MEKENE 28
Olene Jë Koi Iehova Me Iesu La Hnei Nyidro Hna Kuca Koi Epun
Ame la kola hamë së hnene la ketre sinee së la ketre ahnahna, nemene la ka ketri së? Tru catre la madrine së matre, thatreine kö së troa tha olene koi angeic. Tune hi la hnei Iehova me Iesu hna kuca koi së. Hnei nyidroti hna hamëne la ketre ahnahna ka lolo, ene la thupene mel. Tro sa olene tune kaa koi nyidro?
1. Nemene la ketre aqane tro sa olene koi Akötresie me Keriso, la hnei nyidroti hna kuca?
Tusi Hmitrötr a thingehnaeane la mele ka pë pun kowe ‘la itre atre ka amamane la lapaune i angatr koi [Iesu].’ (Ioane 3:16) Kola hapeu la troa amamane la lapaun? Ame la lapaun, ke troa mama qa ngöne la aqane xomi mekun me itre huliwa. (Iakobo 2:17) Celë hi ka troa acatren la imelekeu së me Iesu memine la Keme i nyidrë, Iehova.—E jë la Ioane 14:21.
2. Eu la ijine tro sa amamane la hni ne ole së kowe la hna kuca hnei Iehova me Iesu?
Ame lo jidri tixenuë i Iesu memine la itretre drei nyidrë, hnei nyidrë hna amamane la ketre aqane troa olene kowe la huuje i nyidrë. Hnei nyidrë hna nyiqane la ketre ewekë nyine tro pala pë hë a kuca, lo hnei Tusi Hmitrötr hna hëne ka hape, “Xeni Heji Ne La Joxu,” nge ame la ketre aqane hëne ke, Drai Ne Amekunën La Meci Keriso. (1 Korinito 11:20) Nge, tro pala pë hë la itre aposetolo i Iesu me itre xan e thupen, memine la nöjei keresiano asë, a mekune la hnei nyidrëti hna kuca kowe la nöjei atr. Nge, ame la heji cili, hnei Iesu hna qaja ka hape: “Tro pala pë hë nyipunie a kuca la, nyine mekune koi ni.” (Luka 22:19) Ame la epuni a sine la Drai Ne Amekunën ke, aqane tro hi epuni lai a olen la etrune la ihnimi Iehova me Iesu.
TROA CE ITHANATAN
Tro sa ce wange la itre xaa aqane tro sa olen koi Iehova me Iesu. Ngo tro së a pane ce ithanatan la Drai Ne Amekunën.
3. Kola uku së hnene la hni së troa olene koi Iehova me Iesu
Pane mekune jë la hna kuca koi epun, la epuni a troa nunucil. Tha tro jë kö epuni a thëthëhmin la hnene lai atr hna kuca koi epun? Tro pala hi epuni a thelejëne troa olene koi angeic ke, hnei angeic hna amele epun ngo, maine ju meci hë epun.
Tui së fe hi, hnei Iehova hna amele së jëne la huuj ne la Nekö i Nyidrë. E jë la 1 Ioane 4:8-10, nge ce ithanatane jë cahu itre hnying:
Pine nemene matre ame la mele i Iesu hna huujëne ke, ketre ahnahna ka sisitria catr?
Ame la epuni a mekun la hnei Iehova me Iesu hna kuca koi epun, nemene la ka ketri epun?
Nemene la itre aqane tro sa olene koi Iehova me Iesu göne la thupene mel? E jë la 2 Korinito 5:15 me 1 Ioane 4:11; 5:3. Thupene la hna e la ketre xötr, ce ithanatane jë cahu hnying:
Tro sa amamane tune kaa la hni ne ole së?
4. Enyipiewekëne la troa nyitipu Iesu
Ame la ketre aqane tro sa olene kowe la thupene mel ke, tro sa xötrethengene la tulu i Iesu. E jë la 1 Peteru 2:21, nge ce ithanatane jë cahu hnying:
Nemene la itre aqane tro epuni a xötrethenge hnyawa la tulu i Iesu?
Aja i Iesu troa e la Trengewekë i Akötresie, me cainöjëne la maca ka loi, me xatuane la itre atr
5. Enyipiewekëne la tro sa sine la Drai Ne Amekunën
Ame la aqane atrepengön la Xeni Heji Ne La Joxu ke, troa e la Luka 22:14, 19, 20. Nge ce ithanatane jë cahu itre hnying:
Nemene la aqane trongene la Xeni Heji Ne La Joxu?
Nemene la hna nyihatren hnene la falawa me waina?—Wange ju la xötre 19 me 20.
Ame la aja i Iesu ke, tro la itretre drei nyidrë a aca amekunën ngöne la macatre la Xeni Heji Ne La Joxu lo drai ne meci nyidrë. Celë hi matre e nöjei macatre, itre Temoë Iehova a mekun la meci Keriso. Ame la icasikeu cili ke, ka nyipiewekë, kola xötrethenge hnyawa la tulu hna amaman hnei Iesu. Maine easë a ajane troa atre la itre xaa pengön, goeëne jë la VIDEO. Nge ce ithanatane jë cahu hnying:
Tune kaa la aqane trongene la Drai Ne Amekunën?
Ame la falawa me waina ke, itre nyine nyihatren. Ame la falawa ke, kola nyihatrene la ngönetrei Iesu ka pexej. Nge ame la waina, kola nyihatrene la madra i nyidrë
HNE SË HNA MAJEMINE DRENG: “Lapaune ju koi Iesu, nge mele hë eö.”
Jëne la Ioane 3:16 me Iakobo 2:17 tune kaa la aqane tro epuni a amamane ka hape, tha ijije kö la troa lapaune hmekuje hi?
HANE HI LA HNE SË HNA CE WANG
Loi e tro sa amamane la lapaune së me sine la Drai Ne Amekunëne la meci Iesu.
Nyine Amekunën
Kola hapeu la troa amamane la lapaune koi Iesu?
Tune kaa la aqane tro së isa ala cas, a amamane la ole së koi Iehova me Iesu la hnei nyidroti hna kuca koi së?
Pine nemene matre ka nyipiewekë catre tro sa sine la Drai Ne Amekunën?
ITRE XAA NYINE WANG
Nemene la hna troa upi së hnene la meci Iesu?
Hnei Angeic Hna Huliwane La Ngönetrei Angeic Troa Atrunyi Iehova (9:28)
Aliene la lapaun memine la hna hape, troa amamane la lapaun.
“Lapaune Jë Kowe La Itre Hna Thingehnaean Hnei Akötresie” (Ita Ne Thup Okotropa 2016)
Ketrepengöne hë la aqane goeëne la föe la mele i angeic jëne la thupene mel (hna melën: “Je me sens pure et j’aime la vie”).
Itre milio la etrun la atr ka sine la Drai Ne Amekunën, ngo itre xane hi la ka xen la falawa me iji la waina. Pine nemen?