Itre Hna Atre Göi Itre Angela

Iehova a ce mel memine la fami Nyidrë e hnengödrai tune la itre angela. Nge Tusi Hmitrötr a hë angatr ka hape, itre “nekö i Akötresie.” (Iobu 38:7) Nemene la hnei Tusi Hmitrötr hna qaja göne la itre angela? Hetre ewekë kö hna atreine troa kuca koi së, hnene la itre angela? Ame la nöjei angela asë, angatr kö a sine la fami Akötresie?

1. Drei la itre angela?

Hnei Iehova hna pane xupe la itre angela qëmeken troa xupe la ihnadro. Tui Nyidrë, tha öhnyi angatre kö së, ke angatr a mele e hnengödrai. (Heberu 1:14) Itre milio lao angela, nge isapengö i angatre kö. (Hna Amaman 5:11) Angatr a ‘drengethenge Iehova, me trongëne la hnei Nyidrëti hna qaja.’ (Salamo 103:20) Ame ekö, hnei Iehova hna upe la itre angela i Nyidrë troa qeje maca kowe la itre hlue i Nyidrë me amele angatr. Nge ame enehila, ke itre angela a xatuane la itretre drei Iesu troa thele la itre atr ka ajan troa atre Akötresie.

2. Drei lae Satana me itre dremoni?

Tha hnene kö la itre xaa angela hna nyipici koi Iehova. Ame la ka pane icilekeu ke, “lo hna hëne ka hape, Diabolo me Satana, atre amenune la fen asë.” (Hna Amaman 12:9) Pine laka, aja i Satana troa mus, hnei angeice hna thelejën tro la lue pane atr memine la itre xaa angela a ce xöle me angeic. Nge ame la itre angela cili, ke hna hën ka hape itre dremoni. Hnei Iehova hna upetriji angatr qa hnengödrai, matre angatre pë cahu a tro kanothe la fen, treqene la troa apatrenyi angatr.—E jë la Hna Amaman 12:9, 12.

3. Tune kaa la aqane amenune la itre atr hnei Satana memine la itre dremoni?

Satana me itre dremoni a amenune la ka alanyimu jëne la kuci iöni. Ame la kuci iöni, ke kola qejepengöne la itre atr ka ithanata memine la itre dremoni. Tune la itre atr ka wai horoscope, me itre guérisseur. Ame la itre xan, kola kuca la itre drösinöe hna puj, maine ithanata pena memine la itre atr ka mec. Ngo hane hi la hnei Iehova hna qaja koi së: “The tro kö nyipunie a jea kowe la ite tene u ne ta, me thele thene la ite perofeta thoi.” (Levitiko 19:31) Nyidrëti a qaja lai matre troa thupë së, pine laka Satana me itre dremoni a thele troa akötrë së, ke itre ithupëjia angatr me Akötresie.

TROA CE ITHANATAN

4. Itre angela a ixatua troa thele la itre atr ka ajan troa atre Iehova

Tha itre angela kö la ka cainöj, ngo angatr a xatuane la itre ka cainöj troa thele la itre atr. E jë la Hna Amaman 14:6, 7, nge ce ithanatane jë cahu itre hnying:

• Pine nemene matre loi e tro la itre angela a xatua së la easa cainöj?

• Ka ithuecatre kö koi epun troa atre ka hape, itre angela a xatua epun troa thele la itre atr ka ajan? Pine nemen?

5. Kötrene pi la kuci iöni

Ame Satana me itre dremoni ke, itre ithupëjia me Iehova. Matre ithupëjia fe angatre me easë. E jë la Luka 9:38-42, nge ce ithanatane jë cahu hnying:

• Tune kaa la aqane ujë ne la itre dremoni kowe la itre atr?

Tha tro kö sa nue la itre dremoni troa löthe la itre mekuna së. E jë la Deuteronomi 18:10-12, nge ce ithanatane jë cahu itre hnying:

• Tune kaa la aqane tro la itre dremoni a ithanata koi së me löthe la itre mekuna së? Nemene la itre aqane kuci iöni hne së hna atre?

• Ka loi fe kö koi epun la Iehova a wathebon la nöjei pengöne aqane kuci iöni?

Goeëne jë la VIDEO, nge ce ithanatane jë cahu itre hnying:

VIDEO: “Icilekeu Ju Me Diabolo” (5:02)

• Ame koi epun, ka hetre engazone kö la otrene wanakoime ne la nekö i Palesa? Pine nemen?

• Nemene la hnei Palesa hna kuca matre tha tro kö a angazo angeic hnene la itre dremoni?

Hnene palahi la itre nyipi keresiano hna icilekeu memine la itre dremoni. E jë la Itre Huliwa 19:19 me 1 Korinito 10:21, nge ce ithanatane jë cahu hnying:

• Maine hetre ewekë hnei epuni hna xome trongëne nyine thupë epun, hnauëne la tro epuni a canga dreuthetrij?

6. Pëkö hune i Satana me itre dremoni

Ame la tane la itre dremoni, ke Satana. Nge ame la tane la itre angela ka nyipici, ke Mikaela, ene Iesu. Ka catre kö Mikaela? E jë la Hna Amaman 12:7-9, nge ce ithanatane jë cahu itre hnying:

• Drei la itre ka catr? Mikaela me itre angela i angeic maine Satana me itre dremoni angeic?

• Ame koi epun tro kö la itretre drei Iesu a xoue Satana me itre dremoni?

Ijije hi tro epuni a ngaa Satana me itre dremoni. E jë la Iakobo 4:7, nge ce ithanatane jë cahu hnying:

• Nemene la nyine tro epuni a kuca, matre atreine cile koi Satana me itre dremoni?

HANE HI LA HNE SË HNA CE WANG

Itre angela ka nyipici a xatua së. Satana me itre dremoni la itre ithupëjia me Iehova, nge angatr a thele troa amenune la itre atr jëne la kuci iöni.

Nyine Amekunën

• Tune kaa la aqane xatuane la itre ka pi atre Akötresie, hnene la itre angela?

• Nemene la mekuna i Tusi Hmitrötr göi Satana me itre dremoni?

• Pine nemene matre loi e tro epuni a kötrene la kuci iöni?

ITRE XAA NYINE WANG

Pine nemene matre kola qaja ka hape Iesu hi la Mikaela?

“Qui est l’archange Michel ?” (Itus jw.org)

Ame la Diabolo, ke ene la ngazo e kuhu hni ne la itre atr?

“Le Diable : principe du mal ou personne réelle ?” (Itus jw.org)

Nemene la hna kuca hnene la ketre föe, matre tha löthi angeic hmaca kö hnene la itre dremoni?

“Elle a trouvé un but dans la vie” (Ita Ne Thup 1 Julai 1993)

Tune kaa la aqane iaöne la itre atr hnei Satana jëne la kuci iöni?

“La vérité sur la magie et la sorcellerie” (La route qui mène à la vie éternelle, götrane 5)