HNA PANE EATRËN

Hnanyijoxu

(D) Kola qeje Nebukaneza, Joxu ne Babulona

Hnanyijoxu hna thupatën

(E) Thupene lo macatre 606 M.P.K., ke hna traqa la menu koi Nebukaneza nge seven lao macatre ne tha cilëne angeic la mus

Cile hmaca ha la mus

(F) Patre hë la menu thei Nebukaneza matre angeic hmaca ha mus

Hnaaluene eatr la hna perofetan . . .

• (G) Drei la hna nyihatrene hnene lai sinöe?—E jë la 1 Aqane lapa ite Joxu 29:23.

• (H) Hna thupatëne tune kaa lai musi cili? Nge hne së hna atre tune kaa ka hape, ame lo Iesu e celë fen ke tha hna nue pala kö la musi cili?—E jë la Luka 21:24.

• (I) Eu nge ekaa la kola nue hmaca la Baselaia cili?

HNAALUEN EATR

Hnanyijoxu

(G) Kola qaja la itre joxu ne Isaraela ka cilëne la musi Akötresie

Hnanyijoxu hna thupatën

(H) Kola apatrenyi Ierusalema memine la hnanyijoxu i angetre Isaraela koi 2520 lao macatre

Cile hmaca ha la mus

(I) Iesu a joxu e hnengödrai ngöne la Baselaia i Akötresie

5. Saze catre la fen qaane lo 1914

Goeëne jë la VIDEO.

VIDEO: Saze Catre La Fen Qane Lo 1914 (1:10)

Hnei Iesu hna thingehnaeane ka hape, thupene la hna acili nyidrëti troa Joxu, ke tro ha saze la fen. E jë la Luka 21:9-11, nge ce ithanatane jë cahu hnying:

• Ame la epuni a e la itre hna perofetan ngöne lai xötr, nemene la itre ka eatr?

Hnei Paulo hna qejepengöne la aqane ujë ne la itre atr ngöne la itre drai ne la pun ne la musi atr. E jë la 2 Timoteo 3:1-5, nge ce ithanatane jë cahu hnying:

• Nemene la itre aqane ujë hnei epuni hna goeën?

6. Hetre huliwa hna upi së troa kuca hnene la Baselaia i Akötresie

E jë la Mataio 24:3, 14, nge ce ithanatane jë cahu itre hnying:

• Nemene la huliwa ka nyipiewekë ka amamane ka hape, cile hë la Baselaia i Akötresie?

• Tune kaa la aqane tro epuni a nyipiewekëne la huliwa cili?

Cile hë la Baselaia i Akötresie, nge easenyi hë matre musi jë ej kowe la fen asë. E jë la Heberu 10:24, 25, nge ce ithanatane jë cahu hnying:

• Nemene la nyine tro së asë a kuca la easë a goeëne ka hape, ‘easenyi catre hë la drai’?

HANE HI LA HNE SË HNA CE WANG

Ame la itre hna thingehnaeane hnei Tusi Hmitrötr, memine la itre ewekë hne së hna öhn ngöne la fen ke, kola amamane ka hape, cile hë la Baselaia i Akötresie. Easë a anyipicine lai jëne la hne së hna cainöj me sine la itre icasikeu.

Nyine Amekunën

• Nemene ju hë la ewekë ka traqa ngöne la pun lo seven lao ijin hna perofetan hnei Daniela?

• Pine nemene matre epuni a qaja ka hape, hna nyiqane mus la Baselaia i Akötresie lo 1914?

• Tro epuni a amamane tune kaa ka hape, cile hë la Baselaia i Akötresie?

ITRE XAA NYINE WANG

Itre ka inamacan a qejepengöne la aqane saze la fen qaane lo 1914.

“Depuis quand ce déclin brutal ?” (Hmeke Jë! Eiperem 2007)

Hna saze la mele ne la ketre trahmanyi la angeic a atre la hna perofetan ngöne Mataio 24:14.

“Eni Pe Hi a Mele Koi Elo Bool!” (Ita Ne Thup Na. 3 2017)

Easë a atre tune kaa ka hape, ame lo lai hna perofetan ngöne Daniela mekene 4 ke kola qaja la Baselaia i Akötresie?

“Quand le Royaume de Dieu a-t-il commencé à régner ? (1^re partie)” (Ita Ne Thup 1 Okotropa 2014)

Nemene la ka amamane ka hape, ame lo “seven lao ijin” hna qaja ngöne Daniela mekene 4 ke hna nyipun lo 1914?

“Quand le Royaume de Dieu a-t-il commencé à régner ? (2^e partie)” (Ita Ne Thup 1 Nofeba 2014)

Cile hë la Baselaia i Akötresie. Nge easenyi hë tro ej a saze la nöjei ewekë ngöne la fen. Tro sa ce wang la nöjei ewekë ka loi cili.

1. Tune kaa la aqane tro la Baselaia i Akötresie a traqa fë la tingeting me meköt ngöne la fen?

Tro Iesu, Joxu ne la Baselaia i Akötresie, a apatrene la nöjei atr, me itre mus ka ngazo ngöne la isi e Amagedro. (Hna Amaman 16:14, 16) Nge e cili, troa eatre hnyawa la hnei Tusi Hmitrötr hna qaja ka hape: “Panacas, ame hna patepi la ate ka ngazo.” (Salamo 37:10) Fene la musi Iesu tro ha haöthe la fen hnei tingeting me meköt.—E jë la Isaia 11:4.

2. Nemene hë la mele elanyi e eatre jë la aja i Akötresie e celë fen?

Ame ngöne la musi ne la Baselaia i Akötresie, ke, ‘tro la itre ka meköt a hetenyi la fen, me lapa palua kö ngöne ej.’ (Salamo 37:29) Pane mekune jë ka hape, itre atr ka meköt pe hi la ka troa mel, ke angatr a hnimi Iehova, memine la atr ka lapa easenyi angatr. Pë hmaca kö trene sine kucakuca, nge tro sa mel utihë epine palua.

3. Nemene hë la hna troa kuca hnene la Baselaia i Akötresie thupene la hna apatrene la itre atr ka ngazo?

Thupene la hna apatrene la itre atr ka ngazo, tro pala kö Iesu a musi koi 1000 lao macatre. Ame la ijine cili, tro nyidrë memine lo itre ka ce musi me nyidrë, ala 144000 a xatuane la itre atr matre pexeje pi angatr. Nge ame hë ngöne la pun la 1000 lao macatre, tro hë la fen a paradraiso ka mingöming, nge hna lapan hnene la itre atr ka madrin, ke, hnei angatr hna drengethenge la itre wathebo i Iehova. Tro hmaca ha Iesu a nue la Baselaia kowe la Keme i nyidrë, nge tro ha ‘hmitrötr la ëje i Iehova’ tune lo mekuna i Nyidrëti ekö. (Mataio 6:9, 10) Nge tro ha mama e cili ka hape, ame Iehova, ke, atre musi ka lolo, nge ka nyihnyawane la itre atr hnei Nyidrëti hna musi kow. Thupene lai, tro Nyidrëti a apatrenyi Satana me itre dremoni, memine la nöjei atr ka icilekeu memine la musi Nyidrë. (Hna Amaman 20:7-10) Nge, ame la aqane mele ka lolo cili jëne la Baselaia i Akötresie, ke eje hë lai utihë epine palua.

TROA CE ITHANATAN

4. Tro la Baselaia i Akötresie a apatrene la itre musi ne la atr

“Hete ijine kete ate a musinëne la kete mate angazo nyëne kö.” (Ate Cainöj 8:9) Jëne la Baselaia, tro Iehova a apatrene la itre jol qa ngöne la aqane musi cili.

E jë la Daniela 2:44 me 2 Thesalonika 1:6-8, nge ce ithanatane jë cahu itre hnying:

• Nemene la hnei Iehova me Iesu hna troa kuca kowe la itre musi ne la atr memine la itre atr ka ce me angatr?

• Jëne la hnei epuni hna atre Iehova me Iesu, pine nemene matre xecie hnyawa koi epun ka hape, ka meköt la itre huliwa i nyidro?

5. Iesu la Joxu ka ijij

Nyimutre la itre ewekë ka loi tro Iesu a kuca kowe la nöjei atr e celë fen jëne la Baselaia i Akötresie. Goeëne jë la VIDEO ka amamane ka hape, hetre aja i Iesu troa xatuane la itre atr, jëne la mene i Akötresie.

VIDEO: Hnei Iesu Hna Amamane La Itre Ewekë Hnene La Baselaia Hna Troa Eatrën (1:13)

Ame lo Iesu e celë fen, hnei nyidrëti hna amamane la itre ewekë hna troa eatrën jëne la Baselaia. Ame la itre ewekë hna amë wengën e cahu, ke nemene la itre hna thingehnaean hnei epuni hna ajan troa eatrën? E jë fe la itre xötr ka mama.

6. Mele ka mingöming jëne la Baselaia i Akötresie

VIDEO: Kola Amamane La Mele Ka Mingöming Elany (4:38)

E jë la Salamo 145:16, nge ce ithanatane jë cahu hnying:

• Nemene la mekuna i epun la epuni a atre ka hape, tro Iehova a “amejine la ite ewekë ka mele asëjëihë”?

HANE HI LA HNE SË HNA CE WANG

Tro la Baselaia i Akötresie a eatrëne la aja i Iehova. Jëne ej tro hë la ihnadro a paradraiso, nge tro hë la itre atr ka thili koi Iehova a mele uti hë epin.

Nyine Amekunën

• Tro la Baselaia i Akötresie a ahmitrötrëne tune kaa la ëje i Iehova?

• Pine nemene matre ijije tro sa mejiune ka hape, tro la Baselaia i Akötresie a eatrëne la itre hna thingehnaean hnene la Tusi Hmitrötr?

• Nemene la hnei epuni hna ajane troa canga eatrëne hnene la Baselaia?

ITRE XAA NYINE WANG

Nemene la Amagedro?

“Qu’est-ce que la bataille d’Armaguédon ?” (Itus jw.org)

Itre ewekë ka troa traqa ngöne la 1000 lao macatre ne musi Iesu me e thupen.

“Qu’est-ce que la grande tribulation ?” (Itus jw.org)

Kola lapa mekun hnene la ketre fami la mele i angatr elanyi ngöne la fene ka hnyipixe.

Mekune Jë La Eö Elanyi Ngöne La Paradraiso (1:50)

Ngöne la ketre tane mekun hna hape, “J’étais tourmenté par de nombreuses questions,” kola qejepengöne la aqane sa la itre hnyinge ne la ketre atr ka tha madrine kö kowe la aqane mus.

“La Bible transforme des vies” (Ita Ne Thup 1 Januare 2012)